प्रकाशित वाक्य 2 - चम्बयाली नौआ नियम

सत्त कलीसियां जो बसेख इफिसुस जो सुब बसेख

¹ तिनिये मेरे जो बोल्लेया, “इफिसुस सहर रे कलीसिया रे स्वर्गदूत जो ए चीठ्ठी लिख्ख, मैं अपणे सज्जे हत्थ बिच सत्त तारेयां जो थाम्मि करी रख्खे रा है ते मैं ही तिन्हा सत्त दियां रे धूपदान रे बिच-मझाट्टे घूमदा-फिरदा। मैं तुसा जो ए बोलदा,

² मैं जाणदा कि तू कै करदा। तू बड़ी जी-हजुरी कने मेरा कम्म करदा, तू मेरे पर अपणे विश्वास री वजह कने जुल्मां जो भी बड़े सबर कने सहन करदा। मैं जाणदा कि तू दुष्ट लोक्कां री झूठ्ठी शिक्षा जो बर्दाश नी करदा। तू तिन्हा लोक्कां जो परखे रा है जे ए बोलदे कि से प्रेरित हिन पर हकीकत बिच से नी हिन, ते तू जाणदा कि से झूठ्ठे हिन।

³ मेरे तांइ जुल्म सहन करणे बिच तू सबर कने रेया, ते तू हार नी मन्नी।

⁴ पर मेरे जो तेरे का ए शिकायत है, तू अवे मेरे कने तिन्ना प्यार नी करदा जिन्ना तू तिस बेल्ले करदा थिया जां तू नौआ-नौआ मेरे पर विश्वास कित्तेया थिया।

⁵ तू अवे तिस हिसाब कने जिन्दगी नी जिंदा, जिय्यां तू सुरुआत बिच जिंदा हुंदा थिया, तिस बारे बिच सोच। तेरे जो अवे अपणे पाप्पां का मुड़णा ते तिन्हा चीजां जो करणा जरुरी जे तू सुरुआत बिच करदा हुंदा थिया, जे अगर तू तौबा नी कित्ती, तां मैं तेरे का आई करी तेरे धूपदान जो तिसेरी जगाह् का हटाई करी तेरे जो सजा दैणी।

⁶ पर तेरे पर ए गल्ल ता है कि तू नीकुलइयों रे कम्मां का नफरत करदा जिन्हा कने मैं भी नफरत करदा

⁷ जे सुनणा चाए, से ध्यान कने सुणे कि पवित्रात्मा कलीसियां कने कै बोलदा। जिन्हा लोक्कां ने दुष्ट पर जीत हासिल कित्ती, तिन्हा जो मैं जिन्दगी रे तिस बूट्टे रा फल्ल खाणे तांइ दैणा, जे अब्बे स्वर्ग बिच परमेश्वर रे बगीच्चे बिच है।”

स्मुरना सहर री कलीसिया जो बसेख

⁸ तिन्हा ने मेरे जो ए भी बोल्लेया, “ए बसेख स्मुरना सहर री कलीसिया रे स्वर्गदूत जो लिख्ख, मैं सुरुआत ते आखिर है। मैं इक्क वरी मरेया, पर अवे मैं जिन्दा है, ते हमेसा-हमेसा तांइ जिन्दा ही रैह्णा। जे मरी गेया थिया, अते अवे जिंदा होई गे रा है। मैं तुसा जो ए बोल्लेया करदा है,

⁹ मैं जाणदा कि तेरे पर बड़े जुल्म होए रे हिन ते तू गरीब है। पर आत्मिक गल्लां बिच तू अमीर है। मैं तिन्हा यहूदी मणूआं जो जाणदा जे परमेश्वर रे चुणित्ते रे मणू होणे रा दावा ता करदे पर से हकीकत बिच चुणित्ते रे नी हिन। से तुसा री बुराई करदे ते से शैतान रे गुट रे मणू हिन।

¹⁰ तिन्हा जुल्मां का मत डरो जे तुसा पर होणे वाले हिन। शैतान ने अपणे किच्‍छ लोक्कां का तुसा बिच रे किच्‍छ मणूआं जो पकड़वाणा ते कैद बिच ढपवाणा ताकि से तुसा पर जुल्म करी सके। तुसा ने दस दिन तिकर बड्डी-बड्डी मुसीबतां सहन करणी। पर कदी मेरे पर विश्वास करणे बिच हार मत मनदे भले ही तुसा जो मारी दित्तेया जाए। किजोकी मैं तुसा जो तुसा री जीत तांइ हमेसा री जिन्दगी रा ईनाम दैणा।

¹¹ जे सुनणा चाए, से ध्यान कने सुणे कि पवित्रात्मा कलीसिया जो कै बोलदा। जिन्हा लोक्कां ने दुष्ट पर जीत हासिल करणी, तिन्हा रे शरीरां जो भले ही मारी दित्ता जाए, पर तिन्हा ने हमेसा तांइ नी मरणा।”

पिरगमुन जो बसेख

¹² तिन्हा ने मेरे जो बोल्लेया पिरगमुन सहर री कलीसिया रे स्वर्गदूत जो ए बसेख लिख्खी करी भेज्जी दे। “मैं से मणू है जिस का पैन्नी दोधारी तलवार है, मैं तुसा जो ए बोल्लेया करदा है,

¹³ मैं जाणदा कि तुसा रा कस्बा शैतान रे वस बिच है, पर इय्यां हुंदे होए भी तुसा ने मेरे बिच अपणा विश्वास मजबूती कने बणाई रख्खेया ते मेरे पर विश्वास करणा नी छड्डेया, तिस बेल्ले भी नी जां लम्बे समय पैल्ले अन्तिपास जो मारी दित्तेया गेया थिया। से मेरा बसेख सुनाणे बिच भरोस्सेमंद थिया, इधेरे तांइ तिसजो तुसा रे कस्बे बिच मारी रख्खेया गेया जित्ते शैतान रा काबू है।

¹⁴ पर मेरे जो तेरे खिलाफ किच्‍छ गल्लां बोलणी हिन, किजोकी तुसा तिन्हा लोक्कां रा विरोध नी करदे जे झूठ्ठी शिक्षा सुणांदे जिय्यां कि भविष्यद्वक्ता बिलाम ने भी बड़े पैल्ले कित्तेया थिया। बिलाम ने बलाक राज्जा जो सिखाया कि किय्यां इस्राएल रे लोक्कां का पाप कराया जाए। तिनिये लोक्कां का अनैतिक जिन्दगी जीणे ते मूर्तां जो भेंट चढ़ाए री चीजां खाणे तांइ सिखाया।

¹⁵ तिय्यां ही तुसा बिच किच्‍छ मणू हिन जे नीकुलइयों रे प्रेरितां री शिक्षा पर चलदे।

¹⁶ इधेरे तांइ तौबा करी लै, जे अगर तुसा अपणे पाप्पां का तौबा नी कित्ती तां मैं तुसा का आणा ते अपणे मुँह का निकलणे वाली तलवार कने तुसा कने लड़ाई करणी।

¹⁷ जे सुनणा चाए, से ध्यान कने सुणे कि पवित्रात्मा कलीसिया रे मणूआं कने कै बोलणा चाह्‍ंदा। मैं तिन्हा लोक्कां जो से लुके रा मन्ना दैणा, जिन्हा लोक्कां ने इन्हा बुराई री ताकत जो हराई दैणा। मैं तिन्हा बिच का हर इक्क जो इक्क चिट्टा बट्टा भी दैणा जिस पर इक्क नौआ नां लिख्खेया जाणा। जिस जो से बट्टा मिलणा, तिसेरे अलावा कुसकी जो भी तिस नां रा पता नी होणा।”

थुआतीरा सहर री कलीसिया जो बसेख

¹⁸ तिन्हा ने मेरे जो ए भी बोल्लेया, “थुआतीरा सहर री कलीसिया रे स्वर्गदूत जो ए बसेख लिख्ख, परमेश्वर रा पुत्तर, जे मैं ही है, ते जिसेरी हाख्खियां आग्ग री लपटां सांई चमकदी, ते जिसेरे पैर भट्टी री आग्ग बिच तपाए रे पित्तल सांई हिन, तुसा कने ए गल्लां बोल्लेया करदा है,

¹⁹ मैं जाणदा कि तुसा इक्क-दूए कने प्यार करदे ते तुसा मेरे पर बड़ा वरी विश्वास करदे। मैं जाणदा कि तुसा किय्यां इक्क-दूए री मदद करदे, ते तुसा रे सबर कने सहन करणे री खूबी जो भी मैं जाणदा। मैं जाणदा कि तुसा अवे ए सब किच्‍छ तिस समय का जादा करेया करदे हिन जां तुसा पैल्ली वरी मेरे पर विश्वास कित्तेया थिया।

²⁰ मेरे जो तेरे खिलाफ ए बोलणा है कि पैल्ले जमान्ने राणी ईज़ेबेल जदेई इक्क जनानी तुसा बिच-मझाट्टे है। से अप्पु जो भविष्यद्वक्तिणी बोलदी पर मेरे विश्वासियां जो झूठ्ठी शिक्षां सिखांदी। से लोक्कां जो ए खोठ्ठी गल्लां सिखाई करी भटकांदी कि हमेसा तिकर जीणे तांइ मूर्तां जो भेंट चढ़ाए री चीजां खाओ।

²¹ मैं तिसजो तिसेरे पाप्पां का तौबा करणे का मौक्का दित्तेया पर से अपणे अनैतिक कम्म करणे का बाज नी आंदी।

²² सुणो, इधेरे तांइ मैं तिसजो बिमार करी दैणा। ते जे मणू तिस कने व्यभिचार करणे बिच शामिल हुणे, अगर से अपणे पाप्पां का तौबा नी करगे तां मैं तिन्हा पर भी वरी मुसीबत पाणी।

²³ मैं तिन्हा लोक्कां जो मारी रखणा जे तिसेरी सीख पर चलदे, ते इस कने सारी कलीसिया रे मणूआं ने जाणी जाणा कि मैं इन्सान री सोच ते मकसद री छानबीन करदा। मैं तुसा बिच का हर इक्क जणे जो तिन्हेरे कम्मां रे हिसाब कने ईनाम दैणा।

^24-25 पर तुसा थुआतीरा रे बाकि रे लोक्कां ने गलत शिक्षां जो नी मन्नेया। तुसा मणू तिसेरी झूठ्ठी शिक्षा पर नी चले, जिस जो तिसेरे चेल्‍ले ‘शैतान री खास गल्लां’ बोलदे। मैं तुसा जो बोलदा कि मेरे आणे तिकर मेरे पर विश्वास करणे रे अलावा मैं तुसा पर होर कुसकी खास हुकम मनणे रा बोझ नी पाणा।

²⁶ जिन्हा लोक्कां ने दुष्ट पर जीत हासिल करणी ते जिन्हा ने मेरे हुकमां जो मनदे रैह्णा, मैं तिन्हा लोक्कां जो देसां पर राज करणे रा हक दैणा।

²⁷ जिय्यां मेरे पिता ने मेरे जो हक दित्तेया, तिय्यां ही मैं भी तिन्हा लोक्कां जो राज करणे रा हक दैणा। तिन्हेरा राज तिस लोहे सांई पक्का होणा जे टुटदा नी, ते तिन्हेरे दुश्मण ने मिट्टी रे टुट्टे रे भांडे सांई होई जाणे।

²⁸ मैं तिन्हा जो तिन्हेरी जीत दिखाणे तांइ भ्याग्गे रा सितारा भी दैणा।

²⁹ जे सुनणा चाए, से ध्यान कने सुणे कि पवित्रात्मा कलीसिया कने कै बोलदा।”