प्रकाशित वाक्य 19 - चम्बयाली नौआ नियम

स्वर्ग बिच परमेश्वर री तारीफ

¹ तिस ताकतवर स्वर्गदूत रे गल्ल पूरी करी लैणे रे बाद मैं स्वर्ग बिच मन्नों बड्डी भीड़ जो बड़ी अवाज कने ए बोलदे सूणेया, “हाल्लेलुयाह, छुटकारा ते महिमा ते ताकत असा रे परमेश्वर री ही है।

² किजोकी तिन्हेरे फैसले सच्चे ते ठीक हिन तिन्हा ने तिस बड्डी वेश्या रा, जे अपणे व्यभिचार कने धरती जो भ्रष्ट करदी थी, इंसाफ कित्ता ते तिसका अपणे दासां रे खून रा बदला लित्तेया।

³ फिरी दुसरी वरी तिन्हा ने बोल्लेया, हाल्लेलुयाह: तिसेरे फुकीणे रा धुआं हमेसा-हमेसा उठदा रैह्णा।”

⁴ तां चौब्बी बुजुर्ग मणू ते चारों प्राणिया ने झुकी करी परमेश्वर री अराधना कित्ती जे सिहांसन पर बैठ्ठे रे थिये, ते बोल्लेया, आमीन! हाल्लेलुयाह!

छेलू पर मतभेद

⁵ तां फिरी मैं कुसकी जो बोलदे सूणेया, ते सुनणे कने इय्यां लग्गेया करदा थिया कि से अवाज तिस सिंहासन बिच का आया करदी थी। तिन्हा ने बोल्लेया “परमेश्वर रे सेवादारों ते तिन्हेरा आदरमान करणे वाले लोक्कों, चाए से छोटे होण या बड्डे होण, सारे परमेश्वर री तारीफ करो।”

⁶ फिरी मैं बड्डी भीड़ जदेया ते बड़े झरने री अवाज ते गर्जन री अवाज सूणी, हाल्लेलुयाह: किजोकी प्रभु असा रा सर्वशक्तिमान परमेश्वर राज करदे।

⁷ आओ, असी खुस ते मगन होण, ते तिन्हेरी तारीफ करण, किजोकी उरणू रा ब्याह नेड़े आई गे रा है, ते तिन्हेरी दुल्हन ने अप्पु जो तैयार करी लित्ते रा है।

⁸ परमेश्वर ने तिसजो साफ मलमल रे कपड़े पाणे तांइ दित्ते, किजोकी तिस महीन मलमल रा मतलब परमेश्वर रे लोक्कां रे धार्मिक कम्म हिन।

⁹ तां स्वर्गदूत ने मेरे जो बोल्लेया ए लिख, की धन्न हिन से जे उरणू रे ब्याह रे भोज बिच सद्दे गेरे हिन फिर तिन्हा ने मेरे जो बोल्लेया ए वचन परमेश्वर रे सच्चे वचन हिन।

¹⁰ तां मैं तिन्हा जो प्रणाम करणे तांइ तिन्हेरे पैरां पर पेई गेया, तिन्हा ने मेरे जो बोल्लेया, दिख्ख, इय्यां मत कर मैं तेरे ते तेरे भ्यालां रा संगी दास है जे यीशु री ग्वाही दैणे पर स्थिर हैं परमेश्वर जो ही प्रणाम करे: किजोकी यीशु री ग्वाही भविष्यवाणी री आत्‍मा है।

चिट्टे घोड़े पर सवार

¹¹ फिरी मैं स्वर्ग जो खुले रा दिख्खेया, ते इक्क सफेद घोड़े जो खड़ित्ते रा दिख्खेया, ते तिस पर इक्क सवार है, जे भरोस्सेमंद सच्चा सेवादार है, से परमेश्वर रे दुश्मणा रे खिलाफ तिस हिसाब कने लड़दा जे परमेश्वर री नजर बिच सही है।

¹² तिसेरी हाख्खियां आग्ग री लपटां सांई हिन, ते तिसेरे सिर पर मते सारे राजमुकूट हिन तिस पर इक्क नां लिख्खे रा है ते तिसेरे अलावा होर कोई तिसेरा मतलब नी जाणदा।

¹³ से खून छिड़के रे चोग्गे पाए रे है, ते तिसेरा नां परमेश्वर रा वचन है।

¹⁴ स्वर्ग रे मते सारे सिपाई तिसेरे पीच्छे-पीच्छे चलेया करदे थिये। से चिट्टे घोड़ेयां पर सवार थिये, ते तिन्हा ने मलमल रे चोग्गे पाए थिये जिन्हा पर कोई दाग नी थिया।

¹⁵ तिसेरे मुँह का इक्क तेज तलवार निकली जिस कने तिनिये मते देसां जो हराई दैणा। जिस कुसकी ने भी तिसेरे अधिकार जो नी मनणा, तिसजो तिनिये बड़ी वरी सजा दैणी। जिय्यां कि कुसकी रसकुंड का अंगूर रा रस्स चुड़ी-चुड़ी करी बाहर रुड़ी जांदा, तिय्यां ही तिनिये सर्वशक्तिमान परमेश्वर रा प्रचंड गुस्सा दिखाणा।

¹⁶ तिसेरे चोग्गे ते जांग पर ए ना लिख्खे रा है: राज्जेयां रा राज्जा ते प्रभुआं रा प्रभु है।

¹⁷ फिरी मैं इक्क स्वर्गदूत जो सूरज पर खड़ित्ते रे दिख्खेया। तिनिये जोर सणे हाक्क मारी करी सारे मांस खाणे वाले पच्छियां जो सद्देया, आओ, परमेश्वर रे बड्डे भोज तांइ कठ्ठी जाओ।

¹⁸ आओ ते राज्जेयां रा, सेनापतियां रा, तगड़े सपाईयां रा, घोडे़यां ते तिन्हेरे सवारां रा मांस खाओ। तुसा हर तरिक्के रे मुर्दे रा मांस खाई सकदे, चाए से छोटा हो या बड्डा, अजाद हो या गुलाम।

¹⁹ फिरी मैं तिस ड्रोणे जानवर ते धरती रे राज्जेया ते तिन्हेरी सैना जो तिस घोड़े रे सवार ते तिसेरी सैना कने लड़ने तांइ कठ्ठे दिख्खेया

²⁰ से ड्रोणे जानवर, ते तिसेरे कन्ने से भविष्यद्वक्ता पकड़ेया गेया। झूठ्ठे भविष्यद्वक्ता ने तिस ड्रोणे जानवर रे पास्से का लोक्कां जो बड़े वरी चमत्कार दिखाए ते लोक्कां जो भटकाई दित्तेया जिन्हा ने तिस ड्रोणे जानवर री छाप लित्ती थी ते तिसेरी मूर्ति री पूजा कित्ती थी। से झूठ्ठा भविष्यद्वक्ता ते से ड्रोणा जानवर तिस आग्ग ते गन्धक रे समुंदर बिच सूटी दित्ते गे।

²¹ तां फिरी सफेद घोड़े रे सवार ने तिस ड्रोणे जानवर रे सपाईयां जो मारी रख्खेया, तिसने तिन्हा सारेयां जो अपणे मुँह का निकलणे वाली तलवार कने मारी रख्खेया। से पन्छी तिन्हा मरे रे सपाईयां रा रजी करी मांस खाणे तांइ आई गे।