प्रकाशित वाक्य 18 - चम्बयाली नौआ नियम

बेबिलोन सहर री तबाही

¹ इसेरे बाद मैं इक्क स्वर्गदूत जो स्वर्ग का उतरदे दिख्खेया। तिसजो बड़ा हक्क मिल्ले रा थिया ते तिसेरी बड़ी रौसनी कने पूरी दुनिया भरी गयी।

^2-3 तिनिये बड़े जोर री हाक्क लाई करी बोल्लेया, “बेबिलोन रा से मसहूर सहर अवे हराई दित्ते गे रा है। किजोकी बेबिलोन सहर ने हर देस रे हर इक्क जणे जो सराब पुआई थी जे कि मूर्ति पूजा जो दर्शांदा। दुनिया रे सारे राज्जे बेबिलोन सहर रे गन्दे कम्मां बिच शामिल होए। व्यापारी मणू तिस जनानी रे गन्दे कम्मां रे जरिये बड़े अमीर होई गे। पर परमेश्वर ने तिस बेशर्म जनानी जो मारी रखणा। हर तरिक्के री दुष्टात्मां ने तित्ते रैह्णा ते से जगाह् हर तरिक्के रे गन्दे कम्म तांइ चिड़िया रे घोंसले सांई होणा।”

⁴ फिरी मैं स्वर्ग का इक्क होर अवाज सूणी, “ओ मेरे लोक्कों, तिस सहर जो छड्डी देयो। तिसेरे पाप्पां बिच शामिल ना हो ताकि तुसा जो भी तिस कने सजा ना मिले।”

⁵ किजोकी ए इदेया है कि जिय्यां तिसेरे पाप्पां रा ढेर स्वर्ग तिकर पूज्जी गे रा हो, ते तिसेरे परमेश्वर जो तिसेरे अधार्मिक कम्म याद आई गेरे हिन।

⁶ तिस कने तदेया ही करो जदेया तिनिये लोक्कां कने कित्तेया। जे दुख लोक्कां ने तिसेरी वजह कने सहन कित्तेया, तिसने तिसेरा दुगणा भरणा। तिनिये लोक्कां जो तिसेरे गलत कम्म चखाए, इधेरे तांइ तिसने भी परमेश्वर रा दुगणा गुस्सा बर्दाश करणा।

⁷ तिसने अपणी जिन्नी जादा अराम ते घमंड बिच बिताई, तिसका तिसेरे ही बराबर जुल्म सैह्‍ण कराओ। तिनिये अप्पु जो बोल्लेया, “मैं लोक्कां पर राणी सांई राज करणा। मैं कोई विधवा नी है, ते मेरे जो कोई दुख नी होणा।

⁸ तिसेरे घमंड करणे री वजह कने, तिस पर मुसीबतां भी चाणचक्के ही पैणी। बीमारी, दुख, ते अकाल अचानक ही तिस पर आई पैणे। ते तिनिये आग्ग फुकी जाणा किजोकी परमेश्वर ताकतवर हिन, ते तिन्हा ने तिसजो सजा दैणी।

बेबिलोन सहर तांइ मातम

⁹ “जां धरती रे तिन्हा राज्जेयां ने, जिन्हा ने तिस कने मिली करी अश्लील कम्म कित्ते थिये, ते तिसेरे एशो-अराम बिच भी शामिल थिये, जां तिन्हा ने तिसेरे फुकीणे रा धुआं दिखणा, तां तिन्हा ने तिस तांइ मातम मनाणा।

¹⁰ तिन्हा ने तिसेरे दुख मुसीबतां रे डर बिच शामिल होणे रे डर कने दुर ही खड़िणा, लाणत है, लाणत है, परमेश्वर ने अचानक ही तेरे का हिसाब-किताब लित्तेया।”

¹¹ “धरती रे व्यापारी तिसेरे तांइ रोणा-पटीणा किजोकी अवे तिन्हेरा माल खरीदणे वाला कोई नी रेया।

¹² तिन्हेरा माल मते तरिक्के रा थिया, जिय्यां कि सोन्ना, चादीं, रतन ते मोती ते मलमल ते बैजंनी रेशमी ते लाल रगं रे कपड़े ते हर तरिक्के खुशबूदार लकड़ी ते हाथी रे दांद्द री हर तरिक्के री चीजां ते कीमती लकड़ी ते पीतल ते लोहे ते सगंमरमर री हर तरिक्के री चीजां।

¹³ दालचीनी, मसाल्ले, धूप, इत्र, लोबान, सराब, तेल, मैदा, कणक, गाय-बैल, भेड़-बकरी, घोड़े-रथ ते व्यापारी मणू अवे लोक्कां जो गुलाम्मां रे तौर पर नी बेच्ची सकदे थिये।”

¹⁴ अवे तिन्हा व्यापारियां ने तिस कने बोलणा “तेरे दिल जो भाणे वाले फल्ल तेरे का जान्दे रे ते स्वादिष्ट ते भड़किली चीजां तेरे का दुर होई री हिन ते से फिरी कदी नी मिलणी।”

¹⁵ इन्हा चीजां रे व्यापारी जे तिसेरे जरिए तिस सहर बिच अमीर होई गेरे थिये, तिसेरी दुख-मुसीबतां बिच शामिल होणे रे डर कने दुर ही खड़ी करी रौंदे-पटिंदे होए बोलगे,

¹⁶ लाणत है, लाणत है, ए बड्डा सहर जिनिये बैंगणी ते लाल रगं रे कपड़े पाए रे थिये ते सोन्ने ते रतनां ते मोतियां कने सजे रा थिया,

¹⁷ बेबिलोन सहर इक्क ही घड़ी बिच ही तिसेरा इदेया वरी जायदाद मुकी गयी, हर इक्क जहाज रा मुखिया ते यात्री ते मल्लाह ते जिन्ने भी मणू समुंद्र का कमादें, से सारे दुर खड़ी करी,

¹⁸ तिसेरे फुकीणे रे धुआं दिख्खी करी हाक्क लाई करी बोलणा लग्गे, “कोई भी सहर इस बड्डे सहर सांई नी थिया।”

¹⁹ तिन्हा ने अपणा दुख जताणे तांइ अपणे-अपणे सिरां पर धूड़ पाणी, ते रौंदे पिटिंदे होए लेरां मारी-मारी करी बोलणा, “लाणत है, लाणत है बड्डे सहर तेरे बड़ी वरी जायदाद री वजह कने, जिस कुसकी का भी समुंदर बिच जहाज थिये, से अमीर बणी गे। थोड़े ही समय बिच तिनिये अपणी सारी जायदाद गवाई दित्ती।

²⁰ ओ स्वर्ग ते ओ परमेश्वर रे लोक्कों ते प्रेरितो ते भविष्यद्वक्ता जे तिस कने होआ, तिस पर खुस हो, किजोकी परमेश्वर ने तिसका जे किच्‍छ भी तिसने तुसा कने कित्तेया थिया, तिसेरा सही हिसाब करी के तुसा रा बदला चुकाए रा है।”

बेबिलोन सहर री बर्बादी री आखरी हालत

²¹ फिरी इक्क ताकतवर स्वर्गदूत ने बड़ी चक्की रे बट्टे सांई इक्क बट्टा चुक्केया ते ए बोल्ली करी समुदंर बिच सूटी दित्तेया, “तिस बड्डे सहर बेबिलोन ने बड़ी तबाही कने बर्बाद होई जाणा। तिस सहर ने फिरी कदी भी पैल्ले सांई ठीक नी होणा।

²² तू, बाबेल सहर, तेरे अंदर कुसकी जो भी वीणा बजांदे या गांदे नी सूणेया जाणा। तेरे अंदर कुसकी जो भी बाँसुरी ते तुरही बजांदे नी सूणेया जाणा। तिय्यां ही तेरे अंदर कुसकी भी तरिक्के रा कोई भी व्यापारी नी मिलणा। तेरे अंदर चक्की री अवाज भी नी सुनिणी।

²³ ते दीये री रौसनी फिरी कदी तेरे बिच नी चमकणि, ते दुल्हे ते दुल्हन री अवाज तेरे बिच नी सुनिणी, किजोकी तेरे व्यापारी धरती रे प्रधान थिये तेरे जादू कने सारी जातियां भटकाई गेई थी।

²⁴ भविष्यद्वक्ता ते परमेश्वर रे लोक्कां ते धरती पर सारे मारे गेरे लोक्कां रा खून तिसी बिच पाया गेया।”