प्रकाशित वाक्य 16 - चम्बयाली नौआ नियम

सत्त कटोरे अते परमेश्वर रा गुस्सा परमेश्वर रे गुस्से रे सत्त कटोरे

¹ तिसका बाद मैं परमेश्वर रे मन्दिर बिच कुसकी जो बड्डे अवाज बिच तिन्हा सत्तां स्वर्गदूतां जो ए बोलदे सूणेया, जाओ परमेश्वर रे सत्तों गुस्से रे कटोरेयां जो पृथ्वी पराल्ले उंधेरी देयो।

² अते पैल्ले स्वर्गदूत ने जाई करी पर कटोरा प्रथ्वी पराल्ले उधेरी दित्तेया, तां तिन्हा मणूआं पर जिन्हा पर तिस जानवर री छाप थी ते जे मूर्ति री पूजा करदे थिये इक्क किस्म रा बड़ा दर्दनाक फोड़ा निकलेया।

दुआ कटोरा

³ दूए स्वर्गदूत ने अपणा कटोरा समुन्दर पराल्ले उन्धेरी दित्तेया ते से मरे रे लोक्का रे खून सांई होई गेया ते समुद्र बिच रा हर इक्क जिन्दा जानवर मरी गेया।

तिज्जा कटोरा

⁴ त्रिये स्वर्गदूत ने अपणा कटोरा द्ररेया ते पाणी रे सोत्तेयां पर उन्धेरी दित्तेया ते से खून बणी गेया।

⁵ तां मैं पाणी रे स्वर्गदूत जो परमेश्वर जो ए बोलदे सूणेया, ओ पवित्र परमेश्वर जे हिन, जे थिया, तू सारेयां रा सच्चा हिसाब करदा, ते तुसा ने सही हिसाब-किताब कित्तेया।

⁶ किजोकी तिन्हा ने परमेश्वर रे लोक्कां ते भविष्यद्वक्तां रा खून बहाया थिया ते तुसा ने तिन्हा जो खून पुआया किजोकी से इसी जोग्गे हिन।

⁷ फिरी मैं वेदी का ए शब्द सूणेया, हाँ ओ सर्वशक्तिमान परमेश्वर तुसा रे फैसले ठीक ते सच्चे हिन।

चौथा कटोरा

⁸ चौथे स्वर्गदूत ने अपणा कटोरा सूरज पर उन्धेरी दित्तेया ते तिसजो मणूआं जो आग्ग कने फुकी दैणे रा हक्क दित्तेया गेया।

⁹ मणू बड़ी गरमी कने फुकी गे ते परमेश्वर रे नां री बुराई कित्ती जिन्हा जो इन्हा मुसीबतां पर हक्क है, पर तिन्हेरी महिमा करणे तांइ मन नी लाया। पर तिन्हा ने फिरी भी अपणे पाप्पां का तौबा नी कित्ती ते परमेश्वर री अराधना नी कित्ती।

पंजमा कटोरा

¹⁰ पजंमे स्वर्गदूत ने अपणा कटोरा तिस ड्रोणे जानवर रे सिहांसन पर उन्धेरी दित्तेया ते तिसेरे राज पर न्याहरा छाई गेया। मणू अपणे दर्द री वजह कने अपणी जिब्ब चबाणा लगे।

¹¹ ते अपणे फोड़ेयां ते दर्द री वजह कने स्वर्ग रे परमेश्वर री बुराई कित्ती पर अपणे-अपणे कम्मां का तौबा नी कित्ती।

छठ्ठा कटोरा

¹² छेम्मे स्वर्गदूत ने पर कटोरा फरात नदी पर उन्धेरी दित्तेया ते तिसेरा पाणी सुकी गेया ताकि पूरब दिसा रे राज्जे ते तिसेरे सपाईयां तांइ रस्ता तैयार हो जाए।

¹³ तिसेरे बाद मैं तिस अजगर रे मुँह का ते तिस ड्रोणे जानवर रे मुँह का ते तिस झूठ्ठे भविष्यद्वक्ता रे मुँह का त्रै दुष्टात्मां जो मेढकां रे रुप बिच निकलदे दिख्खेया।

¹⁴ ए चमत्कार दिखाणे वाली दुष्टात्मा हिन जे सारी धरती रे राज्जेयां का निकली करी इस तांइ जांदी कि तिन्हा जो सर्वशक्तिमान परमेश्वर रे तिस बड्डे लडाई रे दिन तांइ कठ्ठा करण। ए से ही दिन है जां परमेश्वर ने तिन्हा जो मुकाई करी अपणे लोक्कां जो बचाणा।

^15-16 ते दुष्टात्मां ते सारे राज्जे ते तिन्हेरे सिपाई इब्रानी भाषा बिच हरमीगिद्दोन नां री जगाह् बिच कठ्ठे होए। इधेरे तांइ मसीह यीशु ने बोल्लेया, “ए गल्ल सुणो, मेरे आणे रा दिन कुसकी चोर रे आणे सांई चाणचक्के ही होणा। धन्न है से मणू जे मेरे आणे रे समय पर अपणे कपड़े तैयार रख्खी करी जागदा रेह्। तां तिन्हा ने नंगे नी रैह्णा ते तिन्हा जो शर्मिंदा होणे तांइ किच्‍छ नी रैह्णा ते आए से फिरी लोक्कां बिच भी चली जाण।”

सतमां कटोरा

¹⁷ सतमे स्वर्गदूत ने अपणा कटोरा हवा पराल्ले उन्धेरी दित्तेया ते स्वर्ग बिच का परमेश्वर रे मन्दिर का तिन्हेरे सिहांसन बिच का ए बड्डी अवाज सुणित्ती, सब किच्‍छ होई गेया।

¹⁸ फिरी बिजली चमकी ते अवाज ते गर्जन होई ते इक्क इदेया बड्डा भूकपं आया की जां रा मणू पैदा होया तां का इदेया बड्डा भुकंप कदी नी होया, इस कने तिस बड्डे सहर रे त्रै टोट्टे होई गे ते जाति-जाति रे सहर पेई गे ते बड्डे बाबेल जो परमेश्वर रे इत्ते याद कित्तेया गेया की से अपणे गुस्से री मदिरा तिसजो पिलाए।

¹⁹ इस कने तिस बड्डे सहर बेबिलोन रे त्रै टोट्टे होई गे, ते जाति-जाति रे सहर पेई गे ते बड्डे बेबिलोन सहर जो परमेश्वर रे इत्ते याद कित्तेया गेया की से अपणे गुस्से री सराब तिसजो पिलाए।

²⁰ तिस बेल्ले समुंद्र रे सारे टाप्पु चाणचक्के ही गुम्म होई गे, ते कोई पहाड़ नी रे थिये।

²¹ स्वर्ग का तेत्ती किलो रे औले पे ते इस तांइ ताकि ए मुसीबत बड़ी वरी थी लोक्कां ने औलेयां री मुसीबत री वजह कने परमेश्वर री बुराई कित्ती।