प्रकाशित वाक्य 14 - चम्बयाली नौआ नियम

परमेश्वर रा हिसाब-किताब अते सुरक्षा रा दर्सन छेलू ते तिसेरे मणू

¹ फिरी मैं दिख्खेया, ते दिखो, से “उरणू रा बच्चा” सिय्योन पहाड़ पर खड़ितेरा है ते तिसेरे कने इक्क लख चुरताली हजार जणे हिन जिन्हेरे मत्थे पर तिसेरा अते तिन्हेरे पिता रा नां लिख्खे रा है।

² ते स्वर्ग का मेरे जो इक्क इदेयी अवाज सुणिती, जे झरने ते बड़ी गर्जन री अवाज सांई अवाज थी, अते जे अवाज मैं सूणी, से इदेयी थी, कि मन्नो वीणा बजाणे वाला वीणा बजाया करदे हो।

³ से सिंहासन रे सामणे अते चारो प्राणी अते बुजुर्ग मणू रे सामणे मन्नो इक्क नौआ गाणा गाया करदे थिये, ते उन्हा इक्क लाख चुरताली हजार जणेया जो छड्डी करी जिन्हा जो परमेश्वर ने धरती पर रैह्णे वाले लोक्कां बिच का छुड़ाई लित्तेया थिया कोई से गाणा नी सीखी सकदा थिया।

⁴ ए से है, जे जनानियां कने व्यभिचार नी कित्तेया, पर कुँआरे हिन। तिन्हा ने तिस उरणू जो छड्डी करी कदी कुसकी होरसी री अराधना नी कित्ती। जित्ते कुथकी से “उरणू रा बच्चा” जांदा, से मणू भी तिसेरे पीच्छे ही जांदे। ए मणू से हिन जिन्हा जो धरती पर रैह्णे वाले लोक्कां बिच का छुड़ाया गेया। जिय्यां मणू परमेश्वर जो अपणी पैल्ली फसल चढांदे, तिय्यां ही तिन्हा ने भी परमेश्वर ते तिस “उरणू” जो चढावा चढाया।

⁵ ते तिन्हा ने कदी भी झूठ नी बोल्लेया, से बेकसूर मणू हिन।

तीन स्वर्गदूत

⁶ फिरी मैं इक्क होर स्वर्गदूत जो आसमान बिच उड़दे दिख्खेया जिस का धरती बिच रैह्णे वाले इक्क कुल, देस, भाषा, ते लोक्कां जो सुनाणे तांइ हमेसा सुब बसेख थिया।

⁷ तिसने बड़ी जोर कने बोल्लेया, “परमेश्वर का डरो, ते तिन्हेरी महिमा करो, किजोकी दुनिया रे लोक्कां रा हिसाब-किताब करणे रा समय आई गे रा है, अते तिसेरी अराधना करो, जिस ने आसमान ते जमीन, समुन्द्र, पाणी रे स्रोत बणाये रे हिन।”

⁸ फिरी इसेरे बाद इक्क होर दुज्जा स्वर्गदूत बोलदा आया, कि अवे बर्बाद होई गेया, से बड्डा बेबिलोन सहर अवे बर्बाद होई गेया। बेबिलोन सहर ने अपणे व्यभिचार रे कम्मां कने सारी दुनिया रे देसां जो भ्रष्ट करी दित्तेया। ए इदेया थिया तिसने सारेयां जो सराब पुआई, ते अवे तिसेरी वजह कने परमेश्वर ने तिन्हा सारेयां जो सजा दैणी।

^9-10 फिरी इसेरे बाद इक्क होर तिजा स्वर्गदूत ए बोलदे आया, कि जे कोई तिस ड्रोणे जानवर ते तिसेरी अराधना करगा, अते अपणे मत्थे या अपणे हत्थां पर तिसेरी छाप लिंगा तां तिसजो परमेश्वर का बड़ी वरी सजा मिलणी। ए इदेया होणा कि जिय्यां तिन्हा ने निरा अंगूर रा रस्स पी लित्ते रा हो जे परमेश्वर रे गुस्से जो दर्शांदा हो। परमेश्वर ने फुकिंदे गंधरस कने इन्हा लोक्कां जो स्वर्गदूतां ते “उरणू” रे सामणे तकलीफ दुआणी।

¹¹ तिन्हेरी पीड़ा रा धुआं, हमेसा तांइ उठदा रैह्णा, ते जे तिस जानवर अते तिसेरी मूर्ति री अराधना करदे हिन, अते जे तिसेरे नां ही छापी लिंदे हिन, तिन्हा जो रात दिन चैन नी मिलणा।

¹² इधेरे तांइ जरुरी है कि पवित्र मणू सबर कने तिस मुसीबतां जो सहन करदे रैह्ण। तिन्हा ने से करणा जिसेरा हुकम परमेश्वर रा दित्ते रा हो, ते से मसीह यीशु पर विश्वास करणा ना छड्डे।

¹³ फिरी मैं स्वर्ग का ए अवाज सूणी, “इन्हा गल्लां जो लिख्खी लै, अब्बे का लेई करी से मणू धन्न हिन जे परमेश्वर बिच विश्वास करदे होए ही मरे। फिरी पवित्रात्मा ने इस गल्ल जो ए बोल्ली करी पक्का कित्तेया, ए सच है। से धन्न हिन किजोकी तिन्हा ने अवे अपणी मैहनत रे कम्म का अराम करणा, तिन्हा जो तिन्हेरे कित्ते रे कम्मां तांइ ईनाम दित्तेया जाणा।”

कटनी

¹⁴ तां फिरी मैं दिख्खेया, “इक्क साफ बद्दल है, अते तिस बदल बिच मणू रे पुत्तर जदेया कोई बैठ्ठे रा है, जिसेरे सिर पर सोन्ने रा मुकुट ते हत्थां बिच तेज दराट्टी है।”

¹⁵ फिरी इक्क होर स्वर्गदूत ने परमेश्वर रे मन्दिर बिच का निकली करी, तिस कने जे बद्दल बिच बैठ्ठे रा है, बड़े जोर कने बोल्लेया, कि अपणी दराट्टी लाई करी कटाई करो, किजोकी बाड्डी रा बेल्ला आई गे रा है, किजोकी धरती री खेती पकी गे री है।

¹⁶ इधेरे तांइ, तिनिये तिस दराट्टी जो हवा बिच हिलाया जिस जो तिनिये पकड़े रा थिया। दुनिया री फसल जो तिसने ही कट्टेया थिया।

¹⁷ फिरी इक्क होर स्वर्गदूत परमेश्वर रे मन्दिर बिच का निकलेया, जे स्वर्ग बिच है, अते तिसका भी चोखी दराट्टी थी,

¹⁸ फिरी इक्क होर स्वर्गदूत जिस का आग्ग पर हक थिया, वेदी बिच का निकलेया, ते जिस का तेज दराट्टी थी, तिसजो जोरे सणे बोल्लेया, अपणी तेज दराट्टी लाई करी धरती रे अंगूर रे रस्स रे गुच्छे बड्डी लै, किजोकी तिसेरा अंगूर रा रस्स पकी गे रा है।

^19-20 ते उस स्वर्गदूत ने धरती पर अपणी दराट्टी लाई, ते धरती री अंगूर री बेल का फल्ल कट्टी करी, अपणे परमेश्वर रे गुस्से रे बड्डे रस्स रे कुंड बिच पाई दित्तेया, ते सहर रे बाहर उस कुंड बिच अंगूर रौंदे गे, अते रस्स कुंड बिच का इतणा खून निकलेया कि घोड़ेयां री लगामां तक पूज्जेया, ते त्रै सौ किलोमीटर तिकर रूढी गेया।