प्रकाशित वाक्य 12 - चम्बयाली नौआ नियम

इक्क अजगर अते दो ड्रोणे जानवर जनानी ते अजगर

¹ फिरी आसमान बिच इक्क बड्डी निशानी नजर आई, मतलब इक्क जनानी जिनिये सूरज जो ओढ़े रा थिया, ते चाँद तिसेरे पैरा थल्ले थिया, ते सिर पर बारह तारेया रा मुकुट थिया।

² से दुपराणी होई, ते लैरा मारदी थी, किजोकी जमणे री पीड़ तिसजो होया करदी थी, अते से बच्चा जमणे री पीड़ बिच थी

³ ते इक्क होर निशानी आसमान बिच दिस्सि, अते दिखो, इक्क बड़ा बड्डा लाल अजगर थिया जे शैतान है, जिसेरे सत्त सिर अते दस्स सींग थिये, ते सिरां पर सत्त राज मुकुट थिये।

⁴ तिसेरी चूमट ने आसमान रे तारेयां री इक्क तिहाई जो खिच्ची करी धरती बिच पाई दित्तेया, अते से अजगर तिस जनानी रे सामणे खड़ी गेया कि जिय्यां ही से बच्चे जो जन्म दे, तां से तिस बच्चे जो खाई जाए।

⁵ ते तिसने इक्क मुन्डा जम्मेया जे लोहे रे राजदंड लित्ते रे, सब जातीया पर राज करणे जो थिया, ते तिसेरा बच्चा चाणचक्के ही परमेश्वर का, अते तिन्हेरे सिंहासन का चुक्की करी पूजाई दित्तेया।

⁶ से जनानी बियाबान बिच इक्क इदेइ जगाह् पास्से नह्सी गयी जे परमेश्वर ने तिसेरे रैह्णे तांइ तैयार कित्तेया थिया, जित्ते बारा सौ साठ्ठ दिनां तांइ तिस जनानी रा ध्यान रख्खेया जाणा।

⁷ फिरी स्वर्ग बिच लड़ाई होई, मीकाईल अते तिसेरे स्वर्गदूत अजगर कने लड़ने तांइ निकले, ते अजगर अते तिसेरे दूत तिस कने लड़े।

⁸ से अजगर ते तिसेरे दूत तिस लड़ाई जो हारी गे ते तिन्हा जो स्वर्ग का कड्डी दित्तेया गेया।

⁹ तां तिस अजगर ते तिसेरे दूत जो धरती पर सूटी दित्तेया गेया। से अजगर ओ ही है जिस जो पैल्ले-पैल्ले कीड़ा भी बोल्लेया गेया थिया, जिसेरा नां शैतान। एह् ओई है जे दुनिया रे लोक्कां पर इल्जाम लगांदा अते भटकाया करदा है।

¹⁰ अवे असा रे परमेश्वर ने अपणे लोक्कां जो बचाणा! अवे तिन्हा ने अपणी ताकत रा इस्तेमाल करणा ते दुनिया पर राज करणा! अवे तिन्हेरे मसीह ने दुनिया पर अपणा हक रा एलान करणा। किजोकी अवे शैतान असा रे परमेश्वर रे सामणे असा रे संगी विश्वासियां पर दिन-रात इल्जाम लाणे तांइ नी खड़ी सकदा। तिसजो स्वर्ग का बाहर सूटी दित्ते गे रा है।

¹¹ ते तिस “उरणू रे बच्चे” रे खून री वजह कने, अते अपणी गवाई रे वचन री वजह कने, तिस पर जयवन्त होये, अते तिन्हा ने अपणे प्राणां जो प्यारे नी जाणी के, इत्ते तक की मौत भी सहन करी लित्ती।

¹² इस वजह कने, खुस हो कि तुसा इत्ते स्वर्ग बिच रैह्‍न्दे। पर तुसा धरती ते समुंद्र पर रैह्णे वाले लोक्कां री हालत पर तरस आंदा किजोकी शैतान अवे तुसा थल्ले तुसा का आई गे रा है। से बड़े जादा गुस्से बिच है किजोकी से जाणदा कि तिसेरा अंत बड़े तौले आणे वाला है।

¹³ जां अजगर ए समजी गेया कि तिसजो धरती पर सूटी दित्ते गे रा है, तां तिस जनानी जो जिनिये मुन्डा जम्मेया थिया, तिसेरा पीच्छा करणा लग्गेया।

¹⁴ पर तिस जनानी जो इल्लण रे दो पंख दित्ते गे, कि से तिस कीड़े का बचणे तांइ उड़ी करी बियाबान बिच तिस जगाह् बिच पूजी जाये, जित्ते से इक्क समय, अते बेल्ले यां, अते अद्दे समय तिकर तिसेरा ध्यान रख्खेया जाये।

¹⁵ तिस कीड़े ने तिस जनानी जो रुढ़ाणे तांइ अपणे मुँह का दरिया जदेई इक्क बाढ़ री उल्टी कित्ती।

¹⁶ पर तिस्सी धरती बिच का खुली गयी, ते से सारा पाणी जमीन अंदर चली गेया जे तिस अजगर रे मुँह का निकलेया थिया ते इसेरी वजह कने तिस जनानी जो मदद मिल्ली।

¹⁷ इसेरे नतीज्जे रे तौर पर, से अजगर जो तिस जनानी पर बड़ा वरी गुस्सा आया। इधेरे तांइ तिनिये तिस जनानी रे ‍खानदान रे खिलाफ इक्क लड़ाई रा एलान करी दित्तेया। ए से मणू होणे जे परमेश्वर रे हुकम मुताबिक चलदे ते तिन्हा सच्ची शिक्षां पर बणी रैह्‍न्दे जे मसीह ने सिखाए री हिन।

¹⁸ तां शैतान समुंद्र रे किनारे जाई करी खड़ी गेया।