प्रकाशित वाक्य 11 - चम्बयाली नौआ नियम

दो गवाह

¹ तां फिरी मेरे जो नप्पणे तांइ इक्क गज दित्तेया गेया ते फिरी परमेश्वर ने बोल्लेया, उठ्ठ, ते परमेश्वर रे मन्दिर, वेदी ते तिन्हा लोक्कां रा नाप लै जे तित्ते अराधना करेया करदे हिन।

² ते परमेश्वर रे मन्दिर रे बाहर रा अंगण छड्डी दे, तिसजो मत नाप, किजोकी से गैर यहूदियां जो दित्तेया गे रा है जे परमेश्वर जो नी जाणदे, ते तिन्हा ने पवित्र सहर जो बताली महिन्ने तांइ रौदंणा।

³ अते मैं अपणे दो गवाह जो भेजणा, कि से टाट ओढ़ी करी इक्क हजार दो सौ साठ्ठ रोज्जां तांइ भविष्यवाणी करण।

⁴ ए से ही जैतून रे दो बूट्टे अते दो मशाल्लां हिन, जे धरती रे प्रभु रे सामणे खड़े रैह्‍न्दे।

⁵ ते जे कोई तिन्हा जो नुक्सान पूजाणा चाह्‍ंगा, तां तिन्हेरे मुँह का आग्ग निकली करी तिन्हेरे दुश्मणा जो राख करी दिंदी, ते जे कोई तिन्हा जो नुक्सान दैणा चाह्‍ंदा, तां से पक्के तौर पर इसी तरिक्के कने मारी दित्तेया जाणा।

⁶ इन्हा जो हक है, कि आसमान जो बांद्द करण, कि तिन्हेरी भविष्यवाणी रे दिनां बिच बरखा ना हो, अते तिन्हा जो पाणी पर हक है, कि तिसजो खून बिच बदली दैण, ते जां चाह्‍ण तां धरती पर हर तरिक्के री मुसीबत लेई आण।

⁷ जां से दो गवाह अपणी गवाई देई बैह्णा, तां तिस ड्रोणे जानवर ने जिनिये पताल बिच का निकलणा, तिस कने लड़ी करी तिन्हा का जीत्ती जाणा ते तिन्हा जो मारी रखणा।

⁸ तिन्हा गवाई दैणे वाले मणूआं रे मरणे का बाद, तिन्हा दोन्नां री लास बड्डे सहर यरुशलेम री गली बिच इय्यां ही पेई री छड्डी दित्ती गई, जिस सहर बिच मसीह यीशु जो सुली पर चढाया गेया थिया। तिस सहर जो सदोम ते मिस्र देस री बराबरी बिच मन्नेया जांदा।

⁹ ते सब कुल, देस, भाषा, ते लोक्कां ने तिन्हेरी लासां जो साड्डे त्रै रोज तांइ दिखदे रैह्णा, अते तिन्हेरी लासां जो कब्र बिच रखणे नी दैणा।

¹⁰ धरती बिच रैह्णे वालेयां ने तिन्हेरे मरणे कने खुस अते मग्न होई जाणा, अते तिन्हा इक्क दूज्जे जो भेंटा भेजणी, किजोकी इन्हा दोनां भविष्यद्वक्ता ने धरती बिच रैह्णे वालेयां जो तंग कित्तेया थिया।

¹¹ पर साड्डे त्रै रोजां बाद परमेश्वर रे पास्से का जिन्दगी री सांस ने तिन्हा पर पैंठी जाणा, अते तिन्हा अपणे पैरा रे भरे खड़े होई जाणा अते तिन्हा जो दिखणे वालेयां जो बड़ा डर होई गेया

¹² तां तिन्हा जो स्वर्ग का इक्क बड़ी बड्डी अवाज सुणित्ती, कि इत्ते उप्पर आओ, ए सुणी करी से बद्दल पर बेई करी अपणे बैरियां जो दिखदे-दिखदे स्वर्ग बिच चढ़ी गे।

¹³ फिरी तिस बेल्ले यरुशलेम सहर बिच इक्क बड़ा बड्डा हिलण होया, ते सहर दसमां हिस्सा छुड़की पेया, ते तिस हिलण कने सत्त हजार मणू मरी गे, ते बाकि बचे रे डरी गे, ते तिन्हा ने परमेश्वर री महिमा कित्ती जे स्वर्ग बिच हिन।

¹⁴ ए दूज्जी मुसीबत रा अंत थिया। तिज्जी मुसीबत अवे तौले आणे वाली है।

सतमी तुरही

¹⁵ जां सत्तमें स्वर्गदूत ने तुरही बजाई, तां फिरी मैं स्वर्ग का इस बारे बड्डी जादा अवाज्जां सूणी, “असां रे परमेश्वर ते तिन्हेरे चुणे रे छुटकारा दैणे वाले मसीह जो ही धरती पर राज करणे रा हक है, ते परमेश्वर ने हमेसा-हमेसा तिकर राज करणा।

¹⁶ चौब्बी बुजुर्ग लोक, जे परमेश्वर रे सामणे अपणे-अपणे सिंहासन पर बैठे रे थिये, मुँह रे भारे पेई करी परमेश्वर री अराधना करी करी के,

¹⁷ ए बोलणा लगे, कि ओ सबका ताकतवर प्रभु परमेश्वर, जे हिन, ते जे हमेसा का थिये, असी तुसा रा शुकर करदे, कि तुसा ने अपणी बड़ी बड्डी ताकत जो इस्तेमाल करी के अवे धरती पर राज करणा सुरु करी दित्ते रा है।

¹⁸ ते जे मणू तुसा बिच विश्वास नी करदे, तिन्हा ने बड़ा गुस्सा कित्तेया, पर अवे से समय आई गे रा है कि तुसा अपणा गुस्सा दिखाओ, ते से बेल्ला आई चुके रा है कि तुसा मुर्देयां रा भी हिसाब-किताब करो। से समय आई गे रा कि तुसा रे सेवादार, भविष्यद्वक्तां ते सारे लोक्कां जो ईनाम दित्तेया जाए, हर इक्क जणे जो, जिन्हा जो तुसा बिच श्रद्वा है से चाए छोट्टे हो या बड्डे। से वक्त आई गे रा है कि तिन्हा सारेयां जो बर्बाद करी दित्तेया जाए, जे धरती जो बर्बाद करदे।

¹⁹ ते परमेश्वर रा मन्दिर जे स्वर्ग बिच है, तिसजो खोल्लेया गेया, अते तिन्हेरे मन्दिर बिच तिन्हेरी वाचा रा सन्दूक दिस्सेया, अते बिजलियां रे कड़कणे ते अवाजां ते गड़गड़ाहट अते हिलण होये अते बड्डे बड्डे औले पे।”