प्रकाशित वाक्य 1 - चम्बयाली नौआ नियम

यूहन्ना री तरफ का भविष्यवाणी

¹ परमेश्वर ने मसीह यीशु जो से लुके री चीजां दिखाई जे बड़े तौले होणे वाली हिन, ताकि से अपणे सेवादार मणूआं जो से गल्लां दस्सी सकण। मसीह यीशु ने अपणे स्वर्गदूत जो भेज्जी करी मेरे पर इन्हा गल्लां जो जाहिर कित्ता जे तिन्हेरा सेवादार है।

² इधेरे तांइ, मैं (यूहन्ना) तिन्हा गल्लां जो लिख्खी लित्ता जे मैं दिख्खी थी। मैं इन्हा लिख्खे री गल्लां बिच परमेश्वर री दस्से री गल्लां जो दस्से रा है जे मसीह यीशु ने मेरे जो दस्से री हिन।

³ परमेश्वर ने तिस हर इक्क मणू जो आशीष दैणी जे इन्हा भविष्यवाणी री गल्लां जो लोक्कां जो पढ़ी करी सुणांदा ते तिन्हा तिस हर मणू जो भी आशीष दैणी जे इन्हा गल्लां जो सूणदा ते इन्हा जो मनदा किजोकी ए गल्लां बड़े तौले होणे वाली हिन।

सत्तों कलीसियां रे लोक्कां जो यूहन्ना रा नमस्ते

⁴ मैं यूहन्ना, एशिया प्रदेश रे सत्त इलाक्केयां बिच रैह्णे वाले विश्वासियां जो ए चीठ्ठी लिख्खेया करदा है। मैं प्रार्थना करदा कि तुसा जो परमेश्वर का अनुग्रह ते सांती मिलदी रे। परमेश्वर पिता ही हिन जे अब्बे भी हिन, से पैल्ले भी थिये, ते तिन्हा ने हमेसा तिकर रैह्णा। तिन्हा सत्त आत्मां रे पास्से का जे परमेश्वर रे सिहांसन रे सामणे हमेसा खड़े रैह्‍न्दे,

⁵ ते मसीह यीशु रे पास्से का भी, जिन्हेरी गल्लां रा असी भरोस्सा करी सकदे। से ही हिन जे सबका पैल्ले मरणे का बाद मुर्देयां बिच का जिन्दे होई गे ते से दुनिया रे सारे राज्जेयां रे राज्जे हिन।

⁶ तिन्हा ने असा कने प्यार कित्ता। तिन्हा ने सुली पर अपणा खून बहाई करी असा रे पाप्पां रा मुल्ल चुकाया। इसेरी वजह कने असी पुरोत्तां रा परिवार बणी गेरे हिन जे तिन्हेरे पिता यानी परमेश्वर री सेवा करदे। परमेश्वर ने असा जो तिन्हेरे अपणे मणू बणाया जिन्हा पर से राज करदे। इस वजह कने मसीह यीशु जो महिमा ते ताकत हमेसा-हमेसा तांइ मिल्ले, आमीन!

⁷ सुणो, मसीह यीशु ने बदलां पर आणा ते हर इक्क मणू ने तिन्हा जो दिखणा, इत्ते तिकर तिन्हा लोक्कां ने तिन्हेरे जो आंदे दिखणा, जिन्हा ने तिन्हा हो सुली पर चढाया थिया। ते धरती रे सारे मणूआं ने तिन्हा जो आंदा दिख्खी करी बड़ी लेरां मारी-मारी करी रोणा। हाँ, ए होणे वाला है, आमीन!

⁸ प्रभु परमेश्वर बोलदे, “मैं ही अल्फा ते ओमेगा है, यानी मैं ही सुरुआत ते आखिर भी मैं ही है। मैं ही सबका ताकतवर है, मैं थिया, मैं है ते मैं ही आणे वाला भी है।”

जींदे प्रभु रा इक्क दर्सन यूहन्ना जो मसीह रा दर्शन मिलणा

⁹ मैं यूहन्ना सबर कने तुसा कने तिन्हा जुल्मां जो सहन करणे बिच तुसा रा साथी है जे असा पर मसीह कने रिस्ता होणे री वजह हुंदे, ते मैं परमेश्वर रे राज बिच तुसा रा साथी है। परमेश्वर रा बसेख सुनाणे ते यीशु रे सच्चे वचन रा प्रचार करणे री वजह कने रोमी साम्राज्य रे अधिकारियां ने मेरे जो पतमुस टाप्पु पर भेज्जी दित्ते रा है।

¹⁰ इतवार रे दिन पर, जे प्रभु रा दिन है, मैं पवित्रात्मा रे ताकत रे वस बिच थिया। मैं अपणे पीच्छे का इक्क अवाज जो किच्‍छ बोलदे सूणेया, से अवाज कुसकी तुरही सांई बड़ी तेज थी।

¹¹ तिन्हा ने मेरे जो ए बोल्लेया, जे किच्‍छ तू दिख्खेया करदा है, तिसजो इस कताब बिच लिखदा जा, ते फिरी तिसजो इफिसुस, स्मुरना, पिरगमुन, थुआतीरा, सरदीस, फिलदिलफिया, अते लौदीकिया, शरहां री सत्तों कलीसिया बिच भेज्जी दे।

¹² मैं ए दिखणे तांइ पीच्छे मुड़ेया कि कुण बोल्लेया करदा है। जां मैं मुड़ेया, तां मैं सत्त दीये अपणे धूपदान कने दिख्खे।

¹³ तिस धूपदान वाली जगाह् रे बिच-मझाटे मणू रे पुत्तर जदेया दिसणे वाला कोई खड़ित्ते रा थिया। तिसने अपणे पैरां तिकर लम्बा चोग्गा पाए रा थिया। तिनिये अपणी छात्ती पर इक्क सोन्ने रा पट्टा बन्ने रा थिया।

¹⁴ तिसेरे सिर रे बाल चिट्टी ऊन या बर्फ सांई चिट्टे थिये। तिसेरी हाख्खियां आग्ग री लपटां सांई चमकेया करदी थी।

¹⁵ तिन्हेरे पैर आग्ग री भट्टी बिच तपाए गेरे पित्तल सांई धधकेया करदे थिये, जां से बोलदे थिये तां तिन्हेरे अवाज कुसकी बड्डे झरने सांई सुणिंदी थी।

¹⁶ अते तिन्हा ने अपणे सज्जे हत्थ बिच सत्त तारे लित्ते रे थिये, अते तिन्हेरे मुँह का चोखी दोधारी तलवार बाहर निकलेया करदी थी, अते तिन्हेरा मुँह इदेया चमकेया करदा थिया, जदेया सूरज कड़ाके री धूप रे बेल्ले चमकदा।

¹⁷ जां मैं तिसजो दिख्खेया, तां मैं तिन्हेरे पैरां पर मुर्दे सांई पेई गेया, पर तिन्हा ने मेरे पर अपणा सज्जा हत्थ रख्खी करी ए बोल्लेया, “डर मत, मैं सुरुआत है, ते मैं ही आखिर भी।”

¹⁸ मैं जिंदा है। मैं मरी गेया थिया, पर अवे दिख, मैं हमेसा-हमेसा तांइ जिंदा है। मौत अते पताल जित्ते मरे रे लोक्कां री आत्मां रेह्न्दी, तिस पर मेरा हक है।

¹⁹ इधेरे तांइ जे किच्‍छ तैं दिख्खेया, जे गल्लां होया करदी हिन, अते जे होणे वाली हिन, तिन्हा सबणी जो लिखदा जा।

²⁰ मैं अवे तेरे जो मेरे सज्जे पास्से रे इन्हा सत्त तारेयां ते इन्हा सत्त सोन्ने रे धूपदान रे राज़ रा मतलब है दसणा। ए सत्त तारे से स्वर्गदूत हिन जे तिन्हा सत्त कलीसियां री रक्षा करदे, ते से सत्त धूपदान सत्त कलीसियां हिन।