फिलिप्पियों 2 - चम्बयाली नौआ नियम

निम्मते तांइ मसीह रा सच्चा उदारण मसीह यीशु रा निमतापन ते महानता

¹ हालांकि तुसा मसीह यीशु रे मणू होणे रे वजह कने उत्साहित, तुसा जो मसीह रे प्यार कने तसल्ली मिल्ले री है, तुसा जो पवित्रात्मा कने सहभागिता मिल्ले री है, ते मसीह तुसा तांइ करुणामयी ते दयावान रे,

² तां मेरी ए गल्ल मन्नी करी मेरे जो खुस करी देयो कि अप्पु-मिते इक्क मन कने रेयो, इक्क-दूए कने प्यार रख्खो ते इक्क ही मकसद ते इक्क-मन होई करी रेयो।

³ मतलबीपन या झूठ्ठी बड़ाई तिकर किच्‍छ मत करो, पर दीनता कने इक्क दुजे जो अप्पु का बदिया समझो।

⁴ हर मणू जो अपणे ही फायदे तांइ नी पर दूज्जेयां रे फायदे तांइ भी सोचणा चाएदा।

⁵ जदेया प्रभु यीशु रा स्वभाव थिया तदेया तुसा रा भी स्वभाव हो।

⁶ जिनिये अप्पु परमेश्वर हुंदे होए भी, परमेश्वर रे बराबर होणे जो अपणे अधिकार बिच रखणे री चीज नी समजेया।

⁷ बल्कि, अपणी सारी ईश्वरीय सहुलतां जो छड्डी करी, अप्पु जो इक्क दास रे बराबर निमता करी लित्ता, ते इक्क मणू रे रुप बिच जन्म लित्ता।

⁸ तिन्हा ने इन्सान रे रुप बिच जन्म लेई करी अप्पु जो इन्ना जादा निमता कित्ता कि परमेश्वर रे हुकमां जो मनदे होए से इक्क मुजरिम सांई मरणे तांइ भी तैयार थिये, ते हाँ, सुली पर अपणी जान देई भी दित्ती।

⁹ इस वजह कने परमेश्वर ने तिन्हा जो सबणी का बड्डे पद पर बिठाया ते तिन्हा जो इक्क इदेया नां दित्तेया जे हर नां का बड्डा है।

¹⁰ ते जे स्वर्ग अन्दर हिन, धरती पर या तिसेरे थल्ले तिन्हा सारे जणेया ने प्रभु यीशु रे अग्गे झुकणा,

¹¹ ते पिता परमेश्वर री महिमा तांइ सारे जणेया ने ए मन्नी लैण कि मसीह यीशु ही प्रभु हिन।

दुनिया बिच रौसनी सांई चमको

¹² इधेरे तांइ मेरे प्यारेयों, तुसा चाए मैं तुसा कने रेयां या दुर रेयां पर तुसा हमेसा का मेरे हुकमां जो मनदे आए रे हिन। अवे तुसा बिच का हर इक्क जणे जो अपणे छुटकारे तांइ डरदे ते कमदे होए कम्म करदे रैह्णा चाएदा।

¹³ किजोकी परमेश्वर तुसा बिच कम्म करेया करदे हिन, ते तुसा जो इच्छा ते ताकत देया करदे हिन ताकि तुसा से कम्म करो जिस कने से खुस हुंदे।

¹⁴ सारे कम्म बगैर कुडकुडाए ते बगैर कुसकी बैसहबाजी रे करेया करो।

¹⁵ ताकि इस दुनिया रे बुरे ते भ्रष्ट लोक्कां बिच परमेश्वर रे बच्चेयां सांई इक्क ठीक ते साफ जिन्दगी जियो। इस दुनिया रे लोक्कां बिच मझाटे जिन्दगी रे वचन बिच मजबूत होई करी आसमान रे तारेयां सांई चमको।

¹⁶ ताकि जिस दिन मसीह यीशु ने हटी आणा तिस दिन मेरे जो ए घमंड होणा कि मेरी कोशीशां ते मैहनत फायदेमंद होई।

¹⁷ प्रभु बिच तुसा रा विश्वास ते तुसा री सेवा इक्क कुर्बानी सांई प्रभु जो चढाया गेरे हिन, ते जे अगर मेरे जो तुसा रे विश्वास ते सेवा तांइ अपणी जान भी दैणा पये, तां भी मैं खुस है।

¹⁸ तिय्यां ही तुसा भी खुस हो ते मेरे कने खुसी मनाओ।

पौलुस रे दोस्त रे बारे खबर तीमुथियुस ते इपफ्रुदीतुस

¹⁹ मेरे जो मसीह यीशु बिच ए आस है कि मैं तीमुथियुस जो तौले ही तुसा का भेजां, ताकि तुसा रा हालचाल जाणी के मेरे जो हिम्मत मिल्ले।

²⁰ किजोकी मेरे का तीमुथियुस रे अलावा इदेय स्वभाव रा होर कोई मणू नी है कि से ठीक मन कने तुसा री चिन्ता करे।

²¹ किजोकी सारे अपणे-अपणे मतलब री चीजां रे पीच्छे पे रे हिन। ते तिन्हा गल्लां री फिकर नी करदे जे मसीह यीशु तांइ जरुरी हिन।

²² पर तुसा तां जाणदे कि तीमुथियुस ने किय्यां साबित कित्ते रा है कि से विश्वासयोग्य है। ते जिय्यां इक्क पुत्तर अपणे प्यो कने मैहनत करदा, तिय्यां ही तीमुथियुस ने सुब बसेख फैलाणे अन्दर मेरे कने मैहनत कित्ती है।

²³ इधेरे तांइ जिय्यां ही मेरे जो पता चलणा कि मेरी अवे कै हालत होणी, तिस्सी बेल्ले तिसजो तौले भेजी दैणा।

²⁴ ते मेरे जो प्रभु जी अन्दर विश्वास है कि मैं अप्पु भी तौले ही तुसा का आणा।

²⁵ पर मैं इपफ्रुदीतुस जो जे तुसा का भेजणा जरुरी समजेया, जे मेरा विश्वासी भाई, ते मसीह रा सुब बसेख सुनाणे बिच मेरा साथी है। से इक्क सिपाई सांई है जे मेरे कने तिन्हा लोक्कां रे खिलाफ खड़ित्तेया जे मसीह रे बसेख रे खिलाफ हिन, तुसा रा दूत भी है। जरुरी गल्लां बिच मेरी सेवा करणे वाला भी है।

²⁶ किजोकी तिसेरा मन तुसा सबणी कने लगे रा थिया, इस वजह कने से बेचैन थिया, ते तुसा सबणी ने मेरी बीमारी रा हाल सूणेया थिया।

²⁷ पक्का से मरणे वाला थिया पर परमेश्वर ने तिस पर दया करी के तिसजो तिस बीमारी का खरा कित्तेया; ते सिर्फ तिस पर ही दया नी कित्ती पर मेरे पर दया कित्ती ताकि मेरे जो इक्क का बाद इक्क, घड़ी-घड़ी दुख ना झेलणा पेयो।

²⁸ इधेरे तांइ मैं तिसजो भेजणे री तोल कित्ती ताकि तुसा खुस होई जाओ, ते मेरी फिकर भी घटी जाओ।

²⁹ इधेरे तांइ तुसा प्रभु बिच तिस कने बड़ी खुसी कने मिलणा ते तिसेरे जदेय लोक्कां रा आदर करेयो।

³⁰ किजोकी से मसीह यीशु रे कम्म तांइ अपणी जान जो खतरे बिच पाई करी मरणे वाला ही थिया, ताकि तुसा रे दुर रैह्णे री वजह कने मेरी जे मदद नी करी सके से तिसेरी कमी पूरी करी सके।