फिलेमोन 1 - चम्बयाली नौआ नियम

फिलमोन जो नमस्ते

^1-2 मैं पौलुस ए चीठ्ठी फिलमोन जो लिख्खेया करदा है ते मैं मसीह यीशु रा बसेख सुनाणे री वजह कने कैद बिच पाया गे रा है। मैं अपणे सहकर्मी तीमुथियुस कने तेरे जो नमस्ते बोलदा। तू इक्क प्यारा दोस्त है ते तू असा सांई मसीह यीशु रा कम्म करदा। मैं असा री विश्वासी भैण अफ्फिया ते अरखिप्पुस जो भी ए चीठ्ठी लिख्खेया करदा है जे मसीह यीशु री सेवा इक्क सिपाई सांई करदी, ते ए चीठ्ठी कलीसिया रे बाकि मणूआं तांइ भी जे तुसा रे घर बिच संगती करणे तांइ कठिंदे।

³ असा रे पिता परमेश्वर ते प्रभु यीशु मसीह रे पासे का तुसा जो अनुग्रह ते सांती मिलदी रेय।

फिलमोन रा प्यार ते विश्वास

⁴ मैं हमेसा तुसा जो प्रार्थना बिच याद करदा ते तुसा तांइ परमेश्वर रा शुक्रिया करदा।

⁵ किजोकी मैं मसीह यीशु बिच तुसा रे विश्वास ते परमेश्वर रे सारे लोक्कां तांइ तुसा रे प्यार रे बारे बिच सुणे रा है।

⁶ मैं प्रार्थना करदा कि परमेश्वर री दित्ती री हर ठीक चीज जो जानणे री वजह कने तुसा सारे विश्वासियां कने मिली करी संगती जो बधाओ। ए सारा किच्‍छ मसीह यीशु री महिमा तांइ हो।

⁷ किजोकी ओ संगी विश्वासी, मेरे तांइ तुसा रे प्यार जो दिख्खी करी मेरे जो बड़ी खुसी ते प्रोत्साहन होए रा है, ते दुज्जेया तांइ तुसा रे प्यार री वजह कने परमेश्वर रे मणू भी प्रोत्साहित होण।

उनेसिमुस तांइ बिनती

⁸ इधेरे तांइ मैं तुसा जो मसीह रे विश्वासी होणे नाते छंदे करदा कि तुसा सही कम्म ही करो।

⁹ मैं, पौलुस, मसीह रा प्रेरित होणे रे नाते हिम्मत कने हुकम भी देई सकदा पर मैं सिर्फ तुसा का छंदे करदा किजोकी मैं जाणदा कि तुसा मेरे ते अपणे सारे संगी विश्वासियों जो प्यार करदे। मसीह यीशु री सेवा करणे री वजह कने अवे मैं कैद बिच पाया गे रा है ते बुजुर्ग होणे रे नात्ते मेरे जो ए ही सही लग्गेया कि अवे मैं तुसा बिनती ही करां।

¹⁰ मैं उनेसिमुस तांइ तुसा रे छंदे करदा जे मेरे बच्चे सांई है ते कैद बिच मेरे सुब बसेख रा प्रचार करणे रे कम्म री वजह कने विश्वासी बणेया।

¹¹ इक्क समय थिया जां से कुसकी कम्म रा नी थिया, पर अवे से असा दोनो तांइ बड़े कम्म रा है।

¹² हालांकि मैं उनेसिमुस जो बड़ा वरी प्यार करदा तां भी मैं तिसजो तेरे का भेज्जेया करदा है।

¹³ मैं तिसजो अपणे का ही रखणा चाह्‍ंदा थिया ताकि से इत्ते सुब बसेख रा प्रचार करणे बिच मेरी मदद करे। किजोकी मैं जाणदा कि तू मेरी मदद करणा चाह्‍ंदा पर से तेरे बदले इत्ते रेई करी मेरी मदद करी सकदा।

¹⁴ पर मैं तेरी मर्जी रे बगैर किच्‍छ भी नी करणा चाह्‍ंदा ताकि तू कुसकी दवाब बिच नी पर अपणी खुसी कने मेरी मदद करे।

¹⁵ होई सकदा कि ए परमेश्वर री ही मर्जी हो कि उनेसिमुस तेरे का थोड़े वक्त तांइ दुर चली जाए ताकि से मसीह यीशु बिच विश्वास करी पाए ते तिसेरे नतीज्जे रे तौर पर से हमेसा तांइ तेरे कने-कने रे।

¹⁶ तुसा तिसजो सिर्फ अपणा गुलाम समजदे करी मत रखदे पर से गुलाम का बधी करी है। से अवे इक्क संगी विश्वासी है। मैं तिस कने बड़ा जादा प्यार करदा पर तुसा जो तिस कने अपणे गुलाम ते इक्क मसीही भाई रे तौर पर होर भी जादा प्यार करणा चाएदा।

¹⁷ जां उनेसिमुस ने तुसा का हटी आणा तां तिस कने तिय्यां ही पेश आओ जिय्यां कि तुसा मेरे कने पेश आंदे।

¹⁸ ते जे अगर तिसने किच्‍छ तेरा नुक्सान कित्ते रा हो या तिस पर तेरा कोई कर्ज हो तां से मैं चुकाई दिंगा।

¹⁹ मैं पौलुस अपणे हत्थ कने ए गल्ल फिरी लिख्खेया करदा है कि मैं अप्पु ही तिसेरा सारा कर्ज चुकाई दैणा। तू पैल्ले ही जाणदा कि जे अगर मैं तेरी मदद कित्ते री नी हुंदी तां तू नौई जिन्दगी नी पाणी थी इधेरे तांइ तू अपणी जिन्दगी तांइ मेरा कर्जदार है।

²⁰ ओ प्यारे दोस्त, प्रभु तांइ मेरी ए मदद कर कि इक्क मसीही भाई होणे रे नाते मेरे जो प्रोत्साहित कर।

²¹ हालांकि मैं तेरे जो ए सारी गल्लां लिख्खी करी भेज्जेया करदा है पर फिरी भी मैं जाणदा कि तू ए गल्लां करदा ते तैं इसका बधी करी ही करणा।

²² ते इक्क होर गल्ल कि अपणे घर बिच मेरे तांइ इक्क कमरा तैयार करी रख्खो किजोकी मेरे जो इस गल्ल री उम्मीद है कि परमेश्वर ने तुसा री प्रार्थनां रा जवाब दैणा ते मेरे जो तित्ते आई करी तुसा कने मिलणे रा मौक्का मिलणा।

आखरी नमस्ते अते इक्क प्रार्थना

²³ इपफ्रास भी मसीह यीशु रे बसेख रा प्रचार करणे री वजह कने मेरे कने कैद बिच पाया गे रा है।

²⁴ मरकुस, अरिस्तर्खुस, देमास ते लूका जे मेरे कने सेवा रा कम्म करदे, तिन्हा पास्से का तेरे जो नमस्कार।

²⁵ मैं प्रार्थना करदा कि मसीह यीशु तुसा पर अनुग्रह करण। आमीन!