मरकुस 9 - चम्बयाली नौआ नियम

¹ यीशु ने चेल्‍लेयां जो बोल्लेया, “मैं तुसा कने सच-सच बोलदा कि जे मणू इत्ते खडित्ते रे हिन, तिन्हा बिच किच्‍छ मणू इदेय भी हिन, जिन्हा ने परमेश्वर रे राज जो पूरी ताकत बिच दिख्खे बगैर नी मरणा।”

यीशु रा रुप बदलणा

² छे रोज्जां बाद यीशु ने पतरस, याकूब अते यूहन्ना जो अपणे कने लेया, ते कुसकी पहाड़ पर इक्क एकांत जगाह् पर लेई गे; ते चेल्‍लेयां सामणे तिन्हेरा रुप बदली गेया।

³ अते तिन्हेरे कपड़े बड़े जादा चमकणे लग्गे, पूरी दुनिया अंदर कोई भी धोबी तिय्यां नी चमकाई सकदा।

⁴ ते चेल्‍लेयां ने भविष्यद्वक्ता मूसा ते एलिय्याह जो यीशु कने गल्लां करेया करदे दिख्खेया।

⁵ ए दिखणे का बाद पतरस ने यीशु जो बोल्लेया, “ओ गुरु, असा तांइ इत्ते रैह्णा ठीक है: इधेरे तांइ असी तुसा तांइ, ते मूसा तांइ, ते एलिय्याह तांइ इत्ते त्रै तम्बू बणांदे।”

⁶ पतरस ने इय्यां इधेरे तांइ बोल्लेया किजोकी से मणू इन्ने डरी गेरे थिये कि समजी नी थिये पांदे कि होर कै बोलण।

⁷ तां इक्क बदल ने तिन्हा जो घेरी लेया, ते परमेश्वर री अवाज आई, “ए मेरा प्यारा पुत्तर है। इसेरी सुणो।”

⁸ तिस्सी बेल्ले चेल्‍लेयां ने चौं पास्से नजर फेरी, ते यीशु जो छड्डी अपणे कने होर कुसकी जो नी दिख्खेया।

⁹ पहाड़ का थल्ले उतरदे बेल्ले यीशु ने चेल्‍लेयां जो हुकम दित्तेया कि जां तांइ मणू रा पुत्तर, जे मैं ही है मरे रेयां बिच का जिन्दा ना होई जां, तां तांइ जे किच्‍छ तुसा ने दिख्खेया से कुसकी कने मत बोलदे।

¹⁰ चेल्‍लेयां ने इस गल्ल जो चेत्ता रख्खेया ते बड़ी वरी अप्पु मिते बैह्स भी करदे थिये कि, “मरे रेयां बिच का जिन्दा होई जाणे रा कै मतलब है?”

¹¹ तां चेल्‍लेयां ने यीशु जो पूच्छेया, “शास्त्रि किजो बोलदे कि, मसीह का पैल्ले एलिय्याह रा आणा जरुरी है?”

¹² यीशु ने चेल्‍लेयां जो जवाब दित्तेया, ए सच है “एलिय्याह ने पैल्ले ही आई करी सब किच्‍छ सुधारणा, पर तुसा ए किजो नी समजदे कि मणू रे पुत्तर, जे मैं ही है रे बारे बिच, जे मैं ही है ए लिख्खे गे रा है कि तिन्ने बड़े दुख चुक्कणे, ते बेइज्जत कित्तेया जाणा?

¹³ पर मैं तुसा जो बोलदा कि, एलिय्याह तां आई चुके रा है जे यूहन्ना बपतिस्मा दैणे वाला थिया, ते जिय्यां तिसेरे बारे बिच लिखेरा है, लोक्कां ने जे तिस कने गलत व्यवहार कित्तेया।”

दुष्टात्मा रे सताए मुडें जो ठीक करणा

¹⁴ जां यीशु अपणे तिन्हा त्रै चेल्‍लेयां कने अपणे बाकि चेल्‍लेयां का हटी आए, तां दिख्खेया कि तिन्हेरे चौं पास्से बड़ी भीड़ लग्गे री थी, अते शास्त्रि मणू चेल्‍लेयां कने बैह्स करेया करदे हिन।

¹⁵ भीड़ रे मणू यीशु जो दिख्खी करी हरान होए ते तिस्सी बेल्ले तिन्हेरे जो मिलणे तांइ दौड़ी करी गे।

¹⁶ यीशु ने तिन्हा लोक्कां का पूच्छेया, “कुस गल्ल पर बैह्स होया करदी है?”

¹⁷ भीड़ बिच मझाटे का इक्क जणे ने जवाब दित्तेया, “ओ गुरु, मैं अपणे मुंडे जो तुसा का ठीक करवाणे तांइ लाया थिया, जिस बिच इक्क दुष्टात्मा है जे तिसजो बोलणा नी दिंदी।

¹⁸ से दुष्टात्मा जां भी मेरे मुंडे हावी हुंदी, तां से तिसजो जमीन पर पटकी दिंदी; ते तिस मुंडे रे मुँह बिच झाग निकलणा लगदा, ते से दांद्द पीह्णे लगदा ते से अकड़ी जांदा; इधेरे तांइ मैं तुसा रे चेल्‍लेयां का बिनती कित्ती कि से तिस दुष्टात्मा जो कड्डी दैण पर से तिसजो नी कड्डी सके।”

¹⁹ ए सुणी करी यीशु ने चेल्‍लेयां जो जवाब देई करी बोल्लेया, “ओ अविश्वासी लोक्कों, मैं कधाड़ी तांइ तुसा रे कने रैह्णा? कधाड़ी तांइ तुसा जो सहन करणा? तिस दुष्टात्मा वाले मुंडे जो मेरे का लेई आओ।”

²⁰ तां से तिस मुंडे जो यीशु का लेई आये: अते जां तिस दुष्टात्मा ने यीशु जो दिख्खेया, तां तिसने चाणचक्के ही तिस मुंडे जो मरोड़ेया, ते तिसेरे मुँह झाग निकलणा लग्गी पेई ते से छटपटाई करी जमीन पर पेई गेया।

²¹ यीशु ने तिसेरे प्यो जो पूच्छेया, “इसेरी ए हालत कधाड़ी का है?” तिन्ने बोल्लेया, “बचपन का।

²² तिस दुष्टात्मा ने इसजो मुकाणे तांइ कदी आग्ग ते कदी पाणी बिच सुट्टेया, असा पर मेहरबानी करी के असा री मदद करो अगर तुसा करी सकदे।”

²³ यीशु ने तिस मणू जो बोल्लेया, “जे तू करी सकदा, इस गल्ल रा कै मतलब है? विश्वास करणे वालेयां तांइ सब किच्‍छ मुमकिन है।”

²⁴ तिस मुंडे रे प्यो ने छन्दे-मिन्नता करी के बोल्लेया, “ओ प्रभु, मैं विश्वास करदा, मेरे अविश्वास का उभरणे तांइ मेरी मदद करो।”

²⁵ जां यीशु ने दिख्खेया कि दिखणे वालेयां री भीड़ बद्देया करदी है, तां तिन्हा ने दुष्टात्मा जो ए बोल्ली करी झिड़केया, से जल्ली अते टोणी करणे वाली आत्‍मा, मैं तिज्जो हुकम दिन्दा कि इस बिच का निकली आ, अते इस बिच फिरी कदी भी मत जान्दी।

²⁶ तां से दुष्टात्मा लेरां मारदी अते तिस मुंडे जो बड़े जोरे मरोड़ी करी, निकली गई, अते निक्का अधमरा जदेया होई गेया, इत्ते तक लोक्कां जो लग्गेया कि से मरी गेया।

²⁷ पर यीशु ने तिसेरा हत्थ पकड़ी करी तिसजो उठाया, अते से ठीक होई करी खड़ी गेया।

²⁸ बाद बिच जां यीशु अपणे चेल्‍लेयां कने घरे किल्ले थिये, तां तिन्हेरे चेल्‍लेयां ने तिन्हा का पूच्छेया, “असां तिसजो किजो नी कड्डी सके?”

²⁹ यीशु ने चेल्‍लेयां जो बोल्लेया, “ए जाति बगैर प्रार्थना रे नी निकली सकदी।”

दुबारा अपणे मरणे रे बारे बिच यीशु री भविष्यवाणी

³⁰ फिरी से तित्ते का चले, अते गलील प्रदेश का होई करी जाया करदे थिये ते यीशु नी चाह्‍ंदे थिये कि कुसकी जो पता चले कि से तित्ते हिन,

³¹ किजोकी से अपणे चेल्‍लेयां जो सिखाणा चाह्‍ंदे थिये। यीशु ने अपणे चेल्‍लेयां जो बोल्लेया “मणू रा पुत्तर, जे मैं ही है लोक्कां रे हत्थां पकड़ाया जाणा, अते तिन्हा ने मेरे जो मारी रखणा अते मैं मरणे रे तिज्जे रोज्जे जिंदा होई जाणा।”

³² पर ए गल्ल चेल्‍लेयां जो समझ नी आई, अते से तिन्हा का पूच्छणे का डरदे थिये।

सबका बड्डा कुण?

³³ फिरी से कफरनहूम रे कस्बे बिच आये ते घरे आई करी यीशु ने चेल्‍लेयां का पूच्छेया, “तुसां रस्ते बिच कुस गल्ल जो लेई करी बैह्स करेया करदे थिये?”

³⁴ चेल्‍ले चुप्प रे, किजोकी रस्ते बिच से अप्पु-मिते ए बैह्स करदे थिये कि असा बिच का बड्डा कुण है?

³⁵ तां यीशु ने बेई करी सारे चेल्‍लेयां जो सद्देया अते तिन्हा जो बोल्लेया, “तुसां बिच जे कोई बड्डा बणना चाह्ए, से सबणी का छोटा ते सबणी रा नौक्कर बणे।”

³⁶ अते यीशु ने इक्क निक्के जो लेई करी तिन्हेरे मझाटे खड़ा कित्तेया, अते तिसजो खोखा लेई करी चेल्‍लेयां जो बोल्लेया,

³⁷ “जे कोई मेरे नां कने इदेय निक्केयां बिच का इक्क जो भी अपणांदा, से मेरे जो अपणांदा, अते जे कोई मेरे जो अपणांदा, से मेरे जो नी पर मेरे भेजणे वाले जो अपणांदा।”

जो खलाफ नी, से कन्ने है

³⁸ तां यूहन्ना ने यीशु जो बोल्लेया, “ओ गुरु, असा ने इक्क मणू जो तेरे नां कने दुष्टात्मा कडदे दिख्खेया अते असा तिसजो ठाक्केया, किजोकी से असा रे बिच रा नी है।”

³⁹ यीशु ने बोल्लेया, “तिसजो मत ठाको किजोकी कोई भी जे मेरे नां कने चमत्कार रे कम्म करदा से बाद बिच मेरे बारे अंदर बुरा नी बोल्ली सकदा,

⁴⁰ किजोकी जे असा रे खिलाफ नी हिन, से असा पास्से हिन।

⁴¹ जे कोई तुसा जो मसीह रे चेल्‍ले होणे री वजह इक्क गलास भी पाणी पियाये तां मैं तुसा कने सच बोलदा कि से अपणा ईनाम कुसी भी तरिके कने नी खोई सकदा।”

ठोक्कर री वजह बणना

⁴² “जे कोई मेरे पर विश्वास करणे वाले कुसकी छोटे का छोटे जो भी गलत रस्ते पर पाए, तिसेरे तांइ ए खरा होणा कि इक्क बड्डा चक्की रा बट्टा तिसेरे गले बिच लटकाई करी तिसजो समुन्द्र बिच सूटी दित्तेया जाये।

⁴³ जे तेरे हत्थ तेरे पाप करणे री वजह बणदे, तां तिन्हा जो बड्डी दे किजोकी टुण्डा होई करी स्वर्ग बिच हमेसा री जिन्दगी जो पाणा दोई हत्थ हुंदे होए नरक री आग्ग बिच पैणे का खरा है जे कदी भी नी बुझणी।

⁴⁴ (ते ना जित्ते कीड़ा मरदा ते ना तित्ते आग्ग बुझदी)।

⁴⁵ जे तेरा पैर तेरे तांइ पाप करणे री वजह बणे तां तिन्हा जो बड्डी दे किजोकी लट्टा होई करी स्वर्ग बिच हमेसा री जिन्दगी जो पाणा, दोनो पैर हुदें होये नरक री आग्ग बिच पैणे का खरा है।

⁴⁶ (जित्ते ना तिन्हेरा कीड़ा मरदा ते ना तित्ते आग्ग बुझदी)।

⁴⁷ जे तेरी आख्खियां पाप करणी री वजह बणे तां तिन्हा जो कड्डी दे किजोकी टीणा होई करी परमेश्वर रे राज बिच आणा, तेरे तांइ इसका खरा है कि दोन्नों हाख्खियां हुंदे भी तू नरक बिच पाया जाए।

⁴⁸ जित्ते तिन्हेरा कीड़ा नी मरदा अते आग्ग नी बुझदी।

⁴⁹ जिय्यां कुर्बानी जो शुद्व करणे तांइ तिस पर लूण पाया जादां, तिय्यां ही परमेश्वर असा जो शुद्व करणे तांइ असा जो मुसीबतां का गुजरणे दिंदा।

⁵⁰ लूण खरा है, पर जे लूण रा सुआद बिगड़ी जाओ, तां तिसजो कुस चीज कने लूणका बणाई सकदे? तुसा बिच लूण री खासियत होणा चाएदी ते अप्पु मिते भाईचारे कने रेयो।”