मरकुस 5 - चम्बयाली नौआ नियम

दुष्टात्मा रे सताए मणू रा ठीक होणा

¹ यीशु गलीली समुन्द्र रे पार गिरासेनियों रे जिले बिच पूज्जे,

² जां यीशु किस्ती का उतरे तां तिस्सी बेल्ले इक्क मणू जिसेरे बिच दुष्टात्मा थी, से कब्रिस्तान बिच का निकली करी उन्हा जो मिल्लेया।

³ से कब्रिस्तान बिच रैहन्दा थिया, ते कोई तिसजो संग्गलां कने भी नी बन्नी सकदा थिया,

⁴ किजोकी से घड़ी-घड़ी बेड़ी ते संग्गलां कने बन्नेया गेया थिया, पर तिनिये संग्गलां जो भन्नी दित्तेया ते बेड़ियां रे टोट्टे-टोट्टे करी दित्ते थिये, ते कोई तिसजो वस अन्दर नी करी सकदा थिया।

⁵ से दिन-रात्ती कब्रिस्तान ते पहाड़ियां बिच चिडां मारदा, ते अप्पु जो पत्थरां कनें जख्मी करदा थिया।

⁶ से यीशु जो दुर का ही का दिख्खी करी तिन्हेरे पास्से दोड़ेया ते तिन्हेरे पैरां पर पेई करी तिन्हा जो प्रणाम कित्तेया,

^7-8 तां यीशु ने तिसजो बोल्लेया, “ओ दुष्टात्मा, इस मणू बिच का निकली आ!” ते जोर कने लेर मारी करी बोल्लेया, “ओ यीशु, परमप्रधान परमेश्वर रे पुत्तर, मेरा तुसा कने कै काम्म? मैं तुसा जो परमेश्वर री सौह् खुआई करी छंदे करदा कि मेरे जो कष्ट मत देयो।”

⁹ यीशु ने तिसजो पूच्छेया, “तेरा नां कै है?” तिनिये यीशु जो बोल्लेया, “मेरा नां सैना है किजोकी असी मती सारी हिन।”

¹⁰ ते तिनिये उन्हा का बड़ी बिनती कित्ती, “असां जो इस देस का बाह्र मत भेजदे।”

¹¹ उत्ते पहाड़ पर सूअरां रा इक्क बड्डा धण चरेया करदा थिया।

¹² दुष्टात्मां ने यीशु का बिनती कित्ती “असां जो उन्हा सूअरां बिच भेजी देयो कि असी उन्हेरे बिच समाई जाण।”

¹³ अते यीशु ने उन्हेरे जो हुकम दित्तेया ते दुष्टात्मा निकली करी सूअरां बिच समाई गेई ते से धण, जे कोई दो हजार रा थिया, ढह्ढा का छाल मारी समुन्द्र बिच जाई पेया ते मरी गेया।

¹⁴ उन्हेरे चराणे वाले ने नह्सी करी सहर ते ग्रां बिच जाई करी ए खबर सूणाई, ते जे होया थिया मणू तिसजो दिख्खणा आए

¹⁵ ते यीशु का आई करी से तिस मणू जो जिसेरे बिच दुष्टात्मा थियां, मतलब जिसेरे बिच सैना बसी री थी, कपड़े पाए रे ते सातीं कने बैठ्ठा रा दिख्खी करी डरी गे।

¹⁶ दिख्खणे वालेयां ने उसेरा, जिसेरे बिच दुष्टात्मा थियां, ते सूअरां रा पूरा हाल होर लोक्कां जो भी दस्सेया।

¹⁷ तां से मणू यीशु का छन्दे करी के बोलणा लग्गे कि हमारे जगाह् का चली जा।

¹⁸ जां यीशु किस्ती पर चढ़णा लग्गे तां से जिसेरे बिच दुष्टात्मा थियां तिन्हेरे छन्दे करणा लग्गेया, “मेरे जो अपणे कने रैह्णा देयो।”

¹⁹ पर यीशु ने तिसजो मना करी दित्ता, ते तिसजो बोल्लेया, “अपणे घरे जाई करी अपणे लोक्कां जो दस्स कि तेरे पर तरस खाई करी परमेश्वर ने तेरे तांइ कदेय बड्डे कम्म कित्ते।”

²⁰ से मणू जाई करी दिकापुलिस जिले बिच इस गल्ल जो दसणा लग्गेया कि यीशु ने मेरे तांइ कदेय बड्डे कम्म कित्ते ते मते सारे मणू ए सुणी करी हरान हुदें थिये।

याईर री मरी री कुड़ी ते इक्क बिमार जनानी

²¹ यीशु किस्ती पर गलीली समुन्द्र रे पार गे, तां इक्क बड्डी भीड़ तिन्हेरे का कठ्ठी गई से समुन्द्र रे नेड़े ही थिये कि

²² याईर नां रे सभास्थल रे सरदारां बिच का इक्क आया, ते तिन्हेरे जो दिख्खी करी तिन्हेरे पैरां पर पेई गेया,

²³ ते ए बोल्ली करी तिन्हेरे बड़े छन्दे कित्ते, “मेरी हलकी कुड़ी मरणे वाली है: तुसा आई तिसेरे पर हत्थ रख्खो की से ठीक होई करी जिन्दी रे।”

²⁴ तां से फिरी यीशु ते तिन्हेरे चेल्‍ले, याईर कने चली पे ते बड्डी भीड़ तिन्हेरे पीच्छे चली पेई, इत्ते तिकर की मणू तिन्हेरे पराल्ले पेया करदे थिये।

²⁵ इक्क जनानी थी, जिस जो बारां साल्लां का खून चलणे री बीमारी थी।

²⁶ तिनिए बड़े वैद्दां का इलाज कराया, ते अपणी सारी जायदाद खर्च करणे पर भी तिसजो किच्‍छ भी फैदा नी होया थिया, पर होर भी बिमार होई गई थी।

²⁷ से यीशु री मसहुरी सुणी करी भीड़ बिच तिन्हेरे पीच्छे का आई ते तिन्हेरे कपड़ेया जो छुई लेया,

²⁸ किजोकी से बोलदी थी, “जे ए तिन्हेरे कपड़े ही छुई लिह्गिं तां ठीक होई जाणा।”

²⁹ ते तिस्सी बेल्ले तिसेरा खून निकलणा बांद्द होई गेया, ते तिन्हा ने अपणी जिस्म बिच जाणी लेया कि मैं तिस बीमारी का ठीक होई गई री है।

³⁰ यीशु ने इक्क-दम अपणे बिच ए जाणी लेया की मेरे बिच का ताकत निकली, ते भीड़ बिच पीच्छे फिरी करी पूच्छेया, “मेरे कपड़े जो कुनिये छुए?”

³¹ तिन्हेरे चेल्‍लेयां ने यीशु जो बोल्लेया, “तुसां दिखदे हिन की भीड़ तुसा पर पेया करदी है, ते तुसा पुछदे कि मेरे कपड़े कुसने छुए?”

³² तां यीशु ने तिसजो दिखणे तांइ जिनिए तिन्हेरे कपड़े छुए थिये, चारों पास्से नजर फेरी,

³³ तां से जनानी ए जाणी करी की मेरे कने कदेया खरा होया, डरदी ते कबंदी होई आई (किजोकी मूसा रे नियम रे हिसाब कने तिस बीमारी वाले मणू समाज बिच नी आई सकदे थिये), ते तिन्हेरे पैरां पर पेई करी तिन्हा कने सारा हाल सच-सच बोल्ली दित्ता।

³⁴ यीशु ने तिसजो बोल्लेया, “कुड़िए तेरे भरोसे ने तेरे जो ठीक कित्ता: राजी खुसी जा, ते अपणी इस बीमारी का बची रेय।”

³⁵ यीशु हल्ले तिस जनानी कने गल्ल करेया ही करदे थिये ही करदे थिये कि सभास्थल रे सरदार याईर रे घरे रे लोक्कां ने आई करी बोल्लेया, “तेरी कुड़ी तां मरी गई, अवे गुरु जी जो तगं मत कर।”

³⁶ से मणू जे गल्लां बोल्लेया करदे थिये तिसजो यीशु ने अनसुणा करी के, सभास्थल रे सरदार याईर जो बोल्लेया, “मत डर सिर्फ विश्वास रख।”

³⁷ ते यीशु सिर्फ पतरस ते याकूब ते याकूब रे भाई यूहन्ना जो अपणे कन्ने आणा दित्ता।

³⁸ ते याईर रे घरे पूज्जी करी, यीशु ने लोक्कां जो बड़ा मातम मणादे दिख्खेया,

³⁹ तां यीशु ने अन्दर जाई करी तिन्हा लोक्कां जो बोल्लेया, “तुसां किजो रोन्दे ते मातम हिन मणादे? कुड़ी मरी नी, पर सोया करदी है।”

⁴⁰ ए सुणी करी से मणू यीशु रा मजाक उडाणा लग्गे पर तिन्हा ने सारेयां जो कड्डी करी कुड़ी रे मां-प्यो ते अपणे चेल्लेया कने अन्दर गे जित्ते कुड़ी पेई री थी।

⁴¹ ते कुड़ी रा हत्थ पकड़ी करी तिसजो बोल्लेया, “तलिता कुमी” जिसेरा मतलब है, “ओ कुड़ी, मैं तिज्जो बोलदा, उठ।”

⁴² ते से कुड़ी जे बारा साल्ले री थी, तिस्सी बेल्ले उठी करी चलणे फिरणे लग्गी। इस पर मणू बड़े हैरान होए।

⁴³ फिरी यीशु ने तिन्हा लोक्कां जो बड़ा समझाई करी हुकम दित्ता कि ए गल्ल कुसकी जो पता ना लग्गे, ते बोल्लेया, “इसजो किच्‍छ खाणे जो देयो।”