Biblia Todo Logo
Bìoball air-loidhne

- Sanasan -

मरकुस 1 - चम्बयाली नौआ नियम


सुब बसेख री सुरुआत यूहन्ना बपतिस्मा दैणे वाले रा प्रचार करणा

1 ए कताब मसीह यीशु रे सुब बसेख रे बारे बिच है, से परमेश्वर रे पुत्तर हिन।

2 ते इसेरी सुरुआत इय्यां हुंदी कि जिय्यां परमेश्वर ने अपणे पुत्तर यीशु मसीह जो यशायाह भविष्यद्वक्ता री कताब बिच बोल्ले रा है, “दिख्ख मैं अपणे दूत जो तेरे अग्गे भेज्जेया करदा है, जिनिये तेरे आणे तांइ लोक्कां जो तैयार करणा।”

3 “बियाबान बिच इक्क हक्क मारणे वाले री अवाज सुणिदीं, ‘प्रभु रे आणे तांइ अप्पु जो तैयार करो, ते तिन्हेरा रस्ता सीद्दा करो।’”

4 यूहन्ना ही से दूत थिया जे आया, जे बियाबान बिच थिया ते लोक्कां बिच ए प्रचार कित्तेया कि बपतिस्मा लेयो ताकि ए गवाई होई सके कि तुसा तौबा करी लित्ते री है ते पाप्पां री माफी तांइ परमेश्वर पास्से मुड़ी आए रे हिन।

5 यहूदियां जिले ते यरुशलेम सहर का मते सारे निकली करी तिसेरे नेड़े गे, ते अपणे पाप्पां जो मन्नी करी यरदन नदी बिच तिसका बपतिस्मा लित्तेया।

6 यूहन्ना ऊँट रे बालां रे बणे रे कपड़े पाई करी ते कमर बिच चमड़े रा कमरबंद बन्नी करी रखदा थिया ते टिड्डियां कने जगंली शहद खादां थिया,

7 ते ए प्रचार करदा थिया, “मेरे बाद से आणे वाला है जे मेरे का भी शक्तिसाली है, मैं इस जोग्गे भी नी कि इक्क गुलाम रे तौर पर भी निठ्ठे होई करी तिन्हेरे जूत्ते री डोरी खोल्ली सकां।

8 मैं तां तुसा जो पाणी कने बपतिस्मा दित्तेया पर उन्ने तुसा जो पवित्रात्मा कने बपतिस्मा दैणा।”


यीशु रा बपतिस्मा ते परखेया जाणा

9 तिन्हा दिना बिच यीशु ने गलील प्रदेश रे नासरत कस्बे का आई करी यरदन नदी बिच यूहन्ना का बपतिस्मा लित्तेया।

10 ते जां यीशु पाणी का निकली करी उप्पर आए, तां तिस्सी बेल्ले तिनिये स्वर्ग जो खुलदे ते पवित्रात्मा जो कबूतर सांई अपणे उप्पर उतरदे दिख्खेया।

11 ते ए स्वर्ग बिच का ए अवाज आई, “तू मेरा प्यारा पुत्तर है, तेरे का मैं खुस है।”

12 तां पवित्रात्मा ने तिस्सी बेल्ले तिसजो बियाबान जो भेज्जेया,

13 बियाबान बिच चाली रोज तिकर शैतान ने तिसजो परखेया, ते से बियाबान रे जानवरां कने रेया, ते स्वर्गदूत उसेरी सेवा-टहल करदे रेय।


गलील प्रदेश बिच यीशु री सेवा यीशु री सेवकाई री सुरुआत

14 यूहन्ना जो जेल बिच पाई दित्ता गेया किजोकी तिसने हेरोदेस जो तिसेरे पाप रे खलाफ चितौणी दित्ती थी ते तिसेरे पकडाए जाणे रे कुछ समय बाद यीशु ने गलील प्रदेश बिच आई करी परमेश्वर रे राज रा सुब बसेख प्रचार कित्तेया,

15 ते बोल्लेया, “वक्त पूरा होई गेया, ते परमेश्वर रा राज नेड़े आई गे रा है तौबा करो ते सुब बसेख पर विश्वास करो।”


मछुआरेयां रा सद्देया जाणा

16 गलीली समुन्द्र रे कन्डे-कन्डे जान्दे बेल्ले उनिये शमौन ते उसदे छोटे भाई अन्द्रियास जो झील बिच जाल पादें दिख्खेया किजोकी से मछवारे थिये।

17 यीशु ने उन्हा जो बोल्लेया, “आओ, मेरे चेल्‍ले बणो तां मैं तुसा जो मेरे तांइ मच्छियाँ सांई मणूआं जो मेरे चेल्‍ले बणने तांइ कठेरणा सिखाणा।”

18 से तिस्सी बेल्ले जालां जो छड्डी करी तिन्हेरे चेल्‍ले बणने तांइ तिन्हा कने चली पे।

19 थोडा अग्गे बदधी करी तिन्हा ने जब्दी रे पुत्तर याकूब, ते तिसेरे भाई यूहन्ना जो किस्ती पर जालां जो ठीक करदे दिख्खेया।

20 यीशु ने तिस्सी बेल्ले तिन्हा जो सद्देया ते से अपणे प्यो जब्दी जो मजदूरां कने किस्ती पर छड्डी करी, यीशु रे पीच्छे तिन्हेरे चेल्‍ले बणने तांइ चली पे।


दुष्टात्मा का तंग मणू जो ठीक करणा

21 तां यीशु ते तिन्हेरे चेल्‍ले कफरनहूम कस्बा बिच आए, ते से तिस्सी बेल्ले विश्राम दिन सभास्थल बिच जाई करी उपदेस दैणा लग्गेया।

22 ते मणू यीशु रे उपदेस कने हैरान होई गे किजोकी से उन्हा जो शास्त्रियां सांई नी, पर अधिकार कने उपदेस दिंदा थिया,

23 तिस्सी बेल्ले, सभास्थल बिच इक्क मणू थिया, जिस बिच इक्क दुष्टात्मा थी।

24 तिनिये चिडं मारी करी बोल्लेया, “ओ नासरत कस्बे रे रैह्णे वाले यीशु, असा जो तुसा रे कने कै काम्म? कै तुसा असा जो खत्म करणे तांइ आए रे हिन? मैं तुसा जो जाणदी कि तुसा कुण हिन? परमेश्वर रे भेज्जे रे पवित्र मसीह!”

25 यीशु ने उस दुष्टात्मा जो बकी करी बोल्लेया, “चुप रेह! ते इस मणू बिच का निकली जा।”

26 तां दुष्टात्मा तिसजो मरोड़ी करी, ते बड़े जोर कने चिडं मारी करी उस बिच का निकली गई

27 इस पर सारे मणू हैरान होई करी अपणे बिच बैह्स करणा लग्गी पे, “ए कै गल्ल? ए तां कोई नौआ उपदेस है! ओ अधिकार कने दुष्टात्मा जो भी हुकम दिंदा, ते से तिसेरा हुकम मनदी।”

28 ते तिन्हेरे नां री खप्प झटपट ही गलील प्रदेश रे नेड़े-तेड़े री सारी जगाह् बिच फैल्ली गई।


मते बिमार लोक्कां जो ठीक करणा

29 यीशु सभास्थल का निकली करी यूहन्ना ते याकूब ते अपणे बाकि चेल्‍लेयां कने शमौन ते अन्द्रियास रे घरे जो गे।

30 शमौन री सास्स बुखार कने दुखी थी, ते उन्हा ने तिस्सी बेल्ले उसदे बारे बिच यीशु जो बोल्लेया।

31 तां उन्हा ने नेड़े जाई करी उसदा हत्थ पकड़ी करी तिसजो उठाया ते उसदा बुखार उतरी गेया, ते से तिन्हेरी सेवा करणा लग्गी पेई।

32 सूरज डूबणे रे बाद जां विश्राम दिन मुकी गेया तां मणू सारे बिमारां जो, ते उन्हा जो, जिन्हेरे बिच दुष्टात्मा थियां, तिन्हेरे का लेई करी आए।

33 ते कस्बे रे मते सारे मणू शमौन रे घरे का कठ्ठी गे।

34 यीशु ने मते सारे बिमार लोक्कां जो ठीक कित्तेया। तिन्हा ने लोक्कां का मती सारी दुष्टात्मां जो भी कड्डेया। यीशु ने तिन्हा जो किच्‍छ भी बोलणा नी दित्तेया किजोकी दुष्टात्मां जाणदी थी कि से मसीह हिन।


यीशु रा किल्ले प्रार्थना करणा

35 अगली भ्याग यीशु न्याहरे-न्याहरे ही जाग्गी होए। ते से घरे का निकली करी इक्क सुनसान जगाह् पर जाई करी प्रार्थना करणा लगे।

36 तां शमौन ते तिसेरे साथी यीशु जो तोपणे जो निकले।

37 जां यीशु मिल्ले, तां उन्हा जो बोल्लेया, “मते सारे मणू तुसा जो कफरनहूम रे कस्बे बिच तोपदे हिन।”

38 यीशु ने चेल्‍लेयां जो बोल्लेया, “आओ, असी होर कुसकी कस्बे बिच जान्दे ताकि मैं तित्ते भी प्रचार करां, किजोकी मैं इस तांइ ही दुनिया बिच आए रा है।”

39 अते से सारे गलील प्रदेश बिच, ते सभास्थल बिच जाई-जाई करी प्रचार करदा ते दुष्टात्मा कडदा रेया।


कोढ़ रे मरीज जो ठीक करणा

40 इक्क कोढ़ी यीशु रे नेड़े आया, उस का बिनती कित्ती, ते तिन्हा रे सामणे घुटने टेकी करी उन्हा जो बोल्लेया, “जे अगर तुसा चाओ तां मेरे जो ठीक करी सकदे।”

41 यीशु ने उस पर तरस खाई करी अपणा हत्थ बधाई करी, ते तिसजो छुई करी बोल्लेया, “मैं चाह्‍ंदा कि तू ठीक होई जाए।”

42 ते तिस्सी बेल्ले तिस मणू रा कोढ़ हटी गेया ते से ठीक होई गेया।

43 तां यीशु ने तिसजो चितौणी देई करी तिस्सी बेल्ले भेजी दित्तेया,

44 ते तिन्हा ने तिसजो बोल्लेया, “दिख्ख कुसकी कने किच्‍छ मत बोलदा पर जाई करी अपणे आप जो पुरोत्त जो दिखा, ते कोढ़ का ठीक होणे रे बारे बिच जे किच्‍छ मूसा ने ठैहराए रा है से कुर्बानी चढ़ा ताकि तित्ते रे लोक्कां पर गवाई हो।”

45 पर से बाहर जाई करी इस गल्ल रा बड्डा प्रचार करणे ते इत्ते तक फैलाणा लग्गेया कि यीशु फिरी नगर बिच खुली करी नी जाई सके, पर बाहर सुनसान इलाकें बिच रेया ते चारो पास्से का मणू उस का आन्दे रेय।

Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.

Lean sinn:



Sanasan