मत्ती 9 - चम्बयाली नौआ नियम

अधरंग रे रोगी जो ठीक करणा

¹ फिरी यीशु किस्ती पर चढ़ी करी पार अपणे सहरां जो आई गे।

² अते दिख्खो, किच्‍छ मणू अधरंग रे इक्क मरीज जो बाणी वाले मन्जे पर रख्खी करी यीशु रे नेड़े लेई आये तिन्हा ने तिन्हेरा विश्वास दिख्खी करी, तिस अधरंग रे मरीज जो बोल्लेया, “ओ पुत्तर, हिम्मत रख तेरे पाप माफ होई गे।”

³ अते शास्त्रियां बिच किच्‍छ अप्पु-मित्ते बोलणा लग्गे, “ए तां परमेश्वर री बेजती करेया करदा है।”

⁴ यीशु ने तिन्हेरे मन री गल्लां जो जाणी करी बोल्लेया, “तुसां अपणे-अपणे मन अन्दर बुरा किजो सोच्चेया करदे हिन।”

⁵ असान कै है? ए बोलणा, तेरे पाप माफ होई गे, या ए बोलणा, उठ अते हन्ड़ फिर?

⁶ ताकि तुसा ए जाणी जाओ कि मणू रे पुत्तर, जे मैं ही है जो दुनिया पर पाप माफ करणे रा हक्क है तां तिन्हा ने अधरंग रे मरीज जो बोल्लेया, “उठ, अपणा पन्द चुक्क, अते अपणे घरे चली जा।”

⁷ से उठी करी अपणे घरां जो चली गेया।

⁸ मणू ए दिख्खी करी डरी गे अते परमेश्वर री महिमा करणा लग्गे जिनिये मणू जो इदेयी ताकत दित्ती।

यीशु रा मत्ती जो सद्देया जाणा

⁹ जिय्यां ही यीशु तित्ते का अग्गे बदधे उन्हा ने मत्ती नां रे इक्क मणू जो चुंगी लैणे वाली चौक पर बैठ्ठे रा दिख्खेया, अते तिसजो बोल्लेया, “मेरा चेल्ला बणी जा।” ते से उठी करी तिन्हेरे पीच्छे चली पेया।

¹⁰ फिरी इय्यां होया कि जां से मत्ती रे घरे रोट्टी खाणा बैठ्ठे रे थिये तां मते सारे चुंगी लैणे वाले अते पापी मणू आई करी यीशु अते तिन्हेरे चेल्‍लेयां कने रोट्टी खाणा बेई गे।

¹¹ ते जां फरीसियां ने ए दिख्खेया तां तिन्हा ने यीशु रे चेल्‍लेयां जो बोल्लेया, “तुसां रा गुरु चुंगी लैणे वालेयां कने अते पापियां कने रोट्टी किजो खाया करदा ए?”

¹² ए सुणी करी यीशु ने तिन्हा जो बोल्लेया, “वैद्द री जरुरत भले-चंगेयाँ जो नी पर मरीजाँ जो हुंदी।”

¹³ “पर तुसा जाओ अते इस गल्ल रा मतलब समझो, मैं कुर्बानी नी पर रहम चाह्‍ंदा किजोकी मैं भले अते नेक मणूआं जो नी, पर पापियां जो सदणे आये रा ए।”

ब्रत्त पर सवाल

¹⁴ तां बपतिस्मा दैणे वाले यूहन्ना रे चेल्‍ले यीशु का आई करी बोलणा लग्गे, “असी अते फरीसी इतणे ब्रत्त रखदे, पर तुसा रे चेल्‍ले ब्रत्त नी रखदे?”

¹⁵ यीशु ने तिन्हा जो बोल्लेया, “जां तांइ नौलाड़ा बरात्ती कने ए कै से दुखी होई सकदे?” पर से रोज भी आणा जां नौआ लाड़ा तिन्हा का बखरा कित्तेया जाणा, अते तिस बेल्ले तिन्हा ब्रत्त रखणे।

¹⁶ “पुराणे कपड़े पर नौये कपड़े री टल्ली कोई नी लगान्दा, किजोकी से टल्ली तिस कपड़े जो छिक्की लिन्दी, अते से पैल्ले का भी जादा फटी जान्दा।”

¹⁷ “ते ना ही पुराणे खलड़ू बिच नौआ अंगूर रा रस्स भरदे, किजोकी इय्यां करणे कने खलड़ू फटी जान्दे अते अंगूर रा रस्स रुड़ी जांदा ते खलड़ू बेकार होई जांन्दे पर नौये अंगूर रे रस्स जो नौये खलड़ू बिच भरदे अते दोनो ही बची रेह्न्दे।”

मरे री कुड़ी ते इक्क बिमार जनानी

¹⁸ जां से तिन्हा कने ए गल्लां करेया ही करदे थिये तां दिख्खो, यहूदी सभास्थल रा इक्क अधिकारी आया अते तिन्हा जो प्रणाम करी के बोलणा लग्गेया “मेरी कुड़ी अब्बे-अब्बे ही मरी, पर तुसा चली करी तिस पर अपणा हत्थ रख्खी दिंगे, तां तिसने जिन्दे होई जाणा।”

¹⁹ यीशु ते तिन्हेरे चेल्‍ले उठ्ठे अते तिसेरे पीच्छे चली पेह्।

²⁰ अते दिख्खो, इक्क जनानी ने जिस जो बारह साल्लां का खून चलणे री बीमारी थी, से पीच्छे का आई अते तिन्ने यीशु रे कपड़े रे कुणे जो छुह्ई लित्तेया।

²¹ किजोकी से अपणे मन अन्दर सोचदी थी, जे इन्हेरे कपड़े जो ही मैं छुह्ई लेयां तां ठीक होई जाणा।

²² यीशु ने मुड़ी करी तिसजो दिख्खेया अते बोल्लेया, “कुड़िये हिम्मत रख्ख तेरे विश्वास ने तिज्जो ठीक कित्तेया ते से जनानी तिस्सी बेल्ले ठीक होई गई।”

²³ जां यीशु तिस सभास्थल रे प्रधान रे घरे पूज्जे तां तिन्हा ने दिख्खेया कि मात्तम वाली धुन बजान्दे बौंसरी बजाणे वाले अते तित्ते इकट्ठा होये रे मणू कुड़ी री मौत पर रोला पाया करदे हिन,

²⁴ यीशु ने उन्हा जो बोल्लेया, “हटी जाओ! कुड़ी मरे री नी ए, पर सुत्ते री है।” इस गल्ल पर से मणू तिन्हेरा मजाक उड़ाणा लगे।

²⁵ पर जां मणूआं जो बाहर भेजी दित्तेया, तां यीशु ने अन्दर जाई करी कुड़ी रा हत्थ पकड़ी करी उठाया, ते कुड़ी जिन्दी होई गई।

²⁶ अते इस गल री चर्चा तिस इलाके बिच फैली गई।

दो अन्नेयां रा विश्वास

²⁷ जां यीशु तित्ते का अग्गे जाणा लग्गे तां दो अन्ने तिन्हेरे पीच्छे लेरां अते ए बोलदे-बोलदे चली पे, “ओ दाऊद री औलाद, असा पर तरस खा!”

²⁸ जां से घरां अन्दर पूज्जे तां से अन्ने तिन्हेरे का आये यीशु ने तिन्हा जो पूच्छेया, “क्‍या तुसा जो विश्वास ए कि मैं तुसा जो ठीक करी सकदा?” तिन्हा ने यीशु जो बोल्लेया, “हाँ, प्रभु जी, असा जो विश्वास!”

²⁹ तां यीशु ने तिन्हेरी हाख्खियां छुई करी बोल्लेया, “मेरे पर विश्वास करणे री वजह कने मैं तुसा जो ठीक करणा।”

³⁰ अते अन्नेया जो दिसणा लग्गी पेया, यीशु ने तिन्हा जो सावधान कित्तेया अते बोल्लेया, दिख्खो, ए कुस जो भी मत बोलदे।

³¹ पर तिन्हा ने तित्ते का जाई करी इस गल्ल जो उस इलाके बिच चारो पास्से फैलाई दित्तेया।

गुंगे मणू जो ठीक करणा

³² जां से अन्ने मणू ठीक होणे रे बाद हटेया करदे थिये, तां किच्‍छ मणू यीशु का इक्क दुष्टात्मा रे सताए रे मणू जो लेई करी आये जिस जो दुष्टात्मा ने जल्ला करी दित्ता थिया।

³³ अते जां यीशु ने तिस मणू बिच का दुष्टात्मा जो कड्डी दित्ता, तां से जल्ला बोलणा लग्गी पेया, इस गल्ल पर मणू हैरान होई करी बोलणा लग्गे, इस्राएल बिच इदेया कदी भी नी दिख्खेया।

³⁴ पर फरीसी मणू बोलणा लग्गे, ए तां दुष्टात्मा रे सरदार री मदत कने दुष्टात्मा जो कड्डदा।

मजदूर घट हिन

³⁵ तां यीशु अते तिन्हेरे चेल्‍ले गलीली जिले रे मते सारे सहर ते कस्बेयां बिच जाई करी मते सारे सभास्थल बिच उपदेस दिन्दे, परमेश्वर रे राज रे सुब बसेख रा प्रचार करदे, मणूआं री बीमारी अते हर तरह री कमजोरियां जो दुर करदे रे।

³⁶ अते मणूआं री भीड़ जो दिख्खी करी यीशु जो मणूआं पर तरस आया, किजोकी से उन्हा भेड़ां सांई थक्के रे अते बिखरे रे थिये जिन्हेरा कोई पुहाल नी थिया।

³⁷ तां यीशु ने अपणे चेल्‍लेयां जो बोल्लेया, पक्के री फसल तां बड़ी है पर मजदूर घट्ट हिन।

³⁸ इधेरे तांइ फसल रे मालक, परमेश्वर का प्रार्थना करो कि से अपणी फसल जो बढ़णे तांइ मजदूर भेजण।