मत्ती 12 - चम्बयाली नौआ नियम

सब्त रा दिन

¹ उस बेल्ले यीशु विश्राम दिन खेत्रां रस्ते का होई करी जाया करदे थिये, ते तिन्हेरे चेल्‍लेयां जो भूख्ख लग्गी ते से जगंली बीह् री फलियां जो तोड़ी-तोड़ी करी खाणे लग्गे।

² तां फरीसियां ने ए दिख्खी करी बोल्लेया, कि दिख्ख, तेरे चेल्‍ले से करेया करदे हिन जिसेरा विश्राम दिन करणा मूसा रे नियमां रे हिसाब कने ठीक नी है?

³ पर यीशु ने तिन्हा का पूच्छेया, कि कै तुसा ने पवित्रशास्त्र बिच ए नी पढ़ेया कि दाऊद अते तिन्हेरे मित्तरां ने, जां तिन्हा जो भूख्ख लग्गी थी, तां कै कित्ता थिया?

⁴ तिसने परमेश्वर रे तम्बू अन्दर जाई करी परमेश्वर जो चढ़ाये री रोटियां किय्यां खाई थी? जिन्हा जो खाणा ना तां तिसेरे तांइ अते ना तिसेरे साथियां तांइ, पर सिर्फ पुरोत्तां तांइ ठीक थिया।

⁵ या मूसा रे कानून बिच तुसा ए नी पढ़ेया कि विश्राम दिन मन्दिर रे पुरोत्त ही तिसेरी विधि जो तोड़दे हिन अते फिरी भी तिन्हा जो कोई किच्‍छ नी बोलदा।

⁶ पर मैं तुसा जो बोलदा, इत्ते कोई है जे मन्दिर का भी बधी करी है।

⁷ जे अगर तुसा पवित्रशास्त्र बिच लिख्खे री इन्हा गल्लां जो समजदे, “मैं लोक्कां बिच कुर्बानी नी पर दया भावना चांह्दा।” तां तुसा मेरे बेकसूर चेल्‍लेयां जो कुसूरवार नी बणांदे।

⁸ किजोकी मणू रा पुत्तर, जे मैं ही है, विश्राम दिन रा भी मालक है।

सुके हत्थ वाले मणू जो ठीक करणा

⁹ फिरी यीशु तित्ते का सभास्थल जो चली गे।

¹⁰ तित्ते इक्क मणू थिया, जिसेरा इक्क हत्थ सुक्कड़ीह् गे रा थिया तां मणूआं ने पुछ्‌छेया, मूसा री रीति रे हिसाब कने विश्राम दिन कुसकी जो खरा करणा, सही है? तिन्हा ने उन्हा का ए इधेरे तांइ पुछ्‌छेया ताकि से तिन्हा पर इल्जाम लगाई सकण।

¹¹ पर यीशु ने उन्हा जो जवाब दित्तेया, मन्नो, तुसा रे बिच का कुसकी का इक्क भेड़ हो, ते से भेड़ विश्राम दिन कुसकी गत्ता बिच जाई पेयो, तां कै तुसा तिसजो पकड़ी करी बाहर नी कड्डणा?

¹² तां फिरी इक्क मणू कुसकी भेड़ का तां बड़ा जादा कीमती है, इधेरे तांइ विश्राम दिन पर कुसकी जो ठीक करणा मूसा रे कानून रे हिसाब कने सही है।

¹³ तां यीशु ने तिस सुकड़ित्ते रे हत्थ वाले जो बोल्लेया, अपणा हत्थ अग्गे कर अते तिन्ने अपणा हत्थ अग्गे कित्तेया अते से खरा होई गेया ठीक तिय्यां ही जिय्यां तिसेरा दुज्जा हत्थ थिया।

¹⁴ फिरी फरीसी तित्ते का बाहर निकली आये अते यीशु जो मारणे तांइ कोई तरकिब सोच्चणा लग्गे।

परमेश्वर रा चुणे रा सेवक

¹⁵ पर यीशु ए जाणी गे अते तित्ते का चली गे बड़े भरी लोक्की तिन्हेरे पीच्छे चली पेह् अते यीशु ने तिन्हा सबनियां जो खरा कित्तेया,

¹⁶ अते तिन्हा जो समजाया कि मेरे जो प्रकट मत करदे।

¹⁷ ए इधेरे तांइ होया कि भविष्यद्वक्ता यशायाह रे जरिए प्रभु ने जे बोल्लेया थिया, से पूरा हो,

¹⁸ “दिख्खो, ए मेरा सेवक है; जिस जो मैं चुणे रा है ए मेरा प्यारा है, मैं इसका खुस है मैं तिसेरे उप्पर अपणी आत्‍मा रखणी अते तिसने गैर यहूदियां रे लोक्कां जो हिसाब-किताब रा सुब बसेख दैणा।

¹⁹ तिनिये ना तां लड़ाई-झगड़ा करणा अते ना ही लेरां मारणी, अते ना कुन्ने इसेरी अवाज गलियां बिच सूणनी।

²⁰ तिनिये झुके रे नलू सांई कमजोर मणू जो नी लताड़णा, तिसने बुझदे दीये सांई कमजोर मणू जो नी मारणा। ते तिसने लोक्कां रा इंसाफ करणा।

²¹ अते गैर यहूदी लोक्कां तिसेरी आस रखणी।”

यीशु ते दुष्टात्मां रा सरदार

²² फिरी मणू यीशु का इक्क अन्ने जो लियाये जे कि जह्ल्ला भी थिया किजोकी तिस बिच दुष्टात्मा थी यीशु ने तिसजो खरा करी दित्तेया, अते से अह्न्ना जह्ल्ला बोलणे अते दिखणे लग्गेया।

²³ अते सबणी मणूआं जो बड़ी हैरानी होई अते से बोल्णा लग्गे, कै ए मणू दाऊद रा पुत्तर होई सकदा?

²⁴ जां फरीसियां ने ए सूणेया तां से बोलणा लग्गे, ए तां दुष्टात्मा जो, दुष्टात्मां रे सरदार री मदत कने कड़दा।

²⁵ यीशु जो तिन्हेरे विचारां रा पता लग्गी गेया अते से तिन्हा जो बोलणा लग्गे, जिस राज बिच फूट पेई जांदी, से खत्म होई जांदा, अते जिस सहर या टब्बर बिच फूट पेई जाओ से नी टिकदा।

²⁶ अते जे अगर शैतान ही शैतान जो बाहर कड्डे तां से अपणे ही खिलाफ होई गेया तां फिरी तिसेरा राज किय्यां टिकी सकदा?

²⁷ भला जे अगर मैं दुष्टात्मां रे सरदार री मदत कने दुष्टात्मा जो कडदा तां तुसा रे चेल्‍ले कुसेरी मदत कने तिन्हा जो बाहर कडदे हिन? इधेरे तांइ तुसा रे चेल्‍लेयां ही ने तुसा रा फैसला करणा।

²⁸ पर जे मैं दुष्टात्मा जो पवित्रात्मा रे जरिए कडदा तां परमेश्वर रा राज तुसा का आई गे रा है।

²⁹ या किय्यां कोई ताकतवर मणू रे घरे घुसड़ी करी तिसेरे चोरी करी सकदा, जां तांइ से पैल्ले ताकतवर मणू जो बन्नी ना लै? तां ही से तिसेरा घर जो लूटी सकदा।

³⁰ जे मेरे कने नी हिन, से मेरे खिलाफ हिन अते जे बिखरियाँ भेड़ां जो इकट्ठा करणे बिच मेरी मदत नी करदा, से बिखेरेया करदा है।

³¹ इधेरे तांइ मैं तुसा जो बोल्दा, मणू रा हर इक्क पाप अते हर इक्क बेजती माफ कित्ती जाणी पर पवित्रात्मा री बेजती करणे वाले जो माफ नी कित्तेया जाणा।

³² अते जे कोई मणू रे पुत्तर, जे मैं ही है रे खिलाफ बिच बोलगा तिसजो माफ कित्तेया जाणा, पर जे कोई पवित्रात्मा रे खिलाफ बिच किच्‍छ बोलगा, तिसेरा ए गुनाह ना तां इस जुग बिच अते ना आणे वाले जुग बिच माफ कित्तेया जाणा।

बूट्टा ते तिसेरा फल्ल

³³ जे अगर इक्क बूट्टा खरा है तां तिसेरा फल्ल भी खरा ही होणा, पर जे अगर इक्क बूट्टा खराब है तां तिसेरा फल्ल भी खराब ही होणा, किजोकी बूट्टा अपणे फलां कने पछाणेया जांदा।

³⁴ तुसा जहरिल्ले कीड़े रे बच्चेयां सांई हिन! जे तुसा बुरे ही हिन तां ठीक गल्लां किय्यां करी सकदे हिन? किजोकी जे तिसेरे मन बिच है सेह्ई मुँह पर आंदा।

³⁵ इक्क खरा मणू जे अच्छाई तिसेरे दिल बिच है, तिस बिच का से ठीक ही गल्लां कडदा, अते बुरा मणू जे बुराई तिसेरे दिल बिच है, तिस बिच का बुरा गल्लां कडदा।

³⁶ पर मैं तुसा जो बोलदा मणू री हर इक्क फजूल गल्ल रा हिसाब तिसजो हिसाब-किताब वाले रोज्जे दैणा पैणा।

³⁷ तुसा री गल्लां रे हिसाब कने ही परमेश्वर ने तुसा जो सही या गलत साबित करणा।

स्वर्गीय निशानी री मांग

³⁸ तां किच्‍छ शास्त्रियां अते फरीसियां ने यीशु जो बोल्लेया, गुरु जी, असी तुसा का इक्क निशानी दिख्खणा चाह्‍ंदे।

³⁹ पर यीशु ने जवाब दित्तेया, ए बुरी अते व्यभिचारी पीढ़ी निशानी दिखणे री इच्छा रखदी, फिरी भी इन्हा लोक्कां जो योना भविष्यद्वक्ता जो दित्ती गेरी निशानी रे अलावा होर कोई निशानी नी दित्ती जाणी।

⁴⁰ किजोकी जिय्यां योना त्रै रोज्ज अते त्रै रात बड्डी मच्छी रे पेट्टा बिच रेया थिया, तिय्यां ही मणू रे पुत्तर, जे मैं ही है, भी त्रै रोज अते त्रै रात कब्र बिच रैह्णा।

⁴¹ हिसाब-किताब रे बेल्ले नीनवे रे मणूआं ने अज्ज री इस पीढ़ी रे मणूआं कने उठी करी उन्हा जो कसुरवार दस्सणा किजोकी नीनवे रे लोक्कां ने योना री उपदेस सुणी करी अपणे पाप्पां का तौबा कित्ती थी, अते इत्ते तां कोई योना का भी बड्डा है पर तुसा फिरी भी तौबा नी करदे।

⁴² हिसाब-किताब रे रोज्जे दक्षिण री राणी ने इस पीढ़ी रे लोक्कां कने उठी करी तिन्हा जो कसुरवार ठैहराणा, किजोकी से सुलैमान का ज्ञान री गल्लां सुनणे तांइ दुनिया रे दूए कुणे का आए री थी, अते दिख्खो, इत्ते तां कोई सुलैमान का भी बड्डा है, पर तुसा फिरी भी तौबा नी करदे।

⁴³ जां कोई दुष्टात्मा कुसकी मणू बिच का निकलदी, तां से अराम री तोप बिच सुकी जगाह् बिच भटकदी फिरदी रेह्न्दी, पर से तिसजो नी मिलदी।

⁴⁴ तां से अप्पु जो बोलदी, जिस मणू बिच का मैं निकली करी आई थी, तिस बिच ही हटी जांदी, अते जां से हटी करी तिस मणू री जिन्दगी जो अप्पु तांइ इक्क कमरे सांई खाली, साफ-सुथरी अते सजी सजाई पांदी।

⁴⁵ तां से दुष्टात्मा जाई करी अपणे कने होर जादा बुरी, होर सत्त दुष्टामां जो लेई आंदी, अते तिस मणू बिच रैह्णा लग्गी पैंदी, ते तिस मणू री हालत पैल्ले का भी जादा बुरी होई जांदी, अज्ज री इस बुरी पीढ़ी रे मणूआं री हालत भी इय्यां ही होणी।

यीशु रा सच्चा परिवार

⁴⁶ जां से मणूआं री भीड़ कने गल्लां करेया करदे थिये कि यीशु री मां अते भाई तित्ते आई करी बाहर खड़े होई गे अते से यीशु कने गल्ल करणे तांइ भालेया करदे थिये।

⁴⁷ अते कुसकी ने यीशु जो बोल्लेया, सुणो तुसा री मां अते भाई बाहर खड़ितेरे हिन ते तुसा कने गल्ल करणा चाह्‍ंदे हिन।

⁴⁸ ए सुणी करी यीशु ने उस बोलणे वाले जो जवाब दित्तेया, कुण है मेरी मां? कुण है मेरा भाई?

⁴⁹ अते अपणे चेल्‍लेयां पास्से हत्थ बद्धाई करी के बोल्लेया, दिख्खो, मेरी मां अते मेरे भाई हिन!

⁵⁰ किजोकी जे कोई मेरे परम-पिता री जे स्वर्ग बिच हिन मर्जी पूरी करदा, सेह्ई मेरा भाई, भैण अते मेरी मां है।