मत्ती 11 - चम्बयाली नौआ नियम

यीशु ते यूहन्ना बपतिस्मा दैणे वाला

¹ जां यीशु अपणे बारा चेल्‍लेयां जो हुकम देई दैणे का बाद से गलील प्रदेश रे सहरां बिच उपदेस अते प्रचार करणे जो तित्ते का चली गे।

² यूहन्ना ने जेल बिच मसीह यीशु रे कम्मां री खबर सुणी करी अपणे चेल्‍लेयां जो तिन्हा का ए पूच्छणे भेजेया,

³ कै तुसा ही से मसीह हिन जिस जो परमेश्वर ने भेजणे रा वादा कित्तेया थिया या असी कुसकी दूज्जे री भाल करण?

⁴ यीशु ने जवाब दित्तेया, कि जे किच्‍छ तुसा दिखदे सूणदे हिन, से सब किच्‍छ जाई करी यूहन्ना जो बोल्ली देयो।

⁵ कि अन्ने दिखदे हिन, अते अपाहिज हंडदे फिरदे हिन, कोढ़ी सुच्चे कित्ते जाया करदे हिन, अते टौणे सूणदे हिन, मुर्दे जिंदा होया करदे हिन, अते गरीबां जो सुब बसेख सुणाया जाया करदा है।

⁶ अते धन्न हिन से, जे मेरे पर शक ना करे।

⁷ जां यूहन्ना रे चेल्‍ले तित्ते का चली गे, तां यीशु यूहन्ना रे बारे बिच मणूआं जो बोलणा लगे, तुसा बणा बिच कै दिखणा गे थिये? कै ब्यार कने हिलदे नलू?

⁸ फिरी तुसा कै दिखणे गे थिये? दिखो, जे कीमती कपड़े पान्दे, से राजमहलां बिच रैहन्दे,

⁹ तां फिरी किजो गे थिये? कै कुसकी भविष्यद्वक्ता जो दिखणे गे थिये? हाँ, मैं तुसा जो बोलदा, बल्कि भविष्यद्वक्ता का भी बड्डे जो।

¹⁰ “ए से ही है, जिसेरे बारे बिच पवित्रशास्त्र बिच परमेश्वर ने बोल्ले रा है, ‘दिख्ख, मैं अपणे दूत जो तेरे अग्गे भेजदा, जे तेरे अग्गे तेरा रस्ता तैयार करणा।’”

¹¹ मैं तुसा जो सच बोलदा, लोक्कां बिच यूहन्ना बपतिस्मा दैणे वाले का बड्डा कोई पैदा नी होया, पर स्वर्ग रे राज बिच छोटा का छोटा मणू भी यूहन्ना का बड्डा है।

¹² जिस बेल्ले का यूहन्ना बपतिस्मा दैणे वाले ने प्रचार करणा सुरु कित्ते रा है तिस बेल्ले का अब्बे तांइ स्वर्ग रे राज बड़ा जादा बदेया करदा है, अते ताकतवर मणू तिस पर हमला करेया करदे हिन।

¹³ यूहन्ना रे आणे तक सारे भविष्यद्वक्तां री कताबां ते अते मूसा रे कानून बिच स्वर्ग रे राज बिच भविष्यवाणी हुंदी रेई,

¹⁴ ते जे अगर तुसा इस गल्ल जो मनणा चाओ तां मन्नो कि यूहन्ना ही एलिय्याह है जिसेरे आणे रे बारे बिच भविष्यवाणी कित्ती गयी थी।

¹⁵ जे सुनणा चाए, से ध्यान कने सुणे!

¹⁶ मैं इस जुग रे मणूआं री बराबरी कुस कने करां? से तिन्हा बच्चेयां सांई हिन, जे बजारा बिच बेई करी इक्क दूज्जे कने शिकायत करदे रैहन्दे

¹⁷ कि असा ने तुसा तांइ खुसी अंदर संगीत बजाया, पर तुसा नी नच्चे, असा ने मातम मनाया पर तुसा नी रोये।

¹⁸ तिय्यां ही यूहन्ना ना दूए लोक्कां सांई खान्दा अते ना पीन्दा थिया पर तुसा लोक्कां ने शिकायत कित्ती उस बिच दुष्टात्मा है,

¹⁹ मणू रा पुत्तर, जे मैं ही है, खान्दा-पीन्दा, पर मणू बोलदे, इस मणू जो दिख्खो, ए भूखान्ग ते पियक्कड़ है, ए चुंगी लैणे वाले अते पापियां रा मित्र है! पर तिसेरे कम्मां कने तिसेरी समजदारी सही साबित होए।

अविश्वास पर लाणत

²⁰ फिरी यीशु तिन्हा सहरां बिच रैह्णे वाले लोक्कां जो बकणा लगे जित्ते तिन्हा ने बड़े चमत्कार कित्ते थिये, पर तिसेरे बावजूद भी तिन्हा लोक्कां ने अपणे पाप्पां का तौबा नी कित्ती थी ते ना ही परमेश्वर रे रस्ते पर चलणा सुरु कित्तेया थिया।

²¹ लाणत है तुसा पर खुराजीन सहर बिच रैह्णे लोक्कों! लाणत है तुसा पर बैतसैदा सहर बिच रैह्णे लोक्कों! जे चमत्कारी कम्म तुसा बिच कित्ते गे, जे से सूर अते सैदा रे सहर बिच कित्ते जान्दे, तां टाट रे कपड़े लेई करी अते अपणे जिस्म बिच राख मली करी अवसोस करदे अपणे पाप्पां का तौबा करी लित्ते रा होणा थिया।

²² पर मैं तुसा जो बोलदा कि हिसाब-किताब होणे वाले रोज्जे तुसा री हालत सूर अते सैदा रे सहर री तिस हालत का भी बुरी होणी जां परमेश्वर ने तिन्हा जो दंड दित्तेया थिया।

²³ ओ कफरनहूम कस्बे रे लोक्को, तुसा कै सोचदे कि तुसा जो स्वर्ग री महिमा तक उच्चा उठाया जाणा? तुसा जो तां पताल तांइ नीच्चे सुट्टेया जाणा, किजोकी जे चमत्कारी कम्म तुसा लोक्कां बिच कित्ते गे, जे अगर से सदोम सहर बिच कित्ते जांदे, तां से कदी भी नास नी कित्तेया जांदा।

²⁴ पर मैं तुसा जो बोलदा कि हिसाब-किताब वाले रोज्जे तुसा री हालत सदोम सहर री तिस हालत का भी बड़ी जादा बुरी होणी जां परमेश्वर ने तिन्हा जो दंड दित्तेया थिया।

यीशु का अराम है

²⁵ तिस्सी बेल्ले यीशु ने बोल्लेया, ओ पिता, आसमान ते जमीन रे प्रभु, मैं तेरा शुकर करदा कि तुसा ने इन्हा गल्लां जो अते समजदार लोक्कां का लुकाई रखेया, पर आम लोक्कां पर जाहिर कित्तेया।

²⁶ हाँ, परम पिता ए इधेरे तांइ होया किजोकी तुसा जो ए ही खरा लग्गेया।

²⁷ मेरे परम पिता ने सब किच्‍छ मेरे हवाले करी दित्तेया, अते कोई पुत्तर जो नी जाणदा, सिर्फ परम पिता जाणदा अते कोई परम पिता जो नी जाणदा, सिर्फ पुत्तर जाणदा, अते हर इक्क से मणू परम पिता जो जाणदा, जिस पर पुत्तर तिसजो जाहिर करणा चाए।

²⁸ ओ सब मैह्नत करणे वालेयों अते बोझ कने दबितेरे मणूओं, मेरे का आओ मैं तुसा जो अराम दिन्गा।

²⁹ मेरा जुंगल अपणे उप्पर लेई लेयो, अते मेरे का सिख्खो किजोकी मैं सांत अते मन का दीन है: अते तुसा जो अपणी आत्‍मा बिच अराम मिलणा।

³⁰ किजोकी मेरा जुंगल असान अते मेरा बोझ हल्का है।