लूका 5 - चम्बयाली नौआ नियम

पैल्ले चेल्‍लेयां रा चुणेया जाणा

¹ जां भीड़ परमेश्वर रा वचन सुनणे तांइ यीशु रे उप्पर पेया करदी थी, ते से गन्नेसरत रे समुन्द्र रे किनारे पर खड़ित्ते रे थिये, तां इय्यां होया कि

² तित्ते तिन्हा ने दिख्खेया, मच्छी पकड़ने वाले अपणी किस्तियां जो कनारे पर लाई करी अपणे मच्छी पकड़ने वाले जाल्लां जो धोया करदे हिन।

³ मते मणू होणे री वजह कने यीशु तिन्हा दो किस्तियां बिच का इक्क पर चढ़ी गे जे शमौन री थी ते तिन्हा ने शमौन जो बोल्लेया, किस्ती जो कनारे का जरा कर अग्गे जो लेई चल ते से लेई गेया, अते फिरी यीशु किस्ती पर बेई करी मणूआं जो उपदेस दैणा लगे

⁴ जां यीशु मणूआं जो उपदेस देई बैठ्ठे, तां तिन्हा ने शमौन जो बोल्लेया, अपणी किस्ती जो डुग्गे पाणी पास्से लेई चल अते मच्छी पकड़ने तांइ अपणे जाल जो पाणी बिच पा।

⁵ शमौन ने तिन्हा जो जवाब दित्तेया, ओ मेरे मालक, असा सारी रात मच्छी पकड़ने तांइ बड़ी मैहनत कित्ती, पर किच्‍छ भी नी पकड़ी सके, फिरी भी जे तुसा बोल्लेया करदे हिन, तां मैं सिर्फ तुसा रे बोलणे पर दुबारा जाल पाई दिन्दा।

⁶ जिस बेल्ले तिन्हा ने यीशु रे बोलणे पर दुबारा जाल पाया, तां तिन्हा ने सच्ची अन्दर मती सारी मच्छियाँ पकड़ियाँ, अते से इतणी जादा थिया कि तिन्हेरे जाल ही फटणा लग्गी पये।

⁷ इन्नी देर अन्दर पतरस ने अपणे दोस्तां जो इसारा करी के सद्देया, कि आई करी असा रा हत्थ बटाओ, फिरी तिन्हा ने आई करी दोन्नां किस्तियां जो मच्छी कने इतणा जादा भरी लेया, कि तिन्हेरी किस्तियां डुबणा ही लग्गी पेई।

⁸ ए सब किच्‍छ दिख्खी करी शमौन पतरस यीशु रे पैरा पेई करी बोलणा लगेया, ओ प्रभु जी, मेरे का दुर चली जाओ, किजोकी मैं तां इक्क पापी मणू है।

⁹ किजोकी इतणी सारी मच्छियाँ रे पकड़िणे कने शमौन अते तिसेरे सारे मित्तरां जो बड़ी हैरानी होई

¹⁰ अते इय्यां ही जब्दी रे दोह्ई पुत्तर, याकूब ते यूहन्ना, भी हैरान होई गे। फिरी यीशु ने शमौन जो बोल्लेया, शमौन डरां मत, किजोकी जिय्यां तू मच्छी पकड़दा, तियां ही तैं अज्ज का बाद मणूआं जो परमेश्वर रे चेल्‍ले बणाया करणा।

¹¹ ते जिस बेल्ले से सब जणे कनारे पर आई गे, तां तिन्हा ने अपणा सब किच्‍छ छड्डी दित्तेया, अते यीशु रे पीच्छे चली पे

¹² जिस बेल्ले से कुसकी सहर अन्दर थिये, तां उत्ते इक्क कोढ़ी मणू आया, ते से यीशु जो दिख्खी करी मुँह रे भारे पेई गेया ते यीशु रे छंदे करणा लगेया, ओ प्रभु जी, जे तुसा चाण तां मेरे जो सुच्चा करी सकदे हिन।

कोढ़ रे रोगी जो ठीक करणा

¹³ यीशु ने अपणा हत्थ बधाई करी तिसजो छुत्तेया ते बोल्लेया, मैं चाह्‍ंदा कि तू ठीक होई जाये ते तिसेरा कोढ़ तिस्सी बेल्ले ठीक होई गेया।

¹⁴ यीशु ने तिसजो बोल्लेया, कुसकी जो भी ए मत बोलदा कि तिज्जो मैं खरा कित्ता, पर जाई करी अप्पु जो पुरोत्त का दिखा ते मूसा भविष्यद्वक्ता ने कुसकी कोढ़ी रे सुच्चा होणे तांइ जे भी कुर्बानी चढ़ाणे तांइ पवित्रशास्त्र बिच लिख्खे रा है, तिसजो चढ़ा, ताकि मणूआं जो भी पता लग्गे कि तू अवे खरा होई गेया है।

¹⁵ पर यीशु रे कम्मां री खप्प तां होर भी फैलणा लग्गी पेई, ते मते जणे मणू उन्हेरी गल्लां जो सुनणे तांइ अते अपणी बमारियाँ का खरा होणे तांइ यीशु का आणा लग्गी पे।

¹⁶ पर यीशु प्रार्थना करणे तांइ कह्ल्ले बियाबान जगाह् जो चुपचाप चली जान्दे थिये।

¹⁷ इक्क रोज इय्यां होया, यीशु मणूआं जो उपदेस देया करदे थिये ते फरीसी ते शास्त्रि मणू तित्ते बैठ्ठे रे थिये, जे कि गलील प्रदेश ते यहूदियां प्रदेश रे हर इक्क ग्रां अते यरुशलेम सहर का आये रे थिये, ते मणूआं जो खरा करणे तांइ प्रभु री ताकत यीशु कने थी।

अधरंग रे मरीज जो ठीक करणा

¹⁸ तिस बेल्ले मते जणे इक्क मणू जो, जे कि अधरंग रा मरीज थिया, बाणी वाले मन्ज्जे पर लटाई करी मणूआं री भीड़ रे बिच का यीशु रे बिल्कुल सामणे लेई जाणे री कोसीस करेया करदे थिये

¹⁹ पर जादा मणू होणे री वजह कने तिस मरीज जो यीशु का लेई जाणे तांइ रस्ता नी थिया, इधेरे तांइ से तिस मरीज जो लेई करी छत्ती पर जाई चढ़े अते बाणी वाले मन्ज्जे जो रस्सी कने बह्न्नी करी खपरैल जो हटाई करी तिसेरे बिच का, तिस मरीज जो यीशु रे मुहाग्गर उत्तारी दित्तेया

²⁰ यीशु ने तिन्हा मणूआं रे विश्वास जो दिख्खी करी तिस मरीज जो बोल्लेया, ओ मणूआं, मैं तेरे सारे पाप माफ करी दित्ते

²¹ यीशु री इन्हा गल्लां जो सुणी करी यहूदी शास्त्रि ते फरीसी अप्पु-मिते सोच-विचार करणा लगे, अप्पु जो परमेश्वर रे बराबर समजणे वाला, ए हुन्दा कुण? ए तां परमेश्वर री बेजती करेया करदा है, किजोकी परमेश्वर जो छड्डी करी, होर दुज्जा कोई पाप्पां जो माफ नी करी सकदा

²² पर यीशु तिन्हेरे मन री गल्ल जो समजी गे, ते तिन्हा जो जवाब दित्तेया, तुसा अपणे मन अन्दर इय्यां किजो सोचदे, मैं परमेश्वर री बेज्ज़ती करेया करदा है?

²³ कै ए बोलणा असान है, तेरे पाप माफ होई गे कि ए बोलणा, उठ अते हंड?

²⁴ पर इधेरे तांइ कि तुसा अवे ए जाणी जाण कि मणू रे पुत्तर, जे मैं ही है जो दुनिया पर पाप माफ करणे रा भी हक है फिरी यीशु ने अधरंग रे मरीज जो बोल्लेया, मैं तिज्जो बोलदा खड़िह् जा, अते अपणा पन्द चुक्की करी घरां जो चली जा

²⁵ तां से मणू तिस्सी बेल्ले सबणी मणूआं सामणे खड़ी गेया, ते जिस मन्ज्जे पर लेटे रा थिया, तिस्जो चुक्की करी परमेश्वर री बड़ाई करदा, अपणे घरे चली गेया।

²⁶ तां फिरी सब जणे हैरान होई गे ते परमेश्वर री बड़ाई करणा लगे अते बड़े वरी डरी गे अते बोलणा लगे, अज्ज असा ने इक्क अलग ही नजारा दिख्खेया

²⁷ इसेरे बाद से तित्ते का बाहर चली गे ते तिन्हा ने दिख्खेया, इक्क चुंगी लैणे वाला मणू अपणी चुंगी वसूल करणे वाली चौकी पर बैठ्ठे रा ए, तिसेरा नां लेवी थिया यीशु ने तिसजो बोल्लेया, आ, अते मेरा चेल्ला बणी जा।

लेवी रा सद्देया जाणा

²⁸ ए सूणदे ही लेवी खड़ा होई गेया ते सब कम्म छड्डी करी यीशु रा चेल्ला बणी गेया

²⁹ फिरी लेवी ने अपणे घरे यीशु तांइ इक्क धाम रख्खी, अते तित्ते चुंगी लैणे वाले ते होर भी मते मणू थिये जे यीशु कने धाम खाया करदे थिये

³⁰ तां फरीसी ते यहूदी शास्त्रि, यीशु रे चेल्‍लेयां कने सिकाइत करणा लगे, तुसा यहूदी होई करी चुंगी लैणे वाले ते पापी मणूआं कने किय्यां खाणा-पीणा बेई जान्दे?

³¹ यीशु ने तिन्हा जो जवाब दित्तेया, जिय्यां मरीजाँ जो ही हकीम अते वैद्दां री जरुरत हुंदी, ते जे भले-चन्गे हिन, तिन्हा जो नी, तिय्यां ही पापी मणूआं जो ही पाप माफ कराणे री जरुरत है ना कि भले अते नेक मणूआं जो

³² पर, मैं तिन्हा लोक्कां तांइ नी आया, जे कि भले अते नेक हिन, पर पापियां जो तिन्हेरे पाप्पां का तौबा कराणे तांइ तिन्हा जो सद्दणे तांइ आये रा है

³³ यहूदी शास्त्ररियां ने यीशु जो बोल्लेया, यूहन्ना ते फरीसियां रे चेल्‍ले प्रार्थना करदे अते ब्रत्त भी रखदे पर तुसा रे चेल्‍ले तां हर बेल्ले खांदे-पिन्दे ही रैह्‍न्दे।

ब्रत पर सवाल

³⁴ यीशु ने तिन्हा जो बोल्लेया, जिस बेल्ले तांइ नौआ लाड़ा ब्रातियां कन्ने हो, ब्राति भूख्खे नी रैह्‍न्दे

³⁵ पर इदेय रोज भी आणे, जिन्हा अन्दर नौआ लाड़ा ब्रातियां का बखरा करी दित्तेया जाणा, तां तिन्हा रोज्जे ब्रातियां ने अप्पु ही ब्रत्त रख्खी लेया करणे

³⁶ यीशु ने तिन्हा जो इक्क होर उदारण दित्तेया, कोई भी मणू नौए कपड़े री टल्ली फाड़ी करी पुराणे कपड़े जो खरा करणे तांइ तिस बिच नी लान्दा, किजोकी जे कोई इय्यां करगा तां, से नौआ कपड़ा तां खराब होणा ही होणा, ते तिस नौए कपड़े री टल्ली ने पुराणे कपड़े कने कोई मेल भी नी खाणा

³⁷ अते कोई भी मणू नौए अंगूर रे रस्स जो पुराणे खलड़ू अन्दर नी भरदा, नी ता नौए अंगूर रे रस्स ने तिस्स पुराणे खलड़ू जो फाड़ी दैणा अते अंगूर रा रस्स ने रुड़ी करी बाहर आई रैह्णा, ते खलड़ू भी कुसकी कम्मे रा नी रैह्णा,

³⁸ पर नौए अंगूर रा रस्स जो नौए खलड़ू अन्दर ही भरणा चाएदा

³⁹ अते जिस मणू रे मुँहा पुराणे अंगूर रा रस्स रा सुआद लग्गी जाओ, तिसजो नौआ अंगूर रा रस्स खरा नी लगदा, किजोकी तिन्हा बोलणा, पुराणा अंगूर रा रस्स खरा थिया।