लूका 23 - चम्बयाली नौआ नियम

पिलातुस रे सामणे यीशु

¹ तिस बेल्ले सारी सभा रे मणू यीशु जो पकड़ी करी पिलातुस राजपाल का लेई गे।

² से पिलातुस रे अग्गे यीशु पर इल्जाम लगाणा लगे, कि ए यहूदी मणूआं जो भड़काया करदा है, अते तिन्हा जो सम्राट जो चुंगी दैणे जो मन्हा करेया करदा है, अते असा ने इसजो अप्पु जो यहूदियां रा राजा कने मसीह यीशु बोलदा भी सूणेया है

³ तां पिलातुस ने यीशु का पूच्छेया, कै तू यहूदी लोक्कां रे राज्जा है? यीशु ने तिसजो जवाब दित्ता, तू अप्पु ही तां बोलदा कि मैं यहूदियां रा राज्जा है

⁴ इस गल्ल पर पिलातुस ने बड्डे पुरोत्त अते मणूआं जो बोल्लेया, मेरे जो इस मणू पर कोई भी बुराई नजर नी आया करदी है

⁵ पर से होर भी जोर पाणा लगे अते बोलणा लगे, ए सारे यहूदियां बिच मणूआं जो अपणी उपदेस देई करी तिन्हा बिच दंगे करदा है अते ए सब किच्‍छ इन्ने गलील प्रदेश का सुरु कित्तेया थिया।

⁶ ए सुणी करी पिलातुस ने मणूआं का पूच्छेया, कै ए गलील प्रदेश रा रैह्णे वाला है?

⁷ फिरी पिलातुस जो पता लगेया, कि ए गलील प्रदेश रा है तां तिन्ने यीशु जो हेरोदेस अन्तिपास का भेजी दित्ता, किजोकी से तिस बेल्ले यरुशलेम सहर बिच थिया।

⁸ हेरोदेस ने जां यीशु जो दिख्खया तां से बड़ा खुस होया किजोकी से बड़े रोज्जा का तिन्हा जो दिखणा चाह्‍ंदा थिया, से इधेरे तांइ दिखणा चाह्‍ंदा थिया, किजोकी तिन्ने यीशु रे बारे बड़ा किच्‍छ सुणे रा थिया, अते से यीशु जोरे चमत्कारी कम्म दिखणे री आस बिच थिया।

हेरोदेस रे सामणे यीशु

⁹ तिसने यीशु का बड़े सवाल कित्ते, पर यीशु ने तिसेरे कोई भी सवाल रा जवाब नी दित्ता

¹⁰ बड्डे पुरोत्त अते शास्त्रि ने तित्ते भी यीशु पर इल्जाम लगाणे तांइ कोई कसर नी छडी

¹¹ हेरोदेस ने भी अपणे सपाईयां समेत तिन्हेरी बेजती कित्ती अते तिन्हेरा मजाक उड़ाया, अते यीशु जो चटकीले रांग रे कपड़े पुआई करी वापस पिलातुस का भेजी दित्ता।

¹² तिसी ही रोज पिलातुस अते हेरोदेस दोस्त बणी गे, हलांकि से इसका पैले इक्क दूज्जे रे दुश्मण थिये।

पिलातुस रा यीशु जो मौत री सजा दैणा

¹³ फिरी पिलातुस ने बड्डे पुरोत्त अते यहूदी मणूआं जो ते सरदारा जो, सद्देया, ते तिन्हा जो बोल्लेया।

¹⁴ तुसा इस मणू जो मेरे का लेई आए कि ए मणूआं जो दंगे करवाणे तांइ भड़कान्दा, मैं इस बारे बिच तुसा रे सामणे तिसजो जाँचे परखेया अते जे तुसा इल्जाम लगाया करदे हिन इदेया किच्‍छ भी मैं इस पर नी दिखदा,

¹⁵ ना ही हेरोदेस ने दिख्खेया, किजोकी तिन्ने इसजो वापस असा का भेजी दित्ता जिय्यां कि तुसा दिखदे कि इसने इदेया किच्‍छ भी नी कित्तेया कि इसजो मौत री सजा दित्ती जाए।

¹⁶ इधेरे तांइ मैं इसजो बेंत कने कुटवाई करी छडी दिन्दा।

¹⁷ पिलातुस त्याहार रे दिना यहूदी लोक्कां तांइ इक्क कैदी जो छडदा हुंदा थिया।

¹⁸ तां सारे मिली करी जोरे जोरे बोलणा लगे असा रे तांइ बरअब्बा जो छडी देयो जे कुसी झगड़े री वजह कने जे सेह्रा बिच् होया थिया ते खून करणे री बजाह् कने जेल बिच थिया

¹⁹ बरअब्बा जो सहर बिच लड़ाई झगड़े अते जान लैणे रे इल्जाम अन्दर जेला बिच पाए दा थिया

²⁰ पिलातुस यीशु जो छडी दैणा चाह्‍ंदा थिया इधेरे तांइ तिन्ने मणूआं जो फिरी समजाया

²¹ पर मणू होर जोरे जोरे लेरां मारी करी बोलणा लगे, इसजो सुली पर चढ़ाई देयो

²² पिलातुस ने मणूआं का तिज्जी वरी पूच्छेया, इस मणू री कै गलती है? मेरे जो इसेरे खिलाफ कोई इदेयी गल्ल नी लिब्बी जे मैं इसजो मौत री सजा देयां इधेरे तांइ मैं इसजो बेत लगवाई करी छडी दिन्दा

²³ पर मणू होर जोरे जोरे लेरां मारी करी अपणी गल्ल जो मनवाणा लगे कि इसजो सुली पर चढ़ाई देयो अते इय्यां होया कि तिन्हेरी मरजी पूरी होई गई

²⁴ अते पिलातुस ने हुकम दित्ता कि ए जिय्यां चाह्‍ंदे तिय्यां ही हो

²⁵ पिलातुस ने तिस मणू जो छडी दित्ता जे लड़ाई झगड़े अते जान लैणे रे इल्जाम अन्दर जेला बिच पाए दा थिया, अते यीशु जो तिन्हेरी मरजी रे मुताबिक तिन्हा का देई दित्ता।

यीशु रा सुली पर चढ़ाया जाणा

²⁶ जां से यीशु जो लेई चले तां तिन्हा ने कुरेन रे रैणे वाले शमौन नां रे इक्क मणू जो, जे अपणे ग्रां का आया करदा थिया, तिसजो पकड़ी लेया अते तिस पर सुली जो लदी दित्ता अते उस्स जो यीशु रे पीच्छे-पीच्छे चलणे जो बोल्लेया।

यीशु रा सुली पर चढ़ाया जाणा

²⁷ अते तिन्हेरे पीछे बडे़ वरी लोक्की चले दे थिये अते तिन्हा बिच किच्‍छ जनानियां भी थिया जे कि यीशु तांइ रुन्दी अते छाती पिटदिया चले री थियां

²⁸ यीशु ने तिन्हा जनानियां पास्से मुड़ी करी दिख्खेया अते बोल्लेया, यरुशलेम री जनानियों, मेरे तांइ मत रो, बल्कि जे गल्लां अग्गे चली करी होणे वाली हिन तिस वजह कने खुद अपणे तांइ कने अपणे बच्चेयां तांइ रो।

²⁹ किजोकी इदेया मुस्किल बेल्ला आणे वाला है, जां मणूआं ने बोल्णा, से जनानियां बड़ी भाग्गा वालियां हिन, जे ओत्तर हिन कने से भी बड़ी भाग्गा वाली हिन जिन्हेरी कोख खाली है से स्तन धन्न हिन जिन्हा दूद्द नी पियाया हो।

³⁰ तिस बेल्ले मणूआं ने बोल्णा, कि पहाड़ असा रे पर आई पेयो अते फाटियाँ असा जो दबी दे।

³¹ किजोकी जां से हरे बूट्टे कने इय्यां करदे तां से सूक्के बूट्टे कने कै किच्‍छ नी करगे?

³² दो होर मणू, जे दोई ही बदमाश थिये, सिपाई तिन्हा जो भी पकड़ी करी यीशु रे कने मौत री सजा दैणे तांइ लेई चले दे थिये।

³³ फिरी जां से तिस जगाह् पर आई रे जिस जो खोपड़ी बोलदे, अते तिन्हा ने त्रै जणेया जो सुली पर चढ़ाई दित्ता इक्क बदमाश यीशु रे खब्बे हात्थाँ पास्से थिया अते दुज्जा सज्जे हात्थाँ पास्से थिया।

³⁴ तां यीशु ने बोल्लेया, ओ परम पिता, इन्हा जो माफ करेयां किजोकी ए नी जाणदे कि ए कै करेया करदे हिन फिरी सपाईयां ने यीशु रे कपड़े तांइ परचियाँ पाईयाँ अते यीशु रे कपड़े आपस बिच बन्डी लै।

³⁵ मणू खड़ी करी दिख्खेया करदे थिये, ते लोक्कां रे हाकिम भी मजाक उड़ाई करी बोल्लेया करदे थिये इन्ने दूए लोक्कां जो बचाया, जे अगर से परमेश्वर रा मसीह यीशु है ते तिन्हा रा चुणे रा है, तां अप्पु जो बचाई लै।

³⁶ सपाईयां ने भी यीशु रा मजाक उड़ाया तिन्हा ने यीशु जो सिरके रा रास्स चुसाया, अते बोल्लेया।

³⁷ जे तू यहूदी लोक्कां रा राज्जा है, तां अप्पु जो बचाई लै

³⁸ यीशु रे सुली रे उप्पर लिखी दित्ता कि ए यहूदी लोक्कां रा राज्जा है।

सुली पर मन फिराणे वाला मणू

³⁹ सुली पर चढ़ाए रे बदमाशाँ बिच का इक्क यीशु री बेजती करी के बोलणा लगेया, कै तू मसीह यीशु नी है? जे है तां असा जो कने अप्पु जो बचाई लै।

⁴⁰ पर दुज्जा बदमाश तिसेरे खिलाफ होई करी बोलणा लगेया, कै तू परमेश्वर का नी डरदा? तू भी तां से ही सजा भोग्या करदा।

⁴¹ असा ने जे भी बुरे कम्म कित्ते तिधेरी सजा असा जो मिलया करदी है पर इस मणू ने तां इदेया किच्‍छ भी नी कित्तेया।

⁴² फिरी तिन्ने बोल्लेया, यीशु जां तुसा अपणे स्वर्ग रे राज बिच ‍जांगे तां मेरे जो जरुर याद रखेयो।

⁴³ यीशु ने तिसजो बोल्लेया, मैं तिज्जो सच बोल्दा, अज्ज ही तू मेरे कने स्वर्ग-लोक बिच होणा।

यीशु रा मरणा

⁴⁴ तिस बेल्ले धियाड़ी रे बारा बजे थिये अते तिस बेल्ले का लेई करी तीन्न बजे तांइ पूरी दुनिया बिच न्याहरा होई गेया।

⁴⁵ अते सूरज री लौ जान्दी रेई अते तित्ते मन्दिर रा परदा फटी गेया।

⁴⁶ अते यीशु ने जोरे सणे बोल्लेया, ओ परम पिता, मैं अपणी आत्‍मा तुसा बिच दिन्दा अते बोल्ली करी यीशु ने अपणे प्राण देई दित्ते।

⁴⁷ तां रोमी सपाईयां रे हिसाब ने जे किच्‍छ भी होया थिया तिसजो दिख्खेया अते परमेश्वर री तारिफ करदे बोल्लेया पक्का ए इक्क धार्मिक मणू थिया।

⁴⁸ कने तित्ते आए रे मणू भी ए सब किच्‍छ दिख्खी करी अपणी छाती पिटदे-पिटदे वापस अपणे घरे हटी गे।

⁴⁹ पर यीशु रे सब जाण-पछाण वाले अते गलील प्रदेश का आए दी जनानियां भी, जे कि गलील का यीशु रे पीछे पीच्छे आई थिया, तित्ते का थोड़े दुर खड़े होई करी इन्हा सब गल्लां जो हुंदे दिख्खेया।

यीशु रा दब्बेया जाणा

⁵⁰ तित्ते यूसुफ ना रा यहूदी महासभा रा इक्क बन्दा थिया, से बड़ा खरा मणू थिया।

⁵¹ से तिन्हेरे इस कम्म कने राजी नी थिया, अते ना ही इस कम्म तांइ से यहूदी लोक्कां रे इक्क सहर अरिमतिया रा रैणे वाला थिया अते से परमेश्वर रे राज री भाल अन्दर थिया।

⁵² से मणू पिलातुस का गेया अते तिन्ने तिसका यीशु री लास जो मन्गेया ताकि से तिन्हा जो दबाई सकण।

⁵³ तिसने यीशु जो सुली का थल्ले उतारेया अते सन रे कपड़े बिच लेपेटी दित्ता फिरी तिसी ने यीशु जो सपड़ जो कट्टी करी बणाई गे री कब्र बिच रख्खी दित्ता, जिस बिच इसका पैले कुसकी जो भी नी रख्खेया गेया थिया।

⁵⁴ अते से रोज तयारी रा दिन थिया ते विश्राम दिन रे दिन सुरु होणे वाला थिया।

⁵⁵ से जनानियां जे गलील का यीशु कने आई थी, से यूसुफ रे पीच्छे-पीच्छे चली पेई, अते तिन्हा ने से कब्र दिख्खी, अते दिख्खया कि यीशु री लास जो कुते रख्खे दा है।

⁵⁶ फिरी से घरां जो हटी आई अते तिन्हा ने यीशु रे सरीर पर मलणे तांइ खुशबू वाली चीजां कने इत्र रा लेप तैयार कित्तेया। अते तिय्यां ही विश्राम दिन वाला रोज आई गेया अते तिन्हा ने मूसा रे कानून रे हिसाब कने तिस रोज अराम कित्ता।