लूका 22 - चम्बयाली नौआ नियम

यीशु रे खिलाफ चाल

¹ फसह रा त्याहार आणे वाला थिया, इस त्योहर जो खमीरी रोट्टी रा त्योहर भी बोलदे

² उत्ते बड्डे पुरोत्त अते शास्त्रि यीशु जो मारणे री ताक बिच थिये पर से मणूआं का डरदे थिये।

यहूदा रा धोखा दैणा

³ तां शैतान यहूदा इस्करियोती चेल्‍ले रे सरीर बिच चली गेया ए यीशु रे बारा खास चेल्‍लेयां बिच का इक्क थिया

⁴ तिन्ने जाई करी बड्डे पुरोत्त अते सभास्थल रा पैह्रा दैणे वालेयां रे प्रधाना कने मिली करी सलाह कित्ती कि से यीशु जो तिन्हा का किय्यां पकडवाई सकदा

⁵ यहूदा री ए गल्ल तिन्हा जो बड़ी छैल लग्गी अते तिन्हा ने तिसजो ईनाम दैणे रा वादा भी कित्ता

⁶ यहूदा भी इस गल्ल तांइ तैयार होई गेया, अते यीशु जो पकड़वाणे तांइ भाह्ना तोपणा लगेया, कि जां से किल्ले होण तां से तिन्हा जो पकड़वाई सको

⁷ तां फिरी अखमीरी रोट्टी रा त्योहर आया, जिस अन्दर छेल्लू री कुर्बानी दिन्दे थिये।

चेल्‍लेयां कने फसह रा आखरी धाम

⁸ यीशु ने पतरस अते यूहन्ना जो फसह री रोट्टी री तयारी करणे तांइ ए बोल्ली करी अग्गे भेज्जेयाअसां रे खाणे तांइ फसह री रोट्टी री तैयार करी करो

⁹ तिन्हा ने यीशु का पूच्छेया कि, असी कुस जगाह् पर फसह री धाम रखण?

¹⁰ यीशु ने पतरस अते यूहन्ना जो बोल्लेया, दिख्खो, यरुशलेम सहर अन्दर पुजदे ही तुसा जो इक्क इदेया मणू मिलणा जिनिये इक्क पाणी री गागर चुक्केरी होणीe, से जिस भी घरां अन्दर जांह्ग्गा, तुसा भी तिस्सी घरां अन्दर चली जाए

¹¹ अते तिस घर रे मालक का पूच्छी लै कि, गुरु जी ने तेरे का पूच्छेया है कि से परौणे वाला कमरा कुदे है, जिस अन्दर तिन्हा ने अपणे चेल्‍लेयां कने बेई करी फसह री रोट्टी खाणी है?

¹² तिन्ने तुसा जो इक्क बड्डा कमरा दसणा, जे पैल्ले रा ही सजाए दा होणा, तुसा तित्ते ही धाम री तयारी करेयो

¹³ फिरी से दोई यरुशलेम जो चली गे, अते तिन्हा ने दिख्खेया कि सब किच्‍छ तिय्यां ही है, जिय्यां कि यीशु ने उन्हा जो बोल्ले रा थिया, फसह री रोट्टी तयारी कित्ती।

प्रभु री धाम

¹⁴ फिरी जां से बेल्ला आया तां यीशु अपणे बारा प्रेरितां कने फसह री धाम खाणे जो बेई गे।

¹⁵ यीशु ने तिन्हा जो बोल्लेया, मेरी बड़ी मरजी होए री थी कि मैं मुसीबतां सैह्णे ते मरणा का पैल्ले अपणे प्रेरितां कन्ने फसह री रोट्टी खाँ,

¹⁶ किजोकी मैं तुसा जो बोल्ली दिन्दा कि जां तांइ परमेश्वर रे राज पूरी तरिक्के कने ना आई जाए, तां तांइ, मैं इसजो दुबारा नी खाणा है।

¹⁷ फिरी यीशु ने अंगूर रे रास्स रा कटोरा लित्तेया अते परमेश्वर रा सुक्र कित्ता अते अपणे चेल्‍लेयां जो बोल्लेया, कि इसजो अप्पु-मिते बंड्डी लेयो।

¹⁸ किजोकी आज का बाद, जां तांइ परमेश्वर मणूआं पर राज नी करी लिन्दा, तां तांइ, मैं अंगूर रा रस्स नी पीणा है

¹⁹ फिरी यीशु ने रोट्टी जो पकड़ी करी परमेश्वर रा सुक्र कित्ता अते तोड़ी करी चेल्‍लेयां जो देई दित्ती अते बोल्लेया कि, ए मेरा जिस्म है, जे तुसा तांइ दित्ता गे रा है: मेरे जो याद करणे तांइ तुसा इय्यां ही करेया करो

²⁰ इय्यां ई, यीशु ने रोट्टी खाणे का बाद अंगूर रे रास्स रा कटोरा चुक्केया अते अपणे चेल्‍लेयां जो बोल्लेया, ए अंगूर रास्स परमेश्वर री तरफ का, ए मेरे खून बिच इक्क नौई वाचा है जे तुसा तांइ बहाया जादां।

²¹ पर, आज असा रे बिच से मणू भी बेई करी रोट्टी खाया करदा है, जिनिये मेरे जो पकड़वाणा है

²² मणू रे पुत्तर, जे मैं ही है जो तां परमेश्वर रे वचन रे हिसाब कने तां मरणा जरुरी है, पर, लाणत है तिस पर जिसेरे जरिए से पकड़ाया जाणा

²³ तां फिरी से बारा चेल्‍ले अप्पु-मिते इक्क दूए का पूच्छणा लगे कि असा बिच का इदेया कुण हुणा जे ए कम्म करी सकदा?

महान कुण? पर बैह्स-बाजी

²⁴ फिरी तिन्हा अन्दर इस गल्ल री बैह्स चली पेई कि असा बिच का सबका बड्डा कुस जो मन्नया जान्दा?

²⁵ यीशु ने तिन्हा जो बोल्लेया, कि गैर यहूदियां रे राज्जे तिन्हा पर राज करदे, अते जे तिन्हा पर अपणा हक्क भी जमान्दे अते से अप्पु जो तिन्हा रे मित्र भी बुलवाणा चाह्‍ंदे।

²⁶ पर तुसा जो तां इय्यां बिल्कुल भी नी करणा चाएदा, तुसा बिच जे सबणी का बड्डा है तिसजो सबणी का निमता बणी करी रैह्णा चाएदा अते जे सबणी रा प्रधान है, तिसजो तां इक्क नौक्कर सांई बणी करी रैह्णा चाएदा

²⁷ तुसा अप्पु सोच्चो कि जे मणू मेज पर रोट्टी खाणा बैठ्ठे रा हो, से बड्डा हुन्दा कि जे मणू तिसजो रोट्टी खुआया करदा हो, से? बड्डा तां से ही हुन्दा जे मेज पर बेई करी रोट्टी खादां पर, मैं भी तां तुसा कने इक्क नौक्कर सांई रैहन्दा

²⁸ तुसा से हिन जे मेरी परखे जाणे रे बेल्ले मेरे कन्ने रेय

²⁹ कने जिय्यां मेरे पिता-परमेश्वर ने मेरे जो राज करणे तांइ इक्क प्रदेश दित्ते दा है, तिय्यां ही मैं भी तुसा जो राज करणे तांइ इक्क प्रदेश पर पूरा हक्क दिन्दा

³⁰ ताकि तुसा मेरे राज अदंर मेरे मेज पर बेई करी मेरे कन्ने रोट्टी खाण अते सिंहासनां पर बेई करी इस्राएल रे बारा गोत्रां रे मणूआं रा फैसला करण।

पतरस रे मन्हा करणे रे बारे बिच भविष्यवाणी

³¹ ओ शमौन, चुकन्ने रेयो, किजोकी ने शैतान ने परमेश्वर का ए अनुमती मंगे री है कि से तुसा परखे ताकि तुसा मुसीबत बिच पेयो ते तुसा रा जे विश्वास मेरे अंदर है तिसजो हिलाए दीये जिय्यां किसान कणक जो छटकारदा।

³² पर मैं तेरे तांइ परमेश्वर का प्रार्थना कित्ती कि तेरा विश्वास टुटी ना जाओ अते जां तू फिरी तौबा करी हटणा तेरे भरोसे जो दिख्खी करी तेरे संगी विश्वास भ्यालां रा भी होंसला होई जाओ।

³³ इस गल्ल पर शमौन ने यीशु जो बोल्लेया, ओ प्रभु जी, मैं तुसा कने जेल जाणे जो अते होर तां होर मरणे जो भी तैयार है।

³⁴ फिरी यीशु ने बोल्लेया, पतरस, मैं तिज्जो बोल्ली दिन्दा कि आज मुर्गे ने तां तांइ बांग नी दैणी जां तांइ तू मेरे जो पछियानणे का तीन्न वरी मुक्करी नी जांगा।

बटुआ, झोली ते तलवार

³⁵ तां यीशु ने तिन्हा का पूच्छेया, कि जां मैं तुसा जो बगैर बटुए, बगैर झोले अते बगैर बूट रे सुब बसेख सुनाणे तांइ भेज्जेया थिया, तां तुसा जो कुसकी चीज रा घाट्टा होया थिया? तिन्हा ने जवाब दित्ता, कि ना, कुसकी भी चीज रा घाट्टा नी पेया थिया।

³⁶ फिरी यीशु ने बोल्लेया, अवे हालात अलग होणे इधेरे तांइ जिस का बटुआ अते झोली होण, से तिन्हा जो अप्पु कन्ने लेई चलो अते जिस का तलवार नी है, से अपणे चोग्गे जो बेच्ची करी इक्क तलवार भी लेई लेयो।

³⁷ किजोकी मैं तुसा जो बोल्ली दिन्दा, कि पवित्रशास्त्र अन्दर मेरे बारे अन्दर लिख्खे री गल्ल अवे पूरी होणे वाली हिन “कि तिसजो अपराधियां बिच गिणेया गेया,” अते मेरे बारे अन्दर होर जितणी भी गल्लां उस अन्दर लिख्खे री हिन, से इक्क-इक्क करी के सब पूरी होया करदी हिन।

³⁸ चेल्‍लेयां ने बोल्लेया, ओ प्रभु जी, दिख्खो, असा का दो तलवारां हिन, यीशु ने बोल्लेया, इन्नी ही बड़ी हिन।

जैतून रे पहाड़ पर यीशु री प्रार्थना

³⁹ तां यीशु तित्ते का जैतून नां रे पहाड़ा पर चली गे, जिय्यां कि से हर वरी जांन्दे थिये अते तिन्हेरे चेल्‍ले भी तिन्हा कन्ने चली पे

⁴⁰ तित्ते पूज्जी करी यीशु ने चेल्‍लेयां जो बोल्लेया, कि प्रार्थना करदे रेयो कि परखे ना जाओ

⁴¹ फिरी यीशु चेल्‍लेयां का थोड़े अग्गे चली गे, जितणी दुर तांइ इक्क पत्थर सूटी सकदे थिये, तितणि दुर जाई करी जाह्न्नु रे भारे बेई करी परमेश्वर कने प्रार्थना करणा लगे,

⁴² कि ओ परम पिता जी, अगर तुसा चाह्‍ंदे तां इस दुख रे कटोरे जो मेरे का दुर हटाई देयो, पर, फिरी भी मैं चाह्‍ंदा कि जे तुसा री मरजी है से ही पूरी हो ना की मेरी मरजी पूरी हो

⁴³ तां स्वर्ग का इक्क स्वर्गदूत सामणे आई रेया अते तिन्ने यीशु जो सैह्णे री ताकत दित्ती

⁴⁴ अते यीशु बडे़ भरी बेचैन होई गे अते होर भी जादा वरी मन कने प्रार्थना करणा लग्गी पे तिन्हेरा पसिना इय्यां निकलदा थिया जिय्यां खून री बुदां जमीन पर पेय करदी हो

⁴⁵ तां से प्रार्थना का उठे ते अपणे चेल्‍लेयां का आई करी तिन्हा जो उदास होई करी सुत्ते रा दिख्खेया

⁴⁶ यीशु ने तिन्हा जो बोल्लेया, तुसा सोई किजो गेरे हिन? उठी जाओ अते प्रार्थना करो, ताकि परखे ना जाओ।

यीशु रा धोखे कने पकड़ाया जाणा

⁴⁷ यीशु हल्ले गल्ल करेया ही करदे थिये कि तित्ते मते जणे मणू आई रे अते बारा चेल्‍लेयां बिच का इक्क जिसेरा ना यहूदा थिया से तिन्हा सबणी का अग्गे चले दा थिया से यीशु रे नेड़े जाई खड़ितेया कि से तिन्हा जो सुन्ना देई सको।

⁴⁸ यीशु ने तिसजो बोल्लेया, यहूदा, कै तू चुम्मी करी मणू रे पुत्तर, जे मैं ही है जो पकडवाणा लगे रा है?

⁴⁹ यीशु रे चेल्‍लेयां जो लग्गेया कि किच्‍छ होणे वाला है तिन्हा ने यीशु जो बोल्लेया, प्रभु जी, कै असी इन्हा कन्ने लड़ने तांइ अपणी तलवारां कड्डी लैण?

⁵⁰ तां तिन्हा बिच का इक्क जणे ने प्रधान पुरोत्त रे नौक्कर रा सज्जा कान्न अपणी तलवार कन्ने बड्डी रख्या

⁵¹ पर यीशु ने बोल्लेया, लड़ीणा बांद करी देयो अते तिन्हा ने तिस मणू रे कान्न जो छुत्तेया अते ठीक करी दित्तया

⁵² तां यीशु ने बड्डे पुरोत्त, मन्दिर रे पैहरेदारां अते बुजुर्ग लोक्कां जो बोल्लेया, कै तुसा मेरे जो इक्क डाकू समजदे जे कि तुसा मेरे जो पकड़ने तांइ तलवारां अते डंडे लेई करी आए दे हिन?

⁵³ जां मैं तुसा कने मन्दिर अन्दर हुन्दा थिया, तुसा ने मेरे जो तां किजो नी पकड़ेया? पर अज्ज ए तुसा रा बेल्ला है, अते निहारे रा राज करणे रा बेल्ला है।

पतरस रा मन्हा करणा

⁵⁴ तिन्हा ने यीशु जो पकड़ेया अते प्रधान पुरोत्तां रे घरे जो लेई गे अते पतरस तिन्हा का दुर-दुर रेई करी तिन्हेरा पीच्छे-पीच्छे थिया आया करदा

⁵⁵ अते जां से पैह्रेदार अंगणा अन्दर आग्ग भखाई करी बेई गे तां पतरस भी तिन्हेरे बिच जाई करी बेई गेया

⁵⁶ इक्क जनानी ने पतरस जो आग्ग री लौ अन्दर दिख्खी करी पछियाणी लेया अते बोल्णा लग्गी कि ए मणू भी तां यीशु रे कन्ने हुन्दा थिया

⁵⁷ पर, पतरस ने तिस जनानी जो बोल्लेया कि मैं तां तिसजो जाणदा भी नी कि से कुण है

⁵⁸ थोड़ी देर बाद इक्क होर मणू तिसजो दिख्खी करी बोल्णा लगेया, तू भी तां इन्हा बिच का ही है, पतरस ने बोल्लेया, ओ भाई, मैं इन्हा बिच का नी है

⁵⁹ कोई इक्क कर घंटे बाद इक्क होर मणू बड़ा जोर देई करी बोल्णा लगेया, पक्का ए भी तिन्हा कन्ने ही थिया किजोकी ए भी गलीली

⁶⁰ पर, पतरस बोल्णा लगेया, ओ भाई, मेरे जो तां पता भी नी है कि तू कुसेरे बारे अन्दर गल्ल करेया करदा है जिय्यां ही तिन्ने ए गल्ल बोल्ली, तिस्सी बेल्ले मुर्गे ने बांग देई दित्ती

⁶¹ तिस्सी बेल्ले यीशु ने पतरस पास्से मुडी करी दिख्खेया, तां पतरस जो यीशु री तिस गल्ल रा चेता आया कि, आज मुर्गे ने तां तांइ बांग नी दैणी जां तांइ तू मेरे जो पछियानणे का तीन्न वरी मुक्करी नी जांह्ग्गा

⁶² तां पतरस तिस अंगणा का बाह्र चली गेया अते जोरे-जोरे रोणा लग्गी पेया।

यीशु रा मजाक उड़ाया जाणा

⁶³ जिन्हा मणूआं ने यीशु जो पकड़े दा थिया, से तिन्हेरा मजाक उडाणा लगे अते तिन्हा जो मारणा लग्गी पे

⁶⁴ तिन्हा ने यीशु री हाखियाँ पर पट्टी बन्नी दित्ती अते तिन्हा जो मारणा लगे अते तिन्हा का पूच्छणा लगे कि, अवे तू दस्स कि से कुण है जिनिये तिज्जो मारेया?

⁶⁵ अते तिन्हा ने यीशु री बेजती करणे तांइ होर भी मती सारी गल्लां बोल्लियाँ।

महासभा रे सामणे यीशु

⁶⁶ जां भ्याग होई तां बड्डे पुरोत्तां अते शास्त्रियां समेत मन्दिर रे बुजुर्गां री इक्क सभा बैठ्ठी, फिरी से मणू यीशु जो महासभा बिच लेई आए।

⁶⁷ तिन्हा ने यीशु का पूच्छेया, कि अगर तू मसीह यीशु है, तां असा जो दस्सी दे यीशु ने तिन्हा जो जवाब दित्ता, कि अगर मैं तुसा जो दस्सी भी देयां, तां भी तुसा मेरे पर विश्वास नी करणा

⁶⁸ अते जे मैं तुसा का इक्क सुआल पुछाँ, तां तुसा ने भी, तिधेरा कोई जवाब नी दैणा

⁶⁹ पर, अवे का मणू रे पुत्तर, जे मैं ही है (यीशु मसीह यीशु) जो सबका ताकतवर परमेश्वर रे सज्जे पास्से बठाया जाणा

⁷⁰ फिरी सब पूच्छणा लगे, कै तू परमेश्वर रा पुत्तर है? यीशु ने तिन्हा जो जवाब दित्ता, तुसा ठीक बोल्लेया करदे हिन, मैं परमेश्वर रा पुत्तर है

⁷¹ तां तिन्हा ने बोल्लेया, अवे असा जो कुसकी होरसी री गुवाई री कै जरुरत है? किजोकी असा तां अप्पु ही इसेरे मुंआ का ए सुणी लेया।