लूका 19 - चम्बयाली नौआ नियम

चुगीं लैणे वाला जक्कई

¹ यीशु यरीहो ना रे सहर का जाया करदे थिये।

² तित्ते जक्कई ना रा मणू चुंगी वसूलणे वालेयां रा प्रधान, अते से बड़े पैसे वाला थिया

³ से यीशु जो दिख्णा चाह्‍ंदा थिया पर, बड़े सारे मणूआं री वजह कने से दिख्खी नी थिया पाया करदा, किजोकी से बोणा थिया।

⁴ इधेरे तांइ से दौड़ी करी त्रिम्बल रे बूट्टे पर चढ़ी गेया, जे कि तिसी रस्ते पर लगे दा थिया, अते जित्ते का यीशु ने जाणा थिया।

⁵ जां यीशु तिस्स तिस रस्ते का होई करी जाणा लग्गे जित्ते से बूट्टा थिया तां तिन्हा ने बूट्टे पर जक्कई जो दिख्खेया, अते तिसजो बोल्लेया, ओ जक्कई, झट्ट थल्ले उतर किजोकी अज्ज तेरा घरे रैणा जरुरी है

⁶ जक्कई झट्ट तिस बूट्टे का थल्ले उतरेया अते बड़ी खुसी कने यीशु कने मिलेया अते तिन्हा जो अपणे घरे लेई गेया।

⁷ पर मणूआं जो ए गल्ल ठीक नी लग्गी, अते बुड़बुड़आणा लग्गी पेय अते बोलणा लग्गे से तां पाप्पी मणू रे उत्ते प्रोणा बणी करी तिसेरे घरे जो गेया

⁸ जां यीशु ते तिन्हेरे चेल्‍ले तिसेरे घरे रोट्टी खाया करदे थिये तां जक्कई खड़े होई गेया अते यीशु जो बोलणा लग्गेया, ओ प्रभु जी, मैं अपणी धन-दौलत रा अद्दा हिस्सा गरीबां बिच्च बन्डी दैणी अते प्रभु जी मैं जिन्हा मणूआं जो ठग्गी करी तिन्हा का जरुरत का जादा लित्ते दा है तिन्हा जो मैं चार गुणा मोड़ी दिह्गां।

⁹ यीशु ने तिसजो बोल्लेया, अज्ज तेरा अते तेरे घरे वालेयां रा छुटकारा होया है किजोकी अज्ज तू अब्राहम औलाद बणेया।

¹⁰ किजोकी मणू रा पुत्तर, जे मैं ही है तेरे जदेय होर भी मणूआं जो हमेसा री सजा का बचाणे तांइ आए रा है।

दस मुहरां रा उदारण

¹¹ जां से गल्लां सूणेया करदे थिये, तां तिन्हा ने इक्क उदहरण बोल्लेया, इधेरे तांइ किजोकी से यरुशलेम सहर रे नेड़े थिये ते से सोचदे थिये कि परमेश्वर रा राज आणे वाला है,

¹² इक्क ठीक पैसे वाला मणू अपणे देस रा राज्जा बणने दी इजाज़त लैणे तांइ इक्क देस जो गेया

¹³ जाणे का पैल्ले तिन्ने अपणे नौक्करां जो सद्देया अते बोल्लेया, कि मैं जां तांइ हटी नी आन्दा तां तांइ मैं तुसा जो दस सोन्ने रे सिक्के देई जान्दा, अते तिन्हा कने किच्‍छ कमाई करे,

¹⁴ पर तिसेरे सहर रे मणू तिसजो सुखान्दे नी थिये, इधेरे तांइ तिन्हा ने किच्‍छ मणू तिसेरे पीच्छे ए बोल्ली करी उस देस जो भेज्जी दित्ते, कि असी नी चाह्‍ंदे कि ए असा रे पर राज करण

¹⁵ जां से राज्जा अपणे राज्जा बणने री मंजूरी लेई करी आई गेया, तां तिन्ने जे सोन्ने रे सिक्के नौक्करां जो दित्ते रे थिये, तिन्हेरा साह्ब-किताब लैणे तांइ तिन्हा जो सद्देया कि तिन्हा लैण दैण बिच् कै कमाये रा है

¹⁶ तां पैल्ले नौक्कर ने आई करी बोल्लेया, ओ मालक, तुसा जे सिक्के मेरे जो दित्ते थिये, तिन्हा सिक्के कन्ने मैं दस गुणा होर सिक्के कमाई लै

¹⁷ मालक, ने तिसजो बोल्लेया, शाबास, तू तां बड़ा खरा कन्ने भरोसे रे लायक नौक्कर है, इधेरे तांइ मैं तिज्जो दस राज रा अधिकारी बणाई दिन्दा

¹⁸ दूज्जे ने आई करी बोल्लेया, ओ मालक, तुसा ने जे सिक्के दित्ते थिये तिन्हा कन्ने मैं पान्ज गुणा होर सोन्ने रे सिक्के कमाए हिन

¹⁹ तिन्ने तिसजो बोल्लेया, तिज्जो भी पान्ज राज रा अधिकारी बणाई दिन्दा

²⁰ तिज्जे ने आई करी बोल्लेया, ओ मालक, मैं तुसा रे दित्ते रे सिक्केयां जो कपड़े बिच बन्नी करी संभाली रख्खे दा थिया

²¹ किजोकी मेरे जो तुसा का डर लगदा किजोकी तुसा इक्क सख्त मणू हिन, इधेरे तांइ कि तुसा जेह्ड़ा, तुसा रा नी है तिसजो भी लेई लिन्दे अते जे तुसा बाया भी नी तिसजो भी कट्टी लिन्दे

²² से राज्जा तिस पर टुटी पेया, अते बोलणे लगेया, ओ नलायक नौक्करां मैं तेरी ही गल्लां का तिज्जो दोषी बणादा! जे तू मेरे बारे अन्दर इन्ना किच्‍छ जाणदा थिया कि मैं बुरा मणू है जे कि बांदा भी नी अते तिसजो कट्टी भी लिन्दा

²³ तां तू मेरे सोन्ने रे सिक्केयां जो ब्याज पर उधार किजो नी देई दित्ता ताकि मैं जां वापस हटी करी तां मेरे जो किच्‍छ ब्याज तां मिली जान्दा?

²⁴ जे नौक्कर नेड़े खड़ितेरे थिये तिन्हा जो राज्जे ने बोल्लेया, इस नौक्करां का से सोन्ने रे सिक्के लेई लो अते जिनिये सबका जादा सिक्के कमाए तिसजो देई दो

²⁵ नौक्करां ने तिन्हा जो बोल्लेया, ओ मालक, तिसेरे का तां दस्स सोन्ने सिक्के हिन

²⁶ इस गल्ल पर राज्जे ने बोल्लेया, जिन्हा जो जे दित्ते दा है, तिसजो से सह्ई तरिक्के कने बरतगे तां तिन्हा जो होर मिलणा, पर जे ईयाँ नी करगा तां तिन्हेरे का जे है से भी खोई लैणा

²⁷ अते जे नी चाह्‍ंदे कि मैं तिन्हा पर राज्जा बणी करी राज करां तिन्हा बैरियां जो मेरे सामणे लै आई करी मारी देयो।

यरुशलेम सहर बिच विजय-प्रवेश

²⁸ फिरी जां यीशु ए गल्लां करी बैठ्ठे तां से तिसेरे बाद यरुशलेम जो चलणा लगे अते तिन्हेरे पीच्छे उन्हेरे चेल्‍ले थिये।

²⁹ जां से जैतून पहाड़ पर बसे रे बैतफगे अते बैतनिय्याह सहर पर पूज्जे तां यीशु ने अपणे चेल्‍लेयां बिच् का दो जो ए बोल्ली करी अग्गे भेज्जेया,

³⁰ कि सामणे वाले ग्रां बिच जाओ अते जिय्यां ही तुसा तिस ग्रां बिच बढ़ गे, तां तुसा जो इक्क गधी रा बच्चा बन्ने रा मिलणा जिस पर हल्ले तांइ कोई भी नी बैठ्ठे रा होणा, तिसजो खोली करी लेई आओ

³¹ जे कोई भी तुसा का पुछगा कि कै हिन करेया करदे? तां वस इन्ना ही बोल्लेयो कि प्रभु जी जो ईधेरी जरुरत है

³² तां से चेल्‍ले गे, अते जिय्यां यीशु ने बोल्ले दा थिया, तिय्यां ही खोती रे बच्चे जो बनितेरा दिख्खेया

³³ अते जां से तिसजो खोल्णा लगे तां तिसेरे मालक ने आई करी तिन्हा जो पूच्छेया, तुसा इसजो किजो खोलदे हिन?

³⁴ तां चेल्‍लेयां ने बोल्लेया कि प्रभु जी जो ईधेरी जरुरत है

³⁵ फिरी से गधी रे बच्चे जो यीशु का लेई आए अते चेल्‍लेयां ने अपणे कपड़े तिस पर पाए अते यीशु जो तिस पर बिठाई दित्ता

³⁶ जां यीशु खोती रे बच्चे पर बेई करी यरुशलेम जो जाया करदे थिये तां मणू भी अपणे कपड़े यीशु रे रस्ते बिच बछाँदे जान्दे थिये ते से यीशु कने चले दे थिये

³⁷ तां से, जित्ते का जैतून पहाड़ री घार सुरु हुंदी, तिस जगाह् पर पूज्जे तां परमेश्वर रे कित्ते रे चमत्कारी कम्म तांइ सारे चेल्‍ले बड़े जोर कने गांदे-गांदे परमेश्वर री बड़ाई करणा लगे

³⁸ धन्न है से राजा, जे प्रभु रे नां कने आंदा, स्वर्ग बिच सांती अते आसमान बिच परमेश्वर री जे जे कार हो

³⁹ तां यीशु रे पीच्छे चलणे वाले मणूआं बिच किच्‍छ फरीसी भी थिये अते से बोल्णा लगे, ओ गुरु जी, ए जे बोल्लेया करदे हिन इस गल्ल तांइ अपणे चेल्‍लेयां जो झिडको।

⁴⁰ यीशु ने जवाब दित्ता जे ए मणू चुप होई गे तां रस्ते रे बट्टेयां ने बोल्ली पैणा।

यरुशलेम सहर तांइ रोणा

⁴¹ जां से यरुशलेम सहर रे नेड़े पूज्जे तां यीशु ने तिस सहर पास्से दिख्खेया अते रोया

⁴² किन्ना खरा हुन्दा कि तू, हाँ तू ही सांती रे रस्ते जो जाणी पान्दा, पर अवे बड़ी हाण होई गे री है अते सांती तुसा री हाख्खी का गैब होई गे रा है।

⁴³ किजोकी से दिन तेरे पर इणे जां तेरे दुश्मणा ने मोर्चा बन्नी करी तेरे जो घेरी लैणा, ते चारों पास्से का तेरे जो दब्बी लैणा।

⁴⁴ ते तेरे दुश्मणा ने तिज्जो ते तेरे बच्चेयां जो जे तेरे बिच हिन, मिट्टी बिच मिलाई दैणा, ते तेरे बिच बट्टे पर बट्टा भी नी छडणा, किजोकी तू तिस मौक्के जो नी पेहचाणेया जां परमेश्वर तिज्जो बचाणे तांइ आए थिये।

मन्दिर का दुकानदारां जो कडणा

⁴⁵ जां यीशु मन्दिर बिच बड़े अते जे तित्ते समान बेचया करदे थिये तिन्हा जो सभास्थल का बाह्र कडणा लगे

⁴⁶ यीशु ने तिन्हा जो बोल्लेया, कि पवित्रशास्त्र बिच लिख्खे दा है कि मेरा देह्रा प्रार्थना दा घर है पर तुसा ने इसजो डाकू री कुड बणाई रखे दा है

⁴⁷ इसका बाद यीशु हर रोज मन्दिर बिच उपदेस दैणे लगे पर बड्डे पुरोत्त शास्त्रियहूदी लोका रे प्रधान यीशु जो मारणे री सलाह करणा लगे

⁴⁸ पर, से यीशु जो मारणे तांइ कोई बेतर नी लाई सके, किजोकी मणू बड़ा मन लाई करी यीशु री गल्लां सूणदे थिये।