लूका 12 - चम्बयाली नौआ नियम

पाखण्ड रे खिलाफ चतौणी

¹ जां हजारां रे साह्बे मणू कठ्ठी गे ते सब इक्क दूज्जे पराल्ले चढ़या करदे थिये, तां यीशु ने पैल्ले अपणे चेल्‍लेयां जो बोल्लेया, कि फरीसी मणूआं रे खमीर का जे कि इन्हेरा कपट है, बची करी रेयो

² किजोकी इदेया किच्‍छ भी छुपे रा नी है जे कि सामणे नी आणा, ते इदेया किच्‍छ भी ढकित्तेरा नी है, जे खोलेया नी जाणा

³ इधेरे तांइ तुसा ने जे किच्‍छ भी न्याहरा अन्दर बोल्ले रा है, से लौ अन्दर सुणाया जाणा: अते जे किच्‍छ भी तुसा ने बन्द कमरेयाँ बिच इक्क-दूज्जे रे कन्ना अन्दर बोल्ले रा है, से गल्लां घरे री छत्ती पर जाई करी जोरे जोरे दस्सी जाणियां।

कुसका डरणा चाएदा

⁴ पर मेरे मित्रो, मैं तुसा जो बोलदा तिन्हा का मत डरो जे सिर्फ तुसा रे सरीर जो घात करी सकदे ते तिसेरे बाद इदेया किच्‍छ भी नी है जे तिन्हेरे वस अन्दर होणा।

⁵ मैं तुसा जो पक्की गल्ल दसी दिन्दा कि कुसका डरणा चाएदा? परमेश्वर का डरो जे तुसा जो मारणे रे बाद नरक बिच पाणे रा हक्क रखदा हाँ, मैं बोलदा, वस परमेश्वर का ही डरो

⁶ कै दो पैसे री पंज चिड़ियाँ नी बिकदी? फिरी भी परमेश्वर तिन्हा बिच का इक्क जो भी नी भूलदा।

⁷ दिख्खो, तुसा रे सरे रा इक्क-इक्क बाल भी परमेश्वर ने गिणी रख्खे रा है इधेरे तांइ डरो मत, किजोकी तुसा तां बड़ी सारी चिड़ियाँ का भी जादा कीमती हिन।

यीशु जो अपनाणा या ना अपनाणा

⁸ फिरी यीशु ने बोल्लेया, मैं तुसा जो बोलदा, कि जे कोई मेरे जो मणूआं रे सामणे मन्नी लिन्गा, तिसजो मणू रे पुत्तर, जे मैं ही है ने भी परमेश्वर रे स्वर्गदूतां सामणे मन्नी लैणा।

⁹ पर, जे मणूआं रे सामणे मेरे का मुक्करगा, तिसेरा परमेश्वर रे स्वर्गदूतां सामणे इन्कार कित्तेया जाणा

¹⁰ ते हर तिस मणू जो माफ कित्तेया जाणा, जे मणू रे पुत्तर, जे मैं ही है रे खलाफ़ किच्‍छ गलत बोल्गा, पर जे कोई पवित्रात्मा री बेजती करगा, तिसजो माफ नी कित्तेया जाणा

¹¹ जां से तुसा जो सभास्थल, राज्जेयां अते बड्डे प्रधाना रे मुहाग्गर लेई जाह्न्गे तां फिकर मत करदे कि तुसा अप्पु जो किय्यां बचांगे या असा जो कै बोलणा चाईन्दा

¹² किजोकी पवित्रात्मा ने तुसा जो सखाई दैणा कि तिस बेल्ले तुसा जो कै बोलणा चाएदा।

इक्क बेवकूफ अमीर आदमी रा उदारण

¹³ फिरी तिन्हा मणूआं री भीड़ बिच का कुसकी ने यीशु जो बोल्लेया, ओ गुरु जी, मेरे भ्याल जो बोल्लो कि से असा रे प्यो री जायदात का मेरे हिस्से री जायदात जो मेरे जो देई देयो।

¹⁴ यीशु ने जवाब दित्तेया, कि ओ मणू, तुसा री इन्हा गल्लां रा फैसला करणे वाला या बटवारा करणे वाला मेरे जो कुनिए बणाया?

¹⁵ फिरी यीशु ने बोल्लेया, ध्यान रख्खो, कि तुसा कुसकी भी चीज रा लालच मत करदे, किजोकी कुसकी रे जिन्दगी री बराबरी तिसेरी जमीन-जायेदात रे बाध्धे होणे कने नी कित्ती जान्दी

¹⁶ यीशु ने ए उदारण भी दित्तेया कि इक्क अमीर मणू री जमीन अन्दर बड़ी छैल फसल लग्गी

¹⁷ ते से अपणे मनां अन्दर सोचणा लगेया, कि अवे मैं कै करां? इतणा सारा अनाज कुते रखगा, मेरे का तां रख्खणे तांइ जगाह् भी नी है?

¹⁸ फिरी तिनिए बोल्लेया, अच्छा, मैं इय्यां करदा कि अनाज रखणे वाले ढन्ड़ू जो तोड़ी करी इक्क बड्डा कमरा बणादा, ताकि मेरा सारा अनाज तिस बिच आई जाओ।

¹⁹ ते फिरी मैं अपणे आप जो बोलणा, कि तेरे का तां बड़ा भरी अनाज है जे केई सालां तांइ तेरे का बची रैह्णा अते अवे चैन कने खा-पी ते मजे कने जी।

²⁰ पर परमेश्वर ने तिसजो बोल्लेया, ओ नासमझ, तैं अज्ज राती ही मरी जाणा ते तैं जे इतणा सारा अनाज कठेरी रख्खे रा है, से सब कुस जो मिलणा?

²¹ दिख्खो, इदेया ही से मणू भी हुन्दा जे अप्पु तांइ धन्न कठेरदा, पर परमेश्वर री नजरां बिच से अमीर नी है।

परमेश्वर पर विश्वास रखो

²² फिरी यीशु ने अपणे चेल्‍लेयां जो बोल्लेया, इधेरे तांइ मैं तुसा जो बोलदा कि अपणे जीणे री फिकर मत करेया करो कि असी हर रोज रोट्टी ते कपड़े कुदका खान्गे अते लान्गे।

²³ किजोकी जीणा, रोट्टी का ते जिस्म, कपड़ेयां का जादा बदधी करी है

²⁴ जरा पछीं पास्से तां दिख्खो से ना तां भी बांदे, ना फसल कटदे ना तां तिन्हा का अनाज कने भरे रे बड्डे-बड्डे कमरे हुन्दे तां भी परमेश्वर तिन्हा जो खाणे जो दिन्दा तुसा तां चिडू-पखेरुआं का भी जादा कीमती हिन

²⁵ तुसा बिच का इदेया कुण है, जे फिकर करी के अपणी उमर जो इक्क घड़ी तांइ भी अग्गे बधाई सकदा हो?

²⁶ जे फिकर करी के तुसा इस छोटी जह्णी गल्ल जो नी करी सकदे तां बड्डी गल्लां री फिकर करी के कै फायदा?

²⁷ सोसनों रे फूलां पास्से दिख्खी करी जरा सोच्चो, कि से किय्यां उगदे से ना तां मैह्नत करदे, ना ही खेत्तर बांदे, फिरी भी मैं तुसा जो बोलदा कि राजा सुलैमान रे महिमा होणे पर भी तिसेरे कपड़े इन्हा फूल्लाँ बिच का कुसकी इक्क का भी जादा छैल नी थिये।

²⁸ इधेरे तांइ अगर परमेश्वर द्रब्बड री घा जो, जे कि अज्ज इत्ते है, ते कल से आग्ग बिच फुक्की दित्ती जाणी, इतणा छैल सजाई सकदा, तां कै से तुसा जो नी पुआई सकदा तुसा मणूआं अन्दर विश्वास री कमी है

²⁹ पर तुसा इन्हा गल्लां री फिकर मत करो कि असी कै खांगे ते कै पींगे इधेरे तांइ तुसा मत सोच्चो

³⁰ किजोकी दुनिया रे सब मणू इन्हा चीजां रे पीच्छे नह्स्सेया करदे हिन: पर परमेश्वर जो पता है कि तुसा जो भी इन्हा सबणी चीजां री जरुरत है

³¹ बल्कि, तुसा परमेश्वर रे राज रे खोजी बणो, ए सब चीजां तां तुसा जो मिली ही जाणियां।

स्वर्गीय धन-दौलत

³² इधेरे तांइ ओ छोटे झुण्ड, डरो मत, किजोकी तुसा रा परम पिता परमेश्वर चाह्‍ंदा कि तुसा तिन्हेरे राज रे वारिस बणो।

³³ इधेरे तांइ अवे अपणी जायदात बेच्ची करी पैसे गरीबां जो दान करी देयो इय्यां करणे पर तुसा अपणे तांइ स्वर्ग अन्दर धन्न-दौलत कठेरगे जे कि कदी नी मुकणी ते अप्पु जो इदेय बटुए बणाओ जे पुराणे नी हुदें, मतलब अप्पु जो स्वर्ग बिच धन-दौलत कठेरो जे घटदा नी ते जिसेरे नेड़े चोर नी जादां, ते कीड़ा नी तिसजो खराब करता

³⁴ किजोकी जित्ते तुसा री धन्न-दौलत है तित्ते ही मन भी लग्गी रैह्णा।

जागदे रेयो

³⁵ परमेश्वर रे कम्म तांइ हमेसा तैयार रेयो ते हमेसा मेरे हटी आणे रे इंतजार बिच रेयो, ते तुसा रे दीये जलदे रैह्ण।

³⁶ जिय्यां कि खरा नौक्कर ब्याह् री धाम का मालक रे वापस हटणे री भाल अन्दर हुन्दा, ताकि जिय्यां ही से आओ ते दुआर खटखटाओ तां से तिस्स ही बेल्ले तिस तांइ दुआर खोली सको, तुसा भी तिस मणू सांई बणो।

³⁷ से नौक्कर धन्न हिन जे अपणे मालक रे हटणे री भाल अन्दर जागदे हुन्दे ते दुआर खोल्णे तांइ तैयार हुन्दे मैं तुसा जो सच बोल्लेया करदा है, कि तिस मालक ने अप्पु नौकरां वाले कपड़े पाई करी अपणे नौक्करां जो अप्पु रोट्टी खुआणी ते तिन्हेरी सेवा भी करणी

³⁸ तिन्हेरा मालक चाए धरात्ते पर आओ या बड़ी भ्याग्गा भी आओ, जे अगर से तिन्हा जो जागदे दिखदा तां से धन्न हिन।

³⁹ जे घरे रा मालक जाणदा हो कि चोर ने कुस बेल्ले आणा है तां तिनिये चोर जो अपणे घरे चोरी नी करणा दैणी

⁴⁰ तिय्यां ही तुसा भी तैयार रेया करो, किजोकी मणू रे पुत्तर, जे मैं ही है तिस बेल्ले आणा जां तुसा मेरे आणे रे बारे अन्दर सोच्चे रा भी नी होणा।

भरोसेमंद नौकर ते बेईमान नौकर

⁴¹ तां पतरस ने पूच्छेया, ओ प्रभु जी, तुसा ए उदारण सिर्फ असा चेल्‍लेयां जो ही सुणाया करदे हिन कि ए होरणी सबणी मणूआं तांइ भी है?

⁴² यीशु ने जवाब दित्तेया, इदेया विश्वास लायक अते समजदार मुंशी कुण है, जिसेरा मालक तिसजो तिसेरे घर री देखभाल ते तिन्हेरे नौक्करां जो रोट्टी दैणे री जिम्मेदारी देई सको?

⁴³ से मुंशी धन्न है जिस जो मालक आई करी दिख्खो कि से पूरी ईमानदारी कने अपणा कम्म करेया करदा है

⁴⁴ मैं तुसा जो सच बोलदा, तिसेरे मालक ने तिसजो अपणी सारी जायदात जो सम्भाणे रा कम्म भी देई दैणा

⁴⁵ पर, जे से मुंशी इय्यां सोच्चो कि मेरे मालक ने पता नी कधाड़ी आणा, अते से तिसेरे नौक्करां ते नौक्कराणियां जो मारणा-कुटणा लग्गी पेयो ते सराब पी करी मजे करणा लग्गी पयो,

⁴⁶ तां तिस मुंशी रे मालक ने ऐसे दिन आणा जिसेरे बारे अन्दर तिनिए सोच्चे रा भी नी होणा, अते जां तिनिए आणा ते आई करी तिसजो कड़ी सजा देई करी तिन्हा मणूआं बिच भेजी दैणा जे कि विश्वास लायक नी हिन ते तिन्हा बिच ही गिणेया जाणा

⁴⁷ से नौक्कर जे अपणे मालक री मरजी जाणदा हो पर तिय्यां नी करणे तांइ तैयार ना रैहन्दा हो ते तिय्यां नी कमांदा हो तां तैसे नौक्कर जो बड़ी बुरे हाल्ले मार पैणी।

⁴⁸ पर जिस नौक्कर जो अपणे मालक री मर्जी रे बारे अन्दर कोई जानकारी नी हो, पर इदेया कम्म करी देयो, जे कि मार खाणे जोग्गा हो, तां तिस नौक्कर जो घट मार पैणी। इधेरे तांइ हर इक्क मणू का जिस जो हद का जादा दित्तेया गे रा है, तिसका तिन्ना ही वापस लित्तेया जाणा। अते जिस जो तिसका थोड़ा घाट्ट दित्तेया दा है, तिसका तितणा ही घट लित्तेया जाणा।

यीशु रे दोबारा आणे रे नतीज्जे

⁴⁹ फिरी यीशु ने बोल्लेया, मैं इस दुनिया पर आग्ग लाणा आये रा है ते मैं ए चाह्‍ंदा थिया कि ए कम्म अब्बे तांइ सुरु होई गे रा हुन्दा, तां खरा थिया।

⁵⁰ पर हल्ले तांइ मेरे जो मते जुल्म सैहणे जो हिन, जां तांइ से जुल्म मुकी नी जांदे तां तांइ मेरे जो बेचैनी लग्गी रैह्णी।

⁵¹ कै तुसा इय्यां तां नी सोचदे कि इस दुनिया पर सांती हो इधेरे तांइ मैं आये रा है? मैं तुसा जो बोल्ली दिन्दा, कि इय्यां नी है, पर मैं तां मणूआं जो बखरा कराणे तांइ आये रा है।

⁵² किजोकी अज्ज का बाद इक्क घरां अन्दर पंज जणे इक्क दूज्जे का बखरे होई जाणे। त्रै जणेया ने मेरे पर विश्वास करणे वाले दो जणे रे खिलाफ होई जाणा अते मेरे पर विश्वास करणे वाले दो जणेया ने त्रै जणे रे खिलाफ होई जाणा।

⁵³ मां अपणी कुड़ी रे खिलाफ होई जाणी अते कुड़ी मां रे खिलाफ होई जाणी, प्यो ने अपणे पुत्तर रे खिलाफ ते सस्सू ने नूँ रे ते नूँ ने अपणी सस्सू रे खिलाफ होई जाणा।

समय री पछाण

⁵⁴ अते यीशु ने मते जणे किठ्ठितेरे मणूआं जो भी बोल्लेया, जां तुसा पश्चिम दिसा का बदल इंदे दिखदे तां झट्ट बोल्ली पैंदे कि बरखा होणे वाली है, ते फिरी तिय्यां ही हुन्दा

⁵⁵ ते जां दक्षिण दिसा का ब्यार चलदी, तां तुसा बोल्दे कि गर्मी आणे वाली है, ते तिय्यां ही हुन्दा

⁵⁶ पर ओ कपटियों, तुसा जो जमीन ते आसमान रे रांग-रुप बदलिणे रा पता तां लग्गी जान्दा, पर इस जुग बिच परमेश्वर जे कम्म करदे हिन तिन्हा जो किय्यां नी समझ नी पांदे?

⁵⁷ फिरी यीशु ने बोल्लेया, तुसा इस गल्ल रा फैसला अप्पु ही किजो नी करी लिन्दे कि ठीक कै है?

अपणी परेसानी जो सुलझाओ

⁵⁸ जां तुसा अपणे दुश्मण कन्ने न्यायधीस का कचैह्री जो चले रे होन्, तां रस्ते अन्दर ही तिस कने सुलाह् करणे री कोसीस करी लेयो, कुदखी इय्यां ना हो कि से तुसा जो हाकिम का छिक्की करी लेई जाओ ते सपाहीयाँ का पकड़वाई देयो अते सपाही तुसा जो जेह्ल अन्दर ढ़प्पी देयो

⁵⁹ मैं तुसा जो बोलदा, कि जां तांइ तुसा अपणा सब किच्‍छ देई ना देंन, तां तांइ जेल का छुटी नी सकदे।