लूका 11 - चम्बयाली नौआ नियम

चेल्‍लेयां रा प्रार्थना करणा सिखणा

¹ इक्क रोज यीशु इक्क जगाह् पर प्रार्थना करेया करदे थिये जां से प्रार्थना करी बैठे तां तिन्हेरे चेल्‍लेयां बिच का इक्क ने तिन्हा जो बोल्लेया, ओ प्रभु जी, जिय्यां यूहन्ना ने अपणे चेल्‍लेयां जो प्रार्थना करणा सखाए रा है, तुसा भी असा जो तिय्यां ही सिखाओ।

² तिन्हा ने तिसजो बोल्लेया, ठीक है, तां प्रार्थना करदे बेल्ले इय्यां बोल्लेया करो ओ असा रे पिता जी, तुसा रे नां जो पवित्र मन्यान जाये, तुसा रा राज इस दुनिया पर आई जाओ।

³ असा री रोज री रोट्टी असा जो देया करो,

⁴ ते असा रे पाप्पां जो तुसा माफ करी देयो, किजोकी, असी भी अपणे गुनेह्गारां जो माफ करदे, ते असा जो परखीह्णे का बचाई लेयो।

प्रार्थना रे बारे बिच यीशु री शिक्षा

⁵ फिरी यीशु ने तिन्हा जो बोल्लेया, कि तुसा बिच का इदेया कुण है कि तिसेरा इक्क मित्र हो ते से तिसका धरात्ते पर आई करी ए बोल्ली करी त्रै रोटियां मन्गो कि

⁶ मेरा मित्र है ते से सफर का मेरे का आया, ते तिस्जो खुआणे तांइ मेरे का अब्बे किच्‍छ भी नी है

⁷ ते से अन्दर का जवाब देयो, कि मेरे जो तंग मत करां दुआर बन्द होई गे रा है, मैं बिस्तर अन्दर मेरे कन्ने मेरे निके-निके चैन कने सुत्ते रे हिन, इधेरे तांइ मैं अब्बे बाहर आई करी तिज्जो रोटियां नी देई सकदा

⁸ मैं तुसा जो बोल्ली दिन्दा, कि इक्क मित्तर होणे री वजह कने बसक्क से ना उठ्ठो, पर तिसेरे घड़ी-घड़ी बगैर झिझक रे मंगणे पर से उठ्ठी करी तिसेरी जरुरत रे हिसाब कने देई दैणा।

⁹ ते मैं इधेरे तांइ मैं तुसा जो बोलदा कि तुसा मंगगे तां तुसा जो दित्तेया जाणा तोपगे तां से मिल्णा अते खटखटाँदे रैह्न्गे तां तुसा तांइ दुआर खोली दित्ते जाणे

¹⁰ किजोकी हर इक्क मणू जे मंगदा, तिसजो मिली जान्दा जे तोपदा से तिसजो पाई लिंदा अते जे खटखटांदा ही रैहन्दा तिसेरे तांइ दुआर खोल्ली दित्तेया जाणा।

¹¹ तुसा बिच का इदेया कुण प्यो हुँगा, जिसेरा पुत्तर तिसका रोट्टी मंगो तां से तिसजो पत्थर पकड़ाई देयो: या तां से मच्छी मंगो तां से कीड़ा पकड़ाई देयो?

¹² या पुत्तर आंड्डा मंगो तां तिस्जो बिच्छु देई देयो

¹³ बुरे स्वभाव रे मणू हुन्दे-सुन्दे भी तुसा जो पता है कि अपणे बच्चेयां जो ठीक चीजां किय्यां दित्ती जान्दी, तां अवे तुसा अप्पु सोच्चो कि असा रा स्वर्ग अन्दर रैह्णे वाला परमेश्वर अपणे मंगणे वालेयां जो खुसी कने पवित्रात्मा किजो नी दिंगा

¹⁴ फिरी यीशु ने इक्क मणू बिच का दुष्टात्मा निकाली जे कि जल्ली थी: जिस बेल्ले दुष्टात्मा तिस बिच का निकली गई तां से मणू गल्लां लग्गी पेया करणा ते सारे मणू ए दिख्खी करी हैरान होई गे।

यीशु ते बालज़बूल रा सरदार

¹⁵ पर तिन्हा बिच का मते जणे बोलणा लगे, कि ए तां दुष्टात्मां रे सरदार री मदद कने इन्हा दुष्टात्मा जो कड़दा।

¹⁶ पर होर मणूआं ने तिन्हा जो परखणे तांइ तिन्हा का स्वर्ग री कोई निशानी मंगी

¹⁷ पर यीशु तिन्हेरे मन री गल्ल जो समजी गे ते तिन्हा ने जवाब दित्तेया, जिस देस अन्दर फूट पेई गे री हो, से उजड़ी जान्दा: ते जिस घर अन्दर कहला हो पेई गे री से कदी भी बसी नी सकदा

¹⁸ ते अगर शैतान अप्पु जो नुकसान पूजाणा सुरु करी देयो, तां शैतान रे राज रा सत्यानास होई जाणा तुसा जे मेरे पर इल्जाम लांदे कि मैं दुष्टात्मां रे सरदार री मदद कने दुष्टात्मा जो कडदा,

¹⁹ जे अगर मैं दुष्टात्मां रे सरदार री मदद कने दुष्टात्मा जो कडदा तां तुसा री औलादां कुसेरी मदद कने कडदी? इधेरे तांइ तिन्हा ने ही तुसा रा फैसला करणे वाला।

²⁰ पर जे मैं परमेश्वर रा नां लेई करी दुष्टात्मा जो कडदा, तां तुसा ए समजी लेयो कि परमेश्वर तुसा रे बिच राज करणे तांइ आई गेरे हिन।

²¹ जां कोई ताकतवर मणू पूरी तयारी कने अपणे घर री पैहरेदारी करदा तां तिसेरा घर-बार बची रैहन्दा।

²² पर जिस बेल्ले कोई तिसका भी जादा ताकतवर मणू आई करी तिस पर हमला करी के तिसजो हराई देयो तां तिसेरे हथियारां जो जिन्हा पर तिसजो विश्वास थिया, खुस्सि करी तिसेरा घर-बार लुट्टी करी से सब किच्‍छ अप्पु-मिते बंड्डी लिन्दे।

²³ जे मेरे पास्से नी है से मेरे खिलाफ है, ते जे मेरे कन्ने नी बटोलदा, से बखेरी रखदा।

अधूरे सुधार कने मुसीबत

²⁴ जां कोई दुष्टात्मा कुसकी मणू बिच का निकली जान्दी तां से अराम करणे तांइ सुकी जगाह् का होई करी जान्दी, ते जिस बेल्ले तिसजो अराम नी मिलदा तां से बोल्दी, मैं अपणे पुराणे घरे जो दुबारा हटी जान्दी जित्ते का मैं आए री है।

²⁵ ते हटी करी तिसजो से साफ-सुथरा ते सजा सजाया मिलदा।

²⁶ होर तां होर, इस बेरी से अप्पु कन्ने सत्त होर दुष्टात्मा जो भी कन्ने लेई आंदी, अते तिस बिच वास करणा लग्गी पैन्दी ते तिसेरी हालत पैल्ले का भी जादा बुरी होई जान्दी।

धन्न कुण है?

²⁷ जिस बेल्ले यीशु हल्ले ए सब गल्लां बोल्लेया ही करदे थिये, कि मणूआं री भीड़ बिच का इक्क जनानी ने जोरे सणे बोल्लेया, कि धन्न है से जनानी जिसा तुसा जो जम्मेया, ते धन्न है से जनानी जिसा तुसा जो अपणा दूद्द पियाया।

²⁸ इस गल्ल पर यीशु ने बोल्लेया, हाँ, पर जादा धन्न से हिन जे जे परमेश्वर रे वचनां जो ध्यान कने सूणदे ते तिन्हा पर मनदे भी।

स्वर्गीय निशानी री मांग

²⁹ जिय्यां जिय्यां मणूआं री भीड़ बधणा लग्गी, तां यीशु तिन्हा जो बोलणा लगे कि इस जुग रे मणू बड़े भरी बुरे हिन, से निशानी तोपदे रैह्‍न्दे पर इन्हा जो योना रे अलावा होर कोई भी निशानी नी दित्ती जाणी।

³⁰ जिय्यां योना नीनवे रे मणूआं तांइ इक्क निशानी बणेया थिया, तिय्यां ही मणू रे पुत्तर, जे मैं ही है ने इस जमाने रे मणूआं तांइ निशानी बणना

³¹ दक्षिण री राणी ने इस जमाने रे मणूआं पर इल्जाम लगाणे ते तिन्हा जो गुनेह्गार साबित करणा, किजोकी से राजा सुलैमान री समजदारी वाली गल्लां सुनणे तांइ दुनिया रे इक्क कुणे का आए थी, ते इत्ते तां कोई राजा सुलैमान का भी बड्डा है।

³² नीनवे रे मणूआं ने भी परमेश्वर रे हिसाब लैणे वाले रोजे अज्ज रे जुग रे मणूआं पर इल्जाम लाणे, किजोकी उन्हा ने योना री गल्लां सुणी करी अपणे पाप का तौबा कित्ती थी, ते अवे तां योना का भी खास कोई इत्ते है।

सरीर रा दीया

³³ कोई भी मणू दीय्या बाली करी तिसजो लुह्काई करी या भान्डे अन्दर पाई करी नी रखदा, पर ऊच्ची बखारी पर रखदा ताकि इणे-जाणे वाले जो लौ मिल्दी रेयो।

³⁴ हाख्खियां मणू रे सरीर रे दीये सांई हुंदी, इधेरे तांइ जे अगर तेरी हाख्खी साफ है तां तेरा पूरा सरीर भी लौ कने चमकदा होणा पर जे अगर से बुरी हिन तां तेरा पूरा सरीर न्याहरा है।

³⁵ इधेरे तांइ ध्यान रेयो, कि तुसा रे अन्दर री लौ नह्यारा नी बणी जाओ

³⁶ पर जे तुसा रा पूरा सरीर लौ कने चमकदा है, ते सरीर रा कोई भी हिस्सा न्याहरे बिच नी है तां से पूरी तरह् कने इय्यां लस्कणा मन्नो कोई दीया तुसा पर अपणी किरणां चमकाया करदा है।

शास्त्रि ते फरीसियां जो फटकार

³⁷ जां यीशु ए गल्लां बोल्ली बैठ्ठे तां कुसकी फरीसी मणू ने तिन्हेरे छंदे कित्ते, कि तुसा मेरे घरे रोट्टी खाओ, ते से अन्दर जाई करी रोट्टी खाणा बेई गे।

³⁸ जिस बेल्ले तिस फरीसी ने दिख्खेया कि यीशु ने रोट्टी खाणे का पैल्ले अपणे हत्थ नी धोये तां तिसजो बड़ी हैरानी होई

³⁹ ते इस गल्ल पर प्रभु जी ने तिसजो जवाब दित्तेया, ओ फरीसियों, तुसा थाली ते कटोरी जो तां उपरा-उपरा का माँजदे, पर तुसा ही अन्दर का लालच अते बुराई कन्ने भरितेरी हिन

⁴⁰ ओ बेअक्कलो, जिनिए बाहरले हिस्से जो बणाया, कै से अन्दरले हिस्से जो नी बणाए रा है?

⁴¹ पर जे तुसा अन्दरे री चीजां जो दान करी दिंगे तां तुसा रा सब किच्‍छ सुच्चा होई जाणा

⁴² पर, ओ फरीसियों, तुसा पर लाणत है! किजोकी तुसा अपणे पुदीने ते सुदाब बूटियाँ रा दसमा हिस्सा तां चढ़ान्दे पर, परमेश्वर रे प्यार ते तिन्हेरे फैसले जो नकारी दिन्दे दसमा हिस्सा तां दैणा चाहिदा, पर परमेश्वर रे प्यार अते तिन्हेरे फैसले जो नकारे रे बगैर

⁴³ ओ फरीसी मणूओं तुसा पर लाणत है! तुसा सभास्थल बिच छैल जगाह् बैणा चाह्‍ंदे ते जां बजार जान्दे तां सबणी मणूआं का अप्पु जो प्रणाम कराणा चाह्‍ंदे

⁴⁴ तुसा पर लाणत है! किजोकी तुसा तिन्हा लुके री कब्रां सांई हिन जिन्हा पर मणू चलदे पर जाणदे नी।

⁴⁵ तां कुसकी शास्त्री लोक्कां ने तिन्हा जो जवाब दित्तेया, कि ओ गुरु जी, इदेय गल्लां बोल्ली करी तुसा असा री भी बेजती करेया करदे हिन

⁴⁶ यीशु ने तिस्जो बोल्लेया, कि ओ शास्त्रियों, तुसा पर भी लाणत है! तुसा लोक्कां तांइ नियमां रा इदेया बोझ बणाई दिदें जिस जो चुकणा भी मुस्किल है ते अप्पु तिसजो अपणी उंग्गल कने भी छुणा नी चाह्‍ंदे

⁴⁷ तुसा पर लाणत है! किजोकी तुसा तिन्हा भविष्यद्वक्ता तांइ कबराँ बणान्दे, जिन्हा जो तुसा रे बाब्ब-दाद्देयां ने ही मारेया थिया

⁴⁸ इन्हा सबणी गल्लां कने तुसा ए साबित करदे कि तुसा रे पूरखां ने जे भविष्यद्वक्तां जो मारे तिस बिच तुसा राजी हुंदे, किजोकी तिन्हा ने मारेया थिया ते तुसा ने तिन्हेरी कब्रां बणाई दित्ती।

⁴⁹ इधेरे तांइ परमेश्वर रे वचन अन्दर भी बोल्ले रा है, कि मैं तिन्हा का भविष्यद्वक्ता जो ते प्रेरिता जो भेजणा ते तिन्हा ने उन्हा मणूआं बिच का किच्‍छ जो मारी दैणा ते किच्‍छ मणूआं तांइ मुसीबत खड़ी करी दैणी

⁵⁰ इधेरे तांइ दुनिया री सुरुआत का जितणे भी भविष्यद्वक्ता रा खून रूलया, तिसेरा हिसाब इस पीढ़ी रे मणूआं का लित्तेया जाणा

⁵¹ मतलब ए है कि हाबिल रे खून होणे का लेई करी जकरयाह रे मरणे तिकर, जे कि परमेश्वर रे मन्दिर ते वेदी रे बिच मरे थिये तिन्हेरे मरणे रा हिसाब, इस पीढ़ी रे मणूआं का लित्तेया जाणा

⁵² तुसा शास्त्रियों पर लाणत है! किजोकी तुसा ने समजदारी री मती सारी गल्लां सिख्खी तां लेईयाँ, पर अप्पु तिन्हा गल्लां पर नी चले ते जे चलणे री कोसीस करदे थिये तिन्हेरे भी रस्ते पर तुसा रुकावट बणे

⁵³ ते फिरी जां यीशु तित्ते का चली गे तां फरीसी ते शास्त्रि तिन्हेरे खिलाफ होई करी बुरे हाल्ले पीच्छे पेई गे कि से होर भी गल्लां पर यीशु कने सवाल-जवाब करण

⁵⁴ किजोकी से तिन्हेरी ही बोल्लेरियाँ गल्लां पर तिन्हा जो फँसाणे री भाल अन्दर थिये।