यूहन्ना 21 - चम्बयाली नौआ नियम

तिबिरियुस झील रे कनारे चेल्‍लेयां जो लिबणा

¹ इन्हा गल्लां रे बाद यीशु ने खुद जो गलीली समुन्द्र (तिबिरियुस) रे कनारे चेल्‍लेयां रे सामणे प्रकट कित्तेया। अते इस तरिके कने सामणे आये;

² शमौन पतरस अते थोमा जिस जो कि दिदुमुस भी बोल्लेया जान्दा, अते गलील प्रदेश रे काना कस्बे का नतनएल, जब्दी रे पुत्तर, अते यीशु रे चेल्‍लेयां बिच का दो जणे होर इकठ्ठे थिये,

³ शमौन पतरस ने तिन्हा जो बोल्लेया, मैं मच्छी पकड़ने चलया तिन्हा ने तिसजो बोल्लेया, असी भी तेरे कने चलदे अते से निकली करी किस्ती पर चढ़ी गे, पर तिस राती किच्‍छ भी नी पकड़या

⁴ भ्याग हुन्दे ही यीशु कनारे पर आये पर चेल्‍लेयां ने नी पछियाणेया कि से यीशु हिन।

⁵ तां फिरी यीशु ने तिन्हा जो बोल्लेया, ओ मित्तरों, कै तुसा का किच्‍छ मच्छियाँ हिन? तिन्हा ने जवाब दित्तेया, ना

⁶ यीशु ने उन्हा जो बोल्लेया, किस्ती रे सज्जे पास्से जाल पाओ तां किच्‍छ मिलणा इधेरे तांइ तिन्हा ने जाल पाया पर मच्छियाँ जादा होणे री वजह कने तिन्हा का जाल खिच्ची नी होया

⁷ तां तिस चेल्‍ले ने जिस कने यीशु प्यार करदे थिये, पतरस जो बोल्लेया, ए तां प्रभु हिन! शमौन पतरस ने ए सुणी करी कि से प्रभु हिन, चोग्गा पाई लित्तेया (किजोकी से नंगा थिया) अते समुन्द्र अंदर कुदी पेया।

⁸ पर दूज्जे चेल्‍ले किस्ती पर मच्छियाँ कने भरितेरा जाल छिकदे कनारे आये, किजोकी से कनारे का जादा नी, पर कोई लगभग सौ मीटर तक दुर थिये।

⁹ जां से कनारे पूज्जे तां तिन्हा ने तित्ते भखे रे कोले अते तिन्हा पर मच्छी ते रोट्टी रख्खे री दिख्खी।

¹⁰ यीशु ने तिन्हा जो बोल्लेया, जे मच्छियाँ तुसा अवे पकड़ी हिन तिन्हा बिच का किच्‍छ लियाओ।

¹¹ शमौन पतरस गेया अते किस्ती पर चढ़ी करी इक्क सौ त्रियुन्जा बड्डी मच्छियाँ कने भरितेरा जाल कनारे पर खिच्ची लियाया, अते इन्नी मच्छियाँ होणे पर भी जाल नी फट्टेया

¹² यीशु ने तिन्हा जो बोल्लेया, आओ, रोट्टी खाओ, चेल्‍लेयां बिच का कुसकी री भी हिम्मत नी होई कि पुच्छे कि तू कुण है? किजोकी से जाणदे थिये कि ए प्रभु ही हिन।

¹³ यीशु ने रोट्टी लेई करी तिन्हा जो दित्ती ते तिय्यां ही मच्छी भी।

¹⁴ ए तिज्जी वरी ए कि यीशु मरे रे बिच का जिन्दा होणे का बाद चेल्‍लेयां जो लिब्बे।

यीशु ते पतरस

¹⁵ रोट्टी खाणे का बाद यीशु ने शमौन पतरस जो बोल्लेया, ओ शमौन, यूहन्ना रे पुत्तर, कै तू इन्हा सारेयां का बधी करी मेरे कने प्यार रखदा? पतरस ने तिन्हा जो बोल्लेया, हाँ प्रभु, तुसा तां जाणदे ही कि मैं तुसा कने प्यार करदा। तिन्हा ने तिसजो बोल्लेया, मेरी शिक्षा पर चलणे वाले लोक्कां जो उरणू सांई चरा।

¹⁶ तिन्हा ने फिरी दूज्जी वरी तिसजो बोल्लेया, ओ शमौन, यूहन्ना रे पुत्तर, कै तू मेरे कने प्यार करदा? तिन्ने तिन्हा जो बोल्लेया, हाँ प्रभु, तुसा तां जाणदे हिन कि मैं तुसा कने बड़ा प्यार करदा। तिन्हा ने तिसजो बोल्लेया, मेरी शिक्षा जो मनणे वाले लोक्कां जो भेड़ां सांई सम्भाल।

¹⁷ तिन्हा ने तिज्जी वरी तिसजो बोल्लेया, ओ शमौन, यूहन्ना रे पुत्तर, कै तू मेरे कने प्यार रखदा? पतरस उदास होई गेया कि यीशु ने तिसका तिज्जी वरी इय्यां बोल्लेया कि, कै तू मेरे कने प्यार रखदा? अते तिसने बोल्लेया, ओ प्रभु जी, तुसा तां सब किच्‍छ जाणदे तुसा जाणदे हिन कि मैं तुसा कने प्यार रखदा यीशु ने तिसजो बोल्लेया, मेरी शिक्षा जो मनणे वाले लोक्कां जो भेड़ां सांई चरा।

¹⁸ मैं तेरे कने सच-सच बोलदा, जां तू जुआन थिया तां तैयार होई करी जित्ते चाह्‍ंदा थिया तित्ते चली जांदा थिया पर जां तू बूड्डा होणा तां तू अपणे हत्थ पसारणे, अते दूज्जे ने तिज्जो तैयार करी के जित्ते तू नी चाह्‍ंदा तित्ते तिज्जो लेई जाणा।

¹⁹ यीशु ने ए सब पतरस री मौत रे पास्से इसारा करणे तांइ बोल्लेया, जिस कने पतरस ने परमेश्वर री बड़ाई करणी। इन्ना बोल्ली करी यीशु ने पतरस जो बोल्लेया, मेरा पीच्छे चल ते “मेरा चेल्ला बणी रे।”

यीशु ते तिन्हेरे प्यारा चेल्ला

²⁰ पतरस मुड़ेया अते दिख्खेया कि से चेल्ला जिस कने यीशु प्यार करदे थिये, उन्हेरे पीच्छे आया करदा है। ए से ही थिया जिनिये रोट्टी खांदे बेल्ले तिन्हेरे नेड़े बैठ्ठे रा थिया ते झुकी करी पूच्छदा थिया, ओ प्रभु, तुसा जो धोखा देई करी पकड़वाणे वाला कुण है?

²¹ तिसजो दिख्खी करी पतरस ने यीशु जो बोल्लेया, ओ प्रभु जी, इसेरा कै हुणा?

²² यीशु ने तिसजो बोल्लेया, जे मैं चाए कि से मेरे आणे तक, ए इत्ते ही रे, तां तिज्जो इस कने कै मतलब? तू मेरे पीच्छे चल ते मेरा चेल्ला बणे रे।

²³ इय्यां ही ए गल्ल संगी विश्वासी बिच फैली गई कि तिस चेल्‍ले ने नी मरणा, पर यीशु ने तिस कने ए नी बोल्लेया थिया, कि तिसने नी मरणा पर तिन्हेरे बोलणा रा ए मतलब थिया कि जे मैं ए चाए कि से मेरे आणे तक, ए इत्ते ही रे, तां तिज्जो इस कने कै मतलब?

²⁴ ए से ही चेल्ला ए जे इन्हा गल्लां री गवाई दिन्दा अते जिनिये इन्हा गल्लां जो लिख्खेया, अते असी जाणदे कि तिसेरी गवाई सच्ची है।

आखरी गल्लां

²⁵ अते होर भी बड़े सारे कम्म हिन, जे यीशु ने कित्ते जे अगर उन्हा जो इक्क-इक्क करी के लिखदे, तां मैं समजदा कि तिन्हा जो रखणे तांइ इस दुनिया री जगाह् भी घट पेई जाणी थी।