यूहन्ना 17 - चम्बयाली नौआ नियमयीशु री अप्पु तांइ प्रार्थना 1 जां यीशु अपणे चेल्लेयां जो ए गल्लां बोल्ली बैठ्ठे, तां तिन्हा ने उप्पर आसमान पास्से दिख्खी करी बोल्लेया, ओ पिता, से बेल्ला आई रेया, अपणे पुत्तर री बड़ाई कर ताकि पुत्तर भी तुसा री बड़ाई करे। 2 किजोकी तुसा ने अपणे पुत्तर जो पूरी मणू जाति पर हक दित्ते रा है कि से, हर इक्क जो, जिन्हा जो तुसा ने तिसजो दित्ते रा है, हमेसा री जिन्दगी देयो। 3 ते इस तरिक्के कने हमेसा री जिन्दगी जो हासिल कित्तेया जाई सकदा कि मणू इकलौते सच्चे परमेश्वर जो ते यीशु मसीह यानी मेरे जो जाणे जिस जो तुसा दुनिया रे लोक्कां का भेज्जे रा है। 4 जे कम्म तुसा ने मेरे जो दित्ते थिये, उन्हा जो पूरा करी के दुनिया बिच मैं तुसा रे नां री बड़ाई कित्ते री है 5 जदेई बड़ाई मेरी इस दुनिया रे बणाए जाणे का पैल्ले तुसा कने थी, तैसी ही बड़ाई तुसा फिरी मेरे जो देयो। अपणे चेल्लेयां तांइ प्रार्थना 6 जिन्हा लोक्कां जो तुसा इस दुनिया रे लोक्कां बिच का मेरे जो सौंपेया थिया, मैं तिन्हा जो तुसा रे बारे बिच दस्सेया। से हमेसा का तुसा रे ही हिन। से तुसा रे बोलणे रे हिसाब कने चलेया करदे हिन। 7 अवे इन्हा जो पता लग्गी गे रा है कि जे किच्छ भी तुसा ने मेरे जो दित्ते रा है, से सब किच्छ तुसा रे पास्से का ही है, 8 किजोकी मैं तिन्हा जो से ही सारे उपदेस दित्ते, जे तुसा ने मेरे दित्ते थिये, अते तिन्हा ने तिसजो अपणाई लेया ते पक्के तौर पर जाणी लेरा है कि मैं तुसा पास्से का आए रा है, अते उन्हा ने विश्वास कित्तेया कि तुसा ने ही मेरे जो भेज्जे रा है। 9 मैं दुनिया रे लोक्कां तांइ प्रार्थना नी करदा जे गलत तौर-तरिक्के पर चलदे, पर सिर्फ तिन्हा लोक्कां तांइ जिन्हा जो तुसा मेरे जो सौंपेया, किजोकी से तुसा रे हिन। 10 अते सब किच्छ जे मेरा है, से तुसा रा है, अते जे तुसा रा है, से मेरा है अते मेरे जो उन्हेरे जरिए बड़ाई मिल्ली। 11 अवे मैं दुनिया बिच नी रैह्णा, अवे मैं तुसा का आया करदा है, पर मेरे चेल्लेयां ने इस दुनिया बिच रैह्णा, ते मैं तुसा का आई जाणा, ओ पवित्र पिता, अवे अपणे उस नां री ताकत कने तिन्हेरी रक्षा कर जे तुसा ने मेरे जो दित्तेया है, ताकि जिय्यां मैं ते तुसा इक्क हिन, से भी इक्क होई सकण। 12 जां मैं तिन्हेरे कने थिया, मैं तुसा रे उस नां री ताकत कने जे तुसा ने मेरे जो दित्ते रा है, तिन्हेरी रखवाली कित्ती, सिवाय विनास रे पुत्तर जो छड्डी उन्हा बिच कोई खत्म नी होया, इधेरे तांइ कि पवित्रशास्त्र बिच लिख्खे री गल्ल पूरी हो; 13 अवे मैं तुसा रे का आया करदा है, पर ए गल्लां मैं दुनिया रे लोक्कां बिच रेह्ई करी बोल्लेया करदा है, ताकि से मणू मेरी खुसी कने पूरी तरिक्के कने भरी जाण। 14 मैं तुसा रा वचन दुनिया रे लोक्कां जो दित्तेया। दुनिया रे लोक्कां ने मेरे चेल्लेयां कने नफरत कित्ती, किजोकी जिय्यां दुनिया चलदी तिय्यां से नी चलदे, जिय्यां मैं भी इस दुनिया रे हिसाब कने नी चलदा। 15 मैं ए प्रार्थना नी है करदा कि तुसा इन्हा जो दुनिया का चुक्की लेयो बल्कि ए कि तुसा उन्हेरी शैतान का रक्षा करो। 16 जिय्यां मैं इस दुनिया रे लोक्कां बिच का इक्क नी है, तिय्यां ही से भी इस दुनिया रे लोक्कां बिच का नी हिन। 17 तुसा रा वचन सच्चा है, सच्चाई बिच तिन्हा जो पवित्र करो। 18 जिय्यां तुसा ने मेरे जो दुनिया अन्दर भेज्जेया, तिय्यां ही मैं भी इन्हा जो दुनिया अन्दर भेज्जेया। 19 ते मैं अप्पु जो तिन्हेरी भलाई तांइ पवित्तर कुर्बानी बणी करी देई दिंदा। सारे विश्वासियां तांइ प्रार्थना 20 पर मैं सिर्फ अपणे चेल्ले तांइ ही प्रार्थना नी करेया करदा है, बल्कि उन्हेरे तांइ भी जे तिन्हेरे बसेख रे जरिए मेरे पर विश्वास करगे। 21 कि से सब इक्क होंन, तिय्यां ही जिय्यां, ओ पिता जी, तुसा मेरे बिच हिन अते मैं तुसा रे बिच है, से भी असा बिच का इक्क होंन, ताकि दुनिया रे मणू विश्वास करण कि तुसा ने मेरे जो भेज्जेया है। 22 से बड़ाई जे तुसा ने मेरे जो दित्ती है, मैं उन्हा जो दित्ती, ताकि से भी तिय्यां ही इक्क होई सकण जिय्यां असी इक्क हिन। 23 मैं उन्हा बिच होणा ते तुसा मेरे बिच होणा, ताकि से सिद्व होई करी इक्क होई जाण, अते दुनिया जाणी जाये कि तुसा ने मेरे जो भेज्जेया है ते तुसा ने उन्हा कने भी तिय्यां प्यार कित्तेया जिय्यां मेरे कने प्यार करदे हिन 24 ओ पिता जी! जे मणू तुसा मेरे जो दित्ते हिन, मैं चाह्ंदा कि जित्ते मैं है, से भी मेरे कने हो ताकि से मेरी उस बड़ाई जो दिख्खी सकण जे तुसा ने मेरे जो दित्ती है किजोकी दुनिया री रचना का भी पैल्ले तुसा मेरे कने प्यार करदे हिन 25 ओ धार्मिक पिता, दुनिया रे लोक्कां ने मेरे जो नी जाणेया पर मैं तुसा जो जाणेया ते मेरे चेल्लेयां ने भी जाणेया कि तुसा ने मेरे जो भेज्जे रा है। 26 मैं तुसा रा नां इन्हा सामणे प्रकट कित्ते रा है, ते अग्गे भी दसदे रैह्णा ताकि जे प्यार तुसा जो मेरे कने थिया से तिन्हा बिच रेय, ते मैं इन्हा बिच रेयां। |
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.