यूहन्ना 14 - चम्बयाली नौआ नियम

परमेश्वर तांइ पुजणे रा रस्ता

¹ तुसा रा मन दुखी ना हो। परमेश्वर पर विश्वास रख्खो, ते मेरे पर भी विश्वास रख्खो।

² मेरे पिता रे घरे बड़ी सारी रैह्णे री जगाह् हिन, जे अगर जगाह् नी हुंदी तां मैं तुसा जो बोल्ली दैणा थिया, किजोकी मैं तुसा तांइ जगाह् तैयार करणे तांइ चलेया।

³ मैं जाणे रे बाद तुसा रे रैह्णे तांइ जगाह् तैयार करणी, ताकि फिरी आई करी तुसा जो अपणे कने उत्ते लेई जांगा ताकि जित्ते मैं रेयां तित्ते तुसा भी रेयो।

⁴ जित्ते मैं जाया करदा है, तुसा तित्ते रा रस्ता जाणदे।

⁵ थोमा ने यीशु जो बोल्लेया, ओ प्रभु जी, असा नी जाणदे कि तुसा कुते जाया करदे हिन, तां रस्ता किय्यां जाणगे?

⁶ यीशु ने तिसजो बोल्लेया, रस्ता अते सच्चाई ते जिन्दगी मैं ही है, बगैर मेरे कोई पिता-परमेश्वर का नी पूज्जी सकदा।

⁷ जे तुसा मेरे जो जाणेया हुन्दा, तां मेरे पिता जो भी जाणी लैणा थिया: अते अव्वे तिन्हा जो जाणदे हिन, ते तिन्हा जो दिख्खेया भी है

⁸ फिलिप्पुस ने तिन्हा जो बोल्लेया, ओ प्रभु जी, पिता जो असा जो दखाई देयो, ए ही असा तांइ बड़ा है।

⁹ यीशु ने तिसजो बोल्लेया, ओ फिलिप्पुस, मैं इत्तणे रोज्जे रा तुसा कने है, ते कै तू मेरे जो नी जाणदा? जिनिये मेरे जो दिख्खेया तिसने पिता जो दिख्खेया है तां फिरी तू किजो बोल्लेया करदा है कि पिता जो असा जो दिख्खाओ?

¹⁰ कै तू विश्वास नी करदा कि मैं पिता बिच है ते पिता मेरे बिच हिन? ए गल्लां जे मैं तुसा कने बोल्लेया करदा है, अपणे पास्से का नी है बोल्लेया करदा, बल्कि पिता मेरे बिच रही करी अपणा कम्म करेया करदे हिन।

¹¹ मेरे विश्वास करो कि मैं पिता बिच है ते पिता मेरे बिच हिन, नी तां कम्मां ही री वजह कने मेरे पर विश्वास करो।

¹² मैं तुसा कने सच-सच बोलदा, जे मेरे पर विश्वास रखदा, ए कम्म जे मैं करदा, तिन्ने भी करणे पर तिन्ने इन्हा का भी बड्डे-बड्डे कम्म करणे किजोकी मैं पिता का चलेया

¹³ जे किच्‍छ तुसा मेरे नां कने मंगणा, से मैं करणे, ताकि पुत्तर रे जरिए पिता री बड़ाई हो।

¹⁴ जे तुसा मेरे नां च मंगगे, तां मैं तिसजो करगा।

पवित्रात्मा रा वादा

¹⁵ जे तुसा मेरे कने प्यार करदे तां मेरे हुकमा जो मन्नो।

¹⁶ मैं पिता-परमेश्वर का प्रार्थना करगा, ते से तुसा जो इक्क मदतगार दिंगा, कि से हमेसा तुसा कने रेह्।

¹⁷ मतलब से आत्‍मा, जे लोक्कां जो परमेश्वर रे सच रे बारे बिच एहसास दुआंदी, ते जिस जो दुनिया अपणाई नी सकदी, किजोकी से ना तां तिन्हा जो दिखदा ते से ना तिसजो जाणदा। तुसा तिसजो जाणदे, किजोकी से तुसा रे कने रैहन्दा, ते से तुसा बिच होणा।

¹⁸ मैं तुसा जो अनाथ नी छड्डणा, मैं तुसा का आन्दा

¹⁹ अवे थोड़ी ही देर बाद दुनिया रे लोक्कां ने मेरे जो नी दिख्खणा, पर तुसा ने मेरे जो दिख्खणा, किजोकी मैं जिंदा है, इधेरे तांइ तुसा भी जिंदे रैह्णा।

²⁰ तिस रोज जां मैं वापिस हटणा, तुसा जाणना कि मैं पिता बिच है, ते तुसा मेरे बिच हिन, ते मैं तुसा बिच।

²¹ जे मेरे हुकमां जो जाणदा ते तिन्हा जो मनदा, से ही मेरे कने दाह-पीड़ रखदा अते जे मेरे कने दाह-पीड़ रखदा तिस कने मेरे पिता ने भी दाह-पीड़ रखणी, अते मैं तिस कने प्यार करणा ते अप्पु जो तिसेरे सामणे जाहिर करणा।

²² तिस यहूदा ने जे इस्करियोती नी थिया, तिसने बोल्लेया, ओ प्रभु जी, कै होया जे तुसा अप्पु जो असा रे सामणे लियाणा चाह्‍ंदे पर दुनिया रे लोक्कां रे सामणे नी?

²³ यीशु ने तिसजो जवाब दित्तेया, जे कोई मेरे कने प्यार रखगा तिनिये मेरे शिक्षा जो मनणा, ते मेरे पिता ने तिस कने दाह-पीड़ रखणी ते असा तिसका आणा, ते तिसेरे कन्ने रैह्णा।

²⁴ जे मेरे कने प्यार नी करदे से मेरे हुकमां जो भी नी मनदा, अते जे हुकमां जो नी मनदा, से मेरे नी पर पिता-परमेश्वर रे हुकमां जो नी मनदा जिन्हा ने मेरे जो लोक्कां बिच भेज्जे रा है।

²⁵ ए गल्लां मैं तुसा कने रैह्‍न्दे बेल्ले ही तुसा जो बोल्ली थी।

²⁶ पर पिता ने मेरे नां कने भेजणा इक्क मददगार जो भेजणा जे पवित्रात्मा है, तिसने तुसा जो सब गल्लां सखाणी, अते जे किच्‍छ मैं तुसा जो बोल्लेया से सब गल्लां तिन्ने तुसा जो चेत्ता कराणी।

²⁷ “मैं तुसा जो अपणी सांती देई करी जाया करदा है। जदेई सांती दुनिया रे मणू दिंदे तैसी सांती नी। तुसा रे दिल दुखी ना हो, ते ना ही डरे।”

²⁸ तुसा सुणी चुके रे हिन जे मैं तुसा जो बोल्लेया, मैं जांदा, ते तुसा रे का फिरी आणा, जे तुसा मेरे कने सच्चा प्यार करदे तां इस गल्ल कने खुस हुन्दे कि मैं पिता का जाया करदा है, जे मेरे का बड्डे हिन।

²⁹ ते मैं ए सब किच्‍छ होणे का पैल्ले तुसा जो बोल्ली दित्तेया, कि जां से होई जांगा, तां तुसा मेरे पर विश्वास करण।

³⁰ मैं अवे तुसा कने जादा गल्लां नी करणी, किजोकी इस दुनिया रा सरदार जे शैतान है, आया करदा है, मेरे पर तिसेरा कोई हक्क नी है,

³¹ पर ए इधेरे तांइ होया करदा है कि दुनिया रे मणू जाणे कि मैं पिता कने प्यार करदा, ते जिय्यां पिता ने मेरे जो हुकम दित्ते हिन मैं तिय्यां ही करदा। उठ्ठो, इत्ते का चलदे।