यूहन्ना 11 - चम्बयाली नौआ नियम

लाज़र री मौत

¹ मरियम ते उसेरी भैण मार्था रे ग्रां बैतनिय्याह रा लाज़र ना रा इक्क मणू बिमार थिया

² ए ओ ही मरियम थी जिनिये प्रभु रे पैरां पर इत्र पाई करी उन्हेरे पैरां जो अपणे बालां कने पुंजेया थिया, इसेरा ही भाई लाज़र बिमार थिया।

³ अते उसेरी भैण ने तिसजो कहलाई भेजेया, ओ प्रभु, दिख, जिस जो तू प्यार करदे, ओ बिमार है

⁴ ए सुणी करी यीशु ने बोल्लेया, ए बीमारी मरणे तांइ नी पर परमेश्वर री बड़ाई तांइ है, कि उस कने (उसदे जरिए) परमेश्वर रे पुत्तर री बड़ाई हो।

⁵ यीशु मार्था ते तिसेरी भैण ते लाज़र जो प्यार करदा थिया।

⁶ पर जां तिनिये सूणेया कि से बिमार है, तां जिस जगाह् पर ओ थिया, उत्ते दो दिनां तांइ होर रुकी गेया।

⁷ इसेरे बाद तिनिये चेल्‍लेयां जो बोल्लेया, आओ, असी फिरी यहूदियां प्रदेश जो चलदे।

⁸ चेल्‍लेयां ने तिसजो बोल्लेया, ओ गुरु, अब्बे तां यहूदी अधिकारी तुसा जो बट्टे मारणा चाह्‍ंदे, ते कै तू फिरी भी उत्ते ही जादां?

⁹ यीशु ने उत्तर दित्तेया, कै दिन रे बारा घटें नी हुदें? अते जे कोई दिन अन्दर चले तां ओ ठोक्कर नी खादां, किजोकी इस दुनिया री रौसनी दिखदा,

¹⁰ पर जे कोई रात्ती चले तां तिसजो ठोकर लगदी, किजोकी तिन्हा का रौसनी नी है।

¹¹ उन्निए ए गल्लां बोल्ली, अते इसेरे बाद उन्हा जो बोलणा लग्गेया, असा रा दोस्त लाज़र सोई गे रा है, पर मैं तिसजो जगाणे जाया करदा है

¹² तां चेल्‍लेयां ने तिसजो बोल्लेया, ओ प्रभु, जे से सोई गे रा है, तां तिनिये ठीक भी होई जाणा

¹³ यीशु ने उसेरे मरणे रे बारे बिच बोल्लेया थिया, पर ओ समजे की निद्रं कने सोणे रे बारे बिच है बोलदा

¹⁴ तां यीशु ने उन्हा जो साफ-साफ दस्सी दित्तेया, लाज़र मरी गे रा है

¹⁵ ते मैं तुसा री तांइ कने खुस है कि मैं उत्ते नी थिया जिस कने तुसा विश्वास करो, पर अवे आओ, असी तिसका चले

¹⁶ तां थोमा ने जे दिदुमुस कहलादां, अपणे साथी चेल्‍लेयां जो बोलदा, आओ, असी भी उस कने मरणे जो चलदे।

यीशु रा फिरी जिंदा होणा ते जिन्दगी

¹⁷ जां यीशु बैतनिय्याह कस्बे बिच पूज्जे तां तिन्हा जो ए पता चलेया कि लाज़र जो कब्र बिच रख्खे चार दिन होई गेरे हिन।

¹⁸ बैतनिय्याह कस्बा यरुशलेम सहर का कोई लगभग दो मील री दुरी पर थिया।

¹⁹ मते सारे यहूदी मार्था ते मरियम जो उन्हेरे भाई रे मरणे पर सांती दैणे तांइ आए रे थिये

²⁰ जां मार्था ने यीशु रे आणे री खबर सुणी तां तिसजो मिलणे जो गयी, पर मरियम घरे ही बेई रेई।

²¹ मार्था ने यीशु जो बोल्लेया, ओ प्रभु, जे तू इत्ते हुन्दा, तां मेरा भाई कदी नी मरदा।

²² ते अब्बे भी जाणदी कि जे किच्‍छ तू परमेश्वर का मगणा, परमेश्वर ने तेरे जो दैणा।

²³ यीशु ने तिसजो बोल्लेया, तेर भाई फिरी जिन्दा होई जाणा।

²⁴ मार्था ने तिसजो बोल्लेया, मैं जाणदी कि हिसाब कताब होणे रे दिन पर फिरी जिन्दे होणे रे बेल्ले तिनिये फिरी जिन्दें होई जाणा जां सारे लोक्कां ने भी जिन्दे होई जाणा।

²⁵ यीशु ने तिसजो बोल्लेया, फिरी जिन्दा होणा ते अब्बे री जिन्दगी मैं ही है जै कोई मेरे पर विश्वास रखदा, से मरी भी जाए तां भी तिनिये जीणा,

²⁶ ते जे कोई जिन्दा है ते मेरे पर विश्वास रखदा, तिनिए कदी नी मरणा, कै तू इस गल्ल पर विश्वास करदी?

²⁷ उन्निए तिसजो बोल्लेया, हाँ! ओ प्रभु, मैं विश्वास करदी कि परमेश्वर रा पुत्तर मसीह यीशु जे दुनिया पर आणे वाला थिया, से तू ही है।

यीशु रा रोणा

²⁸ ए बोल्ली करी से चली गई, ते अपणी भैण मरियम जो सद्दी करी चुपचाणे दस्सेया, गुरु इत्ते ही है ते तेरे जो सद्देया करदा है।

²⁹ ए सूणदे ही ओ झटपट उठी करी उस का आई

³⁰ यीशु हल्ले ग्रां रे बाहर ही तिस्सी जगाह् पर थिये जिस जगाह् पर मार्था तिसजो मिल्ली थी।

³¹ तां जे यहूदी मणू मरियम कने घर अन्दर थिये, ते तिसजो तसल्ली थिये दिए करदे, ए दिख्खी करी कि मरियम झटपट उठी करी बाहर जो गे री है समजे कि ओ कब्र पर रोणे जो जाया करदी है, इस तांइ उसदे पीच्छे चली गे।

³² जां मरियम उत्ते पूज्जी जित्ते यीशु थिया, तां तिसजो दिखदे कने ही उसदे पैरां पर पेई गई, ते बोलणा लग्गी, ओ प्रभु, जे तू इत्ते हुन्दा तां मेरा भाई नी मरदा।

³³ जां यीशु ने तिसजो ते उन्हा यहूदियां जो जे उस कने आए रे थिये, रौंदें दिख्खेया, तां मन बिच बड्डा वरी उदास ते दुखी होई गे,

³⁴ ते बोल्लेया, तुसा ने तिसजो कुते रख्खे रा है? उन्हा ने तिसजो बोल्लेया, ओ प्रभु, चली करी दिख्खी लै।

³⁵ यीशु रोये।

³⁶ तां यहूदी मणू बोलणा लग्गे, दिख्खो, ओ उस कने किन्ना प्यार करदा थिया।

³⁷ पर उन्हा बिच का किच्‍छ लोक्कां ने बोल्लेया, कै जिनिये अन्नेया री हाख्खियां री रौसनी ठीक कित्ती, ओ इन्ना भी करी सकेया कि ए मणू नी मरदा?

लाज़र जो जिन्दा करणा

³⁸ यीशु मन बिच फिरी बड्डा ही उदास होई करी कब्र पर आया, ओ इक्क गुफा थी ते इक्क पत्थर उस तिस गुफा रे दुआर रख्खे रा थिया।

³⁹ यीशु ने बोल्लेया, पत्थर हटाओ तिस मुर्दे री भैण मार्था तिसजो बोलणा लग्गी, ओ प्रभु, उस बिच का अवे तां मुस्क आंदी, किजोकी तिसजो मरे रे चार दिन होई गेरे हिन

⁴⁰ यीशु ने तिसजो बोल्लेया, कै मैं तेरे जो नी बोल्लेया थिया कि जे तू विश्वास करगी, तां परमेश्वर री महिमा जो दिखगी?

⁴¹ तां उन्हा ने तिस पत्थर जो हटाया यीशु ने स्वर्ग रे पास्से हाख्खी चुक्की करी बोल्लेया, ओ पिता, मैं तेरा शुक्रिया करदा कि तैं मेरी सुणी लित्ती री है

⁴² मैं जाणदा थिया कि तू हमेसा मेरी सूणदा, पर जै भीड़ नेड़े-तेड़े खड़िती री है, उनहेरि वजह कने मैं ए जादा जोरे बोल्लेया कि जिस कने ए विश्वास करण कि तैं मेरे जो भेज्जे रा है,

⁴³ ए बोल्ली करी तिनिये बड़े जोर कने हक्क मारी, ओ लाज़र, निकली आ!

⁴⁴ जे मरी गेया थिया, ओ कफन कने हात्थ-पैर भन्निते रे ही बाहर आई गेया, ते उसदा मुँह कपड़े कने भन्निते रा थिया, यीशु ने उन्हा लोक्कां जो बोल्लेया कि तिसजो खोल्ली दयो ते जाणे दयो।

यीशु रे खिलाफ चाल

⁴⁵ तां जे यहूदी मणू मरियम कने आए रे थिये ते तिन्हेरा ए कम्म दिख्खेया थिया, उन्हा बिच का मते जणेया ने उस पर विश्वास कित्तेया।

⁴⁶ पर किच्‍छ ने फरीसियां का जाई करी यीशु रे कम्मां री खबर दित्ती

⁴⁷ इस पर बड्डे पुरोत्तां ते फरीसियां ने महासभा सद्दी, ते बोल्लेया, असी कै करण? ए मणू तां मते चिन्ह-चमत्कार दिखांदा।

⁴⁸ जे असी, तिसजो इय्यां ही छड्डी दिंदे, तां सारेयां ने तिसजो मसीह मन्नी लैणा, ते रोमियां ने आई करी ह्मारी जगाह् ते जाति दोन्नां पर कब्जा करी लैणा।

⁴⁹ तां उन्हा बिच काईफा नां रे इक्क मणू ने जे उस साल रा प्रधान पुरोत्त थिया, उन्हा जो बोल्लेया, तुसा किच्‍छ नी जाणदे,

⁵⁰ ते ना ही ए समजदे कि तुसा रे तांइ ए ही भला होणा कि असा रे सब मणूआं तांइ इक्क मणू मरे, ते ना ए कि सारी जाति नास (बर्बाद) हो,

⁵¹ ए गल्ल तिनिये अपणे पास्से का नी बोल्ली थी, पर उस साल रा प्रधान पुरोत्त होई करी भविष्यवाणी कित्ती, कि यीशु ने उस जाति तांइ मरणा।

⁵² ते ना सिर्फ उस जाति तांइ पर इस तांइ भी परमेश्वर रे तित्तर-बित्तर बच्चेयां जो भी इक्क करी दे।

⁵³ अते उसी दिन का से यहूदी अधिकारी यीशु जो मारणे री तरकिब्बां बनाणा लग्गी पये।

⁵⁴ इधेरे तांइ यीशु उस बेल्ले का यहूदियां प्रदेश बिच खुली करी नी घुम्मे, पर उत्ते का बणा रे नेड़े रे वाली प्रदेश रे इफ्राईम नां रे इक्क नगर जो चली गे ते अपणे चेल्‍लेयां कने उत्ते ही रेहणा लग्गे

⁵⁵ यहूदियां रा फसह रा त्याहार रा समय नेड़े थिया, ते मते मणू त्योहर का पैल्ले अपणे ग्रां का यरुशलेम सहर जो गे कि अपणे आप जो अपणे रीवाज रे हिसाब कने मन्दिर बिच जाई करी शुद्व करण।

⁵⁶ अते ओ यीशु जो तोपणा लग्गे ते मन्दिर बिच आपस अन्दर खड़ी करी बोलणा लग्गे, तुसा कै सोचदे? कै तिनिये त्योहर पर नी आणा?

⁵⁷ बड्डे पुरोत्तां ते फरीसियां ने ए हुकम देई रखे रा थिया कि जै जाणदा हो कि यीशु कुते है ओ दस्से, ताकि ओ तिसजो पकड़ी सकण।