यूहन्ना 10 - चम्बयाली नौआ नियम

पुहाल ते भेड़ां रा उदारण

¹ मैं तुसा जो सच-सच बोलदा कि जे कोई दुआर का गुआड़ बिच नी बड़दा, पर कुसकी दूए पास्से का चढ़दा, से चोर ते डाकू है।

² पर जे दुआर का अन्दर जान्दा, से भेड़ां रा पुहाल है।

³ तिसेरे तांइ पैहरेदार दुआर खोल्ली दिंदा, ते भेड़ां तिसेरी अवाज सुणदी, ते से अपणी भेड़ां जो नां लेई-लेई करी सददा ते बाहर लेई जादां।

⁴ जिस बेल्ले से अपणी सारी भेड़ां जो बाहर कड्डी लिन्दा, तां से तिन्हेरे अग्गे-अग्गे चलदा, ते भेड़ां तिसेरे पीच्छे-पीच्छे चली पैंदी, किजोकी से तिसेरी अवाज पछाणदी।

⁵ पर तिन्हा ने पराए मणू का नी जाणा, पर तिसका नसणा किजोकी से पराए री अवाज नी पछाणदी।

⁶ यीशु ने तिन्हेरे जो ए उदारण सुणाया, पर से तिन्हेरी गल्लां रा मतलब नी समजे।

यीशु अच्छा पुहाल

⁷ तां यीशु ने फिरी तिन्हा जो बोल्लेया, मैं तुसा कने सच-सच बोलदा, कि भेड़ां रा दुआर मैं है।

⁸ जिन्ने मेरे का पैल्ले आए से सारे चोर ते डाकू हिन, पर मेरी भेड़ां ने तिन्हेरी नी सूणी।

⁹ दुआर मैं है, जे अगर कोई मेरे का अन्दर आए, तां छुटकारा पाणा, ते अन्दर बाहर आया जाया करणा ते चारा पाणा।

¹⁰ चोर कुसकी होर कम्म तांइ नी पर सिर्फ चोरी करणे, ते मारणे, ते तबाह करणे तांइ आदां। मैं इस तांइ आया की ओ जिन्दगी पाण ते रज्जी करी पाण।

¹¹ खरा पुहाल मैं है, खरा पुहाल अपणी भेड़ां तांइ हमेसा अपणी जान दैणे तांइ तैयार रैहन्दा।

^12-13 मजदूर भेड़िये जो आंदा दिख्खी करी नह्सी जांदा। किजोकी से ना तां तिन्हेरा पुहाल है ते ना ही भेड़ां रा मालक है, इधेरे तांइ तिन्हेरी परवाह नी करदा। भेड़िया तिन्हा भेड़ां पर हमला करी के तिन्हेरे जो बखेरी दिंदा।

¹⁴ खरा पुहाल मैं है, मैं अपणी भेड़ां जो ते मेरी भेड़ां मेरे जो तिय्यां ही जाणदी

¹⁵ जिय्यां प्यो मेरे जो जाणदा ते मैं प्यो जो जाणदा, ते मैं अपणी भेड़ां तांइ हमेसा जान दैणे तांइ तैयार रैहन्दा।

¹⁶ मेरी होर भी भेड़ां हिन, जे इस गुआड़ री नी हिन मेरे जो तिन्हा जो भी लाणा जरुरी है तिन्हा ने मेरी अवाज सूणनी, तां इक्क ही झुण्ड ते इक्क ही पुहाल होणा।

¹⁷ प्यो इस तांइ मेरे कने प्यार करदा किजोकी मैं अपणी जान दिंदा ताकि मैं फिरी जिन्दा होई जां।

¹⁸ कोई मेरी जिन्दगी मेरे का खुस्सेया नी है करदा, बल्कि मैं अप्पु ही अपणी जिन्दगी दिंदा, मेरे जो अपणी जिन्दगी दैणे रा भी हक्क है, ते तिसजो फिरी लेई लैणे रा भी हक्क है: ए हुकम मेरे जो मेरे पिता-परमेश्वर का मिल्ले रा है।

¹⁹ इन्हा गल्लां री वजह कने यहूदियां बिच फिरी फूट पेई गई।

²⁰ तिन्हा बिच का मते सारे बोलण लग्गे, तिन्हा बिच दुष्टात्मा है, ते से पागल हिन, तिन्हेरी मत सुणो।

²¹ होर लोक्कां ने बोल्लेया, ए गल्लां इदेय मणू री नी जिसेरे बिच दुष्टात्मा हो, दुष्टात्मा अन्नेयां री हाख्खियां नी खोल्ली सकदी।

यहूदियां रा अविश्वास

²² यरुशलेम सहर बिच स्थापना रा त्याहार मनाया जाया करदा थिया, सर्दियां रा मौसम थिया।

²³ यीशु मन्दिर बिच सुलैमान रे अंगण बिच घूम्मेया करदे थिये।

²⁴ तां यहूदियां रे अधिकारियां ने यीशु जो घेरी लित्ता ते पूच्छेया, तुसा ने असा रे मन जो लम्बे समय का परेसानी बिच पाई रख्खे रा है। जे अगर तुसा मसीह हिन तां असा कने साफ-साफ बोल्ली देयो।

²⁵ यीशु ने तिन्हा जो जवाब दित्ता, मैं तुसा जो बोल्ली दित्ता पर तुसा विश्वास ही नही करदे, जे कम्म मैं अपणे प्यो रे दित्ते रे अधिकार कने करदा, ओ ही मेरे गवाह हिन

²⁶ पर तुसा इस तांइ विश्वास नी करदे किजोकी मेरी भेड़ां बिच का नी हिन

²⁷ मेरी भेड़ां मेरी अवाज सुणदी, मैं तिन्हा जो जाणदा, ते से मेरे पीच्छे-पीच्छे चलदी।

²⁸ ते मैं तिन्हा जो हमेसा री जिन्दगी दिंदा, से कदी भी बर्बाद नी होणी, ते कोई तिन्हा जो मेरे हथ का नी खुस्सि सकदा।

²⁹ मेरा प्यो जिन्हा ने तिन्हेरे जो मेरे जो दित्ते रा है, सबका बड्डा है ते कोई तिन्हा जो मेरे प्यो का खुस्सि नी सकदा।

³⁰ मैं ते प्यो इक्क ही हिन।

³¹ यहूदियां ने यीशु जो मारणे तांइ फिरी बट्टे चुक्के।

³² इस पर यीशु ने तिन्हा जो बोल्लेया, मैं तुसा जो अपणे प्यो रे पास्से का मते सारे ठीक कम्म दिखाए रे हिन तिन्हा बिच का कुस्स कम्म तांइ तुसा मेरे जो बट्टे मारदे?

³³ यहूदियां ने तिन्हा जो जवाब दित्ता, ठीक कम्म तांइ असी तुसा जो बट्टे नी मारदे पर परमेश्वर री बेजती करणे री वजह ते इस तांइ की तुसा मणू होई करी अप्पु जो परमेश्वर बणादां।

³⁴ यीशु ने तिन्हा जो जवाब दित्ता, कै तुसा री पवित्रशास्त्र बिच नी लिख्खे रा है, “मैं बोल्लेया, तुसा परमेश्वर हिन?”

³⁵ जे अगर तिन्हा जो परमेश्वर बोल्लेया जिन्हेरे का परमेश्वर रा वचन पूज्जेया (ते पवित्रशास्त्र री गल्ल झूठ नी होई सकदी),

³⁶ तुसा किजो बोलदे कि ए परमेश्वर री बेजती है जां मैं बोलदा, “मैं परमेश्वर रा पुत्तर है?” आखरकार, मैं से ही है जिस जो पिता-परमेश्वर ने मेरे जो अलग करी के इस दुनिया बिच भेज्जे रा है।

³⁷ जे मैं अपणे प्यो रे कम्म नी करदा, तां मेरा विश्वास मत करो

³⁸ पर जे अगर मैं से कम्म करदा, तां चाए मेरा विश्वास ना भी करो, पर उन्हा कम्मां रा तां विश्वास करो, ताकि तुसा जाणी सको ते समझो की प्यो मेरे बिच है ते मैं प्यो बिच।

³⁹ तां तिन्हा ने फिरी यीशु जो पकड़ने री कोसीस कित्ती पर से तिन्हेरे हत्थां का निकली गे।

⁴⁰ फिरी यीशु यरदन नदी रे पार तिस जगाह् पर चली गे जित्ते यूहन्ना पैल्ले बपतिस्मा दिंदा थिया, ते उत्ते ही रे।

⁴¹ मते सारे मणू तिन्हेरे का आई करी बोलदे थिये, यूहन्ना ने तां कोई चिन्ह-चमत्कार नी दिखाया, पर जे किच्‍छ यूहन्ना ने इन्हेरे बारे बिच बोल्लेया थिया, से सारा किच्‍छ सच थिया।

⁴² ते उत्ते मते लोक्कां ने यीशु पर विश्वास कित्ता।