याकूब 5 - चम्बयाली नौआ नियमअमीर मणूआं जो चितौणी 1 ओ अमीर लोक्कों सुणी तां लेयो, तुसा अपणे आणे वाले दुखां पर लेरां मारी-मारी करी रोओ। 2 तुसा री जायदाद बर्बाद होई जाणी ते तुसा रे कपड़े खराब होई गेरे हिन। 3 तुसा रा सोन्ना ते चाँदी रा कोई मोल नी रेया। परमेश्वर रे न्याय करणे रे दिन पर तुसा रे कठेरे रा धन-दौलत ने तुसा रे खिलाफ सबूत होणा ते जिस धन-दौलत जो तुसा कठेरेया तिसने तुसा जो आग्ग सांई मुकाई दैणा। 4 दिख्खो, जिन्हा मजदूरां ने तुसा रे खेत्तर कट्टे रे हिन, ते तिन्हेरी मजदूरी जे तुसा धोखा देई करी रख्खी लित्ती, से मजदूर ते बाड्डी करणे वाले तुसा रे खिलाफ परमेश्वर का लेरां मारी करी रोया करदे हिन ते तिन्हेरी बिनती सेना रे प्रभु ने सुणी लित्ते री है। 5 तुसा दुनिया रे एशो अराम बिच ही लग्गी रे ते बड़ा ही सुख भोग्गेया। तुसा हमेसा सिर्फ अपणी खुसी तांइ जिये ते तिस्सी तरिक्के कने तांइ अप्पु जो तैयार कित्ता कि प्रभु तुसा जो सजा दैण। 6 जे धार्मिक मणू तुसा रा सामणा नी करी सकदे थिये तुसा तिन्हा जो दोषी साबित करी के मारी रख्खेया। सवर तरस अते प्रार्थना दुख बिच सबर रखणा 7 इधेरे तांइ ओ मेरे संगी विश्वासियों, प्रभु रे आणे तिकर सबर रखो। जिय्यां किसान दुनिया री कीमती फसल री उम्मीद रख्खी करी पैल्ली ते आखरी बरखा तिकर सबर रखदा ताकि फसल उगे ते बड्डिणे तांइ तैयार होई जाए। 8 तिय्यां ही तुसा भी सबर रखो, ते हिम्मत रख्खो, किजोकी प्रभु तौले ही आणे वाले हिन। 9 ओ संगी विश्वासियों, इक्क दूज्जे पर मत कुड़कुड़ाओ, ताकि परमेश्वर जे हाकिम है तुसा जो सजा ना दे, ते से अवे बड़े नेड़े है ते वस पुजणे ही वाला है। 10 ओ संगी विश्वासियों, जिन्हा भविष्यद्वक्ता ने प्रभु रे नां कने गल्लां कित्ती, तिन्हेरे दुख चुक्कणे ते सबर रखणे जो इक्क आर्दश समझो। 11 असी सबर रखणे वाले लोक्कां जो धन्न बोलदे। तुसा अय्यूब नां रे मणू रे सबर रखणे रे बारे बिच तां सुणे रा ही है, ते प्रभु ने आखर तिसजो जे प्रतिफल दित्ता तिसजो तुसा जाणी लित्ते रा कि प्रभु अती करुणामयी ते दयालू हिन। 12 पर ओ मेरे संगी विश्वासियों, सबका खरी गल्ल ए है कि कदी कसम मत खांदे, न स्वर्ग री, ना धरती री, ते ना ही कुसकी होर चीज दी पर तुसा री गल्ल हाँ री हाँ ते ना री ना हो, ताकि परमेश्वर तुसा पर इल्जाम लाई करी तुसा जो सजा दे। प्रार्थना री ताकत 13 जे तुसा बिच कोई दुखी हो तां प्रार्थना करे ते जे अगर खुस हो तां परमेश्वर की तारीफ रे भजन गाए। 14 तुसा बिच जे अगर कोई बिमार है तां कलीसिया रे बुजुर्ग लोक्कां जो सद्दो, ते से प्रभु रे नां कने तिस पर तेल मली करी तिसेरे तांइ प्रार्थना करण, 15 ते विश्वास री प्रार्थना कने बिमार ने बची जाणा ते प्रभु ने तिस मणू जो ठीक करी दैणा ते जे उसने पाप भी कित्ते रे होणे तां से भी माफ होई जाणे। 16 इधेरे तांइ तुसा अप्पु बिच इक्क-दूए रे सामणे अपणे-अपणे पाप्पां जो मन्नी लेयो, ते इक्क-दूए तांइ प्रार्थना करो, जिस कने तुसा अपणी बिमारियां का ठीक होई जाओ। धार्मिक मणू री प्रार्थना रे असर कने सब कुछ होई सकदा। 17 भविष्यद्वक्ता एलिय्याह भी तां असा सांई दुख-सुख भोगी मणू ही थिया, ते तिसने बड़े पूरे दिल कने प्रार्थना कित्ती ताकि बरखा ना हो, ते साड्डे त्रै साल्लां तिकर बरखा नी होई, 18 फिरी तिनिए प्रार्थना कित्ती, ते आसमान का बरखा होई, ते जमीन फलवतं होई। 19 ओ मेरे संगी विश्वासियों, जे तुसा बिच का कोई सच्चाई रे रस्ते का भटकी जाए ते कोई तिसजो फिरी परमेश्वर का हटणे बिच मदद करे, 20 तां से ए जाणी लये कि जे कोई कुसकी भटके रे पापी जो परमेश्वर का हटणे बिच मदद करदा तां परमेश्वर ने तिस पापी मणू रे मते सारे पाप्पां जो माफ करी दैणा ते तिसजो हमेसा री मौत का बचाई लैणा। |
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.