याकूब 4 - चम्बयाली नौआ नियम

दुनिया कने दोस्ती के खिलाफ चितौणी दुनिया कने दोस्ती

¹ तुसा बिच लड़ाई-झगड़े सिर्फ तिन्हा एशो-अराम री वजह कने आई गेरे हिन जे तुसा रे बिच लड़दे-भिड़दे रैहन्दे।

² तुसा इच्छा रखदे पर तुसा जो मिलदा नी, इधेरे तांइ तुसा खून करणे रा भी इरादा रखदे, तुसा हिर्स करदे पर कुछ हासिल नी करी पादें इधेरे तांइ तुसा लड़दे ते झगड़दे। तुसा जो इस तांइ नी मिलदा की तुसा परमेश्वर का मगंदे नी।

³ हांलाकी तुसा परमेश्वर का मगंदे पर फिरी भी तुसा जो नी मिलदा किजोकी बुरी नीत कने मगंदे ताकि अपणे एशो-अराम बिच उड़ाई देयो।

⁴ ओ बेईमान लोक्कों, तुसा जाणदे कि दुनिया री चीजां कने प्यार रखणा परमेश्वर कने नफरत करणा है। अते जे दुनिया रा दोस्त होणा चाह्‍ंदा, से अपणे आप जो परमेश्वर रा दुश्मण बणादां

⁵ तुसा जो ए समझणा चाएदा की परमेश्वर पवित्रशास्त्र बिच ए बोलदे, “जिस आत्‍मा जो परमेश्वर ने असा रे अन्दर बसाए रा है, से हिर्स नी करदा जे अगर असी परमेश्वर रे अलावा असी होर कुसकी कने प्यार रखदे।”

⁶ से तां होर भी जादा दया करदे ताकि असी बुरी इच्छा रा विरोध करी सकण, इसी वजह कने पवित्रशास्त्र बिच ए लिख्खे रा है, “परमेश्वर घमंडिया रा विरोध करदे पर निमते मणूआं पर अनुग्रह करदे।”

⁷ इधेरे तांइ परमेश्वर रे अधीन होई जाओ। शैतान रे खिलाफ रेयो, ते तिनिये तुसा रे सामणे का नह्सी जाणा।

⁸ परमेश्वर रे नेड़े आओ तां तिन्हा ने भी तुसा रे नेड़े आणा। ओ पापियों, अपणे जिन्दगी का पाप दुर करो, ते ओ दोगले लोक्कों अपणे दिल जो पवित्र करो।

⁹ अपणे पाप्पां री वजह कने दुखी हो, ते मातम करो, ते रोओ, तुसा री हँसी मातम बिच ते तुसा रा आनंद करणा उदासी बिच बदली जाए।

¹⁰ प्रभु रे सामणे निमते बणो तां तिन्हा ने तुसा जो आदर दैणा।

भाईयां पर इल्जाम लगाणा

¹¹ ओ संगी विश्वासियों, इक्क दूए री बदनामी मत करेया करो, जे अपणे संगी विश्वासी री बदनामी करदा या तिस पर इल्जाम लादां, तां से मूसा रे कानून री बदनामी करदा ते मूसा रे कानून पर इल्जाम लादां, ते तू मूसा रे कानून पर चलणे वाला नी पर तिस पर हाकिम ठैहरेया।

¹² मूसा रा कानून दैणे वाले ते तिसेरे हाकिम सिर्फ परमेश्वर ही हिन, जे बचाणे ते खतम करणे री ताकत रखदे, पर तिज्जो कुसकी पर भी इल्जाम लाणे रा कोई हक्क नी है।

घमण्ड रे खिलाफ चितौणी

¹³ तुसा जे ए बोलदे कि अज्ज या कल असी कुसकी होर सहर बिच जाई करी तित्ते इक्क साल बिताणा, ते कम्म करी के फैदा कमाणा

¹⁴ पर तुसा ए नी जाणदे की कल कै होणा, सुणी तां लेयो कि तुसा री जिन्दगी है ही क्‍या? तुसा तां भाप सांई हिन जे थोड़ी देर दिसदी ते फिरी गायब होई जांदी,

¹⁵ पर इधेरे बजाए तुसा जो ए बोलणा चाएदा, जे अगर प्रभु चाह्‍ंदे तां असी जिन्दे रैह्णा ते ए या ओ कम्म भी करणा।

¹⁶ पर अवे तुसा अपणे बुरे मनसुबे पर घमडं करदे, ते इदेया घमंड बुरा है।

¹⁷ इधेरे तांइ जे कोई भलाई करणा जाणदा ते नी करदा, तिसेरे तांइ ए पाप है।