याकूब 2 - चम्बयाली नौआ नियमअमीर अते ताकतवर री तरफदारी मत करदे भेद-भाव रे खिलाफ चितौणी 1 ओ मेरे संगी विश्वासियों, तुसा असा रे महिमामय मसीह यीशु बिच विश्वास करणे वाले मणू हिन, इधेरे तांइ तुसा बिच दूज करणे रा स्वभाव ना हो। 2 जे अगर इक्क मणू सोन्ने रे छल्ले ते छैल कपड़े पाई करी तुसा री कलीसिया बिच आए ते इक्क कगांल भी मैल्ले-कुचैल्ले कपड़े पाई करी आए 3 ते तुसा तिस छैल कपड़े वाले मणू पर ध्यान देई करी आदर कने बोलदे, “तुसी इत्ते छैल जगाह् पर बेयो,” ते तिस कगांल जो बोलदे, “तू इत्ते खड़ी रे,” या “मेरे पैरां का बेई जा।” 4 तां कै तुसा अप्पु अदंर दूज नी कित्ती ते गलत सोच कने फैसला नी लित्तेया? 5 ओ मेरे प्यारे संगी विश्वासियों, ध्यान देयो, परमेश्वर ने इस दुनिया रे गरीब लोक्कां जो मता विश्वास दित्ते रा है ते से अपणे राज रा हिस्सा तिन्हा सारे लोक्कां जो दैणे रा वादा कित्ते रा है जे परमेश्वर कने प्यार करदे। 6 पर तुसा कगांल मणू री बेज्जती कित्ती। अमीर मणू ही तुसा पर जुल्म नी करदे, ते से ही तुसा जो कचहरियां अदंर धृड़ी-धृड़ी करी नी लेई जादें। 7 ए से ही मणू हिन जे तुसा रे मसीह यीशु रे उत्तम नां री बुराई करदे। 8 तां भी जे अगर तुसा पवित्रशास्त्र रे इस खास हुकम जो मनदे “तू अपणे पड़ोसी कने अप्पु सांई प्यार रख,” तां ठीक करदे। 9 ते जे अगर तुसा इक्क-दूए कने दूज करदे तां पाप करदे; ते मूसा रे कानून तुसा जो गुनेह्गार ठेहरांदा। 10 किजोकी जे कोई मूसा रे कानून रे इक्क भी हुकम जो मनणे बिच चुकी जाए तां से सारी हुकमां बिच गुनेह्गार ठैहरदा। 11 इधेरे तांइ जिनिये बोल्लेया, “तू व्यभिचार मत करदा” तिनिये ही ए भी बोल्लेया, “तू हत्या मत करदा” इधेरे तांइ भले ही तू व्यभिचार नी कित्तेया पर हत्या कित्ती तां भी तैं मूसा रे कानून रा उल्घंन कित्तेया। 12 तुसा अपणा चालचलन तिन्हा लोक्कां सांई रख्खो करो जिन्हेरा न्याय तिस कानून रे हिसाब कने होणा जे असा जो अजादी दिंदी। 13 जे अगर तुसा होर लोक्कां कने दया रख्खी हो तां परमेश्वर ने भी हिसाब-किताब करणे रे दिन पर तुसा पर दया करणी। विश्वास ते कम्म 14 ओ मेरे संगी विश्वासियों, जे अगर कोई बोल्ले कि मेरे जो मसीह यीशु बिच विश्वास है पर से तिसेरे हिसाब कने लोक्कां कने ठीक कम्म ना करदा हो, तां फिरी तिसेरे विश्वास करणे रा कोई फैदा नी। इदेया विश्वास तिसजो छुटकारा नी देई सकदा? 15 मन्नी लेयो जे अगर कुसकी संगी विश्वासी जो कपड़ेयां री जरुरत हो ते तिन्हा जो खाणे जो भी किच्छ ना हो, 16 ते तुसा बिच का कोई तिन्हा जो ए बोल्ली करी बिदा करे, “सांती कने जाओ तुसा निग्गे रेयो ते रजी रेयो,” पर तिन्हा जो तिन्हेरे जरुरत री चीजां ना दे तां कै फैदा? 17 तिय्यां ही बगैर ठीक कम्मां रे विश्वास भी मुर्दे सांई है। 18 पर कोई बोल्ले, “तू विश्वास करदा, ते मैं ठीक कम्म करदा।” पर मैं बोलदा कि तू अपणा विश्वास मिन्जो बगैर ठीक कम्मां रे साबित करी के दिखा; ते मैं अपणा विश्वास अपणे ठीक कम्मां रे जरिये तिज्जो साबित करी के दिखांदा। 19 तिज्जो विश्वास है कि परमेश्वर इक्क ही है; तू ठीक करदा; दुष्टात्मा भी विश्वास करदी ते डर कने कमदी। 20 पर ओ नासमझ इन्सान, कै तू ए भी नी जाणदा, कि ठीक कम्मां रे बगैर विश्वास कुसकी जोग्गा नी है? 21 जां असा रे पुरखे अब्राहम ने अपणे मुंडे इसहाक जो वेदी पर चढ़ाया थिया, तां से अपणे ठीक कम्मां री वजह कने धार्मिक ठैहरे थिये। 22 तैं दिख्खी लित्तेया कि तिन्हेरा विश्वास तिन्हेरे ठीक कम्मां री वजह कने सिद्व होया। 23 ते पवित्रशास्त्र रा से वचन पूरा होया कि अब्राहम ने परमेश्वर पर भरोसा कित्तेया, ते तिसेरे विश्वास रे जरिए परमेश्वर ने तिसजो धार्मिक मणू ठैहराया, ते इत्ते तिकर कि से परमेश्वर रा दोस्त केहलाया। 24 इसी तरिक्के कने तुसा दिख्खी लित्तेया कि परमेश्वर इन्सान जो सिर्फ विश्वास कने ही नी, बल्कि ठीक कम्मां कने भी धार्मिक ठैहरांदे। 25 तिय्यां ही राहाब वेश्या ने भी जां तिन्हा जासुसां जो अपणे घरे रुकाया, ते दूए रस्ते का भेजी दित्तेया, तां तिसजो भी परमेश्वर ने तिसजो तिसेरे कम्मां कने ही धार्मिक ठैहराया। 26 जिय्यां सरीर बगैर साह रे मरे रा है तिय्यां ही विश्वास भी ठीक कम्मां रे बिना मुर्दा है। |
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.