इब्रानियों 5 - चम्बयाली नौआ नियम

¹ “हर इक्क प्रधान पुरोत्त, परमेश्वर इस्राएल रे मणूआं बिच का ही बड्डे पुरोत्त जो चुणदा, ते से हर इक्क बड्डे पुरोत्त जो लोक्कां रे पास्से तिन्हेरी सेवा तांइ ठैहरांदे। ते बड्डा पुरोत्त परमेश्वर तांइ भेंट ते कुर्बानी चढांदा, ताकि से इस्राएल रे लोक्कां रे पाप माफ करे।

² इन्सान होणे रे नात्ते से भी अपणी हर कमजोरी रे अधीन है, इधेरे तांइ से अज्ञानी ते भटके रे लोक्कां कने बड़ा नरम बर्ताव करदा।

³ ते इधेरे तांइ बड्डे पुरोत्त जो जरुरी है कि जिय्यां से मणूआं रे पाप्पां तांइ कुर्बानी दिंदे, तिय्यां ही से अपणे पाप्पां तांइ भी कुर्बानी चढाया करे।

⁴ कोई भी मणू अप्पु ही सिर्फ आदरमान पाणे तांइ बड्डा पुरोत्त नी बणी सकदा। कोई भी मणू सिर्फ तां ही बड्डा पुरोत्त बणी सकदा अगर परमेश्वर ने तिसजो चुणे रा हो, जिय्यां तिन्हा ने पैल्ले बड्डे पुरोत्त, हारून जो चुणेया थिया।”

⁵ तिय्यां ही मसीह यीशु ने अप्पु जो प्रधान पुरोत्त बणाई करी अप्पु ही अपणी बड़ाई नी कित्ती। इसेरे उलट, परमेश्वर ने मसीह जो से गल्ल बोल्ली करी चुणेया थिया, जे गल्ल तिन्हा ने कुसकी होरसी बड्डे पुरोत्त जो नी बोल्ली थी, जिसेरे बारे बिच लिखणे वाले ने पवित्रशास्त्र बिच भी लिख्खे रा है, “तू मेरा पुत्तर है! अज्ज मैं सारेयां जो ए एलान करदा कि तेरा पिता मैं है!”

⁶ तिय्यां ही परमेश्वर दुई जगाह् बिच भी तिन्हा कने बोलदे, “जिस तरिक्के कने मलिकिसिदक अब्राहम रे बेल्ले पुरोत्त थिया, तिय्यां ही तू भी हमेसा तांइ पुरोत्त है।”

⁷ जा मसीह यीशु इस दुनिया बिच इक्क मणू रे रुप बिच थिये, तां तिन्हा ने तिस परमेश्वर का रोई-रोई करी प्रार्थनां ते मिन्नतां कित्ती, जे तिन्हा जो मौत का बचाई सकदे थिये। ते परमेश्वर ने तिन्हेरी प्रार्थना सुणी किजोकी यीशु निमतेपन कने परमेश्वर रा हुकम मनणे तांइ तैयार थिये।

⁸ ते परमेश्वर रा पुत्र होणे पर भी, तिन्हा ने से जुल्म सैह्‍ण करी-करी के परमेश्वर रे हुकमां जो मनणा सिख्खेया।

⁹ ते इस तरिक्के कने परमेश्वर ने तिन्हा जो सिद्ध बड्डा पुरोत्त बणाई दित्ता, तिन्हेरे मनणे वाले सारे मणूआं तांइ हमेसा री जिन्दगी री वजह बणी गे।

¹⁰ ते जिय्यां कि मलिकिसिदक प्रधान पुरोत्त थिया, तिय्यां ही परमेश्वर ने मसीह यीशु जो हमेसा-हमेसा तांइ बड्डा पुरोत्त बणाई दित्ता।

विश्वास का भटकी जाणे रे नतीज्जे

¹¹ इस बारे बिच असा जो मती सारी गल्लां बोलणा बाकि है, पर तिन्हा जो खुली करी समझाणा मुस्किल है, किजोकी परमेश्वर री गल्लां जो समजणे बिच आलसी बणी गेरे हिन।

¹² हालाकी तुसा ने काफी लम्बे समय तिकर विश्वास ता कित्ता, ते तुसा जो अब्बे तिकर ता अपणे साथियां जो सिखाणे वाले भी बणी जाणा थिया, पर फिरी भी तुसा जो परमेश्वर रे बारे बिच असान गल्लां जो सिखणे बिच भी कुसकी री जरुरत पैंदी। तुसा री हालत ता कुसकी छोटे बच्चे सांई है, जिस जो दूद्द पुआणा पैंदा, किजोकी से हल्ले रोट्टी नी चबाई सकदा।

¹³ दूद्द पिंदे बच्चे नी जाणदे कि पवित्रशास्त्र बिच लिख्खे री शिक्षा रे हिसाब कने परमेश्वर री नजर बिच धार्मिकता री जिन्दगी किय्यां जीणा चाएदी।

¹⁴ अनाज तां तिन्हा मणूआं तांइ है जे सही ते गलत रा अनुभव करी के विश्वास करणे बिच समजदार होई गेरे हिन।