इब्रानियों 12 - चम्बयाली नौआ नियम

यीशु मसीह रे उदारण जो अपनाणा परमेश्वर रा डाँटणा

¹ जां विश्वास बिच जीणे वाले इन्हा मणूआं री मती सारी गवाहियां जो असी जाणदे, इधेरे तांइ आओ, असी तिन्हा सारी चीजां जो छड्डी दैण, जे असा जो रोकदी, ते उलझाणे वाले जो दुर करी के, सबर कने तिस रस्ते पर बदधे जाण, जिस पर असा जो जाणा चाएदा।

² असा जो अपणी हाख्खियां यीशु पर लाई रखणी चाएदी, जे असा जो विश्वास बिच अग्गे बधांदे ते पूरा भी करदे। तिन्हा ने सुली पर जान दैणे ते बेज्जती जो भी, बाद बिच मिलणे वाले आनंद रे बारे बिच सोचदे होए सहन करी लित्तेया। से अवे परमेश्वर रे सिहांसन रे सज्जे पास्से बैठ्ठे रे हिन।

³ इधेरे तांइ यीशु रे उदारण पर ध्यान करो। जे पाप्पी मणू तिन्हा कने नफरत करदे थिये, तिन्हेरी वजह कने यीशु जो किन्ना जादा सहन करणा पेया। ताकि तुसा निरास होई करी हिम्मत ना छड्डी देयो।

⁴ पाप रे खिलाफ संघर्ष करणे अंदर तुसा कदी इदेय मोड़ पर नी पूज्जे, जित्ते तुसा जो अपणी जान खतरे बिच पाणी पेयो।

⁵ तुसा तिन्हा हिम्मत दैणे वाली गल्लां जो भूली गेरे हिन, जे तुसा जो बच्चेयां सांई सिखाई गयी थी। जिय्यां कि पवित्रशास्त्र बिच लिख्खे गे रा है, “ओ मेरे पुत्तर, जां परमेश्वर तुसा री गलतियां कड्डे, तां बड़ा ध्यान कने सुणो, ते जां तुसा जो बके, तां तिस बेल्ले हार मत मनदे।

⁶ किजोकी प्रभु जिस कने प्यार करदा, तिसजो सुधारदे भी, ते जिस जो औलाद सांई मनदे, तिसजो कोड़े भी लादां।”

⁷ जिय्यां तुसा इस ईश्वरीय ताड़णा जो सहन करेया करदे हिन, याद रख्खो कि परमेश्वर तुसा कने अपणी औलाद्दां सांई बर्ताव करेया करदे हिन। हर प्यो अपणे पुत्तर जो सुधारणे तांइ तिन्हा जो बकदे।

⁸ जिय्यां परमेश्वर अपणी सारी औलाद्दां जो बकदे, जे अगर से तिय्यां तुसा जो नी बकदे, तां तुसा तिन्हेरी औलाद्दां नी हिन, पर नाजायज़ औलाद्दां हिन।

⁹ जां असा रे दुनियावी पिता, असा जो सुधारणे तांइ असा जो बकदे, तां असी तिन्हेरा आदरमान कित्तेया, तां फिरी ए होर भी जादा जरुरी है कि जां असा रे आत्मिक पिता असा जो सुधारणे तांइ बकदे, तां असी तिन्हेरी मन्ने, ताकि असा जो हमेसा री जिन्दगी मिल्ले।

¹⁰ असा रे दुनियावी पिता ता अपणी समझ रे हिसाब कने थोड़े दिनां तिकर असा जो सिखाणे तांइ बकदे थिये, पर परमेश्वर पिता ता असा रे फायदे तांइ असा जो बकदे, ताकि असी भी तिन्हेरे सांई पवित्र बणी जाण।

¹¹ पर अवे जां असा जो सिखाणे तांइ बकेया जांदा, तां असा जो से ठीक नी लगदी, पर असी दुखी होई जांदे। पर बाद बिच जां असी तिस बिच का किच्‍छ सिखदे, तां असा जो सांती मिलदी, किजोकी असी सही तरिक्के कने जीणा सुरु करी दिंदे।

उपदेस ते चितौणी

¹² इधेरे तांइ इन्हा गल्लां री वजह कने ताकतवर बणो, ते हिम्मत बन्नो।

¹³ इत्ते-उत्ते दिखणे रे बजाए, सीद्दे रस्ते पर चलदे रेयो जे यीशु का पुजदा, ताकि जे मणू असा बिच आत्मिक तौर पर कमजोर हिन, से भटकी ना जाण, पर तिन्हेरा विश्वास मजबूत बणी जाणा चाएदा।

¹⁴ सारेयां कने मेल जोल रख्खो, ते पवित्र जिन्दगी बिताणे री कोसीस करो, किजोकी तिसेरे बगैर कुसकी ने कदी भी परमेश्वर जो नी दिखणा।

¹⁵ ते चुकन्ने रेयो, कुते इय्यां ना हो कि कोई परमेश्वर रे अनुग्रह का अछुता रेई जाओ, ते तुसा तांइ इक्क मुसीबत री वजह बणी जाए। इदेया कोई भी मणू अप्पु ता परमेश्वर रे सच्चे रस्ते का दुर चली जांदा ते मते जणेया तांइ परमेश्वर री सच्चाई का भटकणे री वजह बणी सकदा।

¹⁶ तुसा बिच कोई मणू इदेया ना हो जे व्यभिचारी, या अब्राहम रे पोत्ते एसाव सांई अधर्मी हो, जिनिये इक्क वरी री रोट्टी रे बदले अपणे पैल्ले मुडें होणे रे औहदे जो बेच्ची दित्तेया थिया।

¹⁷ तुसा जाणदे कि बाद बिच जां एसाव ने अपणे प्यो का आशीष पाणी चाही, तां तिसजो नक्कारी दित्तेया गेया, ते तिसजो रोई-रोई करी मंगणे पर भी आशीष नी मिल्ली। पर तिनिये जे कित्तेया थिया, तिसजो बदलणे तांइ अवे से किच्‍छ नी करी सकदा थिया।

¹⁸ तुसा इक्क असली पहाड़ का नी आए रे हिन, ना ही इक्क धधकदी आग्ग का, ना ही न्याहरे बिच, ना ही धुंधलेपन का, ना ही बवण्डर का, ते तुसा ना तुरही री अवाज का आए रे हिन, जिय्यां इस्राएल रे सीने पहाड़ का आए थिये।

¹⁹ किजोकी तिन्हा ने तुरही री बड़े जोर री अवाज सुणी थी, ते तिसेरी अवाज इन्नी जादा थी, कि तिन्हा ने परमेश्वर का बिनती कित्ती कि से ना बोल्ले।

²⁰ तिन्हा ने ए इधेरे तांइ बोल्लेया किजोकी परमेश्वर ने हुकम तिन्हा जो दित्तेया थिया, से मणू तिस हुकम जो ना सही सके, “जे कोई जानवर भी पहाड़ जो छुए तां तिस पर बट्टे मारे जाए।”

²¹ ते से दर्शन इदेया ड्रोणा थिया इत्ते तिकर मूसा ने भी बोल्लेया, “मैं बड़ा डरदा ते कबंदा।”

²² पर तुसा सिय्योन रे पहाड़ रे नेड़े आए रे हिन, जित्ते स्वर्गीय यरुशलेम है, जे जिन्दगी दैणे वाले परमेश्वर रा सहर है, लख्खां स्वर्गदूतां

²³ ते परमेश्वर रे पैल्ली औलाद्दां री खुशहाल संगती जिन्हेरे नां स्वर्ग बिच लिख्खे गेरे हिन। ते सारेयां रा फैसला करणे वाले परमेश्वर का, ते सिद्ध कित्ते गेरे धार्मिक लोक्कां री आत्‍मा का स्वर्ग बिच आए रे हिन।

²⁴ तुसा यीशु का आए रे हिन जे परमेश्वर ते लोक्कां बिच नौई वाचा रे बिचौल्ले हिन। ते तुसा छिड़काव रे तिस खून रे नेड़े आये रे हिन जे हाबिल रे खून सांई बदले री गुहार लाणे री जगाह् माफी दैणे री गल्लां बोलदा।

²⁵ चुकन्ने रेयो, ते परमेश्वर री गल्ल सुनणे का इन्कार मत करो, जे तुसा कने गल्लां करदे। किजोकी इस्राएल रे मणू परमेश्वर री सजा का नी बची सके जां तिन्हा ने मूसा रे हुकम जो मनणे का इन्कार करी दित्ता थिया, जां तिसने इस दुनिया तिन्हा जो चितौणी दित्ती थी। साफ तौर असी भी तिन्हेरी गल्ल सुनणे का इन्कार करी के सजा का नी बची सकणा, जे स्वर्ग का गल्लां करदे।

²⁶ जां परमेश्वर ने सीने पहाड़ का गल्ल कित्ती, तां तिस बेल्ले तां तिन्हेरी अवाज ने दुनिया जो हिलाई दित्तेया, पर अवे तिन्हा ने ए वादा कित्ते रा है, “इक्क वरी फिरी मैं ना सिर्फ दुनिया जो, पर आसमान जो भी हिलाई दैणा”

²⁷ ते ए गल्ल इक्क वरी फिरी इस गल्ल जो साबित करदा, परमेश्वर री बणाए री सारी चीजां हिलाई जाणी ते टली जाणी, ताकि जे चीजां हिलाई नी जादीं से अटल रैह्णी।

²⁸ इधेरे तांइ असा जो जे राज मिल्ले रा है, तिसजो हिलाया नी जाई सकदा। असी परमेश्वर रे अनुग्रह री वजह कने तिन्हेरा शुकर करण, जिस कने असा री भक्ति ते डर कने परमेश्वर री इदेइ अराधना करण जिस कने से खुस हुदें।

²⁹ किजोकी असा रा परमेश्वर इक्क फुकणे वाली आग्ग सांई हिन।