इब्रानियों 10 - चम्बयाली नौआ नियम

सिद्ध बलि

¹ मूसा रा कानून, जे आणे वाली ठीक चीजां री परछाई है, पर से अप्पु ओ ठीक चीजां नी हिन, तिन्हा रीति रिवाज्‍जां रे हिसाब कने, से कुर्बानियां घड़ी-घड़ी मते साल्लां तिकर चढाई गयी, पर से अराधना करणे वाले लोक्कां जो तिन्हेरे पाप्पां का पूरे तरिक्के कने सुच्चा नी करी सकेया।

² जे अगर अराधना करणे वाले मणू पाप का साफ होई जांदे, ते तिन्हेरा विवेक साफ होई जांदे, तां फिरी कुर्बानियां चढ़ाणे री कदी जरुरत नी पैंदी।

³ पर बैल्लां ते बकरेयां रा खून पाप्पां जो दुर नी करी सकदा। से कुर्बानियां लोक्कां जो हर साल तिन्हेरे पाप्पां री याद दुआंदा थिया।

⁴ किजोकी ए बड़ी अनहोन्नी गल्ल है कि बैल्लां ते बकरेयां रा खून, मणूआं रे पाप्पां जो दुर करे।

⁵ इधेरे तांइ जां मसीह यीशु दुनिया बिच आए, तां तिन्हा ने बोल्लेया, “भेंट ते कुर्बानियां तुसा ने नी चाही, पर तुसा ने मेरे जो तुसा री सेवा करणे तांइ सरीर दित्ते रा है।”

⁶ तुसा पाप तांइ चढ़ाए जाणे वाले जानवरां री कुर्बानियां कने खुस नी होए।

⁷ तां मसीह ने बोल्लेया, “मेरे परमेश्वर, मैं आई गे रा है, जिय्यां कि पवित्रशास्त्र बिच मेरे बारे बिच लिख्खे रा है, ताकि ओ परमेश्वर, मैं तुसा री मर्जी पूरा करां।”

⁸ जिय्यां मसीह ने पैल्ले बोल्लेया, तुसा री पाप्पां तांइ चढ़ाए जाणे वाली भेंट ते जानवरां री बलियां कने खुस नी हुंदे। बल्कि ए बलियां मूसा रे कानून रे हिसाब कने चढ़ाई जांदी हिन।

⁹ जिय्यां मसीह पवित्रशास्त्र बिच ए भी बोलदे, “मैं आई गे रा है ताकि तुसा री मर्जी पूरी करां, इधेरे तांइ, तिन्हा ने पुराणी कुर्बानियां जो हटाई करी मसीह री कुर्बानी कने बदली दित्तेया।”

¹⁰ किजोकी परमेश्वर री मर्जी रे हिसाब कने असा जो मसीह यीशु री इक्क ही कुर्बानी रे जरिये पवित्र बणाया जाणा थिया।

¹¹ पुराणी वाचा रे मुताबिक पुरोत्त हर रोज ही अपणे सेवा रा कम्म करदे, ते इक्क ही तरिक्के रे कुर्बानी जो बार-बार चढांदे, जे मणूआं रे पाप्पां जो कदी भी दुर नी करी सकदा।

¹² पर मसीह यीशु, जे असा रे बड्डे पुरोत्त हिन, से ता असा रे पाप्पां रे बदले, इक्क ही वरी कुर्बान होए, ते परमेश्वर रे सज्जे पास्से जाई बैठ्ठे।

¹³ ते तिसी बेल्ले का मसीह इंतजार करेया करदे हिन कि परमेश्वर तिन्हेरे दुश्मणा जो तिन्हेरे अधीन करी दैण।

¹⁴ किजोकी तिन्हा ने इक्क ही वरी कुर्बानी रे जरिए, जिन्हा लोक्कां जो पाप्पां का छुटकारा दित्तेया, तिन्हा जो हमेसा तांइ सिद्व करी दित्तेया।

¹⁵ ते पवित्रात्मा भी असा जो ए ही गवाई दिदें जे मसीह ने पवित्रशास्त्र बिच पैल्ले असा कने बोल्लेया थिया,

¹⁶ “प्रभु बोलदे कि ए नौई वाचा जे मैं अपणा लोक्कां कने तिस दिन बनणी, से ए है कि मैं तिन्हा जो अपणे कानून री सोच बिच पाई दैणा, ते तिन्हा तिसजो अपणे दिल बिच रखणा।”

¹⁷ फिरी मसीह पवित्रशास्त्र बिच ए बोलदे, “मैं तिन्हेरे पाप्पां जो माफ करी दैणा, ते तिन्हेरे अधार्मिक कम्मां जो फिरी कदी याद नी करणा।”

¹⁸ जां तिन्हेरे पाप्पां री माफी होई गे री है, तित्ते फिरी पाप रा कुर्बानी चढ़ाणे री जरुरत नी रेई।

परमेश्वर रे नेड़े जाओ

¹⁹ इधेरे तांइ ओ संगी विश्वासियों, मसीह रे कुर्बानी दैणे री वजह कने, अवे असी पूरे हौंसले कने परमेश्वर रे नेड़े जाई सकदे जिय्यां कि तम्बू बिच सबका जादा पवित्र जगाह् बिच जाई सकदे होण।

²⁰ मसीह यीशु ने तिस परदे का, जे तिन्हेरी मौत जो दर्शांदा, हमेसा री जिन्दगी रे पास्से जाणे वाला इक्क नौआ रस्ता खोल्लेया।

²¹ किजोकी असा रे बड्डे पुरोत्त है इन्ने महान हिन, कि से परमेश्वर रे घर रे अधिकारी हिन,

²² इधेरे तांइ, असा जो सच्चे मन ते मसीह बिच पूरे विश्वास रख्खी करी, परमेश्वर का जाणा चाएदा। ए मसीह ही हिन, जिन्हा ने असा जो पाप्पां का बचाया ते असा जो साफ कित्ते रा है, किजोकी असा रे विवेक पर मसीह यीशु रे खून रा छिड़काव कित्तेया, जिय्यां तिन्हा ने असा रे सरीर जो पाणी कने साफ कित्तेया।

²³ तां आओ असी बगैर डगमगाए, मजबूती कने तिस आस जो पकड़ी रखण जिसेरे बारे बिच असा ने पक्का कित्ते रा है, किजोकी जिन्हा ने असा कने वादा कित्ते रा है, से भरोस्सेमंद है।

²⁴ ते असा जो इक्क दूए तांइ फिकरमंद होणा चाएदा, कि असी इक्क-दूए जो प्यार दिखाए ते इक्क-दूए कने भलाई करण।

²⁵ ते इक्क-दूए कने संगती रखणा ना छड्डे, जिय्यां की मते जणेया ने संगती रखणा छड्डी भी दित्ते रा है, पर इक्क-दूए जो प्रोत्साहन दिंदे रैह्णा चाएदा। ते जिय्या-जिय्यां तुसा परमेश्वर रा हटणे रे समय जो नेड़े आया करदा है, तिय्यां-तिय्यां इक्क-दूए जो जादा का जादा प्रोत्साहन देया करो।

²⁶ किजोकी, मसीह रे बसेख जो अपनाणे रे बाद जे अगर असी जाणी करी पाप करदे रे, तां फिरी असा तांइ होर कोई कुर्बानी नी है जे असा रे पाप्पां का बचाई सके।

²⁷ हाँ, तां फिरी असा जो बड़े डर कने ए गल्ल जाणी लैणी चाएदी कि परमेश्वर ने तिन्हा विरोधी लोक्कां का हिसाब लैणा ते तिन्हा जो नरक री आग्ग बिच पाई करी सजा दैणी।

²⁸ जदकी, मूसा रे कानून रा ना मनणे वाला मणू, दो या त्रै लोक्कां री गवाई पर बगैर कुसकी रहम रे मारी रख्खेया जादां थिया,

²⁹ तां सोच्ची लेयो, कि इदेय मणू जो होर भी किन्नी जादा वरी सजा दैणी, जे मणू परमेश्वर रे पुत्तर जो नक्कारी दिंदा, ते वाचा रे खून जो बेकार समजदा, जिसेरे जरिए से पवित्र ठैहराया गेया थिया, ते असा पर अनुग्रह करणे वाले पवित्रात्मा री बेजती करदा।

³⁰ किजोकी असी जाणदे कि परमेश्वर ने पवित्रशास्त्र बिच बोल्ले रा है, “बदला लैणा मेरा कम्म है, मैं ही बदला दैणा” ते फिरी पवित्रशास्त्र बिच ए बोलदे, “प्रभु ने अपणे लोक्कां रा हिसाब लैणा।”

³¹ ए किन्नी जादा ड्रौणी गल्ल है कि जिन्दा परमेश्वर असा जो पकड़ी करी सजा दैण।

³² पर तिन्हा पिछले दिनां जो याद करो, जां तुसा ने मसीह यीशु रे बसेख पाया। ते तुसा ने इक्क वरी संघर्ष जो झेल्लेया, ते मसीह बिच टिकी रे।

³³ कदी-कदी तां इय्यां होया कि लोक्कां रे सामणे तुसा रा तमाशा बणाया गेया। ते कदी-कदी तुसा दूए विश्वासियां री मुसीबतां बिच शामिल होए ते तिन्हेरी मदद भी कित्ती।

³⁴ किजोकी तुसा मणू ना सिर्फ कैदियां रे दुख बिच दुखी होए, पर तुसा ए जाणदे होए अपणी जायदाद भी खुसी कने लुटणा दित्ती कि तुसा तांइ स्वर्ग बिच इसका भी बदिया ते हमेसा रैह्णे वाली जायदाद है।

³⁵ इधेरे तांइ अपणी हिम्मत ना छड्डो, किजोकी परमेश्वर ने तिन्हा सब चीजां रे बदले तुसा जो इक्क बड्डा ईनाम दैणा।

³⁶ किजोकी तुसा जो सबर रखणा जरुरी है, ताकि तुसा परमेश्वर री मर्जी जो पूरा करी के, तिन्हा जो खुस करी सको ते तुसा ने तिस ईनाम जो पाणा जिसेरा वादा परमेश्वर ने कित्ते रा है।

³⁷ किजोकी पवित्रशास्त्र बिच मसीह यीशु रे बारे बिच लिख्खे रा है, “अवे बड़ा ही घट वक्त रेई गे रा है, कि मसीह यीशु ने बड़े तौले हटी आणा, ते तिन्हा ने देर नी करणी।”

³⁸ “धार्मिक मणू ने विश्वास रे जरिये जीणा, ते जे अगर से विश्वास पीच्छे हटी जाए, तां मेरा मन तिसका खुस नी होणा।”

³⁹ जे मणू परमेश्वर का पीच्छे हटी जांदे, तिन्हा जो परमेश्वर ने सजा दैणी, पर असा ने परमेश्वर बिच विश्वास करदे रैह्णा ते तिन्हा ने असा जो बचाणा।