गलातियों 6 - चम्बयाली नौआ नियम

इक्क दूए री मदद करो

¹ ओ संगी विश्वासियों, जे अगर कोई मणू कुसकी गलत कम्म करदा पकड़ेया भी जाओ, तां तुसा मणू जे पवित्रात्मा रे कहे मुताबिक चलदे, निम्तेपन कने इदेय मणू जो सही रस्ते पर वापिस लेयो, ते अपणे तांइ भी चुकन्ने रेयो ताकि तुसा पाप करणे री परिक्षा बिच ना पेई जाओ।

² तुसा मुसीबत बिच इक्क-दूए री मदद करेया करो ते इसी तरिक्के कने तुसा मसीह रे हुकमां जो पूरा करो।

³ किजोकी जे अगर कोई सोचदा कि से कोई खास मणू है पर हकीकत बिच से नी है, तां से अप्पु जो धोख्खा देया करदा है।

⁴ पर हर इक्क जणा अपणे-अपणे कम्मां जो परखी लै कि से ठीक हिन कि नी। जे अगर तिन्हेरे कम्म सही होए तां से अप्पु तांइ गर्व करी सकदे पर तिन्हा जो अपणे कम्मां जो दूज्जेयां कने बराबरी ना करे।

⁵ किजोकी असी सारे जणे अपणे-अपणे कम्मां तांइ जिम्मेवार हिन।

⁶ जे मणू परमेश्वर रे वचन री शिक्षा पाया करदे हिन, तिन्हा जो हर इक्क ठीक चीजां अपणे सिखाणे वालेयां कने बडंणी चाएदी।

⁷ धोख्खे बिच मत रेयो, कोई भी परमेश्वर जो बेवकूफ नी बणाई सकदा। किजोकी मणू जे किच्‍छ भी बांदे, तिन्हा ने से ही बडणा।

⁸ किजोकी जे कोई अपणे सरीर री बुरी इच्छां जो पूरा करदा, तिसेरा अंजाम हमेसा री मौत होणा। ते जे कोई पवित्रात्मा रे कहे मुताबिक चलदा तां पवित्रात्मा तिसजो हमेसा री जिन्दगी दिंदे।

⁹ असा जो नेक कम्म करणे तांइ हिम्मत नी छडणी चाएदी, किजोकी जे अगर असी हिम्मत ना छड्डे तां असा ने परमेश्वर रे ठैहराए रे समय पर ईनाम पाणा।

¹⁰ इधेरे तांइ जित्ते तक भी मौक्का मिल्लो असा जो सारे लोक्कां कने भलाई करणा चाएदी, खास कर संगी विश्वासियां कने।

आखरी नमस्ते आखरी चितौणी अते नमस्ते

¹¹ ध्यान देयो कि मैं किन्ने बड्डे-बड्डे अक्षरां बिच तुसा जो अपणे हत्थां कने लिख्खे रा है।

¹² जे मणू सिर्फ बाहरी दिखावा करदे, से ही मणू तुसा पर खतना कराणे रा दवाब पांदे। से इधेरे तांइ इय्यां करदे ताकि मसीह रे सुली रा बसेख सुनाणे री वजह कने तिन्हा पर जुल्म ना हो।

¹³ किजोकी यहूदी विश्वासी जो अप्पु ता मूसा रे कानून पर नी चलदे, पर तुसा रा खतना इधेरे तांइ कराणा चाह्‍ंदे कि तुसा रे सरीर री हालत पर घमंड करण।

¹⁴ पर मैं कदी भी मसीह री सुली री मौत जो छड्डी करी होर कुसकी गल्ल पर घमंड नी करणा चाह्‍ंदा। मसीह यीशु रे सुली पर मरणे री वजह कने मैं अवे दुनिया री बुरी इच्छां रा गुलाम नी है, ते तिन्हा बुरी इच्छां का मेरे पर राज करणे तांइ होर ताकत नी है।

¹⁵ किजोकी खतना होणे या ना होणे कने परमेश्वर जो कोई फरक नी पैंदा, पर इक्क नौई रचना बणी जाणा जरुरी है।

¹⁶ जिन्ने मणू इन्हा सारे नियमां पर चलदे, तिन्हा लोक्कां जो परमेश्वर ने सांती अते आशीष दैणी। से परमेश्वर रे चुणे रे मणू हिन।

¹⁷ इसका बाद कोई भी मेरे जो होर परेशान ना करे, किजोकी मेरे सरीर पर जे दाग हिन से इस गल्ल जो दर्शांदे कि मैं मसीह रा सेवादार है।

¹⁸ ओ संगी विश्वासियों, असा रे प्रभु यीशु मसीह रा अनुग्रह तुसा कने बणी रेयो। आमीन!