गलातियों 4 - चम्बयाली नौआ नियम

¹ मैं इस इक्क उदारण कने समझांदा कि कुसकी मणू रा इक्क बच्चा है जे तिसेरा वारिस है। ते जां तांइ से वारिस बच्चा है, तां तिकर तिस बिच ते नौक्कर बिच कोई जादा फरक नी हुंदा।

² जां तांइ से बच्चा मालिक बणने री उमर तिकर नी पूज्जी जांदा, तां तिकर से अपणे प्यो रे ठैहराए रे बेल्ले तिकर अपणे संभालणे वालेया ते ख्याल रखणे वालेयां रे वस बिच रैहन्दा।

³ तिय्यां ही असी भी जां तिकर बच्चे थिये, तां दुनिया री सुरुआती शिक्षा रे वस बिच होई करी इक्क गुलाम सांई थिये।

⁴ पर जां परमेश्वर रा ठैहराए रा समय आई गेया तां परमेश्वर ने अपणे पुत्तर जो इस दुनिया बिच भेज्जेया जे इक्क जनानी का पैदा होए। से इक्क यहूदी मणू रे रुप बिच पैदा होए ते तिन्हा ने मूसा रे कानून जो मन्नेया।

⁵ ताकि जे मणू मूसा रे कानून रे वस बिच रैह्णे वाले लोक्कां जो अजादी देई दे ते तिन्हा ने असा जो अपणे बच्चेयां सांई गोद लेई लित्ता।

⁶ अवे असी जे तिन्हेरे अपणे औलाद हिन इधेरे तांइ परमेश्वर ने अपणे आत्‍मा जो असा रे दिल बिच पाए रा है, जे असा जो ओ अब्बा ते ओ पिता करी के पुकारदा।

⁷ इधेरे तांइ तुसा अवे गुलाम नी बल्कि परमेश्वर री औलाद है, ते जां तुसा परमेश्वर री औलाद्दां ठैहरे तां तुसा से सारी चीजां हासिल करणी जे परमेश्वर ने अपणी औलाद्दां जो दैणे रा वादा कित्ते रा है।

गलातियों रे बारे बिच पौलुस री चिंता

⁸ पैल्ले जां असी परमेश्वर जो नी जाणदे थिये तां तुसा तिन्हा जो ईश्वर मन्नी करी चलेया करदे थिये जे हकीकत बिच ईश्वर हिन ही नी।

⁹ पर अवे ता असा ने परमेश्वर जो जाणी लित्ते रा है, बल्कि इय्यां बोलणा जादा सही होणा कि पैल्ले परमेश्वर ने असा कने रिस्ता बणाया। तां फिरी किय्यां तिस कमजोर ते सुरुआती शिक्षा पास्से मुड़ी सकदे? तुसा फिरी किजो तिन्हेरे गुलाम बणना चाह्‍ंदे?

¹⁰ तुसा गैर यहूदी मणू मूसा रे कानून रे हिसाब कने दिन-बार, महीने, मौसम ते साल्लां जो मनदे।

¹¹ मैं तुसा रे कम्मां री वजह कने बड़ी फिकर बिच है कि जिन्नी मैहनत तुसा बिच कित्ती से कुथकी बेकार ना होई गे री हो।

¹² ओ संगी विश्वासियों, मैं तुसा सांई बणने तांइ यहूदी रीति-रीवाजां पर चलणा छड्डी दित्तेया, ते अवे मैं तुसा का बिनती करदा कि तुसा मेरे सांई बणो ते यहूदी रीति-रीवाजां पर चलणा छड्डी देयो। तुसा पैल्ले मेरे कने बड़े ठीक रे।

¹³ तुसा जाणदे कि पैल्ले मैं सरीर री कमजोरी री वजह कने तुसा का आया ते तिय्यां ही मैं तुसा जो सुब बसेख सुणाया।

¹⁴ हालांकि मेरी शरीरी कमजोरी तुसा तांइ परेसानी ही थी पर तुसा फिरी भी मेरे जो तुच्छ नी समजेया ते ना ही मेरे जो छड्डेया, पर तुसा ने मेरे जो इस तरिक्के कने अपणाया जिय्यां की परमेश्वर रे कुसकी स्वर्गदूत जो या फिरी अप्पु मसीह यीशु जो अपणाया हुंदा।

¹⁵ तिस बेल्ले ता तुसा बड़े खुस थिये पर अवे तुसा री से खुसी कुते गई? मेरे जो इस गल्ल रा पक्का पता है कि तुसा मेरे तांइ किच्‍छ भी करी सकदे थिये, ते जे अगर मुमकिन हुंदा तां तुसा अपणी हाख्खियां भी मेरे तांइ देई दिंदे।

¹⁶ इय्यां लगदा कि मैं तुसा कने सच बोलणे री वजह कने तुसा रा दुश्मण बणी गे रा है।

¹⁷ गलत शिक्षा दैणे वाले मणू तुसा जो अपणा दोस्त ता बनाणा चाह्‍ंदे पर तिन्हेरा मकसद तुसा री भलाई नी है, तिन्हेरा मकसद तुसा जो मेरे का अलग करणा है ताकि तुसा बड़े जोस कने तिन्हेरी गल्लां मन्नों।

¹⁸ ठीक मकसद तांइ हमेसा जोस बिच रैह्णा ता ठीक गल्ल है, ना की सिर्फ तिस बेल्ले जां मैं तुसा कने हुंदा।

¹⁹ ओ मेरे प्रियों, जिय्यां कुसकी दुपराणी जनानी जो लोकिणे री पीड़ हुंदी, तिसी सांई मैं तुसा तांइ पीड़ सहन करेया करदा है। ते जां तांइ तुसा मसीह बिच पूरी तरह पकी नी जांदे, तां तांइ मेरे जो से पीड़ रैह्णी।

²⁰ मैं चाह्‍ंदा कि अवे तुसा का आई करी बड़े नरमी कने तुसा कने गल्ल करां किजोकी अवे मैं तुसा तांइ बड़ा वरी फिकरमंद है।

सारा हाजिरा रा उदारण

²¹ तुसा जे मूसा रे कानून रे हिसाब कने जीणा चाह्‍ंदे, मेरी इक्क गल्ल सुणो, मैं तुसा जो दसदा कि मूसा रे कानून बिच कै लिख्खे रा है।

²² पवित्रशास्त्र बिच ए लिख्खे रा है कि अब्राहम रे दो मुंडे थिये। तिस बिच का इक्क मुंडा जे हाजिरा का पैदा होया जे गुलाम थी, ते दुआ मुंडा जे सारा का पैदा होया जे गुलाम नी थी।

²³ जे मुंडा गुलाम जनानी का पैदा होया, से इक्क आम मुंडा थिया जे इक्क मणू री मर्जी कने पैदा होया। पर जे मुंडा तिस अजाद जनानी का पैदा होया जे अब्राहम री लाड़ी थी, से परमेश्वर रे अब्राहम कने कित्ते रे वादे री मुताबिक पैदा होया।

²⁴ ए दो जनानियां परमेश्वर रे दो वाचा रा इक्क उदारण सांई हिन। हाजिरा परमेश्वर रे तिस वादे सांई है जे तिन्हा ने इस्राएल रे लोक्कां कने सीने पहाड़ पर कित्तेया थिया। से वाचा लोक्कां जो गुलाम सांई बणाई दिंदी।

²⁵ इस बेल्ले रे यरुशलेम रे मणू यहूदी रीति-रीवाजां जो मनणे री वजह कने गुलाम सांई हिन। से मणू हाजिरा सांई गुलाम हिन जे अरब देस रे सीने पहाड़ जो दर्शांदी।

²⁶ पर अब्राहम री लाड़ी सारा स्वर्गीय यरुशलेम सहर जो दर्शांदी ते तिसेरी औलाद्दां अजाद हिन। ते ए यरुशलेम असा री मां सांई है।

²⁷ किजोकी पवित्रशास्त्र बिच लिख्खे रा है, “ओ ओत्तर जनानी, तू जे बच्चे नी पैदा करदी, खुसी मना। तू जिस जो लोकिणे री पीड़ नी हुंदी, गला खोल्ली करी जय जयकार कर। किजोकी जे जनानी छड्डी दित्ती गई थी, तिसेरे बच्चे सुहागिन का भी जादा हिन।”

²⁸ ओ संगी विश्वासियों, असी इसहाक सांई हिन जो परमेश्वर रे वादे री औलाद है।

²⁹ पर अवे तुसा पर से मणू जुल्म करदे जे मणू चाह्‍ंदे कि तुसा मूसा रे कानून जो मन्नो, बिल्कुल तिय्यां ही जिय्यां इश्माइल ने जो इक्क मणू री मर्जी कने पैदा होया तिस इसहाक पर जुल्म कित्ता जे आत्‍मा री ताकत कने पैदा होया थिया।

³⁰ पर पवित्रशास्त्र बिच ए लिख्खे रा है, “गुलाम जनानी ते तिसेरे मुंडे जो दुर भेज्जी देयो, किजोकी गुलाम जनानी रे मुंडे जो प्यो री जायदाद बिच कोई विरासत नी मिलणा चाएदी, से सिर्फ लाड़ी रे मुंडे जो मिलणा चाएदी जे गुलाम नी है।”

³¹ ओ संगी विश्वासियों, आखिर बिच मैं ए बोलणा चाह्‍ंदा कि असी गुलाम जनानी रे मुंडे सांई नी हिन जे मूसा रे कानून जो दर्शांदी, पर असी अजाद जनानी रे मुंडे सांई हिन जे विश्वास जो दर्शांदी।