इफिसियों 3 - चम्बयाली नौआ नियम

गैर यहूदियां बिच पौलुस री सेवा

¹ किजोकी परमेश्वर ने ए सारा किच्‍छ तुसा गैर यहूदी लोक्कां तांइ कित्तेया, मैं पौलुस तुसा सारेयां तांइ प्रार्थना करदा। मैं मसीह यीशु री सेवा तुसा रे खातिर कित्ती इधेरे तांइ मैं कैद बिच है।

² ते तुसा भी पक्के तौर पर सुणे रा है कि परमेश्वर ने मेरे अपणे अनुग्रह कने मेरे जो तुसा बिच सुब बसेख सुनाणे री जिम्मेदारी दित्ते री है।

³ जिय्यां कि मैं पैल्ले ही घट शब्दां बिच तुसा जो दस्सी चुके रा है कि परमेश्वर ने से राज़ मेरे पर ज़ाहिर कित्ते रा है।

⁴ जिस जो पढ़ी करी तुसा जाणी सकदे कि मैं मसीह यीशु रे तिस राज़ किन्नी ठीक तरिक्के कने समजदा।

⁵ पैल्ले समय बिच परमेश्वर ने अपणाए राज़ कुसकी पर भी ज़ाहिर नी कित्ते रा थिया, पर अवे तिन्हा ने इसजो अपणे पवित्र प्रेरितां ते भविष्यद्वक्तां पर पवित्रात्मा रे जरिये ज़ाहिर कित्ते रा है।

⁶ ते से राज़ ए है कि मसीह यीशु रा सुब बसेख सुनणे ते तिन्हा कने रिस्ता बणने री वजह कने गैर यहूदी लोक्कां जो भी विरासत बिच हिस्सा मिलणा। से अवे मसीह रे सरीर रा इक्क हिस्सा बणी गेरे हिन जे कलीसिया है। ते तिन्हा सारी चीजां बिच तिन्हेरा हिस्सा भी है जिसेरा वादा परमेश्वर ने यहूदी लोक्कां कने कित्तेया थिया।

⁷ मैं परमेश्वर रे अनुग्रह रे मुफ्त दान ते ताकत री वजह कने मेरे जो सुब बसेख सुनाणे री सेवा करणे रा सौभाग्य मिल्ले रा है।

⁸ हालांकि मैं परमेश्वर रे सारे लोक्कां बिच का सारेयां का घट काबिल है, पर फिरी भी परमेश्वर ने मेरे जो ए सौभाग्य दित्ते रा है कि मैं गैर यहूदियां बिच ए सुब बसेख सूणां कि मसीह यीशु भरपूर आशीषां रा जरिया हिन,

⁹ ते सारे लोक्कां जो परमेश्वर री ए राज़ री योजना समझाणे तांइ, जिस जो परमेश्वर, जे सारी दुनिया रे बणाणे वाले हिन, तिन्हा ने दुनिया री सुरुआत का लुकाई करी रख्खे रा थिया।

¹⁰ अवे परमेश्वर रा मकसद ए है कि कलीसिया रे जरिये तिन्हेरे अनंत ज्ञान जो तिन्हा पर जाहिर करण जे आत्मां री अणदिख्खी दुनिया रे अधिकारी हिन ते तित्ते राज करदे।

¹¹ परमेश्वर ने ए अपणे अनंत योजना रे हिसाब कने कित्ता जिस जो तिन्हा ने मसीह यीशु रे जरिये पूरा करी लित्ता

¹² मसीह यीशु रे जरिये ते असा रे तिन्हा पर विश्वास करणे री वजह कने अवे असी बड़ी हिम्मत कने परमेश्वर रे नेड़े आई सकदे।

¹³ इधेरे तांइ मैं तुसा का छंदे करदा कि जे किच्‍छ मैं तुसा तांइ सहन करेया करदा है, तिसेरी वजह कने तुसा हिम्मत मत हारो, किजोकी तुसा जो गर्व महसूस करणा चाएदा कि मैं तुसा तांइ ए सब चीजां सहन करणा चाह्‍ंदा।

मसीह रा प्यार

¹⁴ इन्हा सारेयां तांइ परमेश्वर पिता रे सामणे गोड्डे भारे पेई करी प्रार्थना करदा।

¹⁵ से ही हिन जिन्हा का स्वर्ग ते धरती रे सारे परिवारां जो पछाण मिलदी।

¹⁶ मैं ए प्रार्थना करदा कि से तुसा जो अपणी असीमित महिमा रे जरिये तुसा जो ए दान दैण ताकि तुसा अपणे अंदरूनी मनुष्यत्व बिच ताकत पाई करी मजबूत हुंदे जाओ।

¹⁷ मैं प्रार्थना करदा कि तुसा रे दिल मजबूत होई जाण ताकि जिय्यां तुसा मसीह यीशु पर विश्वास करण तिय्यां ही से तुसा रे दिल बिच बसी रैह्ण ते परमेश्वर ते बाकि लोक्कां तांइ तुसा रा प्यार तुसा जो मजबूत बणाई रख्खे।

¹⁸ ते परमेश्वर रे सारे लोक्कां कने तुसा ने भी इस गल्ल जो समजी सकणा कि मसीह यीशु असा जो इन्ना जादा प्यार करदे जे असी बयान भी नी करी सकदे।

¹⁹ मैं प्रार्थना करदा कि तुसा मसीह रे प्यार जो समजी सको जे इन्सानी समझ का परे है ताकि परमेश्वर तुसा जो अपणे स्वभाव कने भरी दैण।

^20-21 परमेश्वर असा रे मंगणे या सोचणे का भी बधी करी बड्डे कम्म करी सकदे किजोकी तिन्हेरी ताकत असा बिच कम्म करेया करदी है। कलीसिया ते यीशु मसीह बिच परमेश्वर जो हर पीढ़ी रे जरिये महिमा मिलदी रे।