इफिसियों 2 - चम्बयाली नौआ नियम

मौत का जिन्दगी रे पास्से

¹ पैल्ले-पैल्ले तुसा बिच परमेश्वर रे पास्से का कोई नौई जिन्दगी नी थी, किजोकी तुसा अपणे पाप ते गलत कम्मां री वजह कने मरे रे मणूआं सांई थिये।

² तिस बेल्ले तुसा दुनियादारी रे तौर-तरिक्के कने चलदे थिये ते तुसा शैतान रे कहे मुताबिक चलेया करदे थिये जे दुष्टात्मां रा हाकिम है, ते जे अज्ज भी तिन्हा लोक्कां बिच कम्म करेया करदा है जे परमेश्वर रे हुकमां री ना-फरमानी करदे।

³ असी भी तिन्हा लोक्कां सांई जिन्दगी जिंदे थिये जे अपणे सरीर री बुरी इच्छां जो पूरा करेया करदे ते बाकि मणू कुदरती तौर पर बुरे मणू थिये ते परमेश्वर रे गुस्से रे हिस्सेदार थिये।

^4-5 पर परमेश्वर दया कने भरपूर थिये। असी अपणे पाप्पां री वजह कने मुर्देयां सांई थिये, पर परमेश्वर ने असा कने इन्ना जादा प्यार कित्तेया कि तिन्हा ने असा जो मसीह कने फिरी जिन्दा कित्तेया ते असा जो अपणे तिस अनुग्रह कने असा जो बचाया जिसेरे काबिल असी नी हिन।

⁶ परमेश्वर ने असा जो मसीह यीशु कने मुर्देयां बिच का जिन्दा कित्ते रा है, ते मसीह यीशु कने असा रा रिस्ता होणे री वजह कने तिन्हा ने असा जो मसीह यीशु कने स्वर्ग बिच इक्क जगाह् भी दित्ते री है।

⁷ ताकि परमेश्वर ए इधेरे तांइ कित्ता ताकि से आणे वाले समय बिच ए दिखाई सकण कि से किन्ने जादा अनुग्रहकारी हिन। परमेश्वर री ए दया मसीह यीशु कने रिश्ते बिच जुड़े रे असी लोक्कां जो दिसदी।

⁸ परमेश्वर ने तुसा जो अपणे अनुग्रह ते तुसा रे मसीह यीशु बिच विश्वास करणे री वजह कने छुटकारा दित्तेया। तुसा अप्पु छुटकारा नी पाया, पर ए परमेश्वर रा दान है।

⁹ ए तुसा रे भले कम्मां रा नतीज्जा नी है, इधेरे तांइ तुसा का इस पर घंमड करणे री कोई वजह नी है।

¹⁰ किजोकी परमेश्वर ने असा जो बणाए रा है ते मसीह यीशु रे जरिये तिन्हा नौए मणू सांई तिन्हा भले कम्मां जो करणे तांइ बणाए गेरे हिन जिन्हा जो परमेश्वर ने इधेरे तांइ तैयार कित्ता कि असी से पूरे करण।

मसीह बिच इक्क

¹¹ इधेरे तांइ याद रख्खो, कि तुसा पैदाइसी गैर यहूदी हिन ते यहूदी मणू तुसा रा इस गल्ल तांइ मजाक उड़ांदे। से इस गल्ल तांइ तुसा रा मजाक उड़ांदे किजोकी तिन्हेरा खतना होए रा है पर तुसा रा खतना नी होए रा है, पर तिन्हेरी ए रीति सिर्फ सरीर पर ही लागू हुंदी।

¹² तिस बेल्ले तुसा मसीह रे बारे बिच नी जाणदे थिये ते तुसा परमेश्वर रे चुणे रे मणूआं बिच का नी थिये ते तुसा परमेश्वर री तिन्हेरे लोक्कां कने कित्ते रे वादे रे हिस्सेदार भी नी थिये। तुसा इस दुनिया बिच परमेश्वर का दुर बगैर कुसकी आस रे जिया करदे थिये।

¹³ तुसा मणू पैल्ले परमेश्वर का दुर थिये पर अवे मसीह कने तुसा रा रिस्ता है किजोकी परमेश्वर ने मसीह यीशु री कुर्बानी देई करी तुसा जो अपणे नेड़े कित्ते रा है।

^14-16 मसीह ने अप्पु ही असा बिच सांती बणाई। पैल्ले-पैल्ले यहूदी ते गैर यहूदियां बिच इन्नी जादा नफरत थी कि जिय्यां दोन्नां बिच मझाटे कोई दुआल हो पर अवे मसीह यीशु ने सुली पर अपणी कुर्बानी रे जरिये तिस दुआल जो ढाह्ई दित्ते रा है ते दोन्नां पास्से रे लोक्कां जो आपस बिच मिलाई दित्ता। मसीह यीशु ने मूसा रे कानून जो रद्द करी दित्तेया ते परमेश्वर कने असा रा मेल जोल कराई दित्तेया।

¹⁷ मसीह यीशु तुसा गैर यहूदी लोक्कां का आए जे परमेश्वर का दुर थिये, ते से यहूदी लोक्कां भी आए जे परमेश्वर रे नेड़े थिये ते तुसा सारेयां बिच परमेश्वर कने मेल-मिलाप रा सुब बसेख सुणाया।

¹⁸ मसीह यीशु री वजह कने असी सारे जणे इक्क ही पवित्रात्मा रे जरिये पिता रे नेड़े आई सकदे।

¹⁹ इधेरे तांइ अवे तुसा गैर यहूदी मणू अनजाण ते परदेसी नी रे पर अवे तुसा परमेश्वर रे लोक्कां कने मिली गेरे हिन ते अवे तुसा परमेश्वर रे परिवार रा हिस्सा हिन।

²⁰ कन्ने मिली करी असी परमेश्वर रा घर हिन जे प्रेरितां ते भविष्यद्वक्तां री नीं पर बणे रा है ते तिस नीं रा पत्थर अप्पु मसीह यीशु हिन।

²¹ मसीह यीशु रे ही वजह कने ही पूरी इमारत इक्क गठ्ठ बिच बन्ने री रैहन्दी। से अपणे सारे लोक्कां जो इक्क गठ्ठ बिच रख्खी करी परमेश्वर रा पवित्र मन्दिर बणाया करदे हिन।

²² मसीह यीशु रे जरिये तुसा भी बाकि पवित्र मणूआं कने मिली करी परमेश्वर रा पवित्र घर हिन, जित्ते परमेश्वर अपणी अात्मा रे जरिये वास करदे।