इफिसियों 1 - चम्बयाली नौआ नियम

नमस्ते

¹ मैं पौलुस, जे परमेश्वर री मर्जी कने यीशु मसीह रा प्रेरित है इफिसुस री कलीसिया रे विश्वासियां जो ए चीठ्ठी लिख्खेया करदा है।

² तुसा जो असा रे पिता परमेश्वर अते मसीह यीशु रे पास्से का अनुग्रह ते सांती मिलदी रे।

मसीह आत्मिक असीसां जो दिंदे मसीह बिच आत्मिक आशीष

³ असा रे परमेश्वर ते यीशु मसीह रे पिता री महिमा हो किजोकी तिन्हा ने असा जो मसीह यीशु कने रिस्ता होणे री वजह कने स्वर्ग का हर तरिक्के री आत्मिक आशीषां दित्ती।

⁴ दुनिया रे बणाए जाणे का पैल्ले ही परमेश्वर ने मसीह कने असा रा रिस्ता बणाणे रे जरिये चुणेया ताकि असी परमेश्वर रे सामणे पवित्र ते बेकसूर ठैहरे।

⁵ किजोकी परमेश्वर ने असा जो प्यार कित्तेया ते तिन्हा ने फैसला कित्तेया कि तिन्हा ने असा जो मसीह यीशु रे जरिये गोद लेई लैणा।

⁶ परमेश्वर ने इय्यां इस तांइ कित्तेया ताकि तिन्हेरे महिमामय अनुग्रह तांइ तिन्हेरी बड़ाई करण, जिस जो तिन्हा ने असा लोक्कां जो मुफ्त बिच इधेरे तांइ दित्तेया किजोकी असा रा तिन्हेरे प्यारे पुत्तर कने रिस्ता है।

⁷ परमेश्वर ने असा जो मसीह रे खून बहाई करी कुर्बानी दैणे रे जरिये छुटकारा दित्ते रा है, जिसेरा मतलब ए है कि असा रे पाप माफ होई गेरे हिन किजोकी परमेश्वर रा अनुग्रह इन्ना महान है जे तिन्हा ने असा पर बड़ा जादा कित्ते रा है।

⁸ जे महान अनुग्रह परमेश्वर ने अपणे बड़े ज्ञान ते समझ कने असा पर कित्तेया।

⁹ परमेश्वर ने अपणी इच्छा रा राज़ ठीक इराद्दे कने असा पर जाहिर कित्तेया, जे तिन्हा ने अप्पु मसीह यीशु रे जरिये स्थापित कित्तेया थिया।

¹⁰ परमेश्वर री ए योजना है कि तिन्हेरे ठैहराए रे समय पर आसमान ते जमीन री सब चीजां जो मसीह यीशु रे हक बिच लेई आए।

¹¹ अते परमेश्वर ने भी असा रा मसीह यीशु कने रा रिस्ता बणाणे रे जरिये असा जो तिन्हेरे अपणे मणू बणाया, किजोकी सुरुआत का ही तिन्हेरी ए योजना थी, ते परमेश्वर सब किच्‍छ अपणी इच्छा ते योजना रे हिसाब कन्ने करदे।

¹² परमेश्वर ने ए इधेरे तांइ कित्तेया ताकि असी यहूदी मणू जे मसीह बिच आस रखणे वाले पैल्ले मणू हिन तिन्हेरी महिमा ते बड़ाई करी सकण।

¹³ ते तुसा कने भी से ही गल्ल होई। तुसा ने सच्चा सुब बसेख सूणेया जे परमेश्वर रा बसेख है कि तिन्हा ने किय्यां तुसा जो बचाया। जां तुसा ने मसीह यीशु बिच विश्वास कित्ता तां परमेश्वर ने तुसा जो पवित्रात्मा दित्ता जे तिन्हा ने अपणे लोक्कां जो दैणे रा वादा कित्तेया थिया। पवित्रात्मा इक्क मौहर सांई है जे ए दर्शांदी कि तुसा मसीह रे मणू हिन।

¹⁴ पवित्रात्मा असा तांइ बयाने सांई भी है जे इस गल्ल री पुष्टि करदा कि परमेश्वर ने असा जो से विरासत भी दैणी जिसेरा तिन्हा ने वादा भी कित्ते रा है ते तिन्हा ने असा जो अपणे मणू बणाणे तांइ असा रा मुल भी चुकाए रा है, ताकि तिन्हेरी महिमा री बड़ाई हो।

पौलुस री प्रार्थना

¹⁵ इधेरे तांइ जिस बेल्ले का मैं प्रभु यीशु बिच तुसा रे विश्वास अते सब पवित्र मणूआं तांइ तुसा रे प्यार रे बारे बिच सुणे रा है,

¹⁶ तिस बेल्ले का मैं परमेश्वर जो तुसा तांइ शुकर करदा रैहन्दा, ते हमेसा तुसा जो अपणी प्रार्थना बिच याद करदा रैहन्दा।

¹⁷ मैं प्रार्थना करदा कि असा रे प्रभु यीशु मसीह रे महिमामय पिता परमेश्वर तुसा जो आत्मिक ज्ञान ते समजदे ताकि तुसा तिन्हा जो पूरी तरिक्के कने जाणी सको।

¹⁸ मैं ए भी प्रार्थना करदा कि से तुसा जो सच्चाई जो पूरी तरिक्के कने समजणे बिच मदद करे ताकि तुसा जाणी सको तिन्हेरे असा जो सद्दणे री आस कै है, ताकि तुसा जाणी सको कि से आशीषां किन्नी जादा महिमामय हिन जिन्हेरे दैणे रा वादा परमेश्वर ने अपणे लोक्कां कने कित्ते रा है।

¹⁹ मैं चाह्‍ंदा कि तुसा तिस महान ते बड्डी ताकत रे बारे बिच जाणो जे परमेश्वर ने असा तांइ रख्खे री है जे मसीह यीशु पर विश्वास करदे।

²⁰ जे कम्म परमेश्वर ने मसीह यीशु रे बारे बिच कित्तेया कि तिन्हा जो मरे रे लोक्कां बिच का जिन्दा करी के स्वर्ग बिच अपणे सज्जे पास्से बिठाई दित्ता।

²¹ तित्ते मसीह जो हर तरिक्के री प्रधानी, हक, ताकत, प्रभुता ते सारे पद रे उप्पर बिठाया जे ना सिर्फ इस दुनिया रे बिच है पर से पद आणे वाली दुनिया रे बिच भी होणा।

²² परमेश्वर ने सब किच्‍छ मसीह यीशु रे हक बिच करी दित्तेया, ते कलीसिया रे फायदे तांइ तिन्हा जो हर इक्क चीज पर प्रधान बणाया।

²³ कलीसिया मसीह यीशु रे सरीर है ते मसीह री भरपुरी कने भरे री है जे सारेया बिच हर इक्क गल्ल जो पूरा करदी।