प्रेरितां रे कम्म 9 - चम्बयाली नौआ नियम

शाऊल रा मन बदलणा

¹ शाऊल जे हल्ले तिकर प्रभु यीशु रे चेल्‍लेयां जो मारणे ते धमकाणे री धुन बिच थिया, प्रधान पुरोत्त का गेया।

² ते तिसका दमिश्क कस्बे रे सभास्थल रे नां पर इस गल्ल पर चीठ्ठियां मगीं कि कै मर्द ते कै जनानी, जे भी मसीह यीशु रे पंथ पर चलदे, तिन्हा जो कैद करी के यरुशलेम सहर लेई आए।

³ पर जां शाऊल ते तिसेरे साथी चलदे-चलदे से दमिश्क कस्बे रे नेड़े पूज्जेया, ते चाणचक्के ही आसमान का चारो पास्से रौसनी चमकी,

⁴ ते से जमीन पर पेई गेया, ते प्रभु जो ए बोलदे सूणेया, “ओ शाऊल, ओ शाऊल, तू मेरे जो किजो तगं करेया करदा है।”

⁵ तिसने पूच्छेया, ओ प्रभु जी, तुसा कुण हिन? तिन्हा ने बोल्लेया, मैं यीशु है, जिस जो तू तगं करेया करदा है

⁶ पर अवे उठी करी कस्बे बिच जा, अते जे तेरे जो करणा है से तेरे जो दस्सी दित्तेया जाणा,

⁷ जे मणू तिस कने थिये से हैरान रेई गे, किजोकी तिन्हेरे जो अवाज तां सुणिदीं थी पर किच्‍छ दिस्सेया नी करदा थिया।

⁸ तां शाऊल जमीन का उठेया ते जां हाख्खियां खोल्ली तां तिसजो किच्‍छ भी नी दिस्सेया, ते से मणू तिसेरा हत्थ पकड़ी करी दमिश्क जो लेई गे

⁹ से त्रै दिनां तिकर किच्‍छ भी नी दिखि सकेया ते ना किच्‍छ खाया पित्ता

¹⁰ दमिश्क कस्बे बिच हनन्याह नां रा इक्क चेल्ला थिया तिसजो प्रभु यीशु ने दर्शन देई करी बोल्लेया, ओ हनन्याह तिसने बोल्लेया हाँ, प्रभु जी

¹¹ तां प्रभु यीशु ने तिसजो बोल्लेया, उठ ते सीद्दा नां री गली बिच यहूदा रे घरे जा, तित्ते शाऊल नां रे इक्क तरसुस रे रैह्णे वाले मणू जो तोप, किजोकी से प्रार्थना करेया करदा है,

¹² अते तिसजो दर्शन बिच दिखाए रा है कि हनन्याह नां रे इक्क मणू आंदा ते तिसेरे पराल्ले हत्थ रखदा ताकि तिसेरी हाख्खियां री रौसनी ठीक होई जाए।

¹³ हनन्याह ने जवाब दित्तेया, ओ प्रभु जी, मैं इस मणू रे बारे बिच मते जणेया का सुणे रा है कि तिसने यरुशलेम सहर बिच तुसा रे परमेश्वर रे लोक्कां री बड़ी वरी बुराई कित्त्ते री है,

¹⁴ ते इत्ते भी इसजो बड्डे पुरोत्तां का अधिकार मिल्ले रा है कि तिन्हा सारे लोक्कां जो पकड़ी लये जे तुसा पर विश्वास करदे तिन्हा।

¹⁵ पर प्रभु ने तिस बोल्लेया, जा, किजोकी शाऊल तां जो मैं चुणी लित्ते रा है कि से गैर यहूदियां, राज्जेयां अते इस्राएल रे लोक्कां बिच मेरा प्रचार करे।

¹⁶ ते मैं तिसजो दसणा कि लोक्कां बिच मेरा प्रचार करणे री वजह कने तिसजो कदेया-कदेया दुख चुकणा पैणा।

¹⁷ तां हनन्याह उठी करी शाऊल रे घरे गेया, ते तिस पर अपणा हत्थ रखि करी बोल्लेया, ओ भाई शाऊल, प्रभु यीशु ने मेरे जो भेज्जे रा है, जे तुसा जो रस्ते बिच दिस्से थिये, ताकि तू फिरी दिखि सके ते पवित्रात्मा कने भरी जाए।

¹⁸ ते तिसी बेल्ले तिसेरी हाक्खिया का छिलके जेय पेय ते से दिखणा लग्गेया ते उठी करी बपतिस्मा लित्तेया,

¹⁹ फिरी रोट्टी खाई करी तिसजो थोड़ा जोर आया। ते से दमिश्क कस्बे बिच रैह्णे वाले चेल्‍लेयां का ही थोड़े दिनां तिकर रेया।

दमिश्क बिच पौलुस रा प्रचार

²⁰ ते से तौले ही दमिश्क कस्बे रे सभास्थल बिच जाई यीशु रे बारे बिच प्रचार करणा लग्गेया कि से ही परमेश्वर रा पुत्तर हिन।

²¹ सारे सुनणे वाले ए सुणी करी हैरान होई करी बोलणे लग्गेया, कै ए सेइ मणू नी है जे यरुशलेम बिच यीशु पर विश्वास करणे वालेयां जो मुकाई दिंदा थिया, ते इत्ते भी इधेरे तांइ ही आया थिया कि तिन्हेरे एजो बन्नी करी बड्डे पुरोत्तां का लेई जाए?

²² पर शाऊल होर भी जोर-शोर कने प्रचार करदा गेया ते इस गल्ल जो साबित करी के कि मसीह यीशु इत्ते ही है, दमिश्क बिच रैह्णे वाले यहूदियां रा मुँह बांद्द करदा थिया,

²³ जां शाऊल मते दिनां तांइ दमिश्क कस्बे बिच थिया, तां यहूदियां ने मिली करी तिसजो मारणे री योजना बणाई,

²⁴ पर तिन्हेरी योजना रा शाऊल जो पता लग्गी गेया से तां तिसजो मारी रखणे तांइ दिन-रात दरवाज्जेयां का बेई रैहन्दे थिये।

²⁵ पर रात्ती चेल्‍लेयां ने तिसजो टोकरे बिच पाया ते सहर री दुआल का टगीं करी तिसजो उतारी दित्तेया।

यरुशलेम सहर बिच शाऊल

²⁶ यरुशलेम सहर जाणे का बाद शाऊल ने तित्ते रैह्णे वाले प्रेरितां बिच मिली जाणे री कोसीस कित्ती, पर सारे तिसका डरदे थिये, किजोकी तिन्हा जो शाऊल रा विश्वास नी हुदां थिया कि से भी इक्क चेल्ला है।

²⁷ पर बरनबास ने तिसजो अपणे कन्ने प्रेरितां का लेई जाई करी तिन्हेरे जो दस्सेया कि किय्यां तिसने दमिश्क कस्बे जाणे रे रस्ते बिच प्रभु जो दिख्खेया ते किय्यां प्रभु जी ने तिस कने गल्लां कित्ती, ते दमिश्क कस्बे बिच किय्यां तिस कने यीशु रा प्रचार कित्तेया।

²⁸ तां प्रेरितां ने बरनबास री गल्ल रा भरोसा कित्ता ते इसी तरिक्के कने शाऊल यरुशलेम सहर बिच तिन्हा कने रेया ते सारे यरुशलेम बिच तिन्हा कने-कने जांदा थिया।

²⁹ ते बिना डरे प्रभु रे नां लेई करी प्रचार करदा थिया ते यूनानी भाषा बोलणे वाले यहूदियां कने गल्ल-बात ते बहस-बाजी करदा थिया, पर से तिसजो मारी रखणे री कोसीस करणा लग्गे

³⁰ ए जाणी करी संगी विश्वासी तिसजो कैसरिया सहर बिच लेई आए ते तरसुस जो भेज्जी दित्तेया।

³¹ इस तरिक्के कने सारे यहूदियां, गलील ते सारे सामरिया रे प्रदेशां बिच कलीसिया जो सांती मिल्ली अते तिसेरी तरक्की हुंदी गेई, ते से प्रभु रे डर ते पवित्रात्मा रे जरिए कलीसिया बिच मणू बदधे गे ते सारे खुशहाल रे।

लूद्दा ते याफा बिच पतरस

³² फिरी इय्यां होया कि पतरस तिन्हा प्रदेशां बिच घूमदा रेया ते तिन्हा यीशु पर विश्वास करणे वाले लोक्कां का भी पूज्जेया जे लुद्देया कस्बे बिच रैहन्दे थिये।

³³ से तिसजो एनियास नां रे इक्क अधरंग रे बीमारी वाला मणू मिल्लेया जे आठ्ठ साल्लां का बिस्तर पर पे रा थिया

³⁴ पतरस ने तिसजो बोल्लेया, ओ एनियास! मसीह यीशु तेरे जो खरा करदा उठ, पर बछाण बिछा तां से उठ्ठी बैठेया

³⁵ तां लुद्देया ते शारोन कस्बे रे सारे रैह्णे वालेयां ने तिसजो दिख्खी करी प्रभु यीशु पर विश्वास कित्ता।

³⁶ याफा कस्बे बिच तबीता नां री यीशु री इक्क चेल्ली रैहन्दी थी, यूनानी भाषा बिच जिस जो दोरकास बोलदे। से बड़े भले रे कम्म रे दान पुन्य करदी रेह्न्दी थी।

³⁷ जिस बेल्ले पतरस लुद्देया कस्बे बिच थिया, तिन्हा ही रोज्जां बिच से बिमार होई करी मरी गई, ते तिन्हा ने तिसजो नुहाई करी अटारी पर रख्खी दित्तेया

³⁸ लुद्देया कस्बा याफा कस्बे रे नेड़े थिया, चेल्‍लेयां ने ए सुणी करी कि पतरस तित्ते है, दो जणेया जो भेजी करी तिसका बिनती कि असा का आणे बिच देर मत कर

³⁹ तां पतरस उठी करी तिन्हेरे कने गेया ते जां से पूज्जेया तां से तिसजो तिस अटारी पर लेई गे सारी विधवा जनानियां आई करी तिसका खड़ी गई, ते जे कपड़े दोरकास ने तिन्हेरे कने रेई करी बणाए थिये से दिखाणा लग्गी

⁴⁰ तां पतरस ने सारेयां जो बाहर करी दित्तेया, ते गोड्डे रे भारे बेई करी प्रार्थना कित्ती ते लास रे पास्से दिख्खी करी बोल्लेया, तबीता, उठ तां तिसने अपणी हाख्खियां खोल्ली दित्ती ते पतरस जो दिख्खी करी उठी गेई

⁴¹ तिसने हत्थ देई करी तिसजो खड़ेरेया ते परमेश्वर रे लोक्कां ते विधवा जनानियां जो सद्दी करी तिन्हेरे जो से जिन्दी दिखाई दित्ती

⁴² ए गल्ल सारे याफा कस्बे बिच फैली गई अते मते जणेया ने प्रभु यीशु पर विश्वास कित्तेया।

⁴³ ते पतरस याफा कस्बे बिच शमौन नां से कुसकी चमड़े रे कम्म करणे वाले रे घरे मते दिनां तांइ तित्ते रेया।