प्रेरितां रे कम्म 8 - चम्बयाली नौआ नियम

¹ शाऊल स्तिफनुस रे मारे जाणे बिच सहमत थिया। तिस्सी दिन का यरुशलेम सहर री कलीसिया पर बड़ा अत्याचार होणा सुरु होई गेया ते प्रेरितां जो छड्डी करी बाकि सारे यहूदियां ते सामरिया प्रदेश बिच बिखरी गे।

शाऊल रा कलीसिया पर जुल्म

² ते किच्‍छ भक्तां ने स्तिफनुस जो कब्र बिच रख्खेया: ते तिसेरे तांइ अफसोस कित्तेया।

³ पर शाऊल कलीसिया रे लोक्कां पर जुल्म करदा थिया ते सारे जनानियां ते मर्दां जो धृड़ी-धृड़ी करी जेल बिच पाया करदा थिया।

यहूदिया ते सामरिया प्रदेसां बिच सुब-बसेख फिलिप्पुस रा सामरिया सहर बिच प्रचार

⁴ पर जे विश्वासी बिखरी गे थिये से जित्ते भी गे तित्ते सुब बसेख सुणादे गे।

⁵ ते फिलिप्पुस सामरिया प्रदेश रे इक्क कस्बे बिच गेया ते तित्ते मसीह यीशु रे बारे बिच सारेयां जो दसणा लग्गेया।

⁶ जां तित्ते भीड़ ने फिलिप्पुस री गल्लां जो सूणेया ते जे चिन्ह-चमत्कार से करदा थिया से दिख्खे तां तिन्हा ने तिसेरी गल्लां पास्से ध्यान लाया

⁷ किजोकी फिलिप्पुस रे हुकम दैणे पर लोक्कां बिच का दुष्टात्मा चिडां मारी करी निकली जादीं थी, ते मते सारे मणू जे लट्टे थिये ते जिन्हा जो अधरगं होए रा थिया से ठीक होई गे।

⁸ ते तिस सहर बिच चारो पास्से खुसी फैली गयी।

शमौन जादूगर

⁹ तिस सहर बिच शमौन नां रा इक्क मणू रैहन्दा थिया, जे जादू-टोणा करी के सामरिया प्रदेश रे लोक्कां जो हैरान करी के ते तिन्हेरे सामणे अप्पु जो कोई बड्डा मणू दसदा थिया

¹⁰ छोटे का लेई बड्डे तिकर सारे सामरी मणू तिसेरी इज्जत करदे थिये ते बोलदे थिये कि ए परमेश्वर री से ताकत है जे बड़ी महान है

¹¹ तिसने मते दिनां का तिन्हा सारेयां जो अपणे जादू-टौणे रे कम्मां कने हैरान करी के रख्खे रा थिया, इधेरे तांइ से तिसजो बड़ा मन्दे थिये।

¹² पर जां लोक्कां ने परमेश्वर रे राज ते मसीह यीशु रे नां रा विश्वास कित्तेया जिन्हेरा सुब बसेख फिलिप्पुस सुणाया करदा थिया, तां मते सारे मणू तिसका बपतिस्मा लैणा लगे।

¹³ तां शमौन ने अप्पु भी विश्वास कित्तेया ते बपतिस्मा लेई करी फिलिप्पुस कने रैह्णा लग्गेया ते चिन्ह-चमत्कार दिख्खी करी हैरान हुदां थिया।

सामरिया में पतरस ते यूहन्ना

¹⁴ जां यरुशलेम बिच रैह्णे वाले प्रेरितां ने सूणेया कि सामरिया प्रदेश रे लोक्कां ने परमेश्वर रे वचन जो अपणाई लित्ते रा है, तां तिन्हा ने पतरस ते यूहन्ना जो तिन्हा का भेज्जेया।

¹⁵ जां से तिन्हा बिच रेया करदे थिये तां तिन्हा ने तित्ते रे लोक्कां तांइ प्रार्थना कित्ती कि से मणू पवित्रात्मा पाई सकण।

¹⁶ किजोकी तिस बेल्ले तिकर पवित्रात्मा तिन्हा बिच का कुसकी पर नी उतरेया थिया, तिन्हा लोक्कां ने तां सिर्फ मसीह यीशु रे नां कने बपतिस्मा लित्तेया थिया।

¹⁷ तां पतरस ते यूहन्ना ने तिन्हा लोक्कां पर हत्थ रख्खे ते तिन्हा पर पवित्रात्मा उतरी गेया।

¹⁸ जां शमौन ने दिख्खेया कि प्रेरितां रे लोक्कां पर हत्थ रखणे कने पवित्रात्मा मिलदा तां से तिन्हा का पैसे लेई करी गेया ते बोलणा लग्गेया,

¹⁹ “ए ताकत मेरे जो भी देयो, कि जिस कुसकी मणू पर हत्थ रखां तिसजो पवित्रात्मा मिली जाए।”

²⁰ पतरस ने तिसजो बोल्लेया, “तू ते तेरे पैसे मुकी जाण, किजोकी तैं परमेश्वर रे दान जो पैसे कने खरीदणे री गल्ल सोची।

²¹ इस सेवकाई बिच तेरा कोई हिस्सा नी है किजोकी परमेश्वर रे अग्गे तेरा मन ठीक नी है।

²² इधेरे तांइ अपणे मन री इन्हा बुरी गल्लां का तौबा कर ते प्रभु का प्रार्थना कर, मुमकिन है कि तेरे मन री बुरी गल्लां जो माफ करी दित्ती जाए।

²³ किजोकी मैं दिख्खेया करदा है कि तेरे अदंर बड़ी हिर्स भरे री है ते अधार्मिक रे बन्धन हिन।”

²⁴ शमौन ने जवाब दित्तेया, “तुसी मेरे तांइ प्रार्थना करो कि जे गल्लां तुसा अब्बे बोल्ली, तिन्हा बिच का कोई मेरे गल्ल मेरे कने ना हो”

²⁵ अते से गवाई देई करी ते प्रभु यीशु रा वचन सूणाई करी ते सामरिया प्रदेश रे मते सारे ग्रां बिच सुब बसेख सुणादें-सुणादें यरुशलेम सहर जो वापस हटी गे।

फिलिप्पुस ते कूश देस रा अधिकारी

²⁶ फिरी परमेश्वर रे इक्क स्वर्गदूत ने फिलिप्पुस जो बोल्लेया, उठ ते दक्षिण रे पास्से तिस रस्ते पर जा, जे यरुशलेम सहर का गाज़ा सहर जो जादां, जे रेगीस्थानी रस्ता है।

²⁷ से उठी करी चली पेया, ते कूश देस रा इक्क मणू आया करदा थिया जे किन्नर थिया, ते कूशियां री राणी कदांकिया रा मत्रीं ते खजांची थिया। से अराधना करणे जो यरुशलेम सहर आया थिया।

²⁸ से अपणे रथ पर बेई करी अपणे देस जो हटेया करदा थिया, ते यशायाह भविष्यद्वक्ता री कताब जोरे-जोरे पढ़ेया करदा थिया।

²⁹ तां पवित्रात्मा ने फिलिप्पुस जो बोल्लेया, जाई करी इस रथ रे नेड़े रे।

³⁰ फिलिप्पुस दौड़ी करी तिस रथ रे नेड़े पूज्जेया, ते तिसजो यशायाह भविष्यद्वक्ता री कताब पढ़दे होये सूणेया, ते पूच्छेया, तू जे पढ़ेया करदा कै तिसजो समजदा भी?

³¹ तिसने बोल्लेया, जां तिकर कोई मेरे जो ना समजाए तांइ तिकर मैं किय्यां समजां? ते तिसने फिलिप्पुस का बिनती कित्ती की से रथ पर चढ़ी करी तिस कने बेई जाए। ते फिलिप्पुस रथ पर चढ़ी करी तिस कने बेई गेया।

³² पवित्रशास्त्र रा जे अध्याय से पढ़ेया करदा थिया से ए थिया: से भेड़ रे सांई बडणे तांइ पूजाया गेया, “जिय्यां मेमना अपणे ऊन कुतरणे वालेयां रे सामणे चुपचाणे रैहन्दा, तिय्यां ही तिसने भी अपणा मुँह नी खोल्लेया।”

³³ तिसजो नीचा दिखाया गेया ते तिस कने हिसाब-किताब नी होया, कुसकी ने भी तिसेरे वंश जो नी जाणना किजोकी तिसेरा वंश सुरु होणे का पैल्ले ही तिसजो मारी दित्तेया गेया।

³⁴ इस पर किन्नर ने फिलिप्पुस का पूच्छेया, मैं तेरे का बिनती करदा, ए दस्स कि भविष्यद्वक्ता ए कुसेरे बारे बिच बोल्लेया करदा है, अपणे या कुसकी होरसी रे बारे बिच?

³⁵ तां फिलिप्पुस ने बोलणा सुरु कित्ता, ते इसी पवित्रशास्त्र का सुरु करी के तिसजो यीशु रा सुब बसेख सुणाया ते तिस किन्नर ने तिन्हा गल्लां जो समजेया ते यीशु पर विश्वास कित्ता।

³⁶ रस्ते बिच जादें-जादें से इक्क तलाब का गुजरेया करदे थिये, तां तिस किन्नर ने बोल्लेया, दिख्ख इत्ते तलाब है अवे मेरे जो बपतिस्मा लैणे बिच कै रोक है?

³⁷ फिलिप्पुस ने तिसजो बोल्लेया, जे अगर तू अपणे पूरे मन कने विश्वास करदा, तां ए होई सकदा: तिसने जवाब दित्तेया कि मैं विश्वास करदा कि मसीह यीशु ही परमेश्वर रे पुत्तर हिन।

³⁸ तां तिनिये रथ खड़ा करणे रा हुकम दित्ता, ते फिलिप्पुस ते किन्नर दोन्नों पाणी बिच उतरी गे, ते फिलिप्पुस ने तिसजो जो बपतिस्मा दित्ता।

³⁹ जां से पाणी बिच निकली करी उप्पर आये तां प्रभु रा आत्‍मा फिलिप्पुस चुकी करी लेई गे, ते किन्नर ने फिरी तिसजो नी दिख्खेया, ते से खुसी मणादें-मणादें अपणे देस जो हटी गेया।

⁴⁰ पर पवित्रात्मा ने फिलिप्पुस जो अश्दोद सहर बिच पूजाई दित्ता, ते जां तिकर कैसरिया बिच ना पूज्जेया तां तिकर सहर-शहर बिच सुब बसेख सुणादां गेया।