प्रेरितां रे कम्म 5 - चम्बयाली नौआ नियम

हनन्याह ते सफीरा

¹ हनन्याह नां रे इक्क मणू ते तिसेरी लाड़ी सफीरा ने अपणी जायदाद रा किच्‍छ हिस्सा बेच्चेया,

² ते तिस रक्म का अप्पु जो थोड़ा बचाई लित्ता ते से गल्ल तिसेरी लाड़ी भी जाणदी थी, ते तिसेरा किच्‍छ हिस्सा अणी करी प्रेरितां जो सौंपी दित्तेया।

³ पतरस ने बोल्लेया, ओ हनन्याह! शैतान ने ए गल्ल तेरे मन बिच किजो पाई की तू पवित्रात्मा कने झूठ बोल्ले, ते अपणी जायदाद बिच का थोड़ा हिस्सा बेच्चेया थिया, तिसेरे दाम बिच का किच्‍छ रख्खी छड्डे?

⁴ जां तिकर से तेरे का थी, कै तेरी नी थी? ते जां से बिकी गई, कै तेरे वस बिच नी थी? ए बुरी गल्ल तैं अपणे मन बिच किजो सोच्ची? तैं मणूआं कने नी पर परमेश्वर कने झूठ बोल्ले रा है।

⁵ ए गल्लां सूणदे ही हनन्याह छुड़की पेया ते तिसेरी जान निकली गई ते सारे सुनणे वाले बड़े डरी गे।

⁶ फिरी जवान लोक्कां ने आई करी तिसजो चुक्केया ते तिसेरी अर्थी बणाई ते बाहर लै जाई करी गाड़ी दित्ता।

⁷ लगभग त्रै घटें रे बाद तिसेरी लाड़ी, जे किच्‍छ होए रा थिया बगैर जाणे अन्दर आई

⁸ तां पतरस ने तिसजो बोल्लेया, मेरे जो दस्स कै तुसा दोन्नां ने तिस जमीन इन्ने बिच ही बेचि थी? तिसने बोल्लेया, हाँ, इन्ने बिच ही।

⁹ पतरस ने तिसजो बोल्लेया, ए कै गल्ल है कि तुसा दोन्नां ने प्रभु री आत्‍मा री परिक्षा तांइ इक्क मन बणाया? दिख, तेरे लाड़े रे गाड़णे वाले दुआर पर ही खड़ित्ते रे हिन ते तेरे जो भी बाहर लेई जाणा

¹⁰ तां से तिस्सी बेल्ले तिन्हेरे पैरां पर पेई गई ते से मरी गई ते जवान लोक्कां ने अन्दर आई करी तिसजो मरे रा दिख्खेया ते बाहर लेई जाई करी तिसेरे लाड़े रे नेड़े दब्बी दित्तेया।

¹¹ यरुशलेम सहर री सारी कलीसिया रे मणू ते इन्हा गल्लां जो मनणे वाले सब मणू बड़े वरी डरी गे।

निशानियां ते अनौखे कम्म

¹² प्रेरितां रे जरिए बड़े चमत्कार ते अनौखे कम्म लोक्कां बिच दिखाए जादें थिये, ते से सारे विश्वासी मणू सुलैमान रे बरांड़े बिच कठिदें थिये।

¹³ पर होर लोक्कां बिच का कुसकी जो ए हिम्मत नी हुदी थी कि तिन्हा प्रेरितां बिच जाई मिल्ले, तां भी मणू तिन्हेरी बड़ाई करदे थिये।

¹⁴ प्रभु बिच विश्वास करणे वाले मते सारे मणू प्रभु री कलीसिया बिच बड़ी वरी गिनती बिच मिलदे रे।

¹⁵ प्रेरितां रे कम्म रा ए नत्तीजा रेया कि मणू बिमारां लोक्कां जो सड़कां पर अणी-अणी करी मज्जेयां ते झुल्लेयां पर लेटाई दिदें थिये ताकि जां पतरस आये तां तिसेरी परछाई ही तिन्हा बिच का कुसकी पर पेई जाए।

¹⁶ यरुशलेम सहर रे नेड़े-तेड़े रे सहरां बिच का भी विश्वासी मणू बिमार ते दुष्टात्मा रे सताए रे लोक्कां जो लाई करी कठिदें थिये, ते से सारे प्रेरितां रे जरिए ठीक करी दित्ते जादें थिये।

प्रेरितां री गिरफ्तारी

¹⁷ तां प्रधान पुरोत्त ते तिसेरे सारे साथी जे सदूकियां रे पथं का थिये, हिर्स कने भरी गे।

¹⁸ ते प्रेरितां जो पकड़ी करी जेलखाने बिच ढप्पी दित्ता।

¹⁹ पर रात्ती प्रभु रे इक्क स्वर्गदूत ने जेलखाने रे दुआर जो खोल्ली री तिन्हेरे जो बाहर लाई करी बोल्लेया,

²⁰ जाओ, मन्दिर बिच खड़ी करी इस हमेसा री जिन्दगी री गल्लां सारे लोक्कां जो सुणाओ।

²¹ जिय्यां तिन्हा जो बोल्लेया गेया थिया, तिस हिसाब कने से भ्यागा उठी करी मन्दिर बिच जाई करी ए उपदेस दैणा लगे, तां प्रधान पुरोत्त ते तिसेरे साथिया ने आई करी महासभा जो ते इस्राएली लोक्कां रे सारे बुजुर्ग मणू जो कठेरेया ते जेलखानेयां बिच ए बोल्ली भेज्जेया कि तिन्हेरे जो लेई आए,

²² पर मन्दिर रे पैहरेदारां जां तित्ते पूज्जी ते दिख्खेया कि से मणू तित्ते नी हिन, ते हटी करी तिन्हेरे जो खबर दित्ती,

²³ असा ने जेलखाने जो बड़ी सावधानी कने बांद्द कित्ते रा थिया ते पेहरे वालेयां जो बाहर खड़ित्ते रे पाया पर जां खोल्लेया तां अन्दर कोई ना मिल्लेया

²⁴ जां मन्दिर रे पैहरेदारां रे सरदार ते बड्डे पुरोत्तां ने ए खबर सूणी, तां तिन्हेरे बारे बिच बड़ी चितां बिच पेई गे कि तिन्हेरा कै होया!

²⁵ इन्ने बिच कुसकी ने आई करी तिन्हेरे जो दस्सेया, दिख्खो, जिन्हा जो तुसा जेलखाने बिच बांद्द करी के रख्खे रा थिया, से मणू मन्दिर बिच खड़ित्ते रे लोक्कां जो उपदेस देया करदे हिन

²⁶ जां तिनिये सूणेया तां सरदार ने पैहरेदारां कने जाई करी, तिन्हेरे जो लेई आया, पर जोर-जबरदस्ती कने नी, किजोकी से लोक्कां का डरदे थिये कि असा पर बट्टे ना सुटण।

²⁷ तिन्हा ने तिन्हेरे जो अणी करी महासभा रे सामणे खड़ेरी दित्ता, ते प्रधान पुरोत्त ने तिन्हा का पूच्छेया,

²⁸ तां बड्डे पुरोत्त ने तिन्हेरे जो पूच्छेया, कै असा ने तुसा जो चितौणी देई करी हुकम नी दित्तेया थिया कि तुसा इस नां कने उपदेस मत करदे? तां भी तुसा ने सारे यरुशलेम सहर जो अपणे उपदेस कने भरी रख्खे रा है ते तिस मणू रा खून रा इल्जाम असा री सिर पर लाणा चाहंदे।

²⁹ पर पतरस ते होर प्रेरितां ने जवाब दित्ता, मणूआं रे हुकम का बधी करी परमेश्वर रे हुकम जो मनणा ही असा री जिम्मेदारी है

³⁰ असा रे बाबे-दादेयां रे परमेश्वर ने यीशु जो जिन्दा कित्तेया, जिस जो तुसा ने सुली पर लटकाई करी मारी रख्खेया थिया।

³¹ तिसजो परमेश्वर ने प्रभु ते छुटकारा दैणे वाला बणाई करी अपणे सज्जे हत्थ पास्से उच्चां करी दित्तेया कि से इस्राएलियां जो तौबा करी के ताकत ते पाप्पां री माफी देई सके।

³² असी इन्हा गल्लां रे गवाह हिन ते तिय्यां ही पवित्रात्मा भी, जिस जो परमेश्वर ने तिन्हा जो दित्ते रा है जे तिन्हेरा हुकम मनदे

³³ ए सुणी करी सभा रे सदस्य मणू जलणा लग्गी पे ते प्रेरितां जो मारी रखणा चाएया।

³⁴ पर गमलीएल नां रे इक्क फरीसी ने जे शास्त्रि लोक्कां ते सारे लोक्कां बिच बड़ा मन्नेया जादां थिया, सभा बिच खड़ी करी प्रेरितां जो थोड़ी देर तांइ बाहर करी दैणे रा हुकम दित्तेया,

³⁵ तां तिसने बोल्लेया, ओ इस्राएल रे लोक्कों, तुसा जे कि ओ इन्हा मणूआं कने करणा चाह्‍ंदे सोची-समजी करी ही करेयो

³⁶ किजोकी इन्हा दिनां का पैल्ले थियुदास ए बोलदा होया उठेया थिया, कि मैं भी किच्‍छ है ते कोई चार सौ मणू तिसेरे कने होई गे, पर से मारेया गेया ते जिनिये मणू तिसजो मनदे थिये, सारे तित्तर-बित्तर होई गे ते मिटी गे।

³⁷ तिसेरे बाद नां लिखणे रे दिनां बिच गलील प्रदेश रा यहूदा आया, ते किच्‍छ लोक्कां जो अपणे पास्से करी लित्ता, ते से भी मुकी गेया ते जिनिये मणू तिसजो मनदे थिये सारे तित्तर-बित्तर होई गे।

³⁸ इधेरे तांइ अवे मैं तुसा जो बोलदा कि इन्हा मणूआं का दुर ही रेयो ते इन्हेरे कने किच्‍छ कम्म मत रख्खो किजोकी जे ए धार्मिकता रा कम्म मणूआं रे पास्से का हो तां मिटी जाणा

³⁹ पर जे परमेश्वर रे पास्से का है तां तुसा तिन्हेरे कदी मिटाई नी सकगे कुते इदेया ना हो कि उसी परमेश्वर कने भी लड़ने वाले बणी जाओ

⁴⁰ तां तिन्हा ने तिसेरी गल्ल मन्नी लित्ती ते प्रेरितां जो सद्दी करी कुटवाया, ते ए हुकम देई करी छड्डी दित्तेया कि यीशु रे नां कने फिरी कोई उपदेस मत करदे।

⁴¹ से इस गल्ल का खुस होई करी महासभा रे सामणे का चली गे, कि असी यीशु रे नां री बड़ाई होणे रे जोग्गे तां ठैहरे।

⁴² से हर रोज मन्दिर बिच ते घर-घर बिच प्रचार करणे, ते इस गल्ल रा सुब बसेख सुनाणे का कि यीशु ही मसीह हिन, नी रुके।