प्रेरितां रे कम्म 23 - चम्बयाली नौआ नियम

¹ पौलुस ने महासभा पास्से नझाई करी दिख्खेया ते बोल्लेया, ओ संगी विश्वासियों, मैं अज्ज तक परमेश्वर तांइ बिल्कुल सच्चे विवेक कने जिन्दगी बिताये री है।

² पौलुस री बोल्ले री गल्लां जो सुणी करी हनन्याह प्रधान पुरोत्त ने तिन्हा जो जे तिसेरे नेड़े खड़ित्ते रे थिये, पौलुस रे मुहँ पर चन्ड़ मारणे रा हुकम दित्तेया,

³ तां पौलुस ने तिन्हा जो बोल्लेया, ओ बेईमानों, परमेश्वर ने तुसा जो मारणा, तुसा मूसा रे कानून रे हिसाब कने मेरा हिसाब-किताब करेया करदे हिन, तां फिरी कै मूसा रे कानून रे खिलाफ ही मेरे जो मारणे रा हुकम देया करदा है?

⁴ जे नेड़े खड़ित्ते रे थिये तिन्हा ने बोल्लेया, तू परमेश्वर रे प्रधान पुरोत्त री बेजती करदा।

⁵ पौलुस ने बोल्लेया, ओ संगी विश्वासियों, मेरे जो पता नी थिया कि ए प्रधान पुरोत्त हिन, किजोकी पवित्रशास्त्र बिच लिख्खे रा है: अपणे मणूआं रे परधान जो बुरा नी बोलणा चाएदा

⁶ तां पौलुस ने ए जानणे का बाद कि तित्ते किच्‍छ सदूकी ते फरीसी मणू भी हिन, सभा बिच हक्क लाई करी बोल्लेया, ओ संगी विश्वासियों, मैं फरीसी है ते फरीसी लोक्कां रे टब्बर रा है, मुर्देयां रे फिरी जिन्दे कित्ते जाणे री गल्ल बिच आस रखणे री वजह कने मेरे पर मुकद्दमा होया करदा है।

⁷ जां तिनिए ए गल्ल बोल्ली तां फरीसियां ते सदूकियां अन्दर अप्पु-मिते लड़ाईयां होणा लग्गी पेई ते सभा अन्दर फूट पेई गई

⁸ किजोकी सदूकी मणू तां ए बोलदे कि, ना फिरी जिन्दे होई जाणा सच है, ना स्वर्गदूत अते ना ही दुष्टात्मा हुंदी पर फरीसी इन्हा सबणी गल्लां जो मन्दे

⁹ फिरी बड़ा रोला पेई गेया ते किच्‍छ शास्त्रि जे कि फरीसी थिये, उठी होए ते ए बोल्ली करी बैह्स-बाजी करणा लग्गी पये, असा जो इस मणू अन्दर कोई खराबी नी मिल्ली, शायद कुसकी दुष्टात्मा या स्वर्गदूत ने तिस कने गल्ल कित्ती हो।

¹⁰ जां बड़ी बैह्स-बाजी होई, तां पलटन रे सरदार ने इस डर कने कि से पौलुस रे टुकड़े-टुकड़े ना करी रखण, पलटन जो हुकम दित्तेया कि उतरी करी पौलुस जो महासभा बिच का जबरदस्ती कड्डी लैण, ते गढ़ अन्दर लेई जाण।

¹¹ तिस्सी रात्ती प्रभु यीशु ने तिसेरे नेड़े खड़े होई करी बोल्लेया, ओ पौलुस, हिम्मत कर किजोकी जिय्यां तैं यरुशलेम अन्दर मेरी गवाई दित्ती, तिय्यां गवाई तिज्जो रोम अन्दर भी दैणा पैणी।

पौलुस जो मारणे री चाल

¹² जां सँझ होई तां यहूदी लोक्कां ने साजिश कित्ती ते कसम खाई कि जां तांइ असी पौलुस जो मारी नी छडगे, तां तिकर असी किच्‍छ खाण या पीन तां असा पर लाणत है।

¹³ तिन्हा ने अप्पु अन्दर ए कसम खाई थी, से चाली मणू का भी जादा थिये

¹⁴ तिन्हा ने बड्डे पुरोत्तां ते बुजुर्ग लोक्कां का जाई करी बोल्लेया, असा ने ए कसम खाए री है कि जां तांइ असी पौलुस जो मारी नी छडदे, तां तांइ अगर किच्‍छ चखन भी तां असा पर लाणत हो।

¹⁵ इधेरे तांइ अवे महासभा समेत पलटन रे सरदार जो समझाओ कि तिसजो तुसा का लेई आए, ते इय्यां लग्गे कि तू तिसेरे बारे अन्दर होर भी जांच-पड़ताल करणा चाह्‍ंदा ते असी तिसेरे पुजणे का पैल्ले ही तिसजो मारी रखणे तांइ तैयार रैह्न्गे।

¹⁶ पर पौलुस रे भांजे ने सुणी लिया कि यहूदी अधिकारी तिसजो मारणे री तयारी अन्दर हिन, तां तिनिए गढ़ अन्दर जाई करी पौलुस जो से सारा किच्‍छ बोल्ली दित्तेया

¹⁷ पौलुस ने हाकिमां बिच का इक्क जो अपणे नेड़े सद्दी करी बोल्लेया, इस जुआन जो पलटन रे सरदार का लेई जाओ, ए तिसजो किच्‍छ बोलणा चाह्‍ंदा

¹⁸ इधेरे तांइ सूबेदार ने पौलुस रे भांजे जो तिसजो पलटन रे सरदार का लेई जाई करी बोल्लेया, कैदी पौलुस ने मेरे जो सद्दी करी मेरे छन्दे कित्ते कि ए जुआन पलटन रे सरदार कने किच्‍छ बोलणा चाह्‍ंदा है इसजो तिसेरे का लेई जा

¹⁹ पलटन रे सरदार ने तिसेरा हत्थ पकड़ी करी ते तिसजो अलग लेई के पूच्छेया, तू मेरे जो कै बोलणा चाह्‍ंदा?

²⁰ तिनिए बोल्लेया, यहूदी अधिकारियां ने साजिश कित्ते री है कि तेरे का छन्दे करण कि कल पौलुस जो महासभा अन्दर अणन, ते इय्यां लग्गे कि से तिसेरे बारे अन्दर होर भी जांच-पड़ताल करणा चाह्‍ंदे होण।

²¹ पर तिन्हेरी गल्ल मत मनदा, किजोकी तिन्हा बिच का चाली का जादा मणू पौलुस जो मारणे री भाल्ला अन्दर हिन, जिन्हा ने ए कसम खाए री है कि जां तांइ से पौलुस जो मारी नी रखण, तां तांइ नां तां तिन्हा किच्‍छ खाणा ते ना ही किच्‍छ पीणा, ते अवे से तैयार हिन ते तेरे बोलणे री भाल्ला अन्दर हिन।

²² तां पलटन रे सरदार ने तिस जुआन जो ए हुकम देई करी बिदा कित्तेया, कुसकी जो भी मत दस्दा कि तैं मेरे जो ए गल्लां बोल्ले री हिन।

कैसरिया जिल्ले बिच पौलुस जो लेई जाणा पौलुस जो फेलिक्स का भेजणा

²³ तां पलटन रे सरदार ने दो हाकिमां जो सदवाई करी बोल्लेया, दो सौ सैनिक, सत्तर सवार ते दो सौ भालैत, रात्ती रे नौ बजे का बाद कैसरिया कस्बे जो जाणे तांइ त्यार रख्खो।

²⁴ ते पौलुस री सवारी तांइ घोड़े तैयार रख्खो, कि तिसजो फेलिक्स हाकिम तांइ ठीक-ठाक पूजाई दैण।

²⁵ पलटन रे सरदार ने फेलिक्स राज्यपाल जो इस तरिक्के कने इक्क चीठ्ठी भी लिखी:

²⁶ महामहिम फेलिक्स हाकिम जो क्लौदियुस लूसियास री तरफ का प्रणाम,

²⁷ इस मणू जो यहूदियां ने पकड़ी करी मारी दैणा चाह्या, पर जां मेरे जो पता लग्गेया कि ए रोमी है, तां मैं पलटन लेई करी इसजो छुड़ाई करी लेई आया

²⁸ मैं पता लाणा चाह्‍ंदा थिया कि से इस पर किजो इल्जाम लाया करदे हिन, इधेरे तांइ तिसजो उन्हेरी महासभा अन्दर लेई गेया

²⁹ तां मेरे जो पता लग्गेया कि से अपणी मूसा रे कानून री गल्लां री वजह कने इस पर इल्जाम लाया करदे हिन, पर मारी रखणे जोग्गी या बह्न्नी रखणे जोग्गी इस अन्दर कोई बुराई नी है

³⁰ जां मेरे कने गल्ल लाई गई कि से इस मणू जो मारणे री भाल्ला अन्दर हिन तां मैं इसजो झट तेरे का भेज्जी दित्तेया ते आरोप लाणे वाले तिन्हा जो भी हुकम दित्तेया कि तेरे सामणे तिस पर इल्जाम लाण।

³¹ इधेरे तांइ जदेह्याँ सैनिकां जो हुकम दित्तेया थिया, तिय्यां ही से पौलुस जो रातो-रात यरुशलेम सहर का लेई करी अन्तिपत्तरिस अन्दर आये,

³² दूए रोज्जे से सवारां जो पौलुस कने जाणे जो छड्डी करी सिपाई अप्पु यरुशलेम सहर जो हटी आये।

³³ तिन्हा ने कैसरिया पूजी करी राज्यपाल जो चीठ्ठी दित्ती ते पौलुस जो भी तिसेरे सामणे खड़ेरी दित्तेया

³⁴ फेलिक्स राज्यपाल ने चीठ्ठी पढ़ी करी पूच्छेया, ए कुस जगाह् रा है? ते जां पता लग्गेया कि किलिकिया प्रदेश रा है

³⁵ तां तिसजो बोल्लेया, जिस बेल्ले तेरे आरोप लाणे वाले मणू भी आंगे, तां मैं तेरा मुकद्दमा करणा, ते तिनिए पौलुस जो हेरोदेस रे किले अन्दर रखणे रा हुकम दित्तेया।