प्रेरितां रे कम्म 18 - चम्बयाली नौआ नियमकुरिन्थुस सहर बिच 1 इसेरे बाद पौलुस एथेंस सहर जो छड्डी करी कुरिन्थुस सहर बिच आए। 2 ते तिस जगाह् पर तिन्हा जो अक्विला नां रा इक्क यहूदी मणू मिल्लेया, जिसेरा जन्म पुन्तुस प्रदेश बिच होए रा थिया। से अपणी लाड़ी प्रिस्किल्ला कने ईतालिया देस बिच हल्ले आया ही थिया, किजोकी क्लौदियुस सम्राट ने सारे यहूदी लोक्कां जो रोम देस छड्डी करी जाणे रा हुकम दित्तया थिया, इधेरे तांइ तिनिये कुरिन्थ सहर छड्डी दित्तेया। 3 ते पौलुस तिन्हा जो दिखणे तांइ गेया किजोकी से तिन्हेरे सांई तम्बू रे व्यापारी थिये ते से तित्ते रुकी करी तिन्हेरे कने कम्म करदा थिया। 4 ते पौलुस हर इक्क विश्राम दिन पर सभास्थल बिच बैहस-बाजी करी के यहूदियां ते यूनानियां जो मसीह बिच विश्वास करणे तांइ समझांदा थिया। 5 जां सीलास ते तीमुथियुस मकिदुनिया प्रदेश का आये, तां पौलुस ने तम्बू बनाणा छड्डी करी वचन सुनाणे बिच मगन होई करी यहूदियां जो गवाई दिन्दा थिया कि यीशु ही मसीह है: 6 पर जां तिन्हा लोक्कां ने पौलुस रे खिलाफ होई करी तिसेरी बेजती करणा लग्गे, तां पौलुस ने अपणे कपड़े झाड़ी करी तिन्हा जो बोल्लेया, तुसा अपणी जिन्दगी तांइ अप्पु जिम्मेदार हिन, मैं बेकसूर है, अव्वे मैं गैर यहूदी रे मणूआं का जाई करी तिन्हा जो परमेश्वर रा बसेख सूणाणा। 7 ते तित्ते का चली गेया ते तीतुस यूस्तुस नां रे परमेश्वर रे भक्त रे घरे आया, जिसेरा घर सभास्थल रे कने ही थिया। 8 तां सभास्थल रे सरदार क्रिस्पुस ने ते तिसेरे टब्बर ने प्रभु पर विश्वास कित्तेया, ते बड़े कुरुन्थियों ने भी सूणेया ते विश्वास कित्तेया ते बपतिस्मा लित्तेया 9 राती प्रभु जी ने दर्शन रे जरिए पौलुस जो बोल्लेया, मत डर प्रचार करदा जा ते चुप मत हो 10 किजोकी मैं तेरे कने है, ते कोई भी तिज्जो नुक्सान नी पूजाई सकदा, किजोकी इस सहर बिच मते मणू हिन जिन्हा ने मेरा भरोसा करणा। 11 तां पौलुस तित्ते परमेश्वर रा वचन सुणादा रेया ते तित्ते डेढ़ साल रेया। 12 जां गल्लियो अखाया प्रदेश रा राज्यपाल थिया तां यहूदी मणू पौलुस रे खिलाफ होई गे, ते तिसजो हिसाब-किताब री गद्दी रे सामणे लियाई करी, बोल्णा लग्गे। 13 कि ए मणूआं जो समझान्दा, कि परमेश्वर री भक्ति इस तरिक्के कने करो, जे मूसा रे कानून रे उलट हो 14 जां पौलुस बोलणे वाला ही थिया, तां गल्लियो ने यहूदियां जो बोल्लेया, ओ यहूदियों, जे ए किच्छ बे-न्यायी या बुराई री गल्लां हुंदी तां ठीक थिया ते मैं तुसा री सूणदा 15 पर जे ए बैहस-बाजी री गल्लां, ते नां, ते तुसा रे इत्ते रे मूसा रे कानून रे बारे बिच हिन, तां तुसा ही जाणो, किजोकी मैं इन्हा गल्लां रा फैसला करणे वाला नी बणना चांदा 16 ते गल्लियो ने तिन्हा जो हिसाब-किताब री गद्दी रे सामणे का कड्डी दित्तेया 17 तां सब, मणूआं ने सभास्थल रे सरदार सोस्थिनेस जो पकड़ी करी हिसाब-किताब री गद्दी रे सामणे मारेया, पर गल्लियो ने इन्हा सब गल्लां री फिकर नी कित्ती। अन्ताकिया जो वापस हटणा 18 तां पौलुस बड़े रोज्जां तांइ कुरिन्थ सहर बिच ही रेया, पौलुस ने किंख्रिया कस्बे बिच अपणे बाल मुण्डवाये किजोकी तिसने इक्क मन्नत मन्नी थी फिरी विश्वासियां का बिदा लेई करी से किस्ती पर बेई करी सीरिया जो चली गेया तिसेरे कने प्रिस्किल्ला कने अक्विला भी थिये। 19 फिरी से त्रैन्नी जणे इफिसुस सहर बिच पूज्जे ते पौलुस ने प्रिस्किल्ला ते अक्विला जो तित्ते ही छड्डी दित्तेया ते अप्पु सभास्थल बिच जाई करी यहूदियां कने बैह्स करणे लग्गेया। 20 जां तित्ते रे मणूआं ने तिसजो किच्छ रोज होर रैह्णे तांइ जो बोल्लेया तां तिसने मना करी दित्तेया। 21 पर जांदे बेल्ले तिसने बोल्लेया, जे परमेश्वर री मर्जी हुन्गी तां मैं तुसा का फिरी आंगा फिर तिसने इफिसुस सहर कने किस्ती बिच सफर कित्तेया 22 फिरी कैसरिया कस्बे पूज्जी करी से यरुशलेम सहर जो गेया ते कलीसिया रे मणूआं जो नमस्ते करी के, फिरी से अन्ताकिया सहर जो चली गेया। सुब-बसेख रे प्रचार तांइ प्रेरित पौलुस रा तिज्जा सफर पौलुस री तीसरी प्रचार यात्रा 23 तित्ते किच्छ दिन रुकेया ते तिसेरे बाद तित्ते का चली गेया ते गलातिया ते फ्रूगिया रे प्रदेशां बिच इक्क जगाह् का दूज्जी जगाह् पर सफर करदे सबणी चेल्लेयां जो विश्वास बिच बधाणे लग्गेया। इफिसुस सहर बिच अपुल्लोस 24 तित्ते ही अपुल्लोस नां रा इक्क यहूदी मणू थिया जिसेरा जन्म सिकन्दरिया सहर बिच होया थिया से विद्वान मणू थिया से इफिसुस सहर बिच आया पवित्रशास्त्र रा तिसजो पूरा ज्ञान थिया 25 तिसजो प्रभु रे रस्ते री शिक्षा हासिल कित्ती थी ते से मन लाई करी यीशु रे बारे बिच खरी-खरी गल्लां सुणादां ते सखादां थिया पर तिसजो सिर्फ यूहन्ना रे बपतिस्मा रे बारे अन्दर ही ज्ञान थिया 26 से सभास्थल बिच निडर होई करी बोलणा लग्गेया, पर प्रिस्किल्ला ते अक्विला ने तिसेरी गल्लां सुणी करी, तिसजो अपणे घरे लेई आये ते परमेश्वर रा रस्ता तिसजो होर भी सह्ई-सह्ई बताया। 27 ते जां तिसने पक्का करी लित्तेया कि समुन्द्र रे पार उतरी करी से अखाया प्रदेश जो जाण तां विश्वासियां ने तिसजो हिम्मत देई करी भेज्जेया ते तित्ते रे चेल्लेयां जो इसेरा स्वागत करणे तांइ चीठ्ठी लिख्खी भेज्जी, ते तिसने पूज्जी करी तित्ते तिन्हा मणूआं री बड़ी मदद कित्ती जिन्हा ने परमेश्वर री अनुग्रह री वजह कने विश्वास कित्तेया थिया। 28 किजोकी पवित्रशास्त्र का प्रमाण देई-देई करी कि यीशु ही मसीह हिन, से यहूदियां जो लोक्कां रे बिच-मझाटे शास्त्र बिच का जबरदस्त गल्लां बोल्ली करी चुप्प करांदा रेया। |
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.