प्रेरितां रे कम्म 16 - चम्बयाली नौआ नियम

पौलुस रा तीमुथियुस जो कन्ने लैणा

¹ फिरी से दिरबे ते लुस्त्रा रे सहरां बिच भी गेया, ते दिख्खो, तित्ते तीमुथियुस नां रा इक्क चेल्ला थिया, जे कुसकी विश्वासी यहूदी जनानी रा निक्का थिया, पर तिसेरा पुत्तर यूनानी थिया

² ते लुस्त्रा ते इकुनियुम रे सहर रे विश्वासियां बिच तिसेरी बोलचाल ठीक थी।

³ पौलुस ने चाह्‍ंदा थिया कि ए मेरे कने चलन, ते जे यहूदी मणू तिन्हा जगाह् बिच थिये तिन्हेरी वजह कने तिसेरा खतना कित्तेया, किजोकी से जाणदे थिये, कि तिसेरा प्यो यूनानी थिया

⁴ ते सहर-शहर रा सफर करदे तिन्हा ने तित्ते रे विश्वासी लोक्कां जो तिन्हा नियमां जो दसदे थिये जिन्हा जो यरुशलेम रे खास प्रेरितां ने ते बुजुर्ग मणू ने पक्का कित्तेया थिया।

⁵ ते इय्यां तित्ते री कलीसिया रा विश्वास मजबूत हुन्दा गेया ते दिन-व-दिन तिन्हेरी गिनती बढ़ना लग्गी।

त्रोआस बिच: पौलुस रा दर्शन

⁶ से फ्रूगिया ते गलातिया प्रदेशां का होई करी निकले किजोकी पवित्रात्मा ने तिन्हा जो एशिया प्रदेश बिच वचन सुनाणे जो मना करी दित्तेया थिया।

⁷ फिरी से जां मूसिया प्रदेश री सीमा पर पूज्जे तां तिन्हा ने बितूनिया प्रदेश जाणे री कोसीस कित्ती पर यीशु रे आत्‍मा ने तिन्हा जो तित्ते जाणे नी दित्तेया।

⁸ तां से मूसिया प्रदेश का हुन्दे त्रोआस बंदरगाह पूज्जे।

⁹ रात्ती रे बेल्ले पौलुस ने दर्शन बिच दिख्खेया कि मकिदुनिया प्रदेश रा इक्क मणू तिस कने बिनती करी के बोलदा थिया, कि समुन्द्र रे पार आई मकिदुनिया प्रदेश बिच आ ते असा री मदद कर।

¹⁰ इस दर्शन जो दिख्खणे का बाद झट ही से फैसला लिन्दे कि परमेश्वर रे तिन्हा मणूआं बिच सुब बसेख रा प्रचार करणे तांइ असा जो सद्देया, असा ने मकिदुनिया प्रदेश जाणे री ठाणी लेई।

फिलिप्पी बिच: लूदिया रा मन बदलणा

¹¹ इधेरे तांइ त्रोआस सहर रे बंदरगाह का जहाज जो चलाई करी असी सीद्दे सुमात्राके टापू ते दूए दिन नियापुलिस सहर रे बंदरगाह बिच आये।

¹² तित्ते का असा फिलिप्पी सहर पूज्जे जे मकिदुनिया प्रदेश रा इक्क मुख्य सहर थिया ते रोमियां री बस्ति है, इस सहर बिच असा किच्‍छ रोज गुजारे

¹³ फिरी विश्राम दिन पर ए सोच्ची करी कि प्रार्थना करणे तांइ तित्ते कोई सभास्थल नी होणा ते असा सहर रे फाटक रे बाहर दरया जो गे, असी तित्ते बेई गे ते इकठ्ठी होये री जनानियां कने गल्ल-बात करणा लग्गे।

¹⁴ थुआतीरा बिच ही लीदिया नां री इक्क जनानी थी, से बैंगणी रांग रे कपड़े बेचदी थी, से परमेश्वर री भक्तणी थी से बड़े ध्यान कने असा री गल्लां सूणेया करदी थी, प्रभु ने तिसेरे मन रे दुआर खोली दित्ते थिये ताकि जे किच्‍छ पौलुस बोल्लेया करदा थिया, से तिन्हा गल्लां पर ध्यान देई सकण

¹⁵ अपणे सारे टब्बर समेत बपतिस्मा लैणे का बाद तिसने असा रे छन्दे कित्ते कि जे तुसा मेरे जो परमेश्वर री सच्ची भक्तण मनदे तां चलो मेरे घरे रुको ते से असा जो मनाई करी अपणे घरे लेई गई।

पौलुस ते सीलास जेल बिच

¹⁶ फिरी इय्यां होया कि जा असा प्रार्थना री जगाह् जो जाया करदे थिये, तां असा जो इक्क भक्तणी मिल्ली जिस बिच इक्क भविष्य दस्सणे वाली दुष्टात्मा थी, से मणूआं रा भाग्य दस्सी करी अपणे मालका जो बड़ा पैसा कमाई करी दिन्दी थी

¹⁷ से पौलुस ते असा रे पीच्छे-पीच्छे आई करी लेरां मारणा लग्गी कि ए मणू परमप्रधान परमेश्वर रे सेवक हिन, जे तुसा लोक्कां जो छुटकारा रे रस्ते तांइ सुब बसेख सुणादे हिन।

¹⁸ से बड़े रोज्जां तांइ इय्यां ही करदी रेई पर पौलुस तिसका परेशान होई गेया, ते अपणा मुड़ी करी तिस दुष्टात्मा जो बोल्लेया जे तिस जनानी अन्दर थी, मैं तिज्जो मसीह यीशु रे नां कने हुकम दिंदा, कि इस बिच का निकली जा ते तिस्सी बेल्ले निकली गई।

¹⁹ जां तिसेरे मालकां ने दिख्खेया कि असा री कमाई री आस पर तां पाणी फिरी गेया, तां पौलुस ते सीलास जो पकड़ी करी बजार बिच अधिकारियां का धरीड़ी करी लेई गे

²⁰ ते तिन्हा जो सजा दैणे वालेयां का लेई जाई करी बोल्णा लग्गे, ए मणू यहूदी हिन ते असा रे सहरां बिच बड़ी कहला पाये करदे हिन

²¹ ए इदेय रीति रवाजां री वकालत करेया करदे हिन जिन्हा जो अपनाणा या तिन्हा जो मनणा असा रोम देस रे रैह्णे वाले लोक्कां तांइ ठीक नी है।

²² तां लोक्कां री भीड़ पौलुस ते सीलास रे खिलाफ इकठ्ठे होई करी तिन्हा पर हमला करणा लग्गे, ते सजा दैणे वालेयां ने तिन्हेरे कपड़े फाड़ी करी खोली दित्ते, ते तिन्हा जो बेंत मारणे रा हुकम दित्तेया

²³ ते बड़े बेंत मारी करी तिन्हा जो जेल बिच पाई दित्तेया, ते जेल रे अधिकारी जो हुकम दित्तेया कि इन्हा जो कड़ी निगरानी बिच रखण

²⁴ ते तिन्हा ने हुकम रे मुताबिक तिन्हा जो जेल री अन्दरिली कोठरी बिच पाई दित्तेया ते तिन्हेरे पैरा लक्कड़ री बेड़ियां कन्ने बन्नी दित्ते।

पौलुस ते सीलास री जेल का अजादी

²⁵ अद्दी रात्ती रे करीब पौलुस ते सीलास परमेश्वर रे भजन गान्दे ते प्रार्थना करेया करदे थिये, ते दूज्जे कैदी तिन्हा जो सूणेया करदे थिये

²⁶ कि इतणे बिच इक्क हिलण गेया ते तिन्ने जेल री नियां तक हिलाई सूटी, अते झट ही जेल रे सारे दुआर खुली गे, ते सब री बेड़ियां खुली गई

²⁷ अते जेल रा अधिकारी जागी होया, ते जेल रे दुआर खुल्ले दिख्खी करी से समजेया कि कैदी नस्सी गे, तां तिन्ने तलवार कड्डी करी अप्पु जो मारणा चाया

²⁸ पर पौलुस ने जोरे सणे बोल्लेया, अप्पु जो कोई नुक्सान मत दे, किजोकी असी सब इत्ते हिन

²⁹ तां तिस जेल रे अधिकारी ने मशाल मंगवाई ते अन्दर चली गेया, ते कंमदा-कंमदा पौलुस ते सीलास रे पैरा पेई गेया

³⁰ ते तिन्हा जो बाहर लियाई करी बोलणा लग्गेया, ओ महान मणूओं, छुटकारा पाणे तांइ मैं कै करां?

³¹ तिन्हा ने बोल्लेया, प्रभु यीशु पर विश्वास कर, तां तू ते तेरे परिवार ने छुटकारा पाणा

³² ते तिन्हा ने तिसजो, ते तिसेरे सारे घरेतां जो प्रभु रा वचन सुणाया

³³ फिरी जेल रा से अधिकारी तिस्सी रात ते तिस्सी बेल्ले तिन्हा जो तित्ते का लेई गेया तिसने तिन्हेरे जख्म धोये, ते तिसने अपणे घरेतां समेत बपतिस्मा लित्तेया

³⁴ फिरी से पौलुस ते सीलास जो अपणे घरे लेई गेया ते तिन्हा जो रोट्टी खुआई ते सारे घरेतां जो परमेश्वर पर विश्वास करणे री वजह कने खुसी होई।

³⁵ जां भ्याग होई तां सजा दैणे वालेयां ने अपणे सिपाहियां जो तित्ते भेज्जेया कि तिन्हा जो छड्डी दित्तेया जाण

³⁶ फिरी जेल रे अधिकारी ने ए गल्लां पौलुस जो दस्सी कि सजा दैणे वालेयां ने तुसा जो छड्डी दैणे तांइ भेज्जेया है इधेरे तांइ अवे तुसा बाहर आई जाओ ते सांती कने चली जाओ।

³⁷ पर पौलुस ने तिन्हा सपाह्ईया जो बोल्लेया, तिन्हा ने असा जो जे रोम देस रे मणू हिन, बगैर कसुरवार ठहराये, मणूआं रे सामणे मारेया, ते जेल बिच पाई दित्तेया, तां कै अवे चुपचाणे असा जो भेजणा चाह्‍ंदे हिन? पर इय्यां नी होणा, हुणा तां इय्यां चाएदा की से अप्पु आई करी असा जो बाहर लेई जाण।

³⁸ सिपाहियां ने ए गल्लां सजा दैणे वालेयां जो बोल्ली दित्ती, ते से सुणी करी कि से रोम देस रे मणू हिन, से डरी गेया।

³⁹ ते आई करी से तिन्हा का माफी मंगणा लग्गे, ते बाहर लेई जाई करी छन्दे कित्ते कि से चली जाण।

⁴⁰ पौलुस ते सीलास जेल रे बाहर निकली करी लीदिया रे घरे पूज्जे ते संगी विश्वासियां कने मिल्ले ते पौलुस ते सीलास ने तिन्हेरा होंसला बद्धाया ते तित्ते का चली गे।