प्रेरितां रे कम्म 15 - चम्बयाली नौआ नियम

यरुशलेम सहर बिच इक्क जरुरी फैसला लैणा यरुशलेम सहर री सभा

¹ फिरी किच्‍छ मणू यहूदियां प्रदेश का आई करी संगी विश्वासियां जो सखाणे लग्गे कि मूसा रे कानून रे हिसाब कने तुसा रा खतना नी हो तां तुसा छुटकारा नी पाई सकदे।

² जां पौलुस ते बरनबास रा तिन्हा कने मिलणे तांइ यरुशलेम सहर बिच आए तां तिन्हा कने बड़ी बैहस-बाजी होई, ते ए फैसला कित्ता कि पौलुस ते बरनबास, ते असा बिच का किच्‍छ मणू इस गल्ल रे बारे बिच यरुशलेम सहर बिच रैह्णे वाले खास प्रेरितां का ते बुजुर्ग मणू का जाण।

³ तां सारी कलीसिया ने पौलुस ते बरनबास जो किच्‍छ पैसे जमा करी के दित्ते ताकि से थोड़ी दुर तिकर जाई सकण, ते से फीनीके ते सामरिया प्रदेशां का हुन्दे गैर यहूदी लोक्कां जो पाप का तौबा करणे रा सुब बसेख सुणादे गे, ते सब संगी विश्वासी जो बड़ा खुस कित्तेया।

⁴ जां पौलुस ते बरनबास यरुशलेम सहर बिच पूज्जे, तां कलीसिया ते खास प्रेरितां ते बुजुर्ग मणू तिन्हा कने खुसी कने मिल्ले, ते तिन्हा ने दस्सेया कि परमेश्वर ने तिन्हा कने होई करी कदेय-कदेय कम्म कित्ते थिये

⁵ पर फरीसियां रे दल रे किच्‍छ लोक्कां ने उठी करी बोल्लेया, कि गैर यहूदियां जो खतना ते मूसा रे कानून जो मनणे रा हुकम दैणा चाएदा।

⁶ तां खास प्रेरित ते बुजुर्ग मणू इस गल्ल रे बारे सोच-विचार करणे तांइ कठ्ठी गे

⁷ तां पतरस ने बड़ी बैह्स-बाजी रे बाद खड़े होई करी तिन्हा जो बोल्लेया, ओ भाईयों तुसा जाणदे कि बड़े रोज होये, कि परमेश्वर ने तुसा बिच का मेरे जो चुणी लेरा है, कि मेरे जरिए गैर यहूदी लोक्कां जो सुब बसेख सूणाई करी तिन्हा जो विश्वास पर लियाऊँ।

⁸ ते मन जो परखणे वाले परमेश्वर ने तिन्हा जो भी असा सांई पवित्रात्मा देई करी तिन्हा जो अपणाई लित्ता।

⁹ ते विश्वास रे जरिए तिन्हेरे मन सुच्चे करी के असा बिच ते तिन्हेरे बिच कोई भेद-भाव रख्खेया

¹⁰ तां अवे तुसा किजो चेल्‍लेयां पर बेमतलब जरुरतां रा बोझ पाई करी परमेश्वर जो परखेया करदे हिन, जिस जो कि न असा रे पित्र चुक्की सके थिये ते ना असा चुक्की सकदे,

¹¹ इय्यां करणा सही नी है। असा रा ए मनणा है कि जिय्यां तिन्हा ने मसीह यीशु रे अनुग्रह कने छुटकारा पाणा, तिस्सी तरिक्के कने असी भी पाणा।

¹² तां सारी सभा चुपचाप होई करी बरनबास ते पौलुस री सुनणे लग्गे, कि परमेश्वर ने तिन्हेरे जरिए गैर यहूदियां रे मणूआं बिच कदेइ-कदेइ निशानियां, ते अनौखे कम्म दिख्खाये

¹³ जां से बोल्ली बैठ्ठे, तां याकूब बोलणे लग्गेया, ओ भाईयों, मेरी सुणो,

¹⁴ शमौन ने जिस जो पतरस भी बोलदे असा जो समजाया कि परमेश्वर ने गैर यहूदी लोक्कां पर कदेइ कृपा कित्ते री है कि तिन्हा बिच का किच्‍छ जो अपणे तांइ चुणी लित्तेया।

¹⁵ ते गैर यहूदियां रे परमेश्वर रे पास्से फिरणे रे बारे बिच भविष्यद्वक्ता ने पवित्रशास्त्र बिच लिख्खे रा है:

¹⁶ इसेरे बाद मैं फिरी आई करी दाऊद रे गिरे रे तम्बू जो फिरी खड़ा करणा, ते खंडरा जो फिरी बनाणा, ते तिन्हा जो खड़ा करणा।

¹⁷ इधेरे तांइ जे बचे रे लोक, मतलब अवे सारे गैर यहूदियां जो जे मेरे हिन, प्रभु जो तोपण।

¹⁸ ए ओई प्रभु बोल्दे हिन जे दुनिया री सुरुआत का ही इन्हा गल्लां रा सुब बसेख दिंदे आये रे हिन

¹⁹ इधेरे तांइ मेरा विचार ए है, कि गैर यहूदियां बिच का जे मणू परमेश्वर रे पास्से आई जांदे, असा तिन्हा पर जोर ना पाण कि से यहूदी रीति रीवाज रे हिसाब कने चले।

²⁰ पर तिन्हा जो चीठ्ठी लिख्खी भेज्जो, कि से मूर्तां जो चढ़ाई री रोट्टी तुसा जो नी लैणी चाएदी ते व्यभिचार का बची रैह्ण गला घोटी करी मारे रे जानवर रा मांस ना खाण ते खून जो कदी ना खाण,

²¹ किजोकी पुराणे बेल्ले का सहर-शहर मूसा रे कानून रा प्रचार करणे वाले चली आया करदे हिन, मूसा रे कानून हर विश्राम दिन सभास्थल बिच पढ़े जांदे हिन।

गैर-यहूदी विश्वासियां जो चीठ्ठी

²² जां यरुशलेम री सारी कलीसिया समेत खास प्रेरित ते बुजुर्ग मणू जो खरा लग्गेया, कि अपणे बिच का केई मणूआं जो चुनण, मतलब यहूदा जिस जो कि बरसब्बास भी बोल्दे, ते सीलास जो जे कि विश्वासियां बिच बड़े इज्जतदार भी थिये, ते तिन्हा पौलुस ते बरनबास रे कन्ने अन्ताकिया सहर री कलीसिया का भेज्जेया।

²³ ते तिन्हेरे हत्थां ए चीठ्ठी लिख्खी भेज्जी, कि अन्ताकिया सहर ते सीरिया ते किलिकिया प्रदेश बिच रैह्णे वाले भाईयां जो जे कि गैर यहूदियां रे हिन, खास प्रेरितां ते बुजुर्ग लोक्कां रा नमस्कार।

²⁴ असा ने सूणेया, कि असा बिच का कितणेयां ने जाई करी, तुसा जो अपणी गल्लां कने डराई दित्तेया, ते तुसा रे मन बदली दित्ते पर असा ने तिन्हा जो हुकम नी दित्तेया थिया

²⁵ इधेरे तांइ असा ने इक्क मन होई करी ठीक समजेया, कि असा रे चुणे रे प्यारे बरनबास ते पौलुस जो तुसा का भेज्जन।

²⁶ ए तां मणू हिन, जिन्हा ने अपणे प्राण असा रे प्रभु मसीह यीशु तांइ मुस्किल बिच पाये रे हिन।

²⁷ ते असा ने यहूदा ते सीलास जो भेज्जेया, ताकि से अप्पु तुसा जो ए सब गल्लां बोल्ली देंन।

²⁸ पवित्रात्मा जो, ते असा जो ठीक लग्गेया, कि इन्हा जरुरी गल्लां जो छड्डी, तुसा पर होर कोई बोझ ना पाण,

²⁹ कि तुसा मूर्तां जो भेंट कित्ते री रोट्टी तुसा जो नी लैणी चाएदी ते व्यभिचार का बची रेंन गला घोटी करी मारे रे जानवर रा मांस ना खाण ते खून जो कदी ना खाण। इन्हा सबका दुर रेयो तां तुसा रा भला होणा, अग्गे बिदा।

³⁰ फिरी से बिदा होई करी अन्ताकिया सहर पूज्जे, ते सभा इकट्ठा करी के से चीठ्ठी तिन्हा जो देई दित्ती

³¹ ते से पढ़ी करी तिस उपदेस री गल्लां का बड़े खुस होये

³² ते यहूदा ते सीलास ने जे खुद भी भविष्वाणी करणे वाले थिये, बड़ी गल्लां कने विश्वासियां जो उपदेस देई करी मजबूत कित्तेया।

³³ यहूदा जिस जो बरसब्बास रे नां कने भी जाणेया जांदा थिया ते सीलास ने विश्वासियां कने किच्‍छ रोज सांती कने रैह्णा चाएया, पर यहूदा जिस जो बरसब्बास रे नां कने भी जाणेया जांदा से तित्ते का हटी गेया,

³⁴ (पर सीलास जो तित्ते रैह्णा खरा लग्गेया।)

³⁵ ते पौलुस अते बरनबास अन्ताकिया बिच रुकी गे, ते बड़े होर मणूआं कने प्रभु यीशु रे वचन री उपदेस ते सुब बसेख सुणादे रे।

सुब-बसेख रे प्रचार तांइ प्रेरित पौलुस रा दूज्जा सफर पौलुस री दुई प्रचार-यात्रा पौलुस ते बरनबास बिच मतभेद

³⁶ किच्‍छ रोज्जां बाद पौलुस ने बरनबास जो बोल्लेया, कि जिन्हा-जिन्हा सहरां बिच असा ने प्रभु रा वचन सुणाया थिया, चलो, फिर तित्ते जाई करी अपणे विश्वासियां जो दिख्खदे, कि कदेय हिन।

³⁷ ते बरनबास ने यूहन्ना जो जिस जो कि मरकुस भी बोल्दे, कन्ने लैणे रे बारे अन्दर सोच्चेया।

³⁸ पर पौलुस ने तिसजो जे कि पंफूलिया प्रदेश बिच तिन्हा का बखरे होई गे थिये, ते कम्म पर तिन्हा कने नी गे थिये, कने लेई जाणा ठीक नी समजेया

³⁹ तां पौलुस ते बरनबास इक्क दूज्जे रे खिलाफ होई गे, ते इक्क दूज्जे का बखरे होई गे ते बरनबास, ते मरकुस जो लेई करी जहाज पर साइप्रस टापू जो चली गेया।

⁴⁰ पर पौलुस ने सीलास जो चुणी लेया, ते विश्वासियां का परमेश्वर री अनुग्रह पर सौंपी दित्तेया ते अन्ताकिया सहर का चली गेया।

⁴¹ ते से सीरिया ते किलिकिया प्रदेशां का हुन्दे होये कलीसिया रे लोक्कां जो मजबूत करदे होए निकली गेया।