2 तीमुथियुस 3 - चम्बयाली नौआ नियम

आखरी दिनां बिच मणू कदेय तराह् रे मणू होणे आखरी दिनां री चितौणी

¹ ओ तीमुथियुस, अवे जे मैं तेरे जो दसणा तिस पर ध्यान दे आखरी समय बिच मुसीबतां रा समय होणा,

² किजोकी तिस समय बिच लोक्कां ने सिर्फ अपणी ही परवाह करणी, तिन्हा ने लालची, बुड़कां मारणे वाले, घमंडी, बेजती करणे वाले, मां-प्यो री गल्लां री ना-फरमानी करणे वाले, एहसान फरामोश, अपवित्र

³ बेरहम, दूज्जेयां जो माफ ना करणे वाले, दूज्जेयां री गलतियां कडणे वाले, अपणी शरीरी इच्छा पर काबू ना रखणे वाले, मार-कुटाई करणे वाले, भलाई रे कम्मां रे दुश्मण,

⁴ धोखेबाज, ढीठ, अकड़बाज, ते परमेश्वर रे का जादा शरीरी सुख जो चाह्‍णे वाले मणू होणे।

⁵ तिन्हा ने परमेश्वर रे भक्त होणे रा ढोंग ता करणा पर तिन्हा ने परमेश्वर री ताकत जो तिन्हा जो सुधारणे नी दैणा। इदेय लोक्कां का दुर रेयो।

⁶ इन्हा बिच का किच्‍छ मणू ता लोक्कां रे घरे अंदर बड़ी करी तित्ते री तिन्हा मुर्ख जनानियां जो अपणे काबू बिच करी लिंदे जिन्हेरा दिल तिन्हेरे पाप्पां रे बोझ रे हेठ दबित्ते रे हुंदे ते जे अपणे सरीर री बुरी इच्छा रे वस बिच हुंदी।

⁷ से हमेसा बखरी चीजां सिखदी रेह्न्दी पर तिन्हा ने कदी भी मसीह रे सच्ची शिक्षां जो नी समजी सकणा।

⁸ ए झूठ्ठे शिक्षक मसीह रे सच्चाई रे बसेख रा प्रचार होणे का तिय्यां ही रोकदे हिन जिय्यां यान्नेस ते याम्ब्रेस मूसा रे खिलाफ थिये। तिन्हेरे दिल दुष्ट हिन ते से मणू मसीह यीशु बिच बिल्कुल भी विश्वास नी करदे।

⁹ तिन्हा ने जादा समय तिकर लोक्कां जो बेवकूफ नी बणाई सकणा किजोकी जिय्यां ही लोक्कां ने ए समजी लित्तेया थिया कि यान्नेस ते याम्ब्रेस मुर्ख थिये, तिय्यां ही तिन्हा ने ए समजी जाणा कि ए मणू भी मुर्ख हिन।

भरोस्सेमंद बणदे रैह्णा तिमुथिययुस जो खास सलाह

¹⁰ पर तीमुथियुस तू साफ तौर पर जाणदा कि मैं कै सिखांदा ते मैं जिन्दगी किय्यां जिन्दा, ते मेरा मकसद कै है ते मैं कुस पर विश्वास करदा। तू जाणदा कि मैं सारे जणेया कने बड़ा सबर ते प्यार रख्खेया, मैं मुसीबतां भी सहन कित्ती, लोक्कां ने मेरे पर जुल्म भी कित्ते।

¹¹ तू जाणदा कि लोक्कां ने अन्ताकिया रे कस्बे बिच मेरे कने कदेइ-कदेइ ड्रौणी चीजां कित्ती, इकुनियुम लुस्त्रा ते मैं किय्यां लोक्कां रे जुल्म सैह्‍ण कित्ते।

¹² हर इक्क तिस मणू पर जुल्म कित्तेया जाणा जिनिये से कम्म करणे री कोसीस करणी जिस कने परमेश्वर खुस हुंदे ते जे मसीह यीशु बिच विश्वास करदा।

¹³ पर दुष्ट ते धोख्खेबाज लोक्कां ने होर भी जादा बुरे कम्म करणे। तिन्हा ने लोक्कां जो धोख्खा दैणा ते तिन्हा ने अप्पु भी लोक्कां धोख्खा खाणा।

¹⁴ पर ओ तीमुथियुस तू तिस शिक्षा जो पकड़ी रे जे तिज्जो सिखाए गे री है ते जिस बिच तू विश्वास करदा, आखिरकार तू जाणदा कि कुसने तेरे जो से सिखाए री हिन।

¹⁵ तू बचपन का ही पवित्रशास्त्र बिच लिख्खे री गल्लां जो जाणदा, जे तेरे जो समझ देई सकदे कि तू मसीह बिच विश्वास करे ते छुटकारा पाए।

¹⁶ पवित्रशास्त्र बिच लिख्खे री हर इक्क गल्ल परमेश्वर रे पास्से का है, से लोक्कां जो सिखाणे, तिन्हा जो सही ते गलत रे बारे बिच दसणे, तिन्हेरी गलतियां सुधारणे ते तिन्हा जो सही कम्म करणे री शिक्षां दैणे बिच असा रे मददगार हिन।

¹⁷ ताकि परमेश्वर रा मणू सिद्व बणे ते हर इक्क खरा कम्म करणे तांइ तैयार ते उत्सुक रे।