2 तीमुथियुस 2 - चम्बयाली नौआ नियममसीह तांइ कियां इक्क खरा सिपाई बणना सबका अच्छा सपाई 1 इधेरे तांइ ओ मेरे पुत्तर तीमुथियुस, होंसला रख, किजोकी तू जाणदा कि परमेश्वर ने तेरे जो से अनुग्रह दित्ते रा है जे सिर्फ मसीह कने रिस्ता बणाणे रे जरिये मिलदी। 2 तुसा ने मते लोक्कां सामणे मेरे का मसीह रे बसेख रे बारे बिच सुणे रा है। इधेरे तांइ मैं चाह्ंदा कि तुसा भी तिस ही बसेख री शिक्षा तिन्हा भरोस्सेमंद विश्वासियां जो देयो जे होर लोक्कां जो सिखाणे रे काबिल हिन। 3 काफी हद तिकर जिय्यां इक्क सिपाई लड़ाई रे मैदान बिच मुस्किल हालात रा सामणा करदा, तिय्यां ही तुसा जो भी मुस्किल हालात रा सामणा करणा चाएदा जिय्यां असी मसीह तांइ मुसीबतां सैह्ण करेया करदे हिन। 4 इक्क सिपाई जे सैना बिच कम्म करदा से आम मणूआं सांई होर कम्मां बिच नी उलझदा, किजोकी से अपणे अफसर जो खुस करणा चाह्ंदा। 5 फिरी, जे अगर कोई मणू कुश्ति बिच लड़े, पर कुश्ति रे नियमां जो ना मन्ने तां तिसजो ईनाम नी मिलणा। 6 फसल रे पैल्ले हिस्से रा हकदार भी से किसान ही है जिनिये तिसजो बाणे बिच मैहनत कित्ते री है। 7 अवे सोच्चो कि ए सारे उदारण कै सिखांदे, ते प्रभु ने तुसा जो ए सारी गल्लां समजणे बिच मदद करणी। 8 मसीह यीशु पर ध्यान लाई रख्खो, से दाऊद रे खानदान का जम्मे, जिन्हा जो परमेश्वर ने तिन्हा जो मरे रे लोक्कां बिच का फिरी जिन्दा करी दित्तेया, ते मैं ए ही सुब बसेख सुणांदा। 9 मैं मुजरिमां सांई तकलिफां सहन करेया करदा है किजोकी मैं सुब बसेख रा प्रचार करदा, इत्ते तिकर मैं कैद बिच भी पाया गे रा है, पर परमेश्वर रे बसेख जो फैलणे का कोई नी रोक्की सकदा। 10 इधेरे तांइ मैं परमेश्वर रे चुणे रे लोक्कां री भलाई तिकर हर तरिक्के रे दुख-तकलीफ जो सहन करी लिंदा, ताकि से मणू भी मसीह यीशु बिच विश्वास करण ते छुटकारा पाण, ते तिस महिमा जो हासिल करण जे हमेसा-हमेसा तांइ रैह्णी। 11 ए गल्ल सच्ची ते भरोस्सेमंद है कि जे अगर असी मसीह कने मरी गेरे हिन, तां असी तिन्हा कने जिन्दे भी होई जाणा। 12 जे अगर असी मसीह तांइ सबर कने सहन करदे रैह्ंगे, तां असी तिन्हा कने राज भी करणा, पर जे अगर असी तिन्हेरा इन्कार करगे, तां तिन्हा ने भी असा रा इन्कार करणा। 13 भले ही अगर असी मसीह कने भरोस्सेमंद बणी करी नी रैह्न्दे तां भी मसीह ने असा कने भरोस्सेमंद रैह्णा, किजोकी से अपणे असली स्वभाव रे उलट कम्म नी करी सकदे। सबका खरा कारिगर 14 विश्वासियां जो लगातार इन्हा गल्लां री शिक्षा दे, ते प्रभु जो गवाह मन्नी करी तिन्हा लोक्कां जो चिताइ दे कि से शब्दां रे मतलबां पर बैह्सबाजी ना करेया करण जिस कने कोई फायदा नी हुंदा, बल्कि तिन्हा जो सुनणे के विश्वासियां रे विश्वास कमजोर होई जांदा। 15 जिन्नी जादा होई सके तुसा उन्नी जादा मैहनत करो ताकि परमेश्वर तुसा जो तिन्हेरे इदेय कम्म करणे वाले मणू रे रुप बिच पसंद करी सके जे तिन्हेरे कम्म का शर्मिंदा ना हुंदा हो ते जे सही तरिक्के कने तिन्हेरे सच्चाई रे बसेख जो सुणांदा हो। 16 पर अभक्त ते खोखली चीजां रे बारे बिच गल्ल-बात करणे का टलो, किजोकी जे मणू इदेइ अभक्ति वाली चीजां री गल्ल-बात करणे शामिल हुंदे से अप्पु भी अभक्त बणी जांदे। 17 तिन्हेरे बसेख ने फैलदे जाणा ते लोक्कां रे विश्वास जो नुक्सान पूजाणा, जिय्यां इक्क खुले रा जख्म फैलदा ते कुसकी मणू जो संक्रमित करदा। हुमिनयुस ते फिलेतुस इदेय लोक्कां बिच का ही हिन। 18 तिन्हा ने सच्चाई बिच विश्वास करणा छड्डी दित्ते रा है। से बोलदे कि परमेश्वर ने विश्वासी लोक्कां जो हमेसा री जिन्दगी तांइ मुर्देयां बिच का फिरी जिन्दा करी दित्ते रा है। इसेरे नतीज्जे रे तौर पर से मते विश्वासियां जो ए सिखाया करदे हिन कि से मसीह यीशु री शिक्षां जो मनणा छड्डी दैण। 19 तां भी परमेश्वर रे लोक्कां रा विश्वास कुसकी घरे री नीं सांई मजबूत है जे बिल्कुल भी हिलदी नी। तिस नीं पर ए गल्लां लिखित्ते री हिन, “परमेश्वर जाणदे कि तिन्हेरे मणू कुण हिन” ते ए भी “जे मणू परमेश्वर री अराधना करदे तिन्हा जो बुराई करणा छड्डी दैणा चाएदा।” 20 बड्डे घरां बिच सोन्ने-चाँदी रे बर्तन हुंदे, किच्छ भांडे खास अवसर तांइ इस्तेमाल हुंदे ते किच्छ भांडे आम कम्मां तांइ इस्तेमाल हुंदे। 21 तिय्यां ही जे अगर कोई विश्वासी मणू अप्पु जो हर तरिक्के री बुराई का बखरा करगा, तां तिसने तिस भांडे सांई ठैहरणा जे खास अवसर पर इस्तेमाल होणे तांइ ठैहराए गे रा है, जिस विश्वासी मणू री जिन्दगी पवित्र होणी तिसने अपणे मालिक तांइ बड़े कम्मे रा होणा। 22 इधेरे तांइ जुआन्नी री बुरी इच्छा का दुर रेयो ते जे मणू प्रभु रा नां लिंदे रैह्न्दे तिन्हा मणूआं कने धार्मिकता, ते विश्वास, ते प्यार ते मेल जोल री कोसीस बिच रेयो। 23 पर बेकार री गल्लां रे बारे बिच बैह्सबाजी करणे का दुर रेयो, किजोकी तू जाणदा तिन्हेरा नतीज्जा सिर्फ लड़ाई-झगड़ा ही हुंदा। 24 प्रभु रे सेवादार रे होणे रे नात्ते तुसा जो झगड़ालू नी होणा चाएदा, पर सारे लोक्कां कने नरमदिल ते साफ-तौर पर परमेश्वर रा बसेख सुनाणे बिच काबिल होणा चाएदा ते लोक्कां कने सबर कने रैह्णा आणा चाएदा। 25 ते तिसजो तिन्हा लोक्कां जो बड़ी नरमदिली कने समझाणा चाएदा जे तिसेरे खिलाफ हिन, मुमकिन है कि परमेश्वर तिन्हा जो अपणा मन बदलणे बिच मदद करे ताकि से मणू भी मसीह री सच्चाई जो जाणे। 26 ताकि से मणू भी चुकन्ने होई जाण ते शैतान रे चंगुल का छुड़की जाण, जिस ने तिन्हा जो अपणी मर्जी पूरी करवाणे तांइ धोख्खे बिच पाई रख्खे रा है। |
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.