2 थिस्सलुनीकियों 1 - चम्बयाली नौआ नियम

नमस्ते

¹ मैं पौलुस, सिलवानुस अते तीमुथियुस कने थिस्सलुनीकियों सहर री कलीसिया जो ए चीठ्ठी लिख्खेया करदा है जे पिता परमेश्वर ते मसीह यीशु रे मणू हिन।

² असी प्रार्थना करदे कि तुसा जो पिता परमेश्वर अते प्रभु यीशु मसीह रे पास्से का अनुग्रह अते सांती मिल्ले।

प्रभु री वापसी इंसाफ लेई करी आणा न्याय रे दिन

³ ओ संगी विश्वासियों, असा जो तुसा तांइ हमेसा परमेश्वर रा शुकर करणा चाएदा। इय्यां करणा ठीक है किजोकी तुसा मसीह बिच विश्वास करणे बिच होर जादा मजबूत होया करदे हिन ते तुसा बिच आपसी प्यार भी बदेया करदा है।

⁴ इधेरे तांइ असी अप्पु परमेश्वर री कलीसिया बिच संगी विश्वासियां सामणे तुसा पर गर्व करदे, हालांकि तुसा बड़े दुख ते मुसीबतां का गुजरे पर तुसा फिरी भी बड़े सबर कने सैहन्दे रे ते तुसा मसीह बिच विश्वास करणा नी छड्डेया।

⁵ तुसा परमेश्वर तांइ दुख-मुसीबतां सहन करेया करदे हिन ते ए तुसा जो तिन्हेरे राज बिच जाणे रे लायक बणांदा। ए इस गल्ल रा सबूत है कि परमेश्वर ने धार्मिकता कने तुसा रा हिसाब-किताब करणा।

⁶ किजोकी परमेश्वर हमेसा धार्मिकता कने हिसाब-किताब करदे, तिन्हा ने उन्हा मणूआं पर मुसीबतां पाणी जिन्हा ने तुसा जो मुसीबत बिच पाया।

⁷ किजोकी तुसा दुख-मुसीबतां सहन करेया करदे हिन इधेरे तांइ परमेश्वर ने तुसा ते असा जो अराम दैणा। ए सब किच्‍छ तां होणा जां मसीह यीशु ने अपणे ताकतवर स्वर्गदूतां कने धधकदी आग्ग सांई स्वर्ग का वापिस हटणा।

⁸ अते जे मणू परमेश्वर जो नक्कारदे ते जे असा रे प्रभु यीशु रे सुब बसेख जो नी मनदे तिन्हा जो सजा दित्ती जाणी

⁹ तिन्हा जो परमेश्वर का हमेसा तांइ अलग करी दित्तेया जाणा ते तिन्हा ने परमेश्वर री महिमामय ताकत रा अनुभव नी करी पाणा। परमेश्वर ने तिन्हा लोक्कां जो हमेसा री सजा दैणी।

¹⁰ ए सारी चीजां तिस बेल्ले होणी जां मसीह यीशु ने तिन्हा लोक्कां का महिमा ते आदरमान पाणे तांइ हटी आणा जे तिन्हा बिच विश्वास करदे ते जे तिन्हेरे अपणे मणू हिन। तुसा भी तिन्हा लोक्कां बिच होणा किजोकी तुसा तिस बसेख पर विश्वास कित्तेया जे असा ने तुसा जो दस्सेया थिया।

¹¹ इधेरे तांइ असी हमेसा तुसा तांइ प्रार्थना भी करदे कि परमेश्वर तुसा जो तैसी जिन्दगी जीणे रे लायक बनाण जे जीणे तांइ तिन्हा ने तुसा जो सद्दे रा है। ते से तुसा अपणी ताकत रे हिसाब कने चलाण ताकि तुसा रा हर इक्क खरा मकसद ते हर इक्क चीज तुसा विश्वास कने करदे से पूरा होई जाए।

¹² इय्यां करणे कने तुसा रे जरिये लोक्कां बिच असा रे प्रभु यीशु रा आदरमान होणा ते तुसा जो भी मसीह यीशु का आदरमान मिलणा। ए सारा किच्‍छ असा रे परमेश्वर ते प्रभु यीशु मसीह रे अनुग्रह कने होणा।