2 पतरस 3 - चम्बयाली नौआ नियम

प्रभु रा वापिस आणा पक्का है प्रभु रे आणे रा दिन

¹ ओ मेरे प्यारे दोस्तों, अवे ए दूज्जी चीठ्ठी है जे मैं तुसा जो लिख्खेया करदा है दोन्नां चीठ्ठियां बिच मैं तुसा जो से गल्लां याद कराई करी, जे तुसा ने पैल्ले का सिख्खे री हिन, तुसा जो सही तरिक्के कने सोचणे तांइ होंसला बंधाणे री कोसीस करेया करदा है।

² मैं ए इधेरे तांइ करेया करदा है किजोकी मैं चाह्‍ंदा कि तुसा से गल्लां याद करो जे परमेश्वर रे भविष्यद्वक्ता ते असा जो छुटकारा दैणे वाले असा रे प्रभु मसीह यीशु ने लम्बे समय पैल्ले बोल्ली थी, जे तुसा जो प्रेरितां ने भी सिखाई थी जे तुसा का आए थिये।

³ खासतौर पर तुसा इस गल्ल जो याद रख्खो कि आखरी दिनां बिच जां मसीह यीशु ने हटणा, किच्‍छ इदेय मणू होणे जिन्हा ने तुसा रा मजाक उडाणा किजोकी तुसा ए विश्वास करदे कि मसीह ने वापिस हटणा। तिन्हा ने अपणी आदतां रे हिसाब कने ही जीणा जिस कने से खुस हुंदे।

⁴ अते तिन्हा लोक्कां ने बोलणा, तिनिये वापिस हटणे रा वादा कित्तेया थिया, पर तिनिये झूठ बोल्लेया थिया। सुरुआत बिच जे मणू असा रे मुखिया थिये, से सारे अवे मरी गेरे हिन, पर हल्ले तिकर किच्‍छ भी नी बदलेया। हर चीज तिय्यां ही होया करदी है जिय्यां तिस बेल्ले हुंदी थी जां परमेश्वर ने दुनिया जो बणाया थिया।

⁵ तिन्हा ने जाणी-बुझी करी इस गल्ल जो नजरंदाज कित्तेया कि दुनिया जो बणाणे री सुरुआत बिच परमेश्वर रे सिर्फ बोलणे भर कने ही आसमान बणी गेया थिया। तिन्हेरे सिर्फ शब्द कने ही सुकी जमीन, पाणी का अलग होई गई ते तिन्हा ने जमीन जो पाणी का कड्डी करी अणेया।

⁶ परमेश्वर ने तिस्सी पाणी कने दुनिया जो बर्बाद करी दित्तेया जे तिस बेल्ले पाणी रे किनारे बसे रा थिया। तिन्हा इक्क बड्डी बरखा कित्ती जिस कने इक्क बड्डी बाढ़ कने सारी दुनिया री जींद्दी चीजां बर्बाद होई गई।

⁷ पर परमेश्वर अपणे हुकम कने अब्बे री जमीन ते आसमान जो बचाया करदे हिन, ताकि तिसजो बाद बिच आग्ग कने मुकाई सके। से तिन्हा जो तिस दिन रख्खेया करदे हिन जां तिन्हा ने तिन्हेरे हुकम री ना-फरमानी करणे वाले लोक्कां का हिसाब-किताब लैणा ते तिन्हा जो सजा दैणी।

⁸ पर प्यारे दोस्तों, जे गल्ल मैं अवे तुसा जो दसणे वाला ओ तिसजो नजरंदाज मत करदे, परमेश्वर इक्क दिन थोड़े समय रे तौर पर ते हजार साल्लां जो लम्बे समय रे तौर नी दिखदे। से दोन्नां जो इक्क ही रुप बिच दिखदे।

⁹ किच्‍छ मणू इय्यां सोचदे कि परमेश्वर अपणे वापिस हटणे रे वादे जो पूरा करणे बिच देर करेया करदे हिन। पर परमेश्वर तिस तरिक्के कने देर नी करेया करदे हिन। बल्कि से तुसा कने सबर कने रेया करदे हिन, किजोकी से कुसकी जो मुकाणा नी चाह्‍ंदे। पर से चाह्‍ंदे कि सारे अपणे मन जो बदली करी, गलत कम्म करणा छड्डी करी, तिन्हा का आए।

¹⁰ पर मसीह ने पक्के तौर पर वापिस हटणा। तिन्हा ने कुसकी रे सोच्चे बगैर ही हटणा, जिय्यां कि कोई चोर आंदा। तिस बेल्ले आसमान बिच गर्जणे जदेई अवाज होणी, ते आसमान गायब होई जाणा, सूरत, चाँद, ते सितारे आग्ग कने मुकाई दित्ते जाणे। तिस दिन, परमेश्वर ने से हर इक्क से चीज जाहिर करणी जे लोक्कां ने धरती पर कित्ते री हिन ताकि परमेश्वर तिन्हा का हिसाब-किताब लेई सके।

¹¹ ए गल्ल साफ है कि परमेश्वर ने सब किच्‍छ इय्यां ही तबाह करणा, तुसा जाणदे कि तुसा जो कदेया बोल-चाल रखणा चाएदा।

¹² जां तुसा बड़ी बेसबरी कने तिस दिन रा इंतजार करेया करदे हिन जे परमेश्वर ने मसीह रे हटणे तांइ रख्खे रा है तां तुसा इसी तरिक्के कने बोल-चाल बणाई रख्खो, ते तिस दिन जो तौले लाणे तांइ तुसा पूरी कोसीस करो। तिस दिन परमेश्वर ने आसमान जो आग्ग के मुकाई दैणा, ते आग्ग री गरमी ने आसमान री सब चीजां जो गलाई दैणा।

¹³ पर असी विश्वासी मणू नौए आसमान ते नौई धरती रा इंतजार करेया करदे हिन जिसेरा वादा परमेश्वर ने कित्ते रा है, जित्ते सारे जणेया ने परमेश्वर री मर्जी रे मुताबिक जीणा।

जागदे रेयो ते त्यार रेयो

¹⁴ इधेरे तांइ मेरे प्यारे दोस्तों, जां तुसा तिस दिन रा इंतजार करेया करदे हिन, तां तुसा जो अपणी पूरी कोसीस करणा जरुरी है कि से तुसा जो सुच्चा, बेदाग ते अप्पु कने सांती बिच पाए।

¹⁵ असा रे प्रभु रे सबर जो अपणे तांइ इक्क समझो, से तुसा जो तिन्हेरे हिसाब-किताब लैणे का बचणे रा मौक्का देया करदे हिन। ए ही गल्ल असा रा संगी विश्वासी पौलुस भी तुसा जो अपणी तिस समझ रे हिसाब कने चीठ्ठी बिच लिख्खी करी समजाया करदा है जे परमेश्वर ने तिसजो दित्ते री है।

¹⁶ अपणी हर चीठ्ठी बिच तिनिये तिस्सी तरिक्के री गल्लां दस्से री हिन असा ने तुसा जो चीठ्ठी बिच लिख्खी करी भेज्जी री हिन। पर किच्‍छ चीजां जे तिनिये अपणी चीठ्ठी बिच लिख्खी करी भेज्जी री हिन, तिन्हा जो समझणा मुस्किल है। जिन्हा ने ए गल्लां ठीक तरिक्के कने नी सिख्खे रे हिन, ते जिन्हा लोक्कां रा विश्वास डामाडोल है, से इन्हा गल्लां रा मतलब गलत तरिक्के कने सिखांदे, जिय्यां कि से पवित्रशास्त्र री बाकि री गल्लां रा मतलब गलत तरिक्के कने समझांदे। इय्यां करणे कने से परमेश्वर जो तिन्हा जो मुकाणे तांइ उकसांदे।

¹⁷ तुसा जो पैल्ले का पता है कि ए सब चीजां होणे वाली हिन। इधेरे तांइ चुकन्ने रेयो, किजोकी जे मणू कानूनां जो नी मनदे तिन्हा ने तुसा कने झूठ बोल्ली-बोल्ली करी तुसा जो भटकाई दैणा। तुसा ने तिस ही गल्ल पर शक करणा सुरु करी दैणा जिस पर तुसा इक्क समय पर पक्का विश्वास करदे थिये।

¹⁸ पर तुसा जो असा रे प्रभु ते छुटकारा दैणे वाले मसीह यीशु रे अनुग्रह रा होर भी जादा अनुभव करणा चाएदा, ते तिन्हा जो समजणे बिच होर भी जादा बधणा चाएदा। तिन्हा रा आदरमान अब्बे ते हमेसा-हमेसा तिकर हुंदा रे।