2 पतरस 2 - चम्बयाली नौआ नियम

झूठ्ठे भविष्यद्वक्ता अते सिखाणे वाले मणू झूठे शिक्षक

¹ जिय्यां कि बड़े पैल्ले झूठ्ठे भविष्यद्वक्तां उठे थिये, तिय्यां ही तुसा बिच झूठ्ठे शिक्षक उठणे। तिन्हा ने झूठ्ठी शिक्षा देया करणी जिसेरी वजह कने लोक्कां ने मसीह बिच विश्वास करणा छड्डी दैणा। इत्ते तिकर तिन्हा ने मसीह जो अपणा मालिक बणने का इन्कार करी दैणा जिन्हेरा तिन्हा लोक्कां पर हक है ते जिन्हा ने तिन्हा लोक्कां जो पाप रे काबू का अजाद कित्ते रा है। तिस्सी तरिक्के कने तिन्हा ने अप्पु जो चाणचक्के ही मुकाई दैणे री वजह बणना।

² परमेश्वर रे मते लोक्कां ने इन्हा झूठ्ठे शिक्षकां रे गलत कम्मां जो करणा, ते जे चीजां से मणू करदे, तिसेरी वजह कने लोक्कां ने सही रस्ते री बुराई करणी।

³ ए झूठ्ठे शिक्षक लालची होणे, ते तिन्हा ने तुसा का रुपया लैणे तांइ तुसा जो मनघड़ंत गल्लां सुनाणी। परमेश्वर ने बड़े पैल्ले ही इस गल्ल रा फैसला करी लित्तेया थिया तिन्हा ने इन्हा लोक्कां जो सजा दैणी ते से इय्यां करणे तांइ तैयार भी हिन। तिन्हा ने इन्हा लोक्कां जो यकिनन बर्बाद करी दैणा।

⁴ तुसा जाणदे कि जां बड़े लम्बे समय पैल्ले शैतान रे दूतां ने परमेश्वर रे हुकम री ना-फरमानी कित्ती थी, तां परमेश्वर तिन्हा जो तिन्हेरे कम्म तांइ सजा दित्ती थी। तिन्हा ने उन्हा सारेयां जो नरक बिच सूटी दित्तेया, ते तित्ते तिस दिन तिकर कैद करी रखणा जां तांइ से तिन्हा का हिसाब-किताब लेई सजा नी दिंदे।

⁵ तुसा ए भी जाणदे कि जां से मणू परमेश्वर का नी डरदे थिये, तां परमेश्वर ने तिन्हेरे बुरे कम्मां जो नजरअंदाज नी कित्तेया। बल्कि तिन्हा ने उन्हा लोक्कां जो सजा दित्ती ते पाणी भेज्जेया ताकि से सारे मुकी जाण। पर परमेश्वर ने नूह जो जिनिये परमेश्वर रे सामणे धार्मिक बणने रे बारे बिच प्रचार कित्तेया थिया तिसजो मिलाई करी तिन्हा आठ्ठ जणेया जो बचाई लित्तेया।

⁶ तुसा ए भी जाणदे कि परमेश्वर ने बड़े पैल्ले तिन्हा लोक्कां जो गुनेह्गार ठैहराया थिया जे सदोम अमोरा रे सहर बिच रैह्‍न्दे थिये ते जिन्हा ने गलत कम्म कित्ते रे थिये। इधेरे तांइ परमेश्वर ने तिन्हा जो पूरी तरिक्के कने फुक्की दित्तेया कि जां तांइ सिर्फ राख नी बची। इय्यां करणे कने, तिन्हा ने इस गल्ल जाहिर जो कित्तेया कि तिन्हा लोक्कां कने कै होणा जे तिन्हेरा डर नी मनदे।

⁷ पर तिन्हा ने सदोम सहर जो तबाह करणे का पैल्ले लूत जो तिस सहर का कढाइ करी तिसजो बचाया, जे इक्क खरा मणू थिया। लूत इस गल्ल कने बड़ा परेशान थिया किजोकी मणू परमेश्वर रे कानून रे मुताबिक नी चलदे थिये ते अश्लील चीजां करदे थिये।

⁸ से तिन्हा बुरे लोक्कां बिच रेया, ते तिनिये हर रोज तिन्हेरी बुरी चीजां दिख्खी ते गलत गल्लां सूणी, ते इन्हा सारी चीजां री वजह कने से बड़ा परेशान होया किजोकी से इक्क खरा मणू थिया।

⁹ ए सारी चीजां जे परमेश्वर ने पैल्ले रे जमान्ने बिच कित्ते री हिन, ए जाहिर करदी कि प्रभु परमेश्वर ने तिन्हा लोक्कां जो सुरक्षित रखणा जे मणू भक्ति कने भरे री जिन्दगी जिन्दे, ते इस कने ए भी जाहिर हुंदा कि परमेश्वर ने दुष्ट लोक्कां जो अपणे हिसाब-किताब करणे रे दिन तिकर सजा दिंदे रैह्णा।

¹⁰ परमेश्वर ने पक्के तौर पर तिन्हा झूठ्ठे शिक्षकां जो सजा दैणी जे मणू अपणी बुरी ते अश्लील इच्छां रे हिसाब कने चलदे ते परमेश्वर जो नक्कारदे। से मणू ढीठ ते घमंडी हिन। से मणू स्वर्ग बिच रैह्णे वाले महिमामय प्राणियां रे बारे बिच गलत गल्लां बोलणे का नी डरदे।

¹¹ पर फिरी भी स्वर्गदूत, जे इन्हा झूठ्ठे शिक्षकां का ताकत ते अधिकार बिच बड़े बड्डे हिन, से भी परमेश्वर रे सामणे इन्हा पर कोई इल्जाम नी लांदे।

¹² पर ए झूठ्ठे शिक्षक जंगली जानवरां सांई हिन। ए जानवर नी जाणदे कि किय्यां सोचणा चाएदा ते तिन्हेरी जिन्दगी मकसद सिर्फ पकड़ी करी मरणा ही है। ए मणू जे भी तिन्हेरे दिमाग बिच आंदा, से ही करदे, ते से तिस गल्ल रे बारे बिच भी गलत गल्लां बोलदे जिन्हा जो से समजदे नी। तिन्हा ने पक्के तौर पर बर्बाद होई जाणा।

¹³ तिन्हा ने जिन्ना नुक्सान कित्ते रा है, तिस तांइ तिन्हेरा ईनाम सिर्फ बर्बादी है। तिन्हा जो सरे-आम अपणी बुरी इच्छा जो पूरा करणा छैल लगदा। चाए से तुसा कने संगती बिच बेई करी रोट्टी ही किजो ना खाया करदे होण, तां भी तिन्हा जो धोख्खा दैणा पसंद है।

¹⁴ से जिस भी जनानी जो दिखदे तिस कने व्यभिचार ही करणा चाह्‍ंदे। से पाप करणे रे मौक्केयां जो तोपदे रैह्‍न्दे। जे मणू मसीह बिच विश्वास करणे अंदर मजबूत नी हिन, से मणू तिन्हा जो भटकाई करी तिन्हा का पाप करवांदे। तिन्हेरे जादा का जादा चीजां जो हासिल करणे रे तिन्हेरे लालच री वजह कने परमेश्वर ने तिन्हा जो सजा दैणी।

¹⁵ तिन्हा ने से कम्म करणा छड्डी दित्ते रा है जे सही है, ते तिन्हा ने से ही गलत कम्म करणा सुरु करी दित्ते रे हिन जे बड़े पैल्ले बओर रे मुंडे, बिलाम ने कित्ते थिये। तिसजो गलत कम्म करी के पैसे कमाणा पसंद थिया।

¹⁶ पर परमेश्वर ने बिलाम रे खोत्ते का गल्ल कराई करी बिलाम जो तिसेरे गलत कम्मां तांइ फटकार लुआई। हालांकि खोत्ते बोल्ली ता नी सकदे पर परमेश्वर ने खोत्ते का तिस बेल्ले गल्ल कराई जां बिलाम तिस पर बेई करी राज्जे का मिलणे तांइ जाया करदा थिया, ते तिसने तिस बेल्ले भविष्यद्वक्ता जो इक्क बेवकूफी वाला कम्म करणे का रोक्की लित्तेया।

¹⁷ ए झूठ्ठे भविष्यद्वक्ता बेकार रे कुएं सांई हिन जे सुकी गेरे हिन। से बरखा होणे का पैल्ले तिस धुंद सांई कुसकी कम्मे रे नी हिन जे हवा कने उड़ाई दित्ती जांदी। परमेश्वर ने तिन्हा तांइ इक्क इदेइ जगाह् तैयार कित्ते री है जे बिल्कुल ही न्याहरी है।

¹⁸ जां से लोक्कां जो सिखाणा लगदे, तां से बेकार ते घमंड कने भरपूर शब्दां रा इस्तेमाल करदे। से लोक्कां जो ए सिखांदे कि से अपणे सरीर री बेशर्मी भरी इच्छां जो पूरा करी सकदे। ते से लोक्कां जो पाप री से ही चीजां करणे बिच दुबारा भटकाई दिंदे जिस जो करणा तिन्हा ने हाल ही बिच छड्डे रा हुंदा।

¹⁹ ए झूठ्ठे शिक्षक लोक्कां जो ए सिखांदे कि से मणू जे करणा चाण, से करी सकदे। से मणू अप्पु भी अपणे रे पाप रे स्वभाव री वजह कने गुलाम्मां सांई हिन जे तिन्हा पर पाप करणे तांइ जोर पांदा। जे किच्‍छ भी तुसा जो चलांदा, तुसा तिसेरे ही गुलाम हिन।

²⁰ मणू जां मसीह जो अपणे प्रभु ते छुटकारा दैणे वाले रे रुप बिच जाणी जांदे, तां से दुनिया री दुष्टता का बची जांदे। पर अवे दुबारा से मणू गलत कम्म करणे बिच शामिल होई गेरे हीन ते से गलत कम्म अवे तिन्हा जो चलांदे। इधेरे तांइ मसीह जो नक्कारी दैणे का बाद तिन्हेरी अब्बे री हालत तिस समय का जादा बुरी है जां से मसीह जो नी जाणदे थिये।

²¹ मेरे बोलणे रा मतलब ए है कि परमेश्वर ने तिन्हा लोक्कां जो होर मणूआं का जादा सजा दैणी जिन्हा ने मसीह जो कदी अपणाया ही नी, तिन्हा लोक्कां तांइ ए ही खरा हुंदा कि से धार्मिक तरिक्के कने जिन्दगी जीणा नी सिखदे, किजोकी अवे से मणू जाणदे पर फिरी भी जाणी करी तिन्हा ने परमेश्वर रे हुकम जो नक्कारी दित्ते रा है जिस जो असी प्रेरित मणू तिन्हा जो सिखांदे।

²² जे तिन्हा कने होया से इस गल्ल जो जाहिर करदा कि नीतीवचन सच्चे हिन, “से मणू कूत्तेयां सांई हिन जे अपणी उल्टी जो चटणे तांइ हटी आंदे, ते से सूअरां सांई हिन जिस जो नुहाया गे रा हो पर फिरी से मिट्टी बिच रुलकणे लग्गी पैंदा।”